Adamadenw ka jɛnɲɔgɔnya
N’i be ladiliw ɲinina jɛnɲɔgɔnya koo la, yala i bena i ɲɛsin Bibulu ka ladiliw lo ma fɔlɔ wala i bena i ɲɛsin fɛɛn wɛrɛ lo ma? Lɔnnikɛlaw be min fɔ jɛnɲɔgɔnya koo la bi, an k’o suma ni Bibulu ka ladiliw ye.
Ɛndi
Sɛgɛsɛgɛri dɔ kɛra saan 2014 la. O b’a yira ko kanbele ni sunguru minw sii ye saan 18-25, olu kɛmɛ kan mɔgɔ 61 b’a miiri ko ka cɛnimusoko kɛ k’a sɔrɔ i ma furu fɔlɔ o tɛ basi ye Ɛndi jamana na. Bombay dugu la, dɔgɔtɔrɔcɛ dɔ y’a fɔ ko: “Kanbelew ni sunguruw be jarabikow kɛ k’a sɔrɔ u tɛ miiri furu koo la. A be se ka kɛ suu kelen koo ye, wagati damanin wala u be se ka sigi ɲɔgɔn fɛ i ko furuɲɔgɔnmaw k’a sɔrɔ u ma furu. O bɛɛ la, u yɛrɛ tɛ miiri furuko la.”—Hindustan Times.
MIIRI K’A FILƐ: Cɛnimusoko banaw, dusukasiko minw ɲɛsinna jarabikow ma, o koow ka teli ka jɔn lo sɔrɔ? Mɔgɔ minw be cɛnimusokow kɛ ka sɔrɔ u ma furu wala minw b’o kɛ furu kɔnɔ?—1 Korɛntikaw 6:18.
Danemarki
Mɔgɔ minw be sɔsɔli kɛ n’u somɔgɔw ye tuma bɛɛ, o tigiw ka teli ka sa k’a to u sii be saan 35 ni 50 ɲɔgɔn cɛ. Copenhague ka inivɛrsite ka sɛgɛsɛgɛrikɛlaw ye mɔgɔ 10 000 ɲɔgɔn kɔrɔsi minw be n’o sanda ɲɔgɔn ye. U y’o kɛ saan 11 ni kɔ kɔnɔ. U y’a yira ko mɔgɔ minw ka teli ka sɔsɔli kɛ n’u teri wala u somɔgɔ dɔ ye olu ka teli ka sa joona ka tɛmɛ tɔɔw kan. O sɛgɛsɛgɛrikɛlaw dɔ y’a fɔ ko see b’an ye ka dusukasi, niin degun ani kɛlɛkow ɲɛnabɔ. A ko “o be se ka jati fɛɛrɛ ɲuman ye min b’a to mɔgɔ kana sa joona.”
BIBLE B’A FƆ KO: “Mɔgɔ min b’a yɛrɛ kumacogo kɔlɔsi, o tigi ye kolɔnbaga ye. Mɔgɔ min sabalinin be, o tigi ye hakilitigi ye.”—Talenw 17:27.
Etazini
Sɛgɛsɛgɛri dɔ kɛra Louisiane ka ɲɛsin mɔgɔ furunin kura 564 ma. A y’a yira ko minw be teriya kɛ furu kama, k’a lalɔ ka tila k’a daminɛ tugun, olu ka furu ka teli ka sa saan duuru u furunin kɔ. U fana ka teli ka kɛlɛ ani u ka furu t’u wasa.
BIBLE B’A FƆ KO: “Ala ye min jɛn ka kɛ kelen ye, mɔgɔ si kana o faran.”—Matiyo 19:6.
