1. Mun na a kɔrɔtanin lo mɔgɔ ka batɛmu ta? (Jaa lajɛ, barokun daminɛ na.)

SAAN o saan, Bibulu kalanden waa caaman be batɛmu ta. U caaman ye kanbelew ni sunguruw ani denmisɛnw ye. N’a sɔrɔ u lamɔna tiɲɛn sira kan. Yala i y’u dɔ ye wa? N’o lo, i ka kan ni tandoli ye. Kerecɛn ka ɲi ka batize walisa ka kisi ