Ka kɛɲɛ ni Heburukan kumadenw ye, an be se k’o vɛrise faamu cogo fila la. Nka, koo nunu bena an dɛmɛ k’a lɔn faamuyali min bɛnnin lo:

1. Zaburuw 144 kɔnɔnako tɔɔw lajɛ. Duga minw kofɔra vɛrise 12-14 kɔnɔ, u ɲɛsinna mɔgɔ tilenninw lo ma. O kɔrɔ, mɔgɔ minw be delili kɛra ko Ala k’u ‘kisi ani k’u bɔsi’ mɔgɔ juguw bolo (vɛrise 11). O miiriya bɛnnin lo ni vɛrise 15nan ye, yɔrɔ min na a fɔra siɲɛ fila ko mɔgɔ dɔw “dagamunin lo.” “Masaba ye jama min ka Ala ye,” o ɲɛsinna olu lo ma.

2. O miiriya bɛnnin lo ni vɛrise wɛrɛw ye yɔrɔ minw na Ala y’a daa di ko a bena a sagokɛla kantigiw duga. Zaburuw 144 be Dawuda ka jigiya lo kofɔ. A tun lanin b’a la kosɔbɛ ko ni Ala ye Israɛl siya kisi ka bɔ u juguw bolo, a bena u duga. U bena sigi hɛɛrɛ la ani ka yiriwa kosɔbɛ (Lev. 26:9, 10; Deter. 7:13; Zab. 128:1-6). Ɲɛyirali fɛ, Deteronɔmu 28:4 b’a fɔ ko: “Aw bena deen caaman sɔrɔ, ni suman caaman, aw ka begɛnw bena caya: aw ka misiw, n’aw ka sagaw.” Tiɲɛn na, Dawuda dencɛ Solomani ka masaya tuma na, Israɛl siya tun be hɛɛrɛ la ani u tun yiriwanin lo. O ɲɔgɔn tun ma deli ka kɛ! Min yɛrɛ kɔrɔtanin lo ka tɛmɛ, o ye ko Solomani ka masaya faan dɔw tun b’a yira koo minw tun bena kɛ Masiya ka Masaya tuma na.—1 Mas. 4:20–5:1; Zab. 72:1-20.

An ye faamuyali min sɔrɔ, o b’a yira ka gwɛ ko Jehova sagokɛlaw be ni jigiya min ye kabi tumajan, Zaburuw 144 kuru bɛɛ be kuma o lo koo la. O jigiya ye ko Ala bena mɔgɔ juguw halaki. Mɔgɔ tilenninw bena to hɛɛrɛ la fɔɔ abada ani u bena yiriwa.—Zab. 37:10, 11.