1, 2. a) Mun na an lanin b’a la ko an be se ka mɔgɔya kura ka jogow don an yɛrɛ la? b) Mɔgɔya kura ka jogo jumanw lo kofɔra Kɔlɔsikaw 3:10-14 kɔnɔ?

“JOGOKURA.” O kumaden be sɔrɔ julakan Bibulu kɔnɔ siɲɛ fila (Efɛz. 4:24; Kɔlɔs. 3:10). O kumaden ɲɛsinna mɔgɔya kura lo ma min danna ka kɛɲɛ ni Ala sago ye. Yala an be se ka mɔgɔya kura ka jogow don an yɛrɛ la wa? Ɔnhɔn. Komi Jehova y’an dan ale yɛrɛ jaa la, an be se k’a ka jogo kabakomanw ladegi.—Zɛnɛzi 1:26, 27; Efɛz. 5:1.

² An ye dafabaliya sɔrɔ cɛɛn ye Adama ni Awa fɛ. O kama, nege juguw ka teli k’an minɛ. An sigiɲɔgɔnw fana be se ka nɔɔba to an kan. Nka, Jehova b’a fɛ an ka kɛ mɔgɔ sifa min ye, an be se ka kɛ o ye sabu a be makari an na k’an dɛmɛ. Jehova ye ciden Pol lasun ka kuma mɔgɔya kura ka jogo dɔw koo la. Walisa an ka se ka kɛ i ko Jehova b’a fɛ cogo min na, an k’o jogo dɔw lajɛ (Kɔlɔsikaw 3:10-14 kalan). An bena a ye fana an be se k’o jogow yira cogo min na an ka waajuli baara la.

3. Mɔgɔya kura ka jogo dɔ ye juman ye?

³ Ciden Pol y’an jija ko an ka jogo kuraw don an yɛrɛ la. O kɔ, a y’a yira ko n’an tɛ mɔgɔ woloma, o ye mɔgɔya kura ka jogo kabakoman dɔ lo ye. A y’a fɔ ko: “Danfara te siya wɛrɛ ni zuwifu cɛ, kɛnɛkɛnɛninw ni kɛnɛkɛnɛbaliw cɛ, lonanw ni siyajuguw cɛ, jɔɔnw ni hɔrɔnw cɛ.” Kafo kɔnɔ, mun na an man ɲi ka mɔgɔw woloma u ka siya, u ka jamana wala u ka lɔyɔrɔ kosɔn? An man ɲi k’o kɛ sabu Yezu ka kalanden sɔbɛw ‘bɛɛ ye kelen ye.’—Kɔlɔs. 3:11; Gal. 3:28.

4. a) Jehova sagokɛlaw ka ɲi ka ɲɔgɔn minɛ cogo di? b) Bɛɛn min be kerecɛnw ni ɲɔgɔn cɛ, koo juman lo be se k’o nagasi?

⁴ Minw be jogo kuraw don u yɛrɛ la, olu be bonya la bɛɛ kan. U b’o kɛ hali ni u ka siya n’u ka koow cogoya tɛ kelen ye (Ɔrɔm. 2:11). O koo man nɔgɔ jamana dɔw la. Ɲɛyirali fɛ, wagati tɛmɛninw na, Afirikidisidi jamana ka gofɛrɛnɛman tun ye mɔgɔw tilan tilan yɔrɔw la ka kɛɲɛ n’u ka siyaw ye. Mɔgɔ caaman bele b’o yɔrɔw la, hali Jehova Seere dɔw yɛrɛ. O kosɔn, Koow Ɲɛnabɔla Jɛnkulu ye labɛn kɛrɛnkɛrɛnnin dɔ kɛ saan 2013, ɔkutɔburukalo la. A y’o kɛ walisa ka balimaw dɛmɛ u ka ɲɔgɔn lɔn ka ɲɛ ani u k’u ka “kanuya bonya” u ni ɲɔgɔn cɛ (2 Kor. 6:13, ABM). O tun ye labɛn juman lo ye?

5, 6. a) Labɛn juman lo kɛra jamana dɔ kɔnɔ walisa bɛɛn min be Ala sagokɛlaw cɛ, o ka sabati? (Jaa lajɛ, barokun daminɛ na.) b) Mun lo sɔrɔla o la do?

