1, 2. a) Baara juman lo tun ye Yezu ɲɛnako fɔlɔ ye ani mun na? b) An ka ɲi ka mun lo kɛ walisa ka kɛ Ala ‘baarakɛɲɔgɔn’ ɲumanw ye?

YEZU KRISTA ye miniziya ni cidenya baara kɛ (Mariki 6:3; Ɔrɔm. 15:8). A tun be se o baara fila bɛɛ la koɲuman. Miniziye baara la, a ye baara kɛcogo degi ni baarakɛminanw ye walisa ka fɛɛn dɔw dilan ni lɔgɔ ye. A tun be Ala ka Kuma lɔn kosɔbɛ ani a ye baara kɛ n’o ye a ka cidenya baara la ka mɔgɔw dɛmɛ ka Ala ka Kuma faamu (Mat. 7:28; Luka 24:32, 45). Yezu saan 30, a ye miniziye baara dabila ka cidenya baara daminɛ sabu a tun b’a lɔn k’o lo kɔrɔtanin lo ka tɛmɛ. A ko kuun minw kama Ala y’a ci dugukolo kan, u dɔ ye ka Ala ka Masaya kibaro diiman fɔ mɔgɔw ye (Mat. 20:28; Luka 3:23; 4:43). O baara lo tun ye Yezu ɲɛnako fɔlɔ ye ani a tun b’a fɛ mɔgɔ wɛrɛw fana k’o baara kɛ.—Mat. 9:35-38.

² An bɛɛ tɛ miniziyew ye, nka an bɛɛ ye kibaro diiman waajulikɛlaw ye. O baara kɔrɔtanin lo kosɔbɛ sabu an ni Ala lo ye “baarakɛɲɔgɔnw” ye (1 Kor. 3:9; 2 Kor. 6:4). An b’a lɔn ko Ala “ka kuma bɛɛ ye tiɲɛ ye cogo bɛɛ la.” (Zab. 119:159, 160). O lo kama an b’a fɛ ka kɛ ‘baarakɛlasɔbɛ ye, min be tilen ka tiɲɛ fɔ.’ (2 Timote 2:15 kalan). An b’an jija ka se baara kɛcogo la koɲuman ni Bibulu ye. Ale lo y’an ka baarakɛminan jɔnjɔn ye, an be tɛmɛ min fɛ ka mɔgɔw dɛmɛ ka tiɲɛn faamu Jehova, Yezu ani Ala ka Masaya koo la. Jehova ka ɔriganisasiyɔn ye  baarakɛminan jɔnjɔn dɔw di an ma walisa k’an dɛmɛ ka cidenya baara kɛ koɲuman. An b’a fɛ k’an yɛrɛ degi walisa ka se baara kɛcogo la kosɔbɛ n’o minanw ye. An b’u weele ko an ka kalankɛminanw.

3. Waajuli baara la, an ka ɲi ka sinsin mun lo kan? Kɛwaliw 13:48 b’an dɛmɛ k’o kɛ cogo di?

³ Mun na an t’o minanw weele ko waajulikɛminanw, nka an b’u weele ko kalankɛminanw? Ka “waajuli” kɛ, o kɔrɔ ko ka kibaro diiman fɔ. Nka ka mɔgɔ “kalan,” o ye ka kibaro diiman ɲɛfɔ mɔgɔ ye walisa a be min mɛnna, a k’o faamu ani k’o sira tagama. Duniɲa laban surunyana minkɛ, an ka ɲi k’an jija ka bibulukalan daminɛ ni mɔgɔw ye ani k’u kalan tiɲɛn koo la. O kɔrɔ ko minw bɛɛ “labɛnnin lo ka sɔn ɲɛnamaya banbali ma,” an ka ɲi k’an jija k’olu lo ɲini ani k’u dɛmɛ u ka kɛ Jehova batobagaw ye.—Kɛwaliw 13:44-48 kalan. *

