SAAN 1910 fan fɛ, n’ bangebagaw bɔra Tibilisi, Zɔrizi jamana na ka taga Kanada. U tun be si boon dennin dɔ kɔnɔ foro la, Peli gɛrɛfɛ, Sakacewan dugu la. O dugu be Kanada tileben fan fɛ. N’ wolola saan 1928 la. N’ bangebagaw ye deen wɔɔrɔ lo sɔrɔ, ne lo ye laban ye. Kalo wɔɔrɔ n’ wolonin kɔ, n’ facɛ sara ani n’ bamuso sara n’ denmisɛn tuma na. Dɔɔni o kɔ, n’ kɔrɔmusoba Lucy fana sara. A tun be ni saan 17 ye. O kɔ, an belencɛ Nick ye ne ni n’ kɔrɔw ladon.

N’ denmisɛn tuma na, loon dɔ, n’ tun b’an ka soo dɔ kukala samana. N’ somɔgɔw tun be siranna a kana n’ tan. U kulera n’ kan ko n’ k’a dabila, nka, n’ bele tun b’a samana. N’ tun ye n’ kɔɔ d’u ma ani n’ tun tɛ u kulekan mɛnna. N’ kunnadiyara soo ma n’ mandimi. Nka o loon le la, n’ somɔgɔw y’a faamu ko n’ ye tulogweren ye.

An somɔgɔw teri dɔ y’a fɔ k’u ka taga ni n’ ye tulogwerenw ka lakɔli la. O kosɔn, n’ belencɛ ye n’ tɔgɔ sɛbɛ tulogwerenw ka lakɔli la, Saskatun, Sakacewan dugu la. O lakɔli yɔrɔ tun ka jan n’an ka soo ye. N’ tun ka ɲi ka lɛri damanin kɛ ka sɔrɔ ka se yen. O tun be siranya bila n’ na sabu n’ tun be ni saan wɔɔrɔ dɔrɔn lo ye. N’ tun be se ka taga n’ somɔgɔw fɛ kɔnzew ani vakansiw dɔrɔn lo la. N’ ye bobow kumacogo degi ani n’ ninsɔndiyara ka tulon kɛ ni deen tɔɔw ye.

Saan 1939 la, n’ kɔrɔmuso filanan, Marion furula ni Bill Danylchuck ye. O kɔ, u ye ne ni n’ kɔrɔmuso Frances ladon u ka soo. An ka somɔgɔw cɛma, olu lo kɔnna ka bibulukalan kɛ ni Jehova Seerew ye. Vakansi tuma na, u tun ye min faamu u ka bibulukalan sababu fɛ, u tun b’u seko bɛɛ kɛ ka n’ kalan o la. Tiɲɛn na, a tun man nɔgɔ n’ fɛ ka kuma n’u ye sabu u tun tɛ bobow ka kaan mɛn. Nka, u y’a kɔrɔsi ko Alakow ka di n’ ye kosɔbɛ. N’ y’a faamu k’u ka kɛwalew tun bɛnnin lo ni Bibulu ka fɔta ye. O kama, n’ tun be to ka taga n’u ye waajuli la. Dɔɔni o kɔ, n’ tun b’a fɛ ka batɛmu ta. Saan 1941, sɛtanburu tile 5nan na, Bill ye n’ batize minanba dɔ kɔnɔ. U tun y’o jii bi kɔlɔn na ani a tun sumanin lo yɛrɛ le!

Saan 1946 la, n’ segira soo vakansi tuma na. An tagara lajɛnba dɔ la Cleveland, Ohio mara la, Etazini. O lajɛnba tile fɔlɔ la, n’ kɔrɔmusow ye miiriya jɔnjɔnw sɛbɛ walisa ka n’ dɛmɛ ka kalanw faamu. Nka loon filanan na, n’ ninsɔndiyara kosɔbɛ k’a ye ko balima dɔ tun be kalanw bayɛlɛmana bobow ye. N’ ye nafa sɔrɔ kalanw na ani n’ ninsɔndiyara ka Bibulu ka kalanw faamu ka ɲɛ sisan!

