1, 2. a) Ala sagokɛlaw bena sara jumanw lo sɔrɔ? b) Mun lo bena an dɛmɛ an k’an ɲɛɛ jɔlen to an ka sara kan? (Jaa lajɛ, barokun daminɛ na.)

I KO ciden Pol, bi, kerecɛn mɔlenw ka jigiya ye ‘ka sini sara sɔrɔ Ala y’u wele min kosɔn.’ (Filip. 3:14). U kɔrɔtɔnin lo ka masaya kɛ ni Yezu Krista ye sankolo la. U bena baara kɛ n’a ye walisa ka adamadenw dɛmɛ u ka kɛ mɔgɔ dafaninw ye (Yir. 20:6). O ye nɛɛmaba ye dɛ! Yezu ka sagaden wɛrɛw be ni jigiya wɛrɛ ye. U bena ɲɛnamaya kɛ fɔɔ abada alijɛnɛ kɔnɔ dugukolo kan. O jigiya b’u ninsɔndiya yɛrɛ le!—2 Piyɛri 3:13.

² Walisa ka kerecɛn mɔlen tɔɔw dɛmɛ u ka to kantigiya la ani ka sara sɔrɔ, Pol y’a fɔ u ye ko: “A’ ye miiri sanfɛ fɛnw na.” (Kɔlɔs. 3:2, ABM). Nɛɛma lo u fɛ ka ɲɛnamaya kɛ sankolo la. U ka ɲi k’o jigiya to u hakili la (Kɔlɔs. 1:4, 5). An ka jigiya ye ka ɲɛnamaya kɛ sankolo la wo wala dugukolo kan wo, Jehova bena duga minw kɛ a sagokɛlaw ye, an bɛɛ ka ɲi ka miiri u la. O lo bena an dɛmɛ an k’an ɲɛɛ jɔlen to an ka sara kan.—1 Kor. 9:24.

3. Pol y’a kerecɛnɲɔgɔnw lasɔmi farati jumanw lo la?

 ³ Pol y’a kerecɛnɲɔgɔnw lasɔmi farati dɔw koo la minw be se k’u bali k’u ka sara sɔrɔ. Ɲɛyirali fɛ, a ye lɛtɛrɛ sɛbɛ Kɔlɔsi kafo ma walisa k’u lasɔmi kerecɛn tɔgɔtigiw koo la. Walisa k’u koo diya Ala ye, o kerecɛnw tun be tugu Musa ka sariya lo kɔ sanni ka limaniya Krista la (Kɔlɔs. 2:16-18). Ciden Pol kumana fana farati dɔw koo la minw be yen bi ani u be se k’an bali ka sara sɔrɔ. A y’a ɲɛfɔ an be se k’an yɛrɛ tanga cɛnimusoko negew ma cogo min na. Bɛnbaliya be se ka kɛ an n’an kerecɛnɲɔgɔn dɔ cɛ wala gwɛlɛyaw be se ka kɛ denbaya kɔnɔ. Ciden Pol y’a ɲɛfɔ fana an be se k’o koow ɲɛnabɔ cogo min na. O ladiliw be se k’an nafa kosɔbɛ bi. O kosɔn, Pol ye lasɔmini kuma minw di ni kanuya ye Kɔlɔsikaw ma, an k’u dɔw lajɛ.

4. Cɛnimusoko nege be se k’an bali cogo di k’an ka sara sɔrɔ?

⁴ Pol y’a balimaw hakili jigi u ka jigiya koo la. O kɔ, a y’a sɛbɛ ko: “A’ ye aw dugukolo kan jogow faga, o kɔrɔ, kakalaya ni nɔgɔlenya ni ko jugu nege ni nege sifa bɛɛ ani wasabaliya.” (Kɔlɔs. 3:5, ABM). Cɛnimusoko nege be se ka gwan an na fɔɔ k’an ka jɛnɲɔgɔnya tiɲɛ ni Ala ye. O be se k’a to fana an be bɔnɛ an ka sara la. Balimacɛ dɔ tun gwɛnna ka bɔ kafo kɔnɔ kakalayako kosɔn. Kɔfɛ a segira ka kɛ kafoden dɔ ye. A y’a fɔ ko cɛnimusoko nege gwanna ale la fɔɔ sanni a ka bɔ a kala ma, “o y’a sɔrɔ koow tiɲɛna ka ban.”

5. An be se k’an yɛrɛ tanga faratikow ma cogo di?

⁵ An ka ɲi k’an yɛrɛ kɔrɔsi sanko ni koo dɔ b’an seen kɔrɔ min be se k’a to an be Jehova ka sariya tiɲɛ. Ɲɛyirali fɛ, ni cɛɛ ni muso dɔ be teriya kɛra furu kama, u ka ɲi ka hakili sɔrɔ k’a latigɛ u tɛna koo minw kɛ jarabiko nunu sen fɛ: ka maga maga ɲɔgɔn na ani ka ɲɔgɔn mɔmɔ. U ka ɲi k’a latigɛ wagati ani yɔrɔ minw na u dama be se ka to ɲɔgɔn fɛ. U ka ɲi k’o latigɛ kabi tuma min na u y’a daminɛ ka teriya kɛ furu kama (Talenw 22:3). N’an tagara voyazi la an ka baara sen fɛ wala n’an be baara kɛra ni mɔgɔ dɔ ye min t’an cɛɲɔgɔn wala an musoɲɔgɔn ye, farati be se ka kɛ o la (Talenw 2:10-12, 16). I be se k’i yɛrɛ tanga cogo di? A yira bɛɛ la ko i ye Jehova Seere ye. I kɛcogo kɔrɔsi ani kana ɲinɛ ko ka jarabiko kɛ k’a sɔrɔ furu miiriya tɛ i kɔnɔ, o nɔfɛko be se ka juguya. An ka ɲi k’an janto an yɛrɛ la fana n’an dusu man di wala n’an b’a miiri ko an b’an kelen na. O wagati ɲɔgɔn na, n’a sɔrɔ an b’a fɛ mɔgɔw k’an kanu. O kama, ni mɔgɔ o mɔgɔ y’a mako don an na, an ka teli ka sɔn o tigi ta ma. N’o koo ɲɔgɔn y’i sɔrɔ, dɛmɛ ɲini Jehova n’a sagokɛlaw fɛ. O la, i tɛna bɔnɛ i ka sara la.—Zaburuw 34:19; Talenw 13:20 kalan.

6. N’an b’an ka ɲɛnagwɛkow sugandira, an ka ɲi ka mun lo to an hakili la?

⁶ Walisa ka cɛnimusoko nege bɔ an yɛrɛ la, ɲɛnagwɛko minw b’a to an be miiri o koo la, fɔɔ an k’an yɛrɛ mabɔ u la. Bi, ɲɛnagwɛko caaman be i n’a fɔ koo minw tun be kɛra Sodɔmu ni Gomɔrɛ duguw la (Zude 7). Minw b’o ɲɛnagwɛkow labɛn, olu b’a kɛ i n’a fɔ kakalayakow tɛ koo jugu ye ani ko farati si t’u la. O kama, an ka ɲi k’an yɛrɛ kɔrɔsi. An man kan ka sɔn duniɲa ka ɲɛnagwɛkow bɛɛ ma. Nka, an ka ɲi k’an ka ɲɛnagwɛkow sugandi koɲuman walisa an kana bɔnɛ an ka sara la.—Talenw 4:23.

7. Gwɛlɛya jumanw lo be se ka kɛ kafo kɔnɔ?

⁷ An ninsɔn ka di ka kɛ kerecɛn kafo kɔnɔ. An be Bibulu kalan an ka lajɛnw na ani an be ɲɔgɔn dɛmɛ ni kanuya ye. O koow bɛɛ b’an dɛmɛ k’an ɲɛɛ jɔlen to an ka sara kan. Nka, tuma dɔw la, bɛnbaliyako dɔw be se ka na ni gwɛlɛyaw ye an ni ɲɔgɔn cɛ. N’an m’o gwɛlɛyaw ɲɛnabɔ, o be se k’a to an be dimi mara an kɔnɔ.—1 Piyɛri 3:8, 9 kalan.

