1-3. a) Koo juman lo be kanbelew ni sunguruw kan ani an be se k’o suma ni mun ye? (Jaa lajɛ, barokun daminɛ na.) b) Mun lo be se k’u dɛmɛ koɲuman?

MIIRI k’a filɛ, i y’a latigɛ ka taga kooba dɔ la dugujan dɔ la. I ka ɲi ka mobili lo ta ka taga yen. I senin gari la, i hakili ɲagamina sabu jamaba be yen ani mobiliw fana ka ca. Nka, i b’i tagayɔrɔ lɔn ani i b’a lɔn i ka ɲi ka mobili min ta. I tɛna mobili ta i kunfɛ sabu i b’a lɔn ko a be se ka taga n’i ye yɔrɔ wɛrɛ la.

² Ɲɛnamaya be i ko dugutaga ani kanbelew ni sunguruw be i n’a fɔ mɔgɔ minw be gari la. Tuma dɔw la, u ka ɲi ka koo minw latigɛ, o ka ca fɔɔ u hakili be ɲagami. Nka, n’u b’u tagayɔrɔ lɔn, a tɛna gwɛlɛya u ma ka desizɔn ɲumanw ta. U ka ɲi ka taga yɔrɔ juman do?

³ Barokun nin bena o ɲiningali jaabi. A fana bena i jija i k’a ɲini k’i koo diya Jehova ye tuma bɛɛ. I ka ɲi k’i janto Jehova ka ladiliw la i ka desizɔnw bɛɛ la i n’a fɔ lakɔliko, baarako, furuko, denko ani a ɲɔgɔnnaw. O kɔrɔ ko, i k’a ɲini ka  laɲinitaw dafa Alako ta fan fɛ. N’i ka laɲinita fɔlɔ ye ka baara kɛ Jehova ye, i ka la a la ko i bena duga sɔrɔ o la ani i ka koo latigɛninw bena ɲɛ.—Talenw 16:3 kalan.

4. An bena mun lo lajɛ barokun nin na?

⁴ A ka ɲi an ka laɲinitaw latigɛ Alako ta fan fɛ. Mun na do? An bena kuun saba lajɛ. A fɔlɔ ni filanan bena i dɛmɛ k’a faamu ko n’i ye laɲinitaw latigɛ Alako ta fan fɛ, o bena ele n’i Jehova ka jɛnɲɔgɔnya sabati. A sabanan bena a yira ko nafa b’a la i ka laɲinitaw latigɛ kabi i denmisɛn tuma.

5. Kuun fɔlɔ juman lo kama i ka ɲi ka laɲinitaw latigɛ Alako ta fan fɛ?

⁵ Kuun fɔlɔ juman lo kama i ka ɲi ka laɲinitaw latigɛ Alako ta fan fɛ? I ka ɲi k’o kɛ walisa k’a yira ko i be Jehova waleɲuman lɔn sabu a b’i kanu ani a ye koo ɲuman kɛ i ye. Zaburu sɛbɛbaga dɔ y’a fɔ ko: “A ka ɲi ka ele Masaba tanu . . . Masaba, e ka kɛwaliw be ne nisɔndiya. Ne be nisɔndiyadɔnkili la i ka kɛtaw kosɔn.” (Zab. 92:2, 5). Miiri k’a filɛ Jehova ye fɛɛn minw bɛɛ d’i ma: niin, limaniya, Bibulu, kafo ani jigiya ɲuman siniɲasigi koo la. N’i ye laɲinitaw latigɛ Alako ta fan fɛ, i b’a yira ko i be Jehova waleɲuman lɔn o fɛɛnw bɛɛ kosɔn. O b’a to fana i b’i magwɛrɛ a la kosɔbɛ.

6. a) N’i ye laɲinitaw latigɛ Alako ta fan fɛ, o bena nɔɔ juman to ele ni Jehova ka jɛnɲɔgɔnya kan? b) Denmisɛnw be se laɲinita jumanw latigɛ?

⁶ Kuun filanan juman kama i ka ɲi ka laɲinitaw latigɛ Alako ta fan fɛ? I ka ɲi k’o kɛ sabu n’i b’i jija k’o laɲinitaw dafa, i be baara ɲuman lo kɛra Jehova ye ani o bena a to i b’i magwɛrɛ a la kosɔbɛ. Ciden Pol y’a sɛbɛ ko: “Aw ye baara min kɛ, ka koɲuman min kɛ ka tɛmɛ, . . . k’a yira Ala la ko a koo ka di aw ye, Ala ka ɲi, a tena ɲinɛ o si kɔ.” (Eburuw 6:10). I sanda mana kɛ min o min ye, i be se ka laɲinitaw latigɛ i yɛrɛ ye. Balimacɛw ni balimamuso kantigi minw ka ɲɛnamaya lakalila an ka gafew kɔnɔ, Kristine y’a latigɛ k’o kalan tuma o tuma. O y’a sɔrɔ a tun be ni saan 10 ye. Tuma min na Toby tun be ni saan 12 ye, a y’a latigɛ ka Bibulu kuru bɛɛ kalan ka sɔrɔ ka batize. Maxim tun be ni saan 11 ye ani a dɔgɔmuso Noemi tun be ni saan 10 ye tuma min na u batizera. U fila bɛɛ y’a latigɛ ka baara kɛ Betɛli la loon dɔ. Sɛbɛ min be dafa walisa ka taga baara kɛ Betɛli la, u y’o nɔɔrɔ u ka boon kogo kan. U y’o kɛ walisa u kana ɲinɛ u ka laɲinita kɔ. Mun na ele fana tɛ laɲinita dɔw latigɛ i yɛrɛ ye ani k’a ɲini k’u dafa?—Filipikaw 1:10, 11 * kalan.

7, 8. a) Ka laɲinitaw latigɛ Alako ta fan fɛ, mun na o b’a to a tɛ gwɛlɛya i ma ka desizɔn ɲumanw ta? b) Mun na sungurunin dɔ banna ka taga inivɛrisite la?

⁷ Kuun sabanan juman kama i ka ɲi ka laɲinitaw latigɛ Alako ta fan fɛ kabi i denmisɛn tuma? O b’a to a tɛ gwɛlɛya i ma ka desizɔn ɲumanw ta. Kanbelew ni sunguruw ka ɲi ka desizɔn caaman ta ka ɲɛsin lakɔli, baara ani fɛɛn wɛrɛw ma. Ka desizɔnw ta, a be i n’a fɔ k’a latigɛ i bena sira min ta n’i sera sirafaran dɔ la. N’i b’i tagayɔrɔ lɔn, a tɛna gwɛlɛya i ma k’a latigɛ i bena sira min ta. O cogo kelen na, n’i y’a lɔn i ka laɲinita ye min ye, a tɛna gwɛlɛya i ma ka desizɔn ɲumanw ta. Bibulu b’a fɔ ko: “Mɔgɔ min be jatemina kɛ a ta baara ra, o laban bɛ nafa sɔrɔ.” (Talenw 21:5, Biblu Ala ta Kuma). N’i  kɔnna ka laɲinitaw latigɛ i yɛrɛ ye, i bena nafa sɔrɔ o la joona. Damaris y’o lo kɔrɔsi tuma min na a tun ka ɲi ka desizɔnba dɔ ta a sunguru tuma na.

⁸ Damaris tun be baara kɛ koɲuman lise la. A tun be se ka taga kalan kɛ inivɛrisite la gwansan walisa ka kɛ avoka ye. Nka, a y’a latigɛ ka baara dɔ kɛ min sara man ca. Mun na do? A ko: “Kabi n’ denmisɛn tuma na, ne y’a latigɛ ko n’ bena kɛ piyɔniye ye. O kama, n’ tun ka ɲi ka baara kɛ tuma kelen kelen. Ni n’ tun tagara inivɛrisite la ka diplomuw sɔrɔ ka kɛ avoka ye, n’ tun bena wari caaman sɔrɔ. Nka, a tun bena gwɛlɛya n’ ma ka baara sɔrɔ min be kɛ tuma kelen kelen na.” A saan 20 ye nin ye, Damaris ye piyɔniye ye. Yala a b’a miiri ko a ye laɲinita ɲuman latigɛ ani ka desizɔn ɲumanw ta a denmisɛn tuma na wa? Ɔnhɔn. A tun be avoka caaman kunbɛn a ka baarakɛyɔrɔ la. A y’a ye ko u caaman dusu tun tiɲɛnin lo u ka baara kosɔn. Damaris b’a jati ko ale ye saan minw bɛɛ kɛ piyɔniye baara la, o y’ale dɛmɛ k’a yɛrɛ tanga o dusu tiɲɛ ɲɔgɔn ma. A ko piyɔniye baara y’a to ale ninsɔndiyara kosɔbɛ.

