1. Ala sagokɛla caaman be mun lo miiri u yɛrɛ koo la jurumu kosɔn?

“NE YE sigɛnbagatɔ ye!” (Ɔrɔm. 7:24). Bi, Ala sagokɛla kantigi caaman fari faganin lo ani u dusu tiɲɛnin lo i ko ciden Pol. Mun na do? Sabu, an kelen kelen bɛɛ ye jurumu sɔrɔ cɛɛn ye ani an ye mɔgɔ dafabaliw ye. O kama, n’an tɛ sera k’an koo diya Jehova ye i ko an b’a fɛ cogo min na, an fari be se ka faga. Kerecɛn minw ye jurumuba kɛ, olu dɔw yɛrɛ be se k’a miiri ko Jehova tɛ se ka yafa olu ma abada!

2. a) Zaburuw 34:23 b’a yira cogo di ko Ala sagokɛlaw man kan ka to k’u yɛrɛ jalaki kojugu u ka jurumuw kosɔn? b) An bena mun lo lajɛ barokun nin na? (Koorilen nin lajɛ: “ An be kalanw lo sɔrɔ u la wala tagamasiɲɛw lo?”)

² Ala ka Kuma b’an hakili sigi ko minw be Jehova kɛ u dogoyɔrɔ ye, olu man kan ka to k’u yɛrɛ jalaki kojugu u ka jurumu kosɔn (Zaburuw 34:23 kalan). Ka Jehova kɛ an dogoyɔrɔ ye, o kɔrɔ ko di? An be se ka mun lo kɛ walisa Jehova ka makari an na ani ka yafa an ma? Galen, labɛn min tun kɛra kalifaduguw koo la Israɛl jamana na, an k’o lajɛ walisa k’o ɲiningaliw jaabiliw sɔrɔ. O labɛn tun be sen kan tuma min na Israɛldenw tun be Musa ka sariya kɔrɔ. Saan 33 Pantekɔte loon na, labɛn wɛrɛ sigira o nɔɔ na. I hakili to a la ko  Jehova yɛrɛ lo tun y’o sariya sigi. O kama, labɛn min kɛra o kalifaduguw koo la, o b’an dɛmɛ ka Jehova ka miiriya lɔn jurumu, jurumukɛlaw ani nimisali koo la. An k’a filɛ fɔlɔ kalifaduguw kuun ani u nafa tun ye min ye.

3. Ni dɔ tun tugura ka mɔgɔ faga, Israɛldenw tun b’o koo ɲɛnabɔ cogo di?

³ Ni dɔ tun ye mɔgɔ faga, o tun tɛ koo dennin ye Jehova fɛ. Ni Israɛlden dɔ tun tugura ka mɔgɔ faga, ale fana tun ka kan ka faga. Mɔgɔ min fagara, o tigi somɔgɔ min ka surun a la, ale lo tun ka kan k’o tigi faga. O somɔgɔ be weele ko “Jurusarabaga.” (Nɔnb. 35:19). O cogo la, mɔgɔ min ye mɔgɔ jalakibali faga, o tigi ka kan ka faga fana. Mɔgɔfagala tun ka ɲi ka faga joona joona walisa layidu jamana kana nɔgɔ. Jehova tun ye cii di ko: “Aw be jamana min na, aw kana o nɔgɔ. Mɔgɔfaga be jamana nɔgɔ.”—Nɔnb. 35:33, 34.

4. Ni dɔ tun ma tugu ka mɔgɔ faga, Israɛldenw tun b’o koo ɲɛnabɔ cogo di?

⁴ Nka ni dɔ tun ye mɔgɔ jalakibali faga k’a sɔrɔ a m’a lawuli a kama do? Hali n’o tigi tun ma tugu k’o kɛ, jalaki b’a kan (Zɛnɛzi 9:5). O koo ɲɔgɔn na, Jehova y’a fɔ ko u be se ka makari o tigi la. Kalifadugu wɔɔrɔ tun be yen. O tigi tun be se ka boli jurusarabaga ɲɛ ka taga o dugu dɔ la walisa k’a yɛrɛ latanga. Nka, a tun ka ɲi ka to o dugu kɔnɔ, fɔɔ ka taga se sarakalasebagaw kuntigiba ka saya ma.—Nɔnb. 35:15, 28.

