Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Yezu ye ladili min di Matiyo 18:15-17 kɔnɔ, a tun kaan be jurumu sifa juman lo ma?

Bɛnbaliyako dɔ be se ka kɛ balima fila cɛ ani olu yɛrɛ be se k’o koo ɲɛnabɔ. Yezu tun kaan b’o bɛnbaliyako ɲɔgɔn lo ma. Nka, o jurumu tɛ koo dennin ye, sabu n’o koo ma ɲɛnabɔ a be se k’a to o tigi ka gwɛn ka bɔ kafo kɔnɔ. Ɲɛyirali fɛ, o jurumu be se ka kɛ nafigiya wala nanbarako ɲɔgɔn ye.—w16.05-F ɲɛɛ 7.

I be se ka mun lo kɛ walisa ka nafa sɔrɔ kosɔbɛ Bibulu kalan na?

Bibulu kalan ni kɔnɔgwɛ ye. A filɛ i be se ka kalan min sɔrɔ o la ani k’a sira tagama. I yɛrɛ ɲininga ko: “Ne be se ka baara kɛ n’o ye ka mɔgɔw dɛmɛ cogo di?” I ye min kalan, sɛgɛsɛgɛri kɛ o kan an ka gafew kɔnɔ.—w16.05-F ɲɛɛ 24-26.

Hali n’an lanin b’a la ko sukununi bena kɛ, yala kojugu lo an dusu ka kasi an ka mɔgɔ dɔ ka saya kosɔn wa?

Hali n’an lanin b’a la ko sukununi bena kɛ, o lo tɛna an ka dimi ban n’an ka mɔgɔ dɔ sara. Ɲɛyirali fɛ, Ibrayima ye Sara suu kasi (Zɛn. 23:2). Wagati dɔ bena se, dɔ bena bɔ i ka dusukasi la.—wp16.3-F ɲɛɛ 4.

Cɛɛ min kofɔra Ezekiyɛli sapitiri 9 kɔnɔ ni sɛbɛninkɛminanw ye a bolo ani kɛlɛkɛminanw be cɛɛ wɔɔrɔ minw bolo, olu ye jɔnw lo tagamasiɲɛ ye?

Mɛlɛkɛ dɔw ye dɛmɛ don ka Zeruzalɛmu halaki. U fana bena dɛmɛ don ka mɔgɔ juguw halaki Arimagedɔn kɛlɛ la. O cɛɛw ye olu lo tagamasiɲɛ ye. Bi tilew la, sɛbɛninkɛminanw be cɛɛ min bolo, o ye Yezu lo tagamasiɲɛ ye. Minw bena kisi, Yezu be tagamasiɲɛ bila olu kan.—w16.06-F ɲɛɛ 16-17.

Bibulu kisira farati jumanw lo ma?

Bibulu kisira farati 3 bolo: 1) U tun be sɛbɛri kɛ fɛɛn minw kan i n’a fɔ papirus ani golo, u tun ka teli ka tiɲɛ joona, 2) Jamana kuntigiw ani diinan kuntigiw y’a ɲini ka a tunu pewu 3) dɔw y’a ɲini k’a kɔnɔnakow yɛlɛma.—wp16.4-F ɲɛɛ 4-7.

Kerecɛn be se k’a ka ɲɛnamaya kɛ cogo nɔgɔman na cogo di?

A filɛ i mako be fɛɛn minw na tiɲɛn na. I mako tɛ fɛɛn minw na, kana u san. Jatiminɛ kɛ i ka sɔrɔ n’i ka musakaw koo la. I makoya tɛna se fɛɛn minw ma, u to yen ani i ka juruw sara. I be lɛri da min kɛ baara la, dɔ bɔ o la ani a filɛ i be se ka dɔ fara i ka waajuli baara kan cogo min na.—w16.07-F ɲɛɛ 10.

Bibulu b’a fɔ ko mun lo nafa ka bon ni sanu ni warigwɛ ye?

Zɔbu 28:12, 15 b’a fɔ ko hakilitigiya min be bɔ Ala yɔrɔ, o nafa ka bon ni sanu ani warigwɛ ye. N’i be hakilitigiya ɲinina, banba k’i majigi ani k’i ka limaniya sabati tuma bɛɛ.—w16.08-F ɲɛɛ 18-19.

A bɛnnin lo balimacɛ k’a bonbosi to yen wa?

Yɔrɔ dɔw la, n’i ka bonbosi saniyanin lo ani n’a filɛ ka di, o bɛnnin lo ani o tɛ mɔgɔw bali ka Masaya kibaro diiman lamɛn. O n’a ta bɛɛ, balimacɛ dɔw be se k’a latigɛ ko u tɛna u bonbosi to yen (1 Kor. 8:9). Nka jamana wɛrɛw la, a bɛnnin tɛ kerecɛnw k’u bonbosi to yen.—w16.09-F ɲɛɛ 21.

Bibulu be maana min lakali Dawuda ni Goliyati koo la, mun na an be se ka la o la?

An ka tile la, cɛɛ min ka jan ni bɛɛ ye, ale janya sera mɛtɛrɛ 2 ani sentimɛtɛrɛ 70 ma (2,70 m). Goliyati tun ka jan n’o cɛɛ ye sentimɛtɛrɛ 15 dɔrɔn. Sɛbɛri kɔrɔw ye min fɔ Dawuda ka somɔgɔw koo la ani Yezu yɛrɛ ye min fɔ Dawuda koo la, o b’a yira ko Dawuda tun be yen tiɲɛn tiɲɛn na. Sɛgɛsɛgɛri minw kɛra dugu dɔw la, u b’o lo yira fana.—wp16.5-F ɲɛɛ 13.

Faranfasi juman lo be lɔnniya, faamuyali ani hakilitigiya cɛ?

Lɔnniya be mɔgɔ min fɛ ale be kunnafoniw wala koo caaman lɔn. Faamuyali be mɔgɔ min fɛ, ale be jatiminɛ kɛ k’a filɛ jɛn min be koow ni ɲɔgɔn cɛ. Nka, hakilitigiya be mɔgɔ min fɛ, ale be se ka lɔnniya ni faamuyali fara ɲɔgɔn kan ani ka baara ɲuman kɛ n’o ye.—w16.10-F ɲɛɛ 18.