9. Mun na kanbelew ni sunguruw ka kan ni tandoli ye?

⁹ Duniɲa kuru bɛɛ kɔnɔ, kanbelew ni sunguru caaman ka kan ni tandoli ye sabu u be baara ɲuman kɛra. U y’u yɛrɛ di Jehova ma ani u ye laɲinitaw latigɛ Alako ta fan fɛ. U b’u ka ɲɛnamaya diyabɔra kosɔbɛ ani u b’u jijara ka Jehova ka ladiliw sira tagama u ka kokɛtaw bɛɛ la: lakɔli, baara ani denbaya koo la. Solomani y’a sɛbɛ ko: “E jigi la Masaba kan sɔbɛ la. . . . I ka koo bɛɛ la, miiri a la, a bena i ka sira gwɛya i ye.” (Talenw 3:5, 6). Kanbelew ni sunguruw, aw koo ka di Jehova ye kosɔbɛ ani aw koo ka gwɛlɛ a ma! O kama, a bena aw latanga, k’aw ɲɛminɛ ani k’aw duga.

10. a) Mun na waajuli baara ka ɲi ka kɛ an ɲɛnako fɔlɔ ye? b) Mun lo be se k’i dɛmɛ ka seereya kɛ koɲuman?

¹⁰ Kanbelew ni sunguru minw ka laɲinita ye k’u yɛrɛ koo diya Jehova ye, a ka di olu ye ka kuma Jehova koo la. Yezu Krista y’a fɔ ko: “Wajibi lo kibaru diman ka fɔ siyaw bɛɛ ye fɔlɔ.” (Mariki 13:10). Waajuli baara ka ɲi ka kɛ an ɲɛnako fɔlɔ ye sabu kɔrɔtɔko lo. Yala i be se k’a latigɛ ka dɔ fara i ka waajuli baara kan wa? Yala i be se ka kɛ piyɔniye ye wa? Nka, n’i tɛ ninsɔndiya bɛrɛ sɔrɔla waajuli baara la do? Mun lo be se k’i dɛmɛ ka seereya kɛ koɲuman? Fɛɛrɛ jɔnjɔn fila be se k’i dɛmɛ: I yɛrɛ labɛn koɲuman ani i kana a to foyi k’i bali ka Jehova kofɔ mɔgɔw ye. N’i y’o kɛ, i bena kabakoya k’a ye ko waajuli baara bena diya i ye kosɔbɛ.

11, 12. a) I be se ka mun lo kɛ walisa k’i yɛrɛ labɛn ka kuma Jehova koo la? b) Kanbele dɔ tɛmɛna sababu dɔ fɛ cogo di ka kuma Jehova koo la lakɔliso la?

¹¹ I filankuruw ka teli ka ɲiningali minw kɛ, a daminɛ k’olu dɔw ka jaabili labɛn. Barokun dɔw labɛnna jw.org kan ani an ka gafe wɛrɛw kɔnɔ walisa ka kanbelew ni sunguruw dɛmɛ k’u filankuruw ka ɲiningaliw jaabi. Ɲɛyirali fɛ, kitabunin nin be se k’i dɛmɛ k’o kɛ: Ɲiningali 10 ka jaabiliw kanbelew ni sunguruw ye. I be se ka tɛmɛ ɲiningali 10nan fɛ k’i yɛrɛ labɛn walisa k’i filankuruw dɛmɛ k’a faamu Bibulu be se k’u nafa cogo min na.—1 Piyɛri 3:15 kalan.

¹² N’i ye sababu sɔrɔ, i filankuruw jija u ka jw.org lajɛ. Luka * y’o lo kɛ. U tun be  kalan kɛra diinankow la a ka klasi kɔnɔ. Luka y’a kɔrɔsi ko lakɔli gafe be koo dɔw fɔ Jehova Seerew koo la minw tɛ tiɲɛn ye. Hali k’a sɔrɔ a tun be siranna, a ye sira deli a ka kalanfa fɛ walisa k’a yira k’o kumaw tɛ tiɲɛn ye. Kalanfa ye sira di a ma a y’a ka lannakow ɲɛfɔ. A ye sababu sɔrɔ ka jw.org yira a ka klasidenw bɛɛ la. Kalanfa ye baara di kalandenw ma ko n’u sera soo, u ka videwo nin filɛ: See sɔrɔ i tɔɔrɔbaga kan hali n’i m’a bugɔ. Miiri k’a filɛ Luka ninsɔndiyara cogo min na sabu a sera ka kuma Jehova koo la lakɔliso la!