5. Labɛn min kɛra kalifaduguw koo la, o b’an dɛmɛ cogo di ka Jehova faamu ka ɲɛ?

⁵ Adamadenw lo m’a latigɛ k’o duguw kɛ kalifaduguw ye. Jehova yɛrɛ lo ye cii di Zozuwe ma ko: ‘A fɔ Isirayɛlidenw ye ko u ka dugu dɔw woloma k’u sigi k’u kɛ kalifayɔrɔw ye.’ O duguw tun be jati dugu senumanw ye (Zozuwe 20:1, 2, 7, 8). Jehova yɛrɛ lo tun y’u saniya wala k’u bila dan na. O labɛn b’an dɛmɛ cogo di ka Jehova ka makari koo faamu? An be se ka Jehova kɛ an dogoyɔrɔ ye cogo min na, o labɛn b’an dɛmɛ k’o faamu cogo di?

6, 7. a) Mɔgɔ min ma tugu ka mɔgɔ faga, cɛkɔrɔbaw tun ka ɲi ka mun lo kɛ a koo la do? (Jaa lajɛ, barokun daminɛ na.) b) Mun na mɔgɔfagala tun ka ɲi ka kuma cɛkɔrɔbaw fɛ?

⁶ Ni dɔ ye mɔgɔ faga k’a sɔrɔ a m’a lawuli a kama, n’a sera kalifadugu la, a ka ɲi “k’a ka koo ɲafɔ o yɔrɔ cɛkɔrɔbaw ye” fɔlɔ. A ka ɲi k’o kɛ dugu donda la. Cɛkɔrɔbaw ka ɲi k’o tigi ladon ka ɲɛ (Zozuwe 20:4). Wagati dɔɔni o kɔ, o tigi ye mɔgɔ faga dugu min na, u b’a ci ka taga o dugu cɛkɔrɔbaw fɛ walisa olu ka kiti tigɛ a kan (Nɔnburuw 35:24, 25 kalan). N’olu ko a ma tugu ka mɔgɔ faga, u b’a bila ka taga kalifadugu la.

⁷ Mun na o mɔgɔfagala tun ka ɲi ka kuma cɛkɔrɔbaw fɛ? Sabu olu lo tun ka ɲi k’u seko kɛ walisa Israɛl siya saniyanin ka to. U tun bena o tigi dɛmɛ fana ka Jehova ka makari sɔrɔ. Lɔnnikɛla dɔ y’a sɛbɛ ko n’o mɔgɔfagala tun ma taga cɛkɔrɔbaw fɛ, “a niin tun be farati la.” A y’a fɔ fana ko ni jurusarabaga tun y’o tigi faga, a ɲiniko lo sabu Ala ye labɛn min bila sen kan walisa k’a latanga, a m’o labato. Mɔgɔ min tun ma tugu ka mɔgɔ faga, ale tun ka ɲi ka dɛmɛ ɲini ani ka sɔn o ma walisa ka to niin na. N’a tun ma taga kalifadugu dɔ la, a tun ye mɔgɔ min faga, ale somɔgɔ min ka surun a la, ale tun be se k’a faga.

8, 9. Ni kerecɛn ye jurumuba kɛ, mun na a ka ɲi k’o fɔ diinan mɔgɔkɔrɔw ye?

⁸ Bi, ni kerecɛn ye jurumuba kɛ, a ka ɲi ka dɛmɛ ɲini diinan mɔgɔkɔrɔw fɛ. Olu  bena a dɛmɛ ka jɛnɲɔgɔnya ɲuman kɛ tugun ni Jehova ye. Mun na o kɔrɔtanin lo? Fɔlɔ, Jehova lo y’o labɛn kɛ walisa diinan mɔgɔkɔrɔw ka jurumubaw koo ɲɛnabɔ (Zaki 5:14-16). Filanan, mɔgɔ minw be nimisa u ka jurumuw na, diinan mɔgɔkɔrɔw be se k’olu dɛmɛ u k’u koo diya Ala ye kokura ani u kana o jurumuw kɛ tugun (Gal. 6:1; Eburuw 12:11). Sabanan, cii ni fɔrɔmasɔn dira diinan mɔgɔkɔrɔw lo ma walisa k’o mɔgɔw hakili sigi. U b’o mɔgɔw dɛmɛ u ka se k’u ka tɔɔrɔw muɲu ani u kana to k’u yɛrɛ jalaki tugun. Jehova y’a fɔ ko diinan mɔgɔkɔrɔw ye ‘dogoyɔrɔ ye, min be mɔgɔ tanga fɔɲɔ ma.’ (Ezayi 32:1, 2). O labɛn b’a yira ko Jehova be makari an na. Tiɲɛn tɛ?

