Komi an ka gafew tɛ feereta ye, dɔw b’a miiri ko n’u y’o gafew ta k’u bila site web wɛrɛw wala rezo sosiyow kan, o tɛ basi ye. (Rezo sosiyow ye site web dɔw wala porogramu [application] dɔw ye minw labɛnna kumaɲɔgɔnya kama ɛntɛrɛnɛti kan.) Nka n’an y’o kɛ, an b’an ka site web ka saratiw * tiɲɛ ani o be se ka na ni gwɛlɛyaw ye. An ka saratiw b’a yira ka gwɛ ko a daganin tɛ mɔgɔ si ka jaaw, gafew, mizikiw, barokunw, an ka tagamasiɲɛw wala videwow ta an ka site kan k’u bila site web wɛrɛw wala rezo sosiyow kan. Mun na an be mɔgɔw bali k’o kɛ?

Fɛɛn o fɛɛn b’an ka site web kan, sariyaw (droit d’auteur) b’u kan. Mɔgɔ murutininw ani an jugu wɛrɛw b’a ɲini ka baara kɛ n’an ka gafew ye u yɛrɛ ka site web kan walisa ka Jehova Seerew ni mɔgɔ wɛrɛw lafili. O site web nunu labɛnna walisa ka mɔgɔw lasun u ka sigasiga Jehova ka ɔriganisasiyɔn koo la (Zab. 26:4; Talenw 22:5). Dɔw be tɛmɛ an ka gafew kɔnɔnafɛnw wala jw.org tagamasiɲɛ fɛ ka piblisitew kɛ. Dɔ wɛrɛw be telefɔniw, tablɛtiw ani ɔridinatɛri ka porogramu dɔw labɛn n’u ye. An be koow kɛ sariya sira fɛ k’an ka joo lafasa ani k’an ka site web n’an ka ɔriganisasiyɔn ka tagamasiɲɛw latanga o baara juguw ma (Talenw 27:12). An man ɲi k’a to mɔgɔw ani hali balimaw yɛrɛ k’an ka site web kɔnɔnafɛnw  bila site wɛrɛw kan wala k’u ka jagokow kɛ ni jw.org tagamasiɲɛ ye. N’o tɛ, kititigɛsow be se ka ban k’an dɛmɛ, n’an b’a fɛ k’an juguw ni jagokɛlaw bali k’o kɛ.

Ka jw.org niin bɔ a la, faratiba b’a la k’an ka gafew telesarse yɔrɔ wɛrɛw la. Jehova y’a ɲini “jɔnkɛ dannamɔgɔ hakiliman” dɔrɔn lo fɛ ko a ka dumuni di ale sagokɛlaw ma Alako ta fan fɛ (Mat. 24:45, ABM). O “jɔnkɛ” be tɛmɛ an ka site web nunu dɔrɔn lo fɛ k’o kɛ: www.pr418.com, tv.pr418.com ani wol.pr418.com. Porogramu saba nunu dɔrɔn lo be yen fana telefɔniw, tablɛtiw ani a ɲɔgɔnnaw kosɔn: JW Language^®, JW Library^®, ani JW Library Sign Language^®. An ka la a la ko piblisitew wala Sutana ka duniɲa ka koow tɛ sɔrɔ o porogramuw n’o site web nunu kan. Nka, an ka gafew wala videwo minw be sɔrɔ site wɛrɛw kan, a be se ka kɛ ko mɔgɔw ye miiriya jugu dɔw don u kɔnɔ.—Zab. 18:27; 19:9.

Ni dɔ y’an ka gafew bila site web dɔw kan mɔgɔw be lakalitaw kɛ minw kan do? O be sababu di mɔgɔ murutininw ani an jugu wɛrɛw ma ka mɔgɔw lasun u k’u yɛrɛ kɔrɔsi Jehova ka ɔriganisasiyɔn ma. Balima dɔw y’u dadon sɔsɔlikow la ɛntɛrɛnɛti kan ka Jehova tɔgɔ nɔgɔ. Tiɲɛn lo ko Bibulu b’a fɔ ko an “ka sɔsɔlikɛlaw kalan” ni dususuman ye. Nka, a bɛnnin tɛ an k’o kɛ o site nunu kan (2 Tim. 2:23-25, ABM; 1 Tim. 6:3-5). An y’a kɔrɔsi fana ko mɔgɔ dɔw ye kɔntiw yɛlɛ rezo sosiyow kan ani ka site web dɔw labɛn an ka ɔriganisasiyɔn tɔgɔ la. U yɛrɛ y’o kɛ Koow Ɲɛnabɔla Jɛnkulu ani o jɛnkulu mɔgɔ kelen kelen bɛɛ tɔgɔ la. Nka, o jɛnkulu mɔgɔw lo ma sira di u ma ani olu yɛrɛ si tɛ baara kɛ ni rezo sosiyow ye.

N’an be jw.org kofɔ mɔgɔw ye, o b’a to “kibaru diman” be jɛnsɛn (Mat. 24:14). Jw.org kɔnɔnafɛn minw labɛnna waajuli kama, olu cogoya be fisaya tuma o tuma. An b’a fɛ bɛɛ ka nafa sɔrɔ u la. O la, an be se ka jw.org kɔnɔnafɛn dɔ wala a sɔrɔyɔrɔ ci mɔgɔ ma e-mail fɛ. O bɛnnin lo n’an ka site web saratiw ye. N’an be jw.org kofɔ makodonmɔgɔw ye, an b’u ɲɛsinna “jɔnkɛ dannamɔgɔ hakiliman” lo ma. Sira dira o jɔncɛ dɔrɔn lo ma ka dumuni di an ma Alako ta fan fɛ.