13. Mun na an man ɲi k’an fari faga hali ni gwɛlɛyaw b’an kan?

¹³ Ni gwɛlɛyaw b’i kan, kana i fari faga. Nka, to k’a ɲini k’i ka laɲinitaw dafa (2 Tim. 4:2). Katharina y’o lo kɛ. Tuma min na a tun be ni saan 17 ye, a y’a latigɛ ka seereya kɛ a baarakɛɲɔgɔn kelen kelen bɛɛ ye. U dɔ y’a nɛni siɲɛ caaman, nka a m’a fari faga. Gwɛlɛyaw bɛɛ n’a ta, a tora ka kɛwale ɲumanw kɛ. O ye nɔɔ to a ka baarakɛɲɔgɔn dɔ kan min tɔgɔ ko Hans. Hans y’a daminɛ k’an ka gafew kalan, ka bibulukalan kɛ ani kɔfɛ a batizera. Katharina tun t’o kala ma sabu a tun yɛlɛmana yɔrɔ wɛrɛ. Saan 13 o kɔ, Katharina n’a ka denbayamɔgɔw tun be lajɛn dɔ la ani a y’a mɛn ko Hans lo nana forobakalan diyɔrɔ u ma. Miiri k’a filɛ Katharina kabakoyara cogo min na! A ninsɔndiyara kosɔbɛ sabu a m’a fari faga ka ban k’a baarakɛɲɔgɔnw waaju.

14, 15. a) I ka ɲi ka miiri mun lo la n’i filankuruw b’i lasunna ka koo jugu kɛ? b) Mun lo be se k’i dɛmɛ ka lɔ kelen kan?

¹⁴ An y’a ye barokun nin na ko a kɔrɔtanin lo i k’a ɲini k’i koo diya Jehova ye ani ka laɲinitaw latigɛ Alako ta fan fɛ. I filankuru caaman be ɲɛnagwɛkow lo kɛ u ɲɛnako fɔlɔ ye. N’a sɔrɔ u bena i lasun i k’u ladegi. A mɛɛn o mɛɛn, i ka ɲi k’a yira ko i cɛsirinin lo k’i ka laɲinitaw dafa. Kana a to tɔɔw k’i lasun i be ɲinɛ i ka laɲinitaw kɔ. Miiri k’a filɛ, i be mobili gari la. Yala i bena don mobili dɔ kɔnɔ sabu mɔgɔ minw b’a kɔnɔ u be ɲɛnagwɛra ninsɔndiya la wa? Ayi, i kɔni tɛna o kɛ!

 ¹⁵ O la, i be se ka mun lo kɛ walisa ka lɔ kelen kan n’i filankuruw b’i lasunna walisa i k’olu ladegi? A bena gwɛlɛya i ma ka lɔ kelen kan koo minw na, i yɛrɛ tanga o ma (Talenw 22:3). N’i ye koo jugu kɛ, o bena tɔɔrɔ minw lase i ma, miiri o la (Gal. 6:7). I yɛrɛ majigi ka sɔn a ma ko i mako be ladiliw la. O la, sɔn i bangebagaw ani kerecɛn kolɔnbaga wɛrɛw ka ladiliw ma.—1 Piyɛri 5:5, 6 kalan.

16. Koo dɔ lakali min b’a yira ko nafa be majigilenya la.

¹⁶ Majigilenya ye Kristoph dɛmɛ a sɔnna ladili ɲumanw ma. Dɔɔni a batizenin kɔ, a y’a daminɛ ka taga spɔr kɛ farikolo ɲɛnagwɛyɔrɔ dɔ la. A filankuru dɔw y’a weele ko a ka don olu ka spɔr jɛnkulu kɔnɔ. A y’o koo fɔ diinan mɔgɔkɔrɔ dɔ ye. Ale ko farati minw b’o la, Kristoph ka miiri o la fɔlɔ ka sɔrɔ ka desizɔn ta. A ko o farati dɔ ye ɲɔgɔndan miiriya ye. O bɛɛ n’a ta, Kristoph donna o jɛnkulu kɔnɔ. Nka wagati dɔ nana se, a y’a kɔrɔsi ko fariyakow ni faratiba b’o spɔr la. A y’o kuma fɔ diinan mɔgɔkɔrɔ wɛrɛw ye tugun ani u basigira Bibulu kan k’a ladi. Kristoph ko: “Jehova ye ladili dibaga ɲumanw ci ne ma. Hali ni n’ ye wagati dɔ kɛ, n’ kɔni ye mɛnni kɛ u fɛ.” Yala i majiginin lo kosɔbɛ ka sɔn ladili ɲumanw ma wa?