8, 9. a) Jogo jumanw lo bena an dɛmɛ k’an ka sara sɔrɔ? b) Mun lo be se k’an dɛmɛ ka to hɛɛrɛ la n’an kerecɛnɲɔgɔnw ye hali n’u donna an gasi la?

⁸ An be se ka mun lo kɛ walisa an kana dimi mara an kɔnɔ ani ka bɔnɛ an ka sara la? Pol ye Kɔlɔsikaw jija ko: “Ala ye aw woloma k’aw kɛ a ka mɔgɔw ye ani aw koo ka d’a ye kosɔbɛ. O la, aw ka kɛ mɔgɔɲumanw ye, minw be makari. Aw k’aw yɛrɛ majigi, ka kɛ mɔgɔsabalininw ye, minw be muɲuli kɛ. N’a sɔrɔla ko dɔ ye koo dɔ kɛ min ma bɛn a tɔɲɔgɔn ma, aw ka yafa ɲɔgɔn ma tuma bɛɛ ka ɲɔgɔn dɛmɛdɛmɛ. Krista yafara aw ma cogo min na, aw fana ka yafa ɲɔgɔn ma ten. Koo bɛɛ la, kanuya ka sɔrɔ aw kɔnɔ, ale sababu la, aw bena se ka ɲɔgɔn minɛ kosɔbɛ.”—Kɔlɔs. 3:12-14.

⁹ Kanuya ni ɲumanya be se k’an dɛmɛ ka yafa ɲɔgɔn ma. Ɲɛyirali fɛ, balima dɔw be se ka don i gasi la kumaw wala kɛwalew fɛ. N’o kɛra, a to i hakili la ko ele fana donna mɔgɔ dɔw gasi la tuma dɔw la i ka kumaw wala i ka kɛwalew fɛ, nka, u yafara i ma. Yala i t’u waleɲuman lɔn u ka ɲumanya n’u ka kanuya kosɔn wa? (Waajulikɛla 7:21, 22 kalan). An be Krista yɛrɛ lo waleɲuman lɔn kosɔbɛ a ka ɲumanya kosɔn. A ye Ala sagokɛla sɔbɛw kaan bɛn k’u kɛ kelen ye (Kɔlɔs. 3:15). An bɛɛ be Ala kelen nin lo kanu, an be kibaro diiman min fɔ, o ye kelen ye ani an caaman ka gwɛlɛyaw ye kelen ye fana. N’an be ɲɔgɔn minɛ ni ɲumanya ni kanuya ye ani ka yafa ɲɔgɔn ma, o b’a to bɛɛn be kɛ an ni ɲɔgɔn cɛ ani an b’an ɲɛɛ jɔlen to an ka sara kan.

10, 11. a) Mun na ɲangoya man ɲi? b) An be se ka mun lo kɛ walisa ɲangoya kana an bali k’an ka sara sɔrɔ?

¹⁰ Ɲɛyirali minw be Bibulu kɔnɔ, u b’an lasɔmi ko ɲangoya be se k’an bali k’an ka sara sɔrɔ. Ɲɛyirali fɛ, Kayɛn ye ɲangoya kɛ Abɛli la ani a y’a faga. Kore, Datan, Abiramu ye ɲangoya kɛ Musa la ani u murutira a kama. Masacɛ Sayuli fana ye ɲangoya kɛ Dawuda la ani a y’a ɲini k’a faga. Ala ka Kuma ye min fɔ, o ye tiɲɛn ye. A y’a fɔ ko: “Kɔnɔnajuguya ni keliya [wala ɲangoya] be yɔrɔ min na, koɲagaminin ni kojugu sifa bɛɛ be sɔrɔ o yɔrɔ la fana.”—Zaki 3:16.

