Dawuda ye kuma minw fɔ Zaburuw 22:2 kɔnɔ, mun na Yezu y’o fɔ dɔɔni ka kɔn a satuma ɲɛ?

Yezu ye kuma minw fɔ dɔɔni ka kɔn a satuma ɲɛ, u dɔ be sɔrɔ Matiyo 27:46 kɔnɔ: “Ne ka Ala, ne ka Ala, mun na i ye ne bila?” Yezu y’o fɔ minkɛ, a ye Zaburu sɛbɛbaga Dawuda ka kumaw dafa, o minw be sɔrɔ Zaburuw 22:2 kɔnɔ (Mariki 15:34). A bɛnnin tɛ an k’a miiri ko Yezu y’o kumaw fɔ sabu a jigi tun tigɛra wala ko a ma limaniya Jehova la wagati dɔ la. Yezu tun b’a faamu koɲuman kuun min kama a tun ka ɲi ka sa ani a sɔnna o ma (Mat. 16:21; 20:28). A tun b’a lɔn fana ko Jehova be dɛmɛ min lase a ma, a tun tɛna o sɔrɔ tugun a satuma na (Zɔbu 1:10). O la, Yezu satuma na, Jehova m’a latanga. Mun na do? Walisa Yezu k’a yira ko ale bena to kantigiya la a mana tɔɔrɔ cogo o cogo ka sɔrɔ ka sa.—Mariki 14:35, 36.

N’o lo, mun na Yezu ye Zaburuw 22:2 kɔnɔkumaw fɔ? An t’o lɔn tigitigi. N’a sɔrɔ kuun minw kama a y’o fɔ, an k’u la damanin lajɛ. *

Yezu y’o kumaw fɔ minkɛ, n’a sɔrɔ a tun b’a yirala le ko Jehova tɛna a latanga a satuma na. Yezu tun ka ɲi ka kunmabɔsara di a kelen le. O kama, Jehova m’a dɛmɛ. Yezu tun ka ɲi ka “sa mɔgɔw bɛɛ kosɔn.”—Eburuw 2:9.

 N’a sɔrɔ Yezu ye Zaburuw 22nan kuma damanin fɔ walisa ka mɔgɔw hakili jigi o Zaburu kuru bɛɛ la. O wagati la, Yahutuw tun ka teli ka Zaburu caaman degi u kunfɛ. U tun mana Zaburu dɔ ka vɛrise kelen mɛn, u tun be sin ka miiri o Zaburu kuru bɛɛ la. N’a sɔrɔ o lo tun ye Yezu ka laɲinita ye. N’o lo, kiraya kuma caaman minw be sɔrɔ Zaburuw 22nan kɔnɔ a ka saya koo la, a sera k’a ka kalandenw hakili jigi u la (Zab. 22:8, 9, 16, 17, 19, 25). O Zaburu ka vɛrise labanw kɔnɔ fana, Zaburu sɛbɛbaga be Jehova tando ani a b’a fɔ ko ale lo ye duniɲa kuru bɛɛ Masaba ye.—Zab. 22:28-32.

N’a sɔrɔ Yezu segira Dawuda ka kumaw kan walisa k’a yira ko ale jalakibali lo. Ka kɔn Yezu fagatuma ɲɛ, u ye kiti tilenbali tigɛ a kan ani u y’a jalaki ko a ye Ala tɔgɔ tiɲɛ (Mat. 26:65, 66). Kititigɛlaw teliyara ka ɲɔgɔn lajɛn dugutilama, ani u ye kiti tigɛ a kan cogo min na, o tun bɛnnin tɛ n’u ka sariya ye (Mat. 26:59; Mariki 14:56-59). N’a sɔrɔ Yezu tun b’a yirala le ko ale ma koo si kɛ min b’a fagakun bɔ tuma min na a ko: “Ne ka Ala, ne ka Ala, mun na i ye ne bila?”

Jehova y’a to Dawuda tɔɔrɔla. N’a sɔrɔ Yezu tun be mɔgɔw hakili jigira le ko o kɔrɔ tɛ ko Jehova tun banna Dawuda la. Dawuda ye ɲiningali min kɛ, o t’a yira ko a tun limaniyanin tɛ tugun Ala la. O ɲiningali kɛnin kɔ, a y’a fɔ ko ale lanin b’a la ko see be Jehova ye ka mɔgɔ kisi. Jehova tora k’a duga fana (Zab. 22:24, 25, 28). O cogo kelen na, hali ni “Dawuda dencɛ” Yezu tun be tɔɔrɔla gwengwenyiri kan, o kɔrɔ tɛ ko Jehova banna a la.—Mat. 21:9.

Walisa Yezu k’a ka kantigiya yira bɛrɛbɛrɛ, Jehova m’a latanga. N’a sɔrɔ Yezu tun b’a yirala le tɔɔrɔba min b’a kan o kosɔn. A daminɛ na, Jehova ka laɲinita tun tɛ ko a Dencɛ ka tɔɔrɔ ani ka sa. A sɔnna o ma, Adama ni Awa murutinin kɔ le. Yezu tun ma koo jugu si kɛ, nka a tun ka ɲi ka tɔɔrɔ ani ka sa. A sɔnna o ma janko ka Sutana ka sɔsɔlikow ɲɛnabɔ ani ka kunmabɔsara di walisa ka adamadenw hɔɔrɔnya ka bɔ jurumu ni saya la (Mariki 8:31; 1 Piyɛri 2:21-24). O tun tɛ se ka kɛ ni Jehova tun tora ka Yezu latanga. O kama, a ma Yezu latanga wagati dɔ la ani o kɛra a siɲɛ fɔlɔ ye Yezu ka ɲɛnamaya kɔnɔ.

Kuun min kama Jehova y’a to Yezu sara o cogo la, n’a sɔrɔ Yezu tun b’a ka kalandenw dɛmɛna u ka miiri o lo la. * Yezu tun b’a lɔn ko ale sara cogo min na gwengwenyiri kan i n’a fɔ kojugukɛla, o tun bena mɔgɔ caaman kunnatiɲɛ (1 Kor. 1:23). A sara kuun jɔnjɔn min kama, a tun b’a fɛ a ka kalandenw ka miiri o la walisa u k’a faamu fɛɛn min kama Jehova y’a to a sara o cogo la (Gal. 3:13, 14). O la, u tun bena a ye ko Yezu tɛ kojugukɛla ye, nka u Kisibaga lo.

An t’a lɔn kuun tigitigi min kama Yezu ye Zaburuw 22:2 kɔnɔkumaw fɔ. A mana kɛ min o min ye, Yezu tun b’a lɔn ko ale kɛtɔ ka sa gwengwenyiri kan, a be Jehova sago lo dafara. Dɔɔni o vɛrise kɔnɔkumaw fɔnin kɔ, Yezu y’a fɔ ko: “Koo bɛɛ dafara.” (Zan 19:30; Luka 22:37). Jehova ma Yezu latanga wagati dɔ la. O kɛra sababu ye, Yezu tun nana dugukolo kan kuun min kama, a sera k’o dafa bɛrɛbɛrɛ. O kɛra sababu ye fana “koo minw fɔra Musa ka sariya, ni kiraw ka kitabuw, ani Dɔnkiliw [o kɔrɔ, Zaburuw]” kɔnɔ Yezu koo la, a y’o bɛɛ dafa.—Luka 24:44.