17, 18. a) Jehova be mun lo fɛ kanbelew ni sunguruw ye bi? b) I be se ka mun lo kɛ walisa n’i kɛra baliku ye, i kana nimisa? Ɲɛyirali dɔ fɔ.

¹⁷ Bibulu b’a fɔ ko: “Kanbelen [wala sunguru], i nisɔn diya i denmisɛn tile la. I dusu ka diya i kanbelenya waati la.” (Waaj. 11:9). Tiɲɛn na, Jehova b’a fɛ i ka ninsɔndiya. Barokun nin b’a yira i ka ɲi ka min kɛ walisa ka ninsɔndiya sɔrɔ. I ka ɲi k’i jija k’i ka laɲinitaw dafa Alako ta fan fɛ ani k’i janto Jehova ka ladiliw la i ka kokɛtaw bɛɛ la. N’i kɔnna k’o kɛ, i bena a faamu joona cogo min na Jehova b’i ɲɛminɛ, k’i tanga ani k’i duga. Ladili ɲuman minw be sɔrɔ Ala ka Kuma kɔnɔ, miiri u bɛɛ la ani i janto ladili nin na: “I hakili to i Danbaga la i kanbelenya waati la.”—Waaj. 12:1.

¹⁸ Kanbeleya ni sunguruya wagati be tɛmɛ. Kanbelew ni sunguruw tɛ mɛɛn ka kɔrɔbaya ka kɛ balikuw ye. A fɔ man di nka, baliku caaman be nimisa sabu u tugura laɲinita juguw kɔ wala u ma laɲinitaw latigɛ u yɛrɛ ye u kanbele wala u sunguru tuma na. Nka n’i tora k’i jija k’i ka laɲinitaw dafa Alako ta fan fɛ, n’i nana kɛ baliku ye, i bena ninsɔndiya o kosɔn. Mirjana y’o lo kɔrɔsi. A tun be se spɔr la koɲuman a sunguru tuma na. Farikolo ɲɛnagwɛ ɲɔgɔndan min be kɛ jamana caaman ni ɲɔgɔn cɛ, u ko a k’a niin don o la. Nka, a banna o la ani a ye kudayi cidenya baara daminɛ. Saan 30 o kɔ, Mirjana n’a cɛɛ bele ye kudayi cidenya baarakɛlaw ye. A ko mɔgɔ minw b’a fɛ ka tɔgɔba, nɔɔrɔ ani nafoloba sɔrɔ, olu ninsɔndiyanin tɛ sɔbɛ la. A y’a fɔ fana ko k’a latigɛ ka Jehova bato ani ka mɔgɔ wɛrɛw dɛmɛ u k’a lɔn, o lo ɲɔgɔn tɛ yen.

19. Mun na a ka ɲi i k’i jija ka laɲinitaw dafa Alako ta fan fɛ i kanbele wala i sunguru tuma na?

¹⁹ Kanbelew ni sunguruw, aw ka kan ni tandoli ye sabu gwɛlɛyaw bɛɛ n’a ta, aw b’aw jija ka Jehova sago kɛ aw ɲɛnako fɔlɔ ye. Aw be laɲinitaw latigɛ Alako ta fan fɛ ani aw be waajuli baara jati baara kɔrɔtaninba ye. Aw b’aw jija fana walisa duniɲa kana aw bali k’aw ka laɲinitaw dafa. Aw ka la a la ko aw be baaraba min kɛra, o tɛna kɛ fuu ye. Aw balimaw b’aw kanu ani u b’a fɛ k’aw dɛmɛ walisa aw k’aw ka laɲinitaw dafa Alako ta fan fɛ. O la, aw k’aw ‘kɔnɔnako fɔ Masaba ye, aw ka koo latigɛninw bena ɲɛ.’