4. Minw bɛɛ “labɛnnin lo ka sɔn ɲɛnamaya banbali ma,” an be se k’olu sɔrɔ cogo di?

⁴ Minw bɛɛ “labɛnnin lo ka sɔn ɲɛnamaya banbali ma,” an be se k’olu sɔrɔ cogo di? Saan kɛmɛkulu fɔlɔ la, kerecɛnw tun b’u sɔrɔ waajuli dɔrɔn lo sababu fɛ. Yezu tun y’a fɔ a ka kalandenw ye ko: “N’aw sera dugu min kɔnɔ, duguba lo wo, dugudennin lo wo, mɔgɔ min sɔɔn ka ɲi, aw y’o tigi yɔrɔ ɲini.” (Mat. 10:11). An fana ka ɲi k’o ɲɔgɔn lo kɛ. Mɔgɔ minw ye kuncɛbaw ye, u kɔnɔ gwɛnin tɛ ani u t’u mako don Alako la, an jigi t’a la k’olu bena sɔn kibaro diiman ma. Mɔgɔ kɔnɔgwɛw, mɔgɔ majigininw ani minw b’a fɛ ka tiɲɛn lɔn sɔbɛ la, an b’olu lo yɔrɔ ɲini. Yezu ka miniziye baara la, walisa ka daaw, zuuw n’a ɲɔgɔnnaw dilan, a tun b’a daminɛ ka yiri ɲuman lo ɲini. O kɔ, a tun be tɛmɛ a ka baarakɛminanw n’a ka lɔnniya fɛ k’o fɛɛnw dilan. Bi, an fana b’a daminɛ ka mɔgɔ kɔnɔgwɛw lo ɲini. O kɔ, an be tɛmɛ an ka kalankɛminanw n’an ka lɔnniya fɛ k’u dɛmɛ u ka kɛ Krista ka kalandenw ye.—Mat. 28:19, 20.

5. An ka ɲi ka mun lo lɔn an ka kalankɛminanw koo la? Ɲɛyirali dɔ fɔ. (Jaa lajɛ, barokun daminɛ na.)

⁵ Minan kelen kelen bɛɛ n’a ka baara. An k’a filɛ Yezu tun be baara kɛ ni minan minw ye a ka miniziye baara la. * A mako tun be minanw na walisa ka yiri suma, ka nɔɔ bila a kan, ka yiri tigɛ, k’a sɔgɔ, k’a lɛsɛ ani ka lɔgɔw gwengwe ɲɔgɔn na. An ka kalankɛminanw kelen kelen bɛɛ fana n’u ka baara. An be se ka baara kɛ n’o minan jɔnjɔnw ye cogo di?

6, 7. a) I delila ka baara kɛ ni ladɛrɛsi sɛbɛ ye cogo di? b) Kuun jumanw kama an be baara kɛ ni lajɛnw welelisɛbɛ ye?

⁶ Ladɛrɛsi sɛbɛw. U ka dɔgɔ dɔgɔ, nka baarakɛminan ɲumanw lo an be se ka tɛmɛ minw fɛ k’an kofɔ mɔgɔw ye ani k’u ɲɛsin an ka site web ma. O site kan, u bena koo caaman faamu an koo la ani u be se k’a ɲini yen ka bibulukalan kɛ. Mɔgɔ 400000 ni kɔ lo y’a ɲini yen ka bibulukalan kɛ n’an ye. Mɔgɔ caamanba b’o kɛ loon o loon. I be se ka ladɛrɛsi sɛbɛ damanin to i kun walisa ka tɛmɛ sababuw bɛɛ fɛ ka seereya kɛ i ka loon o loon baaraw sen fɛ.

⁷ Welelisɛbɛw. A fɔra an ka lajɛnw welelisɛbɛ kɔnɔ ko: “An b’i weele ka na bibulukalan kɛ ni Jehova Seerew ye.” O kɔ, a fɔra ko mɔgɔ be se k’o kɛ “an ka lajɛnw na” “wala ni kalanfa dɔ ye.” O  cogo la, o welelisɛbɛ b’an kofɔ mɔgɔw ye. Ka fara o kan, “mɔgɔ minw b’a lɔn k’u mako be Ala la,” a b’olu jija u ka bibulukalan kɛ n’an ye (Mat. 5:3). Mɔgɔ sɔnna bibulukalan na wo, a ma sɔn wo, a be se ka na an ka lajɛnw na. N’a nana, a bena a ye a be se ka koo caaman minw faamu Bibulu kɔnɔ.