¹¹ Ni kanuya ni ɲumanya b’an dusu la, an tɛna ɲangoya kɛ joona. Bibulu b’a fɔ ko: “Kanuya be mɔgɔ min dusu la, o tigi be muɲuli kɛ, a be koɲuman kɛ, keliya t’a dusu la.” (1 Kor. 13:4). Walisa keliya kana sigiyɔrɔ sɔrɔ an dusukun na, an ka ɲi ka banba ka koow jati i ko Ala b’u jati cogo min na. O kɔrɔ ko an ka ɲi k’a jati ko an ni an balimaw ye farisogo kelen ye, o min ye kafo ye. O lo bena an dɛmɛ k’an janto an balimaw na ni kanuya ye ka kɛɲɛ ni Bibulu ka ladili nin ye: “Ni farikolo yɔrɔ dɔ . . . ye boɲa sɔrɔ, tɔw fana be jɛn n’a ye ka nisɔndiya.” (1 Kor. 12:16-18, 26). O kama, n’u ye koo ɲuman kɛ an balima dɔ ye, an ka ninsɔndiya n’a ye, an kana ɲangoya kɛ. An ka miiri Sayuli dencɛ Zonatan koo la. Tuma min na Dawuda sugandira ka kɛ masacɛ ye ale nɔɔ na, a ma ɲangoya kɛ Dawuda la. Nka, a y’a jija (1 Sam. 23:16-18). Yala i be tɔɔw kanu ani k’u minɛ ni ɲumanya ye i ko Zonatan wa?

12. Bibulu ka ladili jumanw lo bena denbayamɔgɔw dɛmɛ ka sara sɔrɔ?

¹² Ni denbayamɔgɔw be Bibulu ka sariyakolow sira tagama, u be se ka hɛɛrɛ ni ninsɔndiya sɔrɔ ani u tɛna bɔnɛ u ka sara la. Ciden Pol ye ladili juman lo di Kɔlɔsikaw ma min be sɔrɔ Ala ka Kuma kɔnɔ? A y’a fɔ u ye ko: “Musow, aw k’aw yɛrɛ majigi aw cɛɛw ye i n’a fɔ a bɛnnin be Matigi ka mɔgɔw fɛ cogo min na. Cɛɛw, aw k’aw ka musow kanu, aw kana fariya u ma. Denmisenw, koo bɛɛ la aw k’aw wolobagaw boɲa, bari o le ka di Matigi ye. Wolobagaw, aw fana kana aw deenw degun kojugu fɔɔ u be dimi, waasa o jigi kana tigɛ.” (Kɔlɔs. 3:18-21). Siga t’a la, i bena sɔn ko ni denbayamɔgɔw b’o ladiliw sira tagama, u bena nafa sɔrɔ o la.

13. Balimamuso dɔ be se k’a cɛɛ dɛmɛ cogo di walisa a k’a ɲini ka Jehova bato?

¹³ N’a sɔrɔ i ye furumuso ye ani i cɛɛ tɛ Jehova Seere ye. I bena mun lo kɛ n’i b’a jati ko a t’i minɛ ka ɲɛ? N’i dimina a kɔrɔ ani ka kule a kan, yala o lo bena koow fisaya wa? Hali n’i ye joo sɔrɔ, yala o bena a to a be kɛ Jehova Seere dɔ ye wa? Ayi. Nka, n’i y’i cɛɛ bonya a ka kuntigiya kosɔn, o bena kɛ sababu ye hɛɛrɛ be kɛ  i ka denbaya kɔnɔ ani i bena Jehova tando. N’a sɔrɔ, o yɛrɛ bena a to i cɛɛ b’a ɲini ka Jehova bato. O la, aw fila bɛɛ bena sara sɔrɔ ɲɔgɔn fɛ.—1 Piyɛri 3:1, 2 kalan.

14. Balimacɛ ka ɲi ka mun lo kɛ n’a muso dannabali tɛ bonya la a kan?

¹⁴ N’a sɔrɔ i ye furucɛ ye ani i muso tɛ Jehova Seere ye. I bena mun lo kɛ n’i b’a jati ko a t’i bonya? Yala a bena bonya la i kan kosɔbɛ n’i be kule a kan walisa k’a yira a la ko ele lo ye denbaya kuntigi ye wa? Ayi! Ala b’a fɛ i ka kɛ cɛɛ ɲuman ye min b’a muso kanu. O la, i b’a yira ko i be Yezu ladegi (Efɛz. 5:23). Yezu lo be kafo kuun na, a b’a ɲɛminɛ ni kanuya ye ani a be muɲu a kɔrɔ (Luka 9:46-48). N’i be Yezu ladegi, n’a sɔrɔ i muso bena kɛ Jehova batobaga dɔ ye loon dɔ.