O tuma na duniɲa ka kɛlɛba filanan tun banna a ma mɛɛn ani mɔgɔw tun b’a fɛ k’a yira k’u be kantigiya kɛ u ka jamana ye. Lajɛnba bannin kɔ, n’ tun jijanin lo ka kantigiya kɛ Jehova ye lakɔliso la. O kosɔn, n’ y’a dabila ka darapo fo ani ka faso fasa la bobow kumacogo la. N’ tun tɛ fɛtiw kɛ tugun ani n’ tun tɛ taga legilizi la tugun ni denmisɛn tɔɔw ye. O ma diya lakɔli ɲɛmɔgɔw ye. O kama, u y’a daminɛ ka n’ bagabaga ani ka ngalon tigɛ ka la n’ kan walisa ka n’ ka miiriya yɛlɛma. O kɛra mankan ye n’ ka lakɔli filankuruw cɛma, nka u ye sababu di n’ ma fana ka seereya kɛ. N’ ka lakɔli filankuru nunu kɛra Jehova batobagaw ye: Larry Androsoff, Norman Dittrick ani Emil Schneider. U be Jehova batora ni kantigiya ye hali bi.

N’ tun mana taga dugu wɛrɛw la, n’ tun be n’ jija ka seereya kɛ tulogwerenw ye. Ɲɛyirali fɛ, Mɔntereyal dugu la, tulogwerenw be lajɛn yɔrɔ min na, n’ tagara yen. N’ ye Eddie Tager waaju. Ale tun be bobow ka jɛnkulu dɔ kɔnɔ. Nka, a sara salon. Sanni a ka sa, a tun be tulogwerenw ka kafo dɔ kɔnɔ Laval dugu la, Kebɛk. N’ ye Juan Ardanez fana waaju. I n’a fɔ Berekaw, a tun be Bibulu sɛgɛsɛgɛ walisa k’a filɛ ni n’ ka kumaw tun basiginin lo Bibulu kan (Kɛw. 17:10, 11). Ale fana kɛra Jehova Seere ye. A ye Jehova bato kantigiya la ani a tun ye diinan mɔgɔkɔrɔ ye Otawa, Ɔntario mara la fɔɔ ka taga se a satuma ma.

Saan 1950 la, n’ yɛlɛmana Vankuvɛr dugu la. Hali n’a tun ka di n’ ye ka tulogwerenw waaju, koo dɔ kɛra n’ tɛ se ka ɲinɛ min kɔ. N’ ye seereya kɛ muso dɔ ye sirada la. A tɔgɔ ko Chris Spicer ani a tun tɛ tulogweren ye. A sɔnna ko an ka to ka zurunaliw ci a ma ani a ko a b’a fɛ ne n’a cɛɛ Gary ka ɲɔgɔn ye. O kosɔn, n’ tagara u ka soo ani an ye sɛbɛri kɛ papiye kan wagatijan kɔnɔ walisa ka se ka ɲɔgɔn faamu. Saan damanin o kɔ le an sɔrɔla ka ɲɔgɔn ye tugun lajɛnba dɔ la, Torɔnto, Ɔntario mara la. U nana n’ fo jama cɛma. O barila n’ na yɛrɛ le! Gary tun ka ɲi ka batize o loon yɛrɛ la. O koo y’a yira n’ na ko a kɔrɔtanin lo an ka to ka mɔgɔw waaju sabu an t’a lɔn min bena kɛ Jehova Seere ye.

O kɔ, n’ tagara Saskatun. N’ ye muso dɔ kunbɛn yen. Ale y’a fɔ ko n’ ka bibulukalan kɛ n’a ka filaninw ye: Jean ani Joan Rothenberger. U tun ye tulogwerenw ye. U tun be lakɔli min na, n’ tun ye kalan kɛ o lakɔli lo la. Dɔɔni o kɔ, o sungurunin fila tun ye min kalan, u tun b’o fɔ u ka lakɔli filankuruw ye. A laban, u ka lakɔli filankuru duuru kɛra Jehova Seerew ye. Eunice Colin tun ye u dɔ ye. N’ siɲɛ fɔlɔ ka Eunice ye, n’ tun be n’ ka klasi laban na. O tuma na, a ye bɔnbɔn kelen di n’ ma ani a ye n’ ɲininga ni n’ b’a fɛ an ka kɛ teriw ye. Kɔfɛ, n’ y’a furu ani a ye n’ dɛmɛ kosɔbɛ n’ ka ɲɛnamaya kɔnɔ!

Tuma min na Eunice bamuso bɔra a kala ma ko a be bibulukalan kɛra, a y’a fɔ lakɔli ɲɛmɔgɔ ye ko a ka banba Eunice be kalan dabila. Eunice tun be bibulukalan kɛ ni gafe minw ye, lakɔli ɲɛmɔgɔ y’u bɔsi. Nka Eunice tun jijanin lo ka Jehova batoli kɛ a ɲɛnako fɔlɔ ye. Tuma min na a tun b’a fɛ ka batize, a bangebagaw y’a fɔ a ye ko: “N’i kɛra Jehova Seere dɔ ye, i be bɔ an ka soo!” Eunice tun be ni saan 17 ye tuma min na a bɔra u ka soo. Jehova Seere dɔw y’a ladon u fɛ. A tora ka bibulukalan kɛ ani o kɔ, a ye batɛmu ta. An furula saan 1960 la. A bangebagaw ma na an ka furu la. Nka wagati dɔ nana se, u tun b’an bonya an ka lannakow ani an ka deenw lamɔcogo kosɔn.