8. Mun na a kɔrɔtanin lo mɔgɔw ka na an ka lajɛnw na hali ni siɲɛ kelen lo? Ɲɛyirali dɔ fɔ.

⁸ A kɔrɔtanin lo an ka to ka mɔgɔw weele ka na an ka lajɛnw na, hali n’o tigi bena na siɲɛ kelen le. N’u nana, u bena a ye ko an be mɔgɔw kalan Bibulu ka tiɲɛnkalanw lo la ani an be mɔgɔw dɛmɛ ka Ala lɔn. Ngalon diinanw kɔni t’o kɛ (Ezayi 65:13). Ray n’a muso Linda y’o lo faamu a saan naani ye nin ye. U be Etazini. U tun lanin lo Ala la ani u tun b’a fɛ k’a lɔn koɲuman. O kama, u y’a latigɛ ka taga u ka dugu ka legilizi kelen kelen bɛɛ la. U y’o kɛ saan caaman kɔnɔ sabu legiliziw ka ca kosɔbɛ. U y’a latigɛ fana ko legilizi min bena sarati fila dɔw dafa, u bena kɛ o mɔgɔw ye. A fɔlɔ, u ka ɲi ka lɔnniya dɔ sɔrɔ o legilizi la. A filanan, legilizidenw ka fanidoncogo ka ɲi k’a yira k’u ye Ala sagokɛlaw ye. Ray n’a muso Linda jigi tigɛra pewu sabu u ma lɔnniya si sɔrɔ ani legilizidenw ka fanidoncogo tun bɛnnin tɛ fewu! Legilizi min tun b’u ka lisi laban na, u bɔnin kɔ yen, Linda tagara baara la. Ray kɔsegitɔ soo, a ye Masaya Boon dɔ ye ani a y’a miiri ko: “To n’ ka don k’a filɛ fɛɛn min be kɛra yen.” Tiɲɛn na, a ye min mɛn yen, a ma deli k’o ɲɔgɔn mɛn yɔrɔ si! Mɔgɔw y’a minɛ ka ɲɛ teriya la ani bɛɛ ka fanidoncogo tun ka ɲi. Ray tagara sigi ɲɛfɛ ani a ye min mɛn, o diyara a ye! O b’an hakili jigi mɔgɔ dɔ koo la ciden Pol ye min kofɔ. Siɲɛ fɔlɔ min na o tigi nana lajɛn na, a ko: “Tiɲɛ na, Ala be n’aw ye!” (1 Kor. 14:23-25). Ray tora ka na lajɛnw na dimansi o dimansi. O kɔ, a y’a daminɛ ka na lajɛnw bɛɛ la. Linda fana y’a daminɛ ka na lajɛnw na. U ye bibulukalan kɛ ani ka batize, hali k’a sɔrɔ u fila bɛɛ tun be ni saan 70 ni kɔ ye.

9, 10. a) Mun na a ka nɔgɔ ka baara kɛ ni sɛbɛninw ye? b) Baara be kɛ cogo di ni sɛbɛnin nin ye: Ala ka Masaya ye mun lo ye?

⁹ Sɛbɛninw. Sɛbɛnin seegi lo b’an ka kalankɛminanw cɛma. A ka nɔgɔ ka baara kɛ n’u ye ani u b’an dɛmɛ koɲuman ka baro daminɛ ni mɔgɔw ye. An y’u la fɔlɔ sɔrɔ saan 2013. Kabi o wagati, u deen miliyari duuru ɲɔgɔn lo dilanna! U bɛɛ cogo ye kelen ye. O kama n’i be se baara kɛcogo la ni kelen ye, i bena se ka baara kɛ ni tɔɔw bɛɛ ye! I be se ka baro daminɛ n’u ye cogo di?

