SALON duniɲa kuru bɛɛ kɔnɔ, balimacɛ waa caaman kɛra diinan mɔgɔkɔrɔw wala kɔrɔsigi cidenw ye. N’i y’u dɔ ye, siga t’a la, i ninsɔndiyanin lo i ka nɛɛma baara kura kosɔn.

N’i be hami dɔɔni o koo la, a be faamu. Jason ye diinan mɔgɔkɔrɔ ye ani kanbele lo. A ko: “Tuma min na ne kɛra diinan mɔgɔkɔrɔ ye, n’ tun b’a miiri ko n’ ka kunkanbaaraw ka ca kojugu.” Tuma min na Jehova ye kunkanbaaraw kalifa Musa ni Zeremi ma, u tun b’a miiri k’u tɛna se k’u dafa (Ɛkiz. 4:10; Zer. 1:6). N’ele fana be n’o miiriya ɲɔgɔn ye, i be se ka see sɔrɔ o kan cogo di ani ka to ka ɲɛtaga kɛ? An ka Timote ka koo lajɛ.—Kɛw. 16:1-3.

N’a sɔrɔ Timote tun be ni saan 20 ɲɔgɔn ye tuma min na Pol y’a fɔ a ye ko a k’ale bila sira a ka voyaziw la. N’a sɔrɔ a tun lanin t’a yɛrɛ la ani a tun be siran k’a ka kunkanbaara kura dafa (1 Tim. 4:11, 12; 2 Tim. 1:1, 2, 7). Nka saan 10 ɲɔgɔn o kɔ, Pol y’a fɔ Filipi kafo ye ko: “N’a kɛra an Matigi Yezu sago ye, ne jigi b’a la ko ne bena Timote ci aw fɛ . . . Ale kelen le be hami aw ka koo la i n’a fɔ ne.”—Filip. 2:19, 20.

Mun lo y’a to Timote kɛra diinan mɔgɔkɔrɔ ɲuman ye ten? An ka koo 6 lajɛ an be se k’a ladegi minw na.

1. A tun b’a janto tɔɔw la kosɔbɛ. Pol y’a fɔ Filipikaw ye ko: “[Timote] kelen le be hami aw ka koo la.” (Filip. 2:20). Timote tun b’a janto tɔɔw la tiɲɛn na. A tun b’a fɛ u k’u magwɛrɛ Jehova la ani a tun b’a yɛrɛ di k’u dɛmɛ.

An kana kɛ i n’a fɔ mobili bolila dɔ min ka laɲinita ye ka se a tagayɔrɔ la wagati tigitigi dɔ la ani minw tɛ lɛri la, a be taga k’olu to yen. William ye diinan mɔgɔkɔrɔ ye kabi saan 20 ni kɔ ani mɔgɔw b’a bonya kosɔbɛ. Kunkanbaara kalifara balimacɛ minw ma kura ye, a b’olu ladi ko: “Balimaw kanu. Sinsin u makoyaw lo kan, kana sinsin kafo ka koow labɛncogo kan.”

2. Waajuli baara lo tun y’a ɲɛnako fɔlɔ ye. Pol y’a yira ko Timote ni tɔɔw tun tɛ kelen ye. A ko: “Mɔgɔ tɔɔ nunu, olu bɛɛ be miiri u yɛrɛ ka koo la dama, u te miiri Yezu Krista ka koo la.” (Filip. 2:21). Pol y’o kumaw sɛbɛ k’a to Ɔrɔmu. A y’a kɔrɔsi k’o yɔrɔ balimacɛw bolo tun degunnin lo kosɔbɛ u tɔgɔlakow la. U tun tɛ u seko bɛɛ kɛ Jehova ka baara la. Nka Timote tun tɛ ten! N’ale tun ye sababu sɔrɔ ka kibaro diiman jɛnsɛn, a tun be koow kɛ i n’a fɔ Ezayi. Ale ko: “Ne filɛ nin ye. Ne ci.”—Ezayi 6:8.

I be se ka mun lo kɛ walisa i kana i tɔgɔlakow bila Alakow ɲɛ? A fɔlɔ, a latigɛ fɛɛn min y’i ɲɛnako fɔlɔ ye. Pol ko: “Aw k’a filɛ fɛɛn minw kɔrɔtanin lo kosɔbɛ.” (Filip. 1:10, NW). Fɛɛn min kɔrɔtanin lo Ala fɛ, o kɛ i ɲɛnako fɔlɔ ye. A filanan, ɲɛnamaya kɛ cogo  nɔgɔman na. Fɛɛn minw be se k’i ka wagati tiɲɛ ani k’i sɛgɛn, kana u kɛ. Pol ye Timote jija ko: “I ka boli kamalenya negew ɲɛ . . . ka tilennenya ni dannaya ni kanuya ani hɛrɛ ɲini.”—2 Tim. 2:22.