⁵ Labɛnw kɛra walisa kafo fila ka wagati kɛ ɲɔgɔn fɛ wikɛni dɔw la. Balima minw b’o kafow kɔnɔ, u tɛ kaan kelen fɔ ani u tɛ siya kelen ye. O balimaw ye waajuli ni lajɛnw kɛ ɲɔgɔn fɛ ani u tagara bɔ ɲɔgɔn ye u ka soo. Kafo caaman fana y’o ɲɔgɔn kɛ. Jehova Seerew ye kuma ɲuman caaman sɛbɛ k’u ci Betɛli ma o labɛn koo la. Hali minw yɛrɛ tɛ Jehova Seerew ye, olu fana y’o kɛ. Ɲɛyirali fɛ, diinan kuntigi dɔ y’a fɔ ko: “N’ tɛ Jehova Seere ye, nka n’ be se k’a fɔ ko aw ka waajuli baara labɛnnin lo koɲuman. Hali k’a sɔrɔ aw ka siyaw tɛ kelen ye, aw kaan bɛnnin lo.” O labɛn ye nɔɔ juman lo to Jehova Seerew kan?

⁶ Balimamuso Noma be kafo dɔ kɔnɔ Xhosakan be fɔ yɔrɔ min na. A daminɛ na, a tun be sigasiga ka balima dɔw weele a ka fantan boon kɔnɔ. O balimaw tun ye tubabuw ye ani u tun be kafo dɔ kɔnɔ angilikan be fɔ yɔrɔ min na. Nka kɔfɛ, a ye waajuli kɛ n’o balimaw ye ani u y’a weele u ka soo. O y’a hakili sigi. A y’a fɔ ko: “U ye mɔgɔ gwansanw lo ye i ko anw!” O kosɔn, tuma min na o balimaw nana waajuli kɛ ni Noma ka kafomɔgɔw ye, ale fana y’u dɔw weele u ka na dumuni kɛ a ka soo. A ye balima minw weele, u dɔ tun ye diinan mɔgɔkɔrɔ ye ani tubabu tun lo. Noma y’a fɔ ko: “N’ kabakoyara k’a ye ko a sɔnna ka sigi kɛsu manalaman dɔ kan dugu ma.” Koow Ɲɛnabɔla Jɛnkulu ye labɛn min kɛ, o bele be sen kan. Mun lo sɔrɔla o la do? Balima caaman ye teri kuraw sɔrɔ ani u jijanin lo ka to k’u ka kanuya bonya u balimaw ta fan fɛ.

7. Mun na an ka ɲi ka makari ɲɔgɔn na tuma bɛɛ?

⁷ An bena to ka gwɛlɛyaw sɔrɔ fɔɔ ka taga se Sutana ka duniɲa nin laban na. Baara tɛ sɔrɔ, bana juguw, kɔrɔbɔli ni balawokow be yen, an be bɔnɛ an ka bololafɛnw na fariyakow kosɔn. A be se ka kɛ fana ko gwɛlɛya wɛrɛw b’an kan. An  ka ɲi ka makari ɲɔgɔn na sɔbɛ la walisa ka ɲɔgɔn dɛmɛ o gwɛlɛyaw wagati la. N’an be makari ɲɔgɔn na, o bena an lasun ka ɲumanya kɛ (Efɛz. 4:32). O ye mɔgɔya kura ka jogo dɔw ye minw bena an dɛmɛ ka Ala ladegi ani ka tɔɔw dusu saalo.—2 Kor. 1:3, 4.

8. N’an be makari kafodenw bɛɛ ma ani ka ɲumanya kɛ u ye, nafa juman lo be sɔrɔ o la? Ɲɛyirali dɔ lakali.

⁸ An be se k’an janto koɲuman lonanw ni dɛsɛbagatɔw la an ka kafo kɔnɔ cogo di? An ka ɲi ka teriya kɛ n’o ɲɔgɔnnamɔgɔw ye ani k’u dɛmɛ u k’a lɔn ko nafa b’u la kafo kɔnɔ (1 Kor. 12:22, 25). An ka Dannykarl ka koo lajɛ. Ale bɔra Filipine jamana na ka taga Zapɔn. Komi a tun ye lonan ye, u tun t’a minɛ ka ɲɛ a ka baarakɛyɔrɔ la i ko u tun b’a ka baarakɛɲɔgɔn tɔɔw minɛ cogo min na. Loon dɔ, a tagara Jehova Seerew ka lajɛn na. A y’a fɔ ko: “Mɔgɔw fanba tun ye Zapɔnkaw ye, nka u ye n’ bisimila ka ɲɛ i ko an tun be ɲɔgɔn lɔn ka kɔrɔ.” Balimaw tora ka ɲumanya kɛ a ye. O lo y’a dɛmɛ ka ɲɛtaga kɛ. A batizera ani diinan mɔgɔkɔrɔ lo sisan. Diinan mɔgɔkɔrɔ tɔɔw dusu ka di sabu Dannykarl n’a muso Jennifer b’u ka kafo kɔnɔ. Diinan mɔgɔkɔrɔw y’a fɔ ko: “U ye piyɔniyew ye ani u be ɲɛnamaya kɛ cogo nɔgɔman na. U ye ɲɛyirali ɲuman ye kafo kɔnɔ sabu Ala ka Masaya lo y’u ɲɛnako fɔlɔ ye.”—Luka 12:31.