¹⁰ An k’a jati ko i b’a fɛ ka baara kɛ ni sɛbɛnin nin ye: Ala ka Masaya ye mun lo ye? Ɲiningali min be ɲɛɛ fɔlɔ kan, o yira i lamɛnbaga la ani a ɲininga ko: “Ala ka Masaya ye mun lo ye do? Ele fɛ . . . ?” O kɔ, jaabili saba minw dira, a ɲininga ale bena min sugandi. A ka jaabili mana kɛ min o min ye, sanni i k’a fɔ ko a ka ɲi wala a man ɲi, sɛbɛ yɛlɛ yɔrɔ nin na: “Bibulu b’a fɔ ko.” Vɛrise minw kofɔra yen, o kalan a ye, Daniyɛli 2:44 ani Ezayi 9:5. N’a bɛnnin lo, taga ni baro ye ɲɛ. Baro kuncɛtɔ, ɲiningali nin yira a la sɛbɛ kɔɔ kan: “Ɲɛnamaya bena kɛ cogo di Ala ka Masaya tuma na?” O ɲiningali be sɔrɔ cɛtigɛ nin jukɔrɔ: “Miiri k’a filɛ.” I be se ka na o ɲiningali jaabi siɲɛ wɛrɛ. N’i segira ka na, i be se ka kitabunin Kibaro diiman min bɔra Ala yɔrɔ kalansen 7nan kofɔ a ye. O kitabunin y’an ka minan dɔ ye an be tɛmɛ min fɛ ka bibulukalan daminɛ ni mɔgɔw ye.

11. An ka zurunaliw labɛnna kuun juman lo kama ani an ka ɲi ka mun lo lɔn u koo la?

¹¹ Zurunaliw. Duniɲa kɔnɔ, zurunali si hakɛ ma se Kɔrɔsili Sangaso ni Réveillez-vous ! ta ma. Zurunali si tɛ bayɛlɛma kaan caaman na ka se u ma fana. Mɔgɔw b’o zurunaliw kalan jamana caaman kɔnɔ. O kama, u be labɛn walisa u ka diya mɔgɔw ye yɔrɔ bɛɛ. An ka ɲi ka baara kɛ n’u ye walisa ka mɔgɔw dɛmɛ u k’a lɔn yɔrɔ min na u be se ka ladili ɲumanw sɔrɔ bi. Walisa ka se k’o kɛ, an ka ɲi k’a lɔn fɔlɔ o zurunaliw ɲɛsinna mɔgɔ sifa minw ma.

12. a) Réveillez-vous ! labɛnna mɔgɔ jumanw lo kama ani kuun juman kama? b) I ye baara ɲuman minw kɛ ni Réveillez-vous ! ye kɔsa la, u dɔ lakali.

¹² Réveillez-vous ! Ale labɛnna mɔgɔ nunu lo kama: Minw tɛ bɛrɛ lɔn wala u tɛ foyi lɔn Bibulu koo la. N’a sɔrɔ u tɛ foyi lɔn kerecɛnw ka kalanw koo la wala u yɛrɛ lanin tɛ diinanko la. A be se ka kɛ fana k’u t’a lɔn ko Bibulu be se k’u dɛmɛ bɛrɛbɛrɛ. Réveillez-vous ! kuun jɔnjɔn ye k’a kalanbagaw dɛmɛ u ka la a la ko Ala be yen (Ɔrɔm. 1:20; Eburuw 11:6). A kuun ye fana k’u dɛmɛ u ka la a la ko Bibulu ye “Ala ka kuma yɛrɛ yɛrɛ” lo ye (1 Tes. 2:13). Saan 2018 la, Réveillez-vous ! deen saba lo be yen. U barokunw ye ko: “Le chemin du bonheur,” “12 clés du bonheur familial” ani “De l’aide pour les endeuillés.”

13. a) An be waajuli kɛ ni Kɔrɔsili Sangaso min ye, a labɛnna mɔgɔ jumanw lo kama? b) I ye baara ɲuman minw kɛ ni Kɔrɔsili Sangaso ye kɔsa la, u dɔ lakali.