An tun ye tulogwerenw ye. Nka, an ye dencɛ wolonfila sɔrɔ ani k’u lamɔ. U si tun tɛ tulogwerenw ye. O tun man nɔgɔ, nka, an banbara u ka bobow ka kumacogo lɔn. O la, an tun be se ka baro kɛ n’u ye ka ɲɛ ani k’u kalan tiɲɛn koo la. Kafo ka balimaw y’an dɛmɛ kosɔbɛ. Ɲɛyirali fɛ, loon dɔ, an dencɛ dɔ ye kuma nɔgɔninw fɔ kafo kɔnɔ ani bangebaga dɔ ye sɛbɛri kɛ papiye kan k’o fɔ an ye. An sinna k’o koo ɲɛnabɔ yɔrɔnin kelen. An dencɛ naani n’u musow ani u deenw be Jehova batora ni kantigiya ye: James, Jerry, Nicholas, ani Steven. U bɛɛ ye diinan mɔgɔkɔrɔw ye. Ka fara o kan, Nicholas n’a muso Deborah be dɛmɛ don k’an ka sɛbɛw bayɛlɛma bobow kumacogo la, Garande Beretaɲi Betɛli la. Steven n’a muso Shannan fana b’o lo kɛra Etazini ka Betɛli la.

Kansɛri bana ye Eunice faga. Kalo kelen lo tun tora an ka furu saan 40nan be dafa. Eunice ye jagwɛlɛya kɛ a ka bana wagati la. A tun lanin b’a la ko sukununi bena kɛ ani o y’a jija. A bena lakunu loon min na, n’ kɔrɔtɔnin lo o loon ka se.

Saan 2012, feburukalo la, n’ benna ka n’ kɔɔ kari ani n’ mako gwɛlɛ tun be dɛmɛ na. O kosɔn, n’ tagara to n’ dencɛ dɔ n’a muso fɛ. Sisan, an be kafo dɔ kɔnɔ Kalgari. Lajɛnw be kɛ yen bobow kumacogo la. N’ bele ye diinan mɔgɔkɔrɔ ye. N’ siɲɛ fɔlɔ lo ka kɛ kafo dɔ kɔnɔ min be lajɛnw kɛ bobow kumacogo la. Miiri k’a filɛ! Kabi saan 1946, n’ tun be kafo min kɔnɔ, angilikan lo tun be fɔ yen. Nka, n’ sera ka n’ ka limaniya sabati cogo di? Jehova lo ye n’ dɛmɛ. A ye layidu ta ko a bena a janto falatɔw la. A y’o layidu dafa n’ koo la (Zab. 10:14). Minw y’u seko kɛ ka sɛbɛri kɛ n’ ye, ka bobow kumacogo degi ani ka kalanw bayɛlɛma n’ ye, n’ b’olu bɛɛ waleɲuman lɔn u ka jijali kosɔn.

Tiɲɛn na, tuma dɔw la, n’ tun be dimi ani n’ fari tun be ɲini ka faga sabu min tun be fɔ lajɛnw na, n’ tun t’o faamu. A tun be n’ ɲɛɛ na ko mɔgɔw t’a lɔn u ka ɲi ka tulogwerenw dɛmɛ cogo min na. Nka o wagati la, Piyɛri ye min fɔ Yezu ye, n’ tun be miiri o la. A ko: “An bena taga jɔn fɛ? Mɔgɔ be nii [ ɲɛnamaya] banbali sɔrɔ ele ka kuma barika la.” (Zan 6:66-68). Balima caaman ye tulogwerenw ye ani u be Jehova batora kabi wagatijan. I n’a fɔ olu, n’ ye muɲuli kɛ. N’ ye n’ jigi la Jehova n’a ka ɔriganisasiyɔn kan ani n’ ye nafa caaman sɔrɔ o la. Sisan, an ka gafe caaman be sɔrɔ bobow kumacogo. N’ ninsɔndiyanin lo fana sabu n’ be se ka lajɛnw ani lajɛnbaw kɛ bobow kumacogo (ASL). Tiɲɛn na, ka baara kɛ Jehova Ala ye, o ye n’ ninsɔndiya ani n’ ye duga caaman sɔrɔ o la.