3. A jijanin tun lo Ala ka baara la. Pol ye Filipikaw hakili jigi ko: “[Timote] y’a ka mɔgɔsɔbɛya yira cogo min na, aw b’o lɔn. A y’a yɛrɛ di ka baara kɛ ni ne ye, kibaru diman ka ɲataga kosɔn, i n’a fɔ deen be baara kɛ n’a faa ye cogo min na.” (Filip. 2:22). Timote tun tɛ salabagatɔ ye. A ye baara kɛ ni Pol ye. O y’a to, u ye ɲɔgɔn kanu kosɔbɛ!

Baara ka ca Jehova ka jɛnkulu kɔnɔ. O baaraw b’an ninsɔndiya sɔbɛ la ani o b’a to an b’an magwɛrɛ an balimaw na kosɔbɛ. O la, a latigɛ ka “taga ɲa Matigi ka baara la tuma bɛɛ.”—1 Kor. 15:58.

4. A ye min faamu, a y’o sira tagama. Pol ye bataki sɛbɛ Timote ma ko: ‘I tugura ne la ne ka kalan ni ne taama cogo ni ne ka ko latigɛlenw ni ne ka dannaya ni ne ka muɲuli ni ne ka kanuya ni ne ka jijali la.’ (2 Tim. 3:10, ABM). Timote ye min faamu, a y’o kɛ. O kama, a tun be saratiw dafa ka kunkanbaara wɛrɛw sɔrɔ.—1 Kor. 4:17.

Yala i teri sɔbɛ dɔ ka kɔrɔ n’i ye, kolɔnbaga lo ani i be se k’a ladegi wa? N’o tɛ, dɔ ɲini. Tom ye diinan mɔgɔkɔrɔ ye a mɛɛnna. A ko: “Diinan mɔgɔkɔrɔ kolɔnbaga dɔ y’a mako don ne la kosɔbɛ ani a ye fɔrɔmasɔn ɲuman di n’ ma. N’ tun be ladiliw ɲini a fɛ ani k’u sira tagama. O y’a to n’ tun tɛ siran i ko fɔlɔ la.”

5. A tora k’a yɛrɛ degi. Pol ye Timote jija ko: “I yɛrɛ dege Ala ɲɛsiran kow la.” (1 Tim. 4:7, ABM). Farikoloɲanagwɛla ka ɲi k’a yɛrɛ degi, hali n’a be ni mɔgɔ dɔ ye min b’a degi. Pol ye Timote jija ko: “Jija ka Ala ka kuma fɔ jama cɛma, k’u waaju, k’u kalan fana. I ka kan ka olu to i dusu la, k’o minɛ ka ɲa kosɔbɛ. O la, mɔgɔw bɛɛ ben’a ye ko i jijanin lo.”—1 Tim. 4:13-15.

Ele fana ka ɲi ka to k’i ka setigiya fisaya. To ka ɲɛtaga kɛ Alako ta faan fɛ ani banba ka ɔriganisasiyɔn ka cikan kuraw lɔn k’u sira tagama. Ka fara o kan, kana la i yɛrɛ la kojugu ani k’a miiri ko lɔnniya b’i fɛ ka koo bɛɛ ɲɛnabɔ hali n’i ma sɛgɛsɛgɛri kɛ koɲuman. I ko Timote, “i yɛrɛ minɛ ani k’i ka mɔgɔ kalancogo kɔlɔsi.”—1 Tim. 4:16.

6. A tun b’a lɔn ko Jehova bena hakili senu di a ma. Pol tun be miirila Timote ka waajuli baara la ani a ko: “I ye koɲuman minw sɔrɔ, i ka olu minɛ kosɔbɛ Nii senuman barika la, min be an kɔnɔ.” (2 Tim. 1:14). Walisa ka to ka waajuli kɛ ka ɲɛ, Timote tun ka ɲi ka la a la ko Jehova bena hakili senu di a ma.

Donald ye diinan mɔgɔkɔrɔ ye a mɛɛnna. A ko: “Kunkanbaara kalifara balima minw ma, olu be jɛnɲɔgɔnya min kɛ ni Jehova ye, u ka ɲi k’o jati fɛɛn nafamanba ye. Minw b’o kɛ, u bena ‘to ka fanga sɔrɔ.’ N’u ye hakili senu deli Ala fɛ, ani k’a ɲini ka kɛ ni hakili senu deen ye, u bena se k’u balimaw dɛmɛ kosɔbɛ.”—Zab. 84:8; 1 Piyɛri 4:11.

I ko ele, kunkanbaara kalifara balimacɛ caaman ma kura ye ani u be ɲɛtaga kɛra. O be mɔgɔ jija yɛrɛ le! Jason min kofɔra daminɛ na, ale ko: “Ne kɛnin diinan mɔgɔkɔrɔ ye, n’ ye koo caaman faamu ani sisan, n’ hakili siginin lo. N’ ka kunkanbaara ka di n’ ye kosɔbɛ ani n’ b’o jati nɛɛmaba ye!”

Yala i bena to ka ɲɛtaga kɛ Alako ta faan fɛ wa? A latigɛ ka Timote ladegi. O la, ele fana bena se ka Ala sagokɛlaw dɛmɛ.