9, 10. Ɲɛyirali dɔw lakali minw b’a yira ko duga b’a la ka makari mɔgɔw la waajuli la.

⁹ N’an be kibaro diiman fɔ mɔgɔw ye, o ye sababu ɲuman ye ka ɲumanya kɛ “mɔgɔ bɛɛ ye.” (Gal. 6:10). Jehova Seere caaman ye kaan wɛrɛ degi sabu u be makari lonanw na (1 Kor. 9:23). Duga caaman sɔrɔla o la. Ɲɛyirali fɛ, balimamuso Tiffany be Ɔsitarali jamana na ani a ye piyɔniye ye. A ye Swahilikan degi walisa ka taga dɛmɛ don kafo dɔ kɔnɔ, Brisbane dugu la. Swahilikan lo be fɔ o kafo kɔnɔ. Hali n’a tun ka gwɛlɛ k’o kaan degi, Tiffany ye ninsɔndiya sɔrɔ o la. A ko: “N’i b’a fɛ ka ninsɔndiya sɔrɔ i ka waajuli baara la, kaan wɛrɛ be fɔ kafo min kɔnɔ, taga yen. A be i n’a fɔ i tagara voyazi la k’i to i ka dugu la. An ka balimaya min be duniɲa kuru bɛɛ kɔnɔ, i bena o diyabɔ ani i bena a ye ko bɛɛn min b’an ni ɲɔgɔn cɛ, o ɲɔgɔn tɛ yen.”

¹⁰ An ka denbaya dɔ ka koo lajɛ min be Zapɔn. Denmusoman tɔgɔ ko Sakiko. A ko: “Saan 1990 wagati la, an tun ka teli ka lonanw kunbɛn waajuli la minw bɔra Berezil. An tun mana Yirali 21:3, 4 wala Zaburuw 37:10, 11, 29 kalan Pɔrtigɛkan na, u tun b’an lamɛn koɲuman. Tuma  dɔw la yɛrɛ, u ɲɛji tun be jigi.” Nka, an ka denbayamɔgɔw ka makari ma dan o dɔrɔn ma. Sakiko ko: “An ka denbayamɔgɔw y’a daminɛ ka Pɔrtigɛkan degi sabu an y’a ye k’o mɔgɔw mako gwɛlɛ tun be Alakow la.” Kɔfɛ, o denbaya ye dɛmɛ don walisa ka kafo kura dɔ sigi Pɔrtigɛkan na. Saan caaman kɔnɔ, o denbaya ye lonan caaman dɛmɛ ka kɛ Jehova batobagaw ye. Sakiko y’a fɔ fana ko: “A tun man nɔgɔ ka Pɔrtigɛkan degi, nka an ye duga minw sɔrɔ, o tɛmɛna an ka jijaliw bɛɛ kan. An be Jehova waleɲuman lɔn kosɔbɛ o kosɔn.”—Kɛwaliw 10:34, 35 kalan.

11, 12. a) Mun lo ka ɲi k’an lasun ka jogo kuraw don an yɛrɛ la? Mun na o kɔrɔtanin lo? b) Mun lo bena an dɛmɛ an ka to k’an yɛrɛ majigi?

¹¹ Fɛɛn min b’an lasun ka jogo kuraw don an yɛrɛ la, o ye ko an b’a fɛ ka bonya la Jehova kan. An t’o kɛ walisa mɔgɔw k’an tando. I hakili to a la ko mɛlɛkɛ dɔ tun dafanin lo, nka, a ye jurumu kɛ sabu a y’a to kuncɛbaya ye see sɔrɔ a kan (Ezekiyɛli 28:17 lajɛ). An do ye mɔgɔ dafabaliw ye. A ka gwɛlɛ an fɛ kosɔbɛ k’an yɛrɛ tanga kuncɛbaya ma. O n’a ta bɛɛ, an be se k’an yɛrɛ majigi. Mun lo be se k’an dɛmɛ k’o kɛ?