⁹ Ala sagokɛla caaman ye lafiya sɔrɔ tuma min na u kumana ni diinan mɔgɔkɔrɔw ye ani olu y’u dɛmɛ. Ɲɛyirali fɛ, balimacɛ Daniel tun ye jurumuba dɔ kɛ. Nka kalo caaman kɔnɔ, a tun be siranna k’o fɔ diinan mɔgɔkɔrɔw ye. A ko: “Komi wagati caaman tun tɛmɛna, ne tun b’a miiri ko diinan mɔgɔkɔrɔw tɛ se ka foyi kɛ ne ye tugun. O n’a t’a bɛɛ, n’ tun sirannin lo tuma bɛɛ ko mɔgɔ kana bɔ n’ ka jurumu kala ma ani n’ tun be n’ ka jurumuw nɔfɛkow kɔnɔna. Tuma o tuma, n’ tun be n’ ka delili kelen kelen bɛɛ daminɛ ni yafama deli ye.” A laban, Daniel ye dɛmɛ ɲini diinan mɔgɔkɔrɔw fɛ. A miiritɔ koo tɛmɛninw na, a y’a fɔ ko: “Tiɲɛn na, n’ tun be siranna ka kuma u fɛ. Nka n’ y’o kɛ tuma min na, a kɛra komi u ye doni gwiliman dɔ lo bɔ n’ kan. Sisan, foyi tɛ n’ bali ka n’ kɔnɔkow fɔ Jehova ye.” Daniel dusukun t’a jalaki foyi la tugun. A ma mɛɛn, a kɛra kɔrɔsigi ciden ye.

10. Mɔgɔfagala min ma tugu, ale ka ɲi ka mun lo kɛ walisa Ala ka yafa a ma?

¹⁰ Mɔgɔfagala min ma tugu, ale ka ɲi ka dɔ kɛ dɔ ye walisa Ala ka yafa a ma. Kalifadugu min ka surun a ma, a ka ɲi ka boli ka taga yen (Zozuwe 20:4 kalan). A tɛ se k’a kɛ i n’a fɔ foyi ma kɛ. N’a b’a fɛ ka to niin na, fɔɔ a ka boli ka don  kalifadugu dɔ la ani ka to yen fɔɔ ka taga se sarakalasebaga kuntigiba saya ma! * (Nɔnb. 35:25). A tun ka ɲi ka sɔn ka bɔnɛ a ka baara ani a ka boon ɲuman na. A tun tɛ se fana ka taga dugu wɛrɛ la tugun. Nka, kuun tun b’a la a k’o kɛ. N’a tun bɔra o dugu kɔnɔ, a tun b’a yira ko a ye min kɛ, a mako t’o la. A tun b’a yɛrɛ niin bila farati la.

11. Kerecɛn min nimisara, a be se k’a yira cogo di ko a be Ala waleɲuman lɔn a ka makari kosɔn?

¹¹ Bi, mɔgɔ min be nimisa a ka jurumuw na, ale fana ka ɲi ka dɔ kɛ dɔ ye walisa Ala ka yafa a ma. A ka ɲi k’a ka jurumuw dabila pewu. Koo o koo be se k’a to a be jurumuba kɛ, a ka ɲi k’a mabɔ o la. Korɛnti kerecɛnw ye min kɛ walisa k’a yira k’u nimisara u ka jurumuw na, ciden Pol y’o sɛbɛ ko: “Dusukasi min y’aw sɔrɔ ka bɔ Ala fɛ. Ale ye baara min kɛ, aw y’o ye, o le y’a to aw siranna Ala ɲa. Ka sin ka koo nin ta ni sɔbɛ ye, k’a yira ko a tun man d’aw ye fana, fɔɔ aw dimina. Ne koo donna aw kɔnɔ kosɔbɛ, ani aw banbana kosɔbɛ ka kojugukɛla nin jalaki.” (2 Kor. 7:10, 11). O la, n’an b’an seko bɛɛ kɛ ka jurumu dabila, an b’a yira Jehova la k’o koo b’an tɔɔrɔ. An b’a yira fana ko an b’a lɔn ko waajibi tɛ a ka yafa an ma.

12. Kerecɛn ka ɲi ka mun lo dabila walisa Ala ka to ka makari a la?

¹² Kerecɛn ka ɲi ka mun lo dabila walisa Ala ka to ka makari a la? Koo o koo be se k’a to a be jurumu kɛ, a ka ɲi ka sɔn k’o dabila hali n’o koo ka di a ye (Mat. 18:8, 9). N’i teri dɔw b’i lasun ka koo dɔw kɛ minw man di Jehova ye, yala i bena i seen tigɛ u la wa? N’a ka gwɛlɛ i ma ka dɔrɔ min ka dama kɛɲɛ, yala koo o koo be se k’i lasun ka dɔrɔ min kojugu, i bena i mabɔ o la wa? N’i be cɛnimusoko nege kɛlɛla do? Yala i bena i yɛrɛ mabɔ filimuw, site web dɔw, ani fɛɛn o fɛɛn na minw be se ka cɛnimusoko nege bila i la wa? Kana ɲinɛ ko i be jijali minw bɛɛ kɛra walisa ka kantigiya kɛ Jehova ye, kuun b’o la. K’a miiri ko Jehova banna i la, fɛɛn tɛ mɔgɔ tɔɔrɔ ka se o ma. O cogo kelen na, n’i “koo diyara [Jehova] ye, daan te o kanuya la.” O bena i ninsɔndiya ka tɛmɛ fɛɛn bɛɛ kan!—Ezayi 54:7, 8.

13. Mun na mɔgɔfagala tun latanganin lo, ani a tun be se ka to hɛɛrɛ la kalifadugu kɔnɔ?

¹³ Mɔgɔfagala tun mana don kalifadugu kɔnɔ, a latanganin lo. Jehova y’a fɔ o kalifaduguw koo la ko: ‘U bena kɛ i kalifayɔrɔ ye.’ (Zozuwe 20:2, 3). Jehova tun t’a ɲini ko kiti ka tigɛ mɔgɔfagala kan tugun o jurumu kosɔn. Jurusarabaga fana tun tɛ se ka taga mɔgɔfagala kama, kalifadugu la. O la, ka mɔgɔfagala to kalifadugu kɔnɔ, a tun tɛ siran tugun sabu Jehova tun b’a latanga. A tun tɛ i n’a fɔ a be kaso lo kɔnɔ. O dugu kɔnɔ, a tun be se ka baara kɛ, ka tɔɔw dɛmɛ ani ka Jehova bato hɛɛrɛ la. Tiɲɛn na, a tun be se ka to hɛɛrɛ la yen ani a ka ɲɛnamaya tun be se k’a wasa!

14. Kerecɛn min nimisara, a be se ka la mun lo la?

¹⁴ Jehova sagokɛla minw ye jurumuba kɛ ani u nimisara, u bele be se ka to k’u yɛrɛ jalaki. Dɔw yɛrɛ be se k’a miiri ko Jehova tɛna yafa u ma abada. N’i be n’o miiriya ɲɔgɔn ye, i ka la a la ko ni Jehova yafara i ma, a yafara le pewu! O kama, i man kan ka to k’i yɛrɛ jalaki tugun. Daniel min kofɔra ka tɛmɛ, ale y’a ye k’o ye tiɲɛn ye. Diinan mɔgɔkɔrɔw y’a kolo ani k’a dɛmɛ minkɛ, a dusukun m’a kɛlɛ tugun. A ko: “N’ ye n’ yɛrɛ sɔrɔ kokura.  O koo ɲɛnabɔra ka ɲɛ minkɛ, n’ tun man kan ka to ka n’ yɛrɛ jalaki tugun. Ni Ala y’i ka jurumuw jɔsi ka bɔ yen, a banna le. I ko Jehova y’a fɔ cogo min na, a b’an ka doniw ta k’u fili yɔrɔjan. An tɛna u ye tugun.” Ni mɔgɔfagala tun donna kalifadugu kɔnɔ, a tun man kan ka siran ko jurusarabaga bena na a kama k’a faga. O cogo kelen na, ni Jehova yafara an ma, an man ɲi ka siran ko a bena segi o jurumu kan tugun wala ko a bena an jalaki o kosɔn.—Zaburuw 103:8-12 kalan.