15. Balimacɛ be se k’a yira a muso la cogo di ko a b’a kanu?

¹⁵ Bibulu b’a fɔ cɛɛw ye ko: “Aw k’aw ka musow kanu, aw kana fariya u ma.” (Kɔlɔs. 3:19). Cɛɛ min b’a muso kanu, a be bonya la a kan. Cogo di do? A b’a ɲini k’a ka miiriya lɔn koow kan ani a b’a hakili sigi ko a ye min fɔ, o kɔrɔtanin lo ale fɛ (1 Piyɛri 3:7). Hali n’a muso ye min fɔ a tɛna se k’o kɛ tuma bɛɛ, n’a b’a muso lamɛn, o be se k’a dɛmɛ ka desizɔn ɲumanw ta (Talenw 15:22). Cɛɛ min b’a muso kanu, a tɛna a fɔ a muso ye ko a k’ale bonya. Nka, a ka kɛwalew lo bena a to a muso be bonya la a kan. Ni cɛɛ b’a muso n’a deenw kanu, u be hɛɛrɛ sɔrɔ Jehova batoli la ani u bena u ka sara sɔrɔ.

16, 17. N’i ye kanbele wala sunguru ye, mun lo be se k’i dɛmɛ i kana dimi i bangebagaw kɔrɔ?

¹⁶ N’a sɔrɔ i ye kanbele wala sunguru ye ani i b’a miiri ko i bangebagaw t’i faamu wala k’u b’i bali ka koo caaman kɛ. O be se k’i dusu tiɲɛ, fɔɔ i b’i yɛrɛ ɲininga ni nafa b’a la tiɲɛn na ka Jehova bato. Nka, kana Jehova batoli dabila o kosɔn. N’o tɛ, i bena a faamu kɔfɛ ko mɔgɔ si tɛ i kanu sɔbɛ la ka tɛmɛ kafodenw n’i bangebagaw kan, olu minw be ni Ala ɲɛsiran ye.

¹⁷ N’i bangebagaw tun t’i kolo, i tun bena a lɔn cogo di k’u b’u janto i la? (Eburuw 12:8). N’a sɔrɔ, u b’i kolo cogo min na, o lo man di i ye. Kana sinsin o kan. Nka, a ɲini k’a faamu fɛɛn min kama u y’o kɛ. I hakili sigi ani banba i kana dimi u kɔrɔ n’u b’i jalakira. Bibulu b’a fɔ ko: “Mɔgɔ min b’a yɛrɛ kumacogo kɔlɔsi, o tigi ye kolɔnbaga ye. Mɔgɔ min sabalinin be, o tigi ye hakilitigi ye.” (Talenw 17:27). A ɲini ka kɛ mɔgɔ kolɔnbaga ye min be sɔn ladiliw ma hali n’u dicogo man d’i ye (Talenw 1:8). Ka kɛ ni bangebaga ye minw be Jehova kanu sɔbɛ la, o ye dugaba ye. Siga t’a la, u b’a fɛ k’i dɛmɛ ka sara sɔrɔ.

18. Mun na i jijanin lo k’i ɲɛɛ jɔlen to sara kan?

¹⁸ An ka jigiya ye ka ɲɛnamaya kɛ sankolo la wo wala dugukolo kan wo, sara min b’an kɔnɔna, o ye fɛɛn nafamanba yɛrɛ lo ye! O jigiya ye wulibali lo ye sabu an Danbaga yɛrɛ lo y’a daa di o koo la. Alijɛnɛ min bena sigi dugukolo kan, Ala y’a fɔ o koo la ko: “Masaba lɔnni bena yɔrɔ bɛɛ fa.” (Ezayi 11:9). Mɔgɔ minw bena ɲɛnamaya kɛ alijɛnɛ kɔnɔ, Ala bena olu bɛɛ kalan. Kuun b’a la an k’an jija k’o sara sɔrɔ. O la, Jehova y’a daa di koo minw na, i k’o to i hakili la ani kana a to fɛɛn si k’i bali ka sara sɔrɔ!