¹³ Kɔrɔsili Sangaso. An be waajuli kɛ ni min ye, ale labɛnna mɔgɔ nunu lo kama: Minw be bonya la Ala ni Bibulu kan. A kuun jɔnjɔn ye ka Bibulu ka kalanw ɲɛfɔ u ye. N’a sɔrɔ o mɔgɔw be dɔ lɔn Bibulu koo la, nka u tɛ a ka kalanw faamu koɲuman. (Ɔrɔm. 10:2; 1 Tim. 2:3, 4). Saan 2018 la, Kɔrɔsili Sangaso deen saba lo be yen. U barokunw ye ko: “La Bible: actuelle ou dépassée?,” “Que nous réserve l’avenir?” ani “Dieu se soucie-t-il de vous?”

14. a) Videwo naani minw b’an ka kalankɛminanw cɛma, olu kuun ye mun lo ye? b) I ye baara ɲuman minw kɛ n’o videwow ye, u dɔ lakali.

¹⁴ Videwow. Yezu ka tile la, miniziyew tun be baara kɛ ni bolola baarakɛminanw dɔrɔn lo ye. Nka bi, u be baara kɛ ni mansinw ye i n’a fɔ yirisɔgɔnan, lasi, gwengwenan, yirilɛsɛnan ani a ɲɔgɔnnaw. O cogo kelen na, ka fara sɛbɛw kan, videwo ɲumanw b’an fɛ an be minw yira mɔgɔw la. Videwo naani b’an ka kalankɛminanw cɛma: Mun na i ka ɲi ka bibulukalan kɛ? An be bibulukalan kɛ ni mɔgɔw ye cogo di? Mun lo be kɛ an ka Masaya boonw kɔnɔ? ani Jehova Seerew: An ye mɔgɔ sifa jumanw lo ye? Videwo minw tɛ se miniti fila ma, olu ka ɲi ɲɔgɔnyeko fɔlɔ la. Minw be mɛɛn dɔɔni, an be se k’olu yira viziti kuraw la ani mɔgɔ wɛrɛw la minw labilanin lo. Videwow ye kalankɛminan ɲumanw ye. U be se ka mɔgɔw lasun ka bibulukalan kɛ n’an ye ani ka na lajɛnw na.

15. Mɔgɔ mana an ka videwo dɔ filɛ a ka kaan na, o be se ka nɔɔ juman lo to a kan? Ɲɛyirali dɔw fɔ.

¹⁵ An ka ɲɛyirali dɔ lajɛ. Balimamuso dɔ ye muso dɔ kunbɛn min be bɔ Mikronezi ani a be yapuwakan fɔ. A ye videwo nin yira a la a ka kaan na: Mun na i ka ɲi ka bibulukalan kɛ? Tuma min na videwo daminɛna, muso ko: “Nin tɛ tiɲɛn ye, n’ ka kaan lo be fɔra! A tigi kumacogo  fɛ, n’ be se k’a fɔ ko an ka guun mɔgɔ dɔ lo. A be n’ ka kaan lo fɔra!” O kɔ, a ko fɛɛn minw bɛɛ be jw.org kan a ka kaan na, a bena u lajɛ (Kɛwaliw 2:8, 11 lajɛ). Ɲɛyirali wɛrɛ: Balimamuso dɔ be Etazini ani o videwo be sɔrɔ cogo min na ɛntɛrɛnɛti kan a ka kaan na, a y’o ci a belenden ma jamana wɛrɛ la. A belenden y’o videwo filɛ ani ka e-mail ci a ma ko: “Videwo yɔrɔ min b’a fɔ ko Sutana lo be duniɲa nin marala, o lo diyara n’ ye kosɔbɛ. N’ y’a ɲini u ka na bibulukalan kɛ ni n’ ye.” O cɛɛ be jamana min na, bali sigira an ka baara kan!

16. A fɔ kitabunin nunu labɛnna kuun min kama: a) Mɛnni kɛ Ala fɛ ani to niin na fɔɔ abada. b) Kibaro diiman min bɔra Ala yɔrɔ. c) Jɔn lo be Jehova sago kɛra bi?