15, 16. Yezu y’a niin di ka kɛ kunmabɔsara ye ani a ye Sarakalasebagaw Kuntigiba ye. O b’an dɛmɛ cogo di ka la a la ko Jehova bena makari an na?

¹⁵ Tiɲɛn na, joo b’an fɛ ka tɛmɛ Israɛldenw kan ka la a la ko Jehova be makari an na. Ciden Pol y’a fɔ ko ale ye “sigɛnbagatɔ ye” sabu a tun tɛ sera ka Jehova sago kɛ cogo dafanin na. O kɔ, a ko: “Ne be barika la Ala ye ale min b’o kɛ an Matigi Yezu Krista sababu la!” (Ɔrɔm. 7:25). Pol tun be jijaliba kɛra walisa k’a yɛrɛ mabɔ jurumu na ani a kana a yɛrɛ jalaki a ka jurumu tɛmɛninw kosɔn. A tun nimisara o jurumuw na. O kama, a tun lanin b’a la ko Ala yafara a ma Yezu barika la. Komi Yezu y’a niin di ka kɛ kunmabɔsara ye, o b’an dusukun saniya ani k’a lafiya. O be kɛ sababu ye an t’an yɛrɛ jalaki ani an dusukun t’an kɛlɛ (Eburuw 9:13, 14). Yezu y’an ka Sarakalasebagaba ye. “O kama, mɔgɔ minw be gwɛrɛ Ala la ale sababu la, see b’a ye k’olu kisi bii ani sini, bari a be yen tuma bɛɛ ka Ala dali u ye.” (Eburuw 7:24, 25). Galen, sarakalasebagaw kuntigi ka baara tun ye ka Israɛldenw hakili sigi ko Jehova bena yafa u ma. O cogo kelen na, Sarakalasebagaw Kuntigiba Yezu b’an hakili sigi ko Ala bena “makari an na, ka nɛɛma kɛ an ye, k’an dɛmɛ an dɛsɛ tuma na.”—Eburuw 4:15, 16.

¹⁶ Walisa ka Jehova kɛ an dogoyɔrɔ ye, an ka ɲi ka limaniya Yezu ka kunmabɔsara koo la. Kana a miiri ko kunmabɔsara ɲɛsinna adamadenw bɛɛ dɔrɔn lo ma. Nka, i ka la a la ko a be ele fana nafa (Gal. 2:20, 21). La a la fana ko o sababu fɛ, Ala be i ka jurumuw yafa ani ko i be se ka ɲɛnamaya banbali sɔrɔ. Yezu ka saraka ye nilifɛn ye, Jehova ye min di i ma!

17. Mun na i b’a fɛ ka Jehova kɛ i dogoyɔrɔ ye?

¹⁷ Kalifaduguw b’an dɛmɛ ka Jehova ka makari faamu. O labɛn sababu fɛ, Ala b’a yira an na ko niin ye fɛɛn senuman ye, ko diinan mɔgɔkɔrɔw be se k’an dɛmɛ. A b’a yira an na fana nimisali sɔbɛ kɔrɔ ye min ye ani fɛɛn min kama an be se ka la a la ko Jehova be yafa an ma pewu. Yala i be Jehova kɛ i dogoyɔrɔ ye wa? An tɛ se ka lafiya sɔrɔ yɔrɔ si Jehova kɔ! (Zab. 91:1, 2). Jehova ka tilenninya n’a ka makari ɲɔgɔn tɛ yen. Barokun nata la, an bena a filɛ kalifaduguw koo be se k’an dɛmɛ cogo min na ka Jehova ladegi.