¹² Walisa k’an yɛrɛ majigi, an ka ɲi ka wagati ta ka Ala ka Kuma kalan loon o loon ani ka miiri a kan (Deter. 17:18-20). Yezu ka kalanw n’a ka majigilenya ɲɔgɔn tɛ yen. A kɔrɔtanin lo fana an ka miiri u la (Mat. 20:28). Yezu y’a ka kalandenw seen ko yɛrɛ (Zan 13:12-17). An ka ɲi fana ka Jehova deli tuma o tuma walisa k’a ka hakili senu sɔrɔ. O lo bena an dɛmɛ an tɛna an yɛrɛ fisaya tɔɔw ye.—Gal. 6:3, 4; Filip. 2:3.

13. N’an majiginin lo, duga jumanw lo be sɔrɔ o la?

¹³ Talenw 22:4 kalan. Ala sagokɛla kantigiw bɛɛ ka ɲi k’u yɛrɛ majigi. O le b’a to u be duga caaman sɔrɔ. N’an majiginin lo, o be kɛ sababu ye hɛɛrɛ ni bɛɛn min be kafo kɔnɔ, o be sabati. Ka fara o kan, Jehova bena nɛɛma kɛ an ye. Ciden Piyɛri y’a sɛbɛ ko: “Aw bɛɛ k’aw yɛrɛ majigi ɲɔgɔn ye. Bari a fɔra Ala ka kuma na ko: ‘Yɛrɛboɲala ka koo man di Ala ye. Nga a be nɛɛma kɛ mɔgɔmajigininw ye.’”—1 Piyɛri 5:5.

14. Jɔn lo dusu sumanin lo ani a be muɲu ka tɛmɛ bɛɛ kan?

¹⁴ Bi duniɲa kɔnɔ, mɔgɔ minw sabalinin lo wala minw dusu sumanin lo ani u be muɲuli kɛ, tɔɔw b’u jati siranbagatɔw ye. Nka, o tɛ tiɲɛn ye hali dɔɔni! O jogo ɲumanw bɔra Sebagayabɛɛtigi Ala lo yɔrɔ. Mɔgɔ si tɛ ni dususuman ni muɲuli ye ka se Jehova ma (2 Piyɛri 3:9). Ɲɛyirali fɛ, tuma min na Ibrayima ni Lɔti ye Jehova ɲininga a ka mɛlɛkɛ dɔ sababu fɛ, Jehova muɲuna u kɔrɔ k’u jaabi (Zɛnɛzi 18:22-33; 19:18-21). Miiri k’a filɛ Jehova muɲuna fana Israɛlden murutininw kɔrɔ cogo min na saan 1500 ni kɔ kɔnɔ.—Ezek. 33:11.

15. Yezu y’a yira cogo di ko a dusu sumanin lo ani ko a be muɲuli kɛ?

¹⁵ Yezu fana “sabalinin lo.” (Mat. 11:29). A y’a yira ko a muɲunin lo kosɔbɛ tuma min na a y’a ka kalandenw ka filiw muɲu. A ka cidenya baara kuru bɛɛ la dugukolo kan, diinan kuntigiw ye tilenbaliyakow kɛ a la ani u y’a kɔrɔfɔ. Nka, Yezu y’o koow bɛɛ muɲu. A y’a dusu suma ani a ye muɲuli kɛ fɔɔ ka taga se a satuma ma. Tuma min na a tun be tɔɔrɔla  kosɔbɛ gwengwe yiri kan, Yezu y’a Faa deli walisa a ka yafa a fagabagaw ma. A ko: “U be min kɛra, u m’o lɔn.” (Luka 23:34). Hali ni Yezu hakili tun ɲagaminin lo ani a tun be tɔɔrɔla kosɔbɛ, a tora k’a dusu suman ani ka muɲuli kɛ!—1 Piyɛri 2:21-23 kalan.

16. An be se k’a yira cogo di ko an dusu sumanin lo ani ko an be muɲuli kɛ?

¹⁶ An be se k’a yira cogo di ko an dusu sumanin lo ani ko an be muɲuli kɛ? Pol ye fɛɛrɛ dɔ yira tuma min na a y’a fɔ ko: “Aw ye hinɛ ɲɔgɔn na ka koɲuman kɛ ɲɔgɔn ye, ka yafa ɲɔgɔn ma i n’a fɔ Ala fana yafara aw ma cogo min na Krista barika la.” (Efɛz. 4:32). Walisa ka yafa tɔɔw ma, an ka ɲi ka kɛ ni dususuman ni muɲuli ye. O la, bɛɛn min be kafo kɔnɔ, o bena sabati.

17. Mun na a kɔrɔtanin lo an k’an dusu suman ani ka muɲuli kɛ?

¹⁷ Jehova b’a ɲini an fɛ an k’an dusu suman ani an ka muɲu ɲɔgɔn kɔrɔ. An ka ɲi ka kɛ n’o jogow ye n’an b’a fɛ ka ɲɛnamaya banbali sɔrɔ (Mat. 5:5; Zaki 1:21). Min yɛrɛ kɔrɔtanin lo, o ye ko n’an be n’o jogow ye, an bena bonya la Jehova kan ani an bena se ka tɔɔw dɛmɛ ka Bibulu ka ladiliw sira tagama.—Gal. 6:1; 2 Tim. 2:24, 25.

18. N’an tɛ mɔgɔ bɔ mɔgɔ la, o b’a yira cogo di ko an be mɔgɔw kanu?

¹⁸ An ye jogo minw lajɛ, u ni kanuya be taga ɲɔgɔn fɛ. Ɲɛyirali fɛ, kalanden Zaki y’a balimaw ladi ko u kana nafolotigi fisaya ni fantan ye. A y’a yira k’o kɛwale ɲɔgɔn bɛnnin tɛ ni Ala ka sariya nin ye: “E k’i tɔɲɔgɔn kanu i n’a fɔ i yɛrɛ.” O kɔ, a y’a fɔ ko: “N’aw be wolomani kɛ ka mɔgɔw fisaya ni ɲɔgɔn ye, aw be hakɛ kɛ.” (Zaki 2:8, 9). Nka, kanuya b’a to an tɛ mɔgɔ bɔ mɔgɔ la hali n’an lamɔcogo, an ka siya wala an lɔyɔrɔ tɛ kelen ye. An man ɲi k’a fɔ daa la dɔrɔn ko an tɛ mɔgɔ bɔ mɔgɔ la. Nka, o ka ɲi ka ye an ka kɛwalew fɛ.

19. Mun na a kɔrɔtanin lo an ka tɔɔw kanu?

¹⁹ Kanuya b’a to fana an be ‘muɲuli kɛ , an be koɲuman kɛ’ ani an t’an “yɛrɛ boɲa.” (1 Kor. 13:4). Walisa an ka to ka Masaya ka kibaro diiman fɔ an sigiɲɔgɔnw ye, fɔɔ an ka muɲu, ka ɲumanya kɛ ani k’an yɛrɛ majigi (Mat. 28:19). O jogow b’a to an be bɛn n’an balimaw bɛɛ ye kafo kɔnɔ. N’an b’an ka kanuya yira o cogo la, nafa juman lo be sɔrɔ o la? O be kɛ sababu ye bɛɛn be kɛ kafo kɔnɔ ani an be bonya la Jehova kan. O be mɔgɔ wɛrɛw lasun fana ka Jehova bato. O kosɔn, Bibulu b’a ka kuma kuncɛ jogo kuraw koo la ni kuma barikaman nunu ye: “Koo bɛɛ la, kanuya ka sɔrɔ aw kɔnɔ, ale sababu la, aw bena se ka ɲɔgɔn minɛ kosɔbɛ.”—Kɔlɔs. 3:14.

20. a) An ka ɲi k’an yɛrɛ ɲininga mun lo la ani mun na do? b) An kɔrɔtɔnin lo wagati juman lo ka se?

²⁰ An kelen kelen bɛɛ ka ɲi k’an yɛrɛ ɲininga ko: “Ne bele ka ɲi ka yɛlɛmani jumanw lo kɛ walisa ka jogo kɔrɔw bɔ n’ yɛrɛ la pewu?” An ka ɲi ka Ala deli n’an dusu bɛɛ ye a k’an dɛmɛ. Miiriyaw ani kɛwale minw be se k’an bali ka Ala ka Masaya sɔrɔ, an k’an jija ka see sɔrɔ u kan (Gal. 5:19-21). An ka ɲi k’an yɛrɛ ɲininga fana ko: “Yala n’ be to ka n’ ka miiriya yɛlɛma walisa ka n’ koo diya Jehova ye wa?” (Efɛz. 4:23, 24). An ye mɔgɔ dafabaliw ye. O kosɔn, an ka ɲi k’an jija tuma bɛɛ ka jogo kuraw don an yɛrɛ la ani k’u mara. Miiri k’a filɛ ɲɛnamaya bena diya cogo min na tuma min na an lɔnbagaw bɛɛ bena jogo kuraw don u yɛrɛ la cogo dafanin na!