¹⁶ Kitabuninw. Dɔw tɛ se kalan na ka ɲɛ wala an ka gafe si tɛ yen u ka kaan na. An be se k’olu kalan tiɲɛn koo la cogo di? An be se k’o kɛ ni sɛbɛ nin ye: Mɛnni kɛ Ala fɛ ani to niin na fɔɔ abada. * Sɛbɛ nin fana b’an dɛmɛ koɲuman ka bibulukalanw daminɛ: Kibaro diiman min bɔra Ala yɔrɔ. Barokun 14 minw b’a kɔgolo kan, i be se k’u yira i lamɛnbaga la. A to a k’a sugandi min ka di a ye. O kɔ, bibulukalan daminɛ o barokun kan. I y’o ɲɔgɔn kɛ ka ye i ka viziti kuraw la wa? Kitabunin sabanan min b’an ka kalankɛminanw cɛma, o ye nin ye: Jɔn lo be Jehova sago kɛra bi? A be Bibulu kalandenw dɛmɛ u k’an ka ɔriganisasiyɔn lɔn. N’i b’a fɛ k’a lɔn baara be kɛ n’o kitabunin ye cogo min na, sɛbɛ nin lajɛ: Kerecɛnw ka ɲɛnamaya n’u ka waajuli baara: Lajɛnsɛbɛ, saan 2017, marisikalo ta.

17. a) Kalankɛ gafe kelen kelen bɛɛ labɛnna kuun jɔnjɔn juman lo kama? b) Minw be ɲɛtaga kɛ ani ka batize, u mako be mun lo la ani mun na?

¹⁷ Gafew. N’i ye bibulukalan daminɛ ni mɔgɔ dɔ ye kitabunin dɔ kɔnɔ, wagati min k’i diya, i be se k’o kalan yɛlɛma gafe nin kɔnɔ: Bibulu b’an kalan mun lo la? O gafe be mɔgɔw dɛmɛ ka Bibulu ka kalan jɔnjɔnw faamu. Ni kalanden tilara o gafe la ani a be ɲɛtaga kɛra, i be se ka kalan kɛ n’a ye gafe nin kɔnɔ: I be se ka to Ala ka kanuya la cogo min na. O gafe bena a dɛmɛ k’a lɔn cogo min na a be se ka Bibulu ka sariyakolow labato loon o loon. A to i hakili la ko hali ni kalanden ye batɛmu ta, a mako bele b’a la i ka bibulukalan kɛ n’a ye fɔɔ k’o gafe fila ban. O bena a dɛmɛ ka limaniya barikaman sɔrɔ ani ka to ka Jehova bato kantigiya la.—Kɔlɔsikaw 2:6, 7 kalan.

18. a) 1 Timote 4:16 b’an jija mun lo la ani nafa juman lo b’o la? b) An ka laɲinita ye mun lo ye n’an be baara kɛra n’an ka kalankɛminanw ye?

¹⁸ Komi an ye Jehova Seerew ye, “kibaru diman . . . min ye tiɲɛkuma ye,” an ka ɲi k’o fɔ mɔgɔw ye. O be se k’a to mɔgɔ be ɲɛnamaya banbali sɔrɔ (Kɔlɔs. 1:5; 1 Timote 4:16 kalan). An mako be kalankɛminan minw na walisa k’o cii dafa, ɔriganisasiyɔn y’u di an ma (Koorilen nin lajɛ: “ Kalankɛminanw”). An ka banba ka to ka baara ɲuman kɛ n’u ye. An kelen kelen bɛɛ be se k’a latigɛ an bena baara kɛ ni kalankɛminan min ye ani an bena o kɛ tuma min na. Nka an k’a to an hakili la ko an ka laɲinita tɛ ka sɛbɛw tilantilan dɔrɔn. Minw t’u mako don, an man kan ka sɛbɛ di olu ma. An b’a fɛ ka mɔgɔ nunu lo dɛmɛ u ka kɛ Krista ka kalandenw ye: Minw kɔnɔ gwɛnin lo, u majiginin lo, u b’a fɛ ka tiɲɛn lɔn sɔbɛ la Ala koo la ani u “labɛnnin lo ka sɔn ɲɛnamaya banbali ma.”—Kɛw. 13:48, NW; Mat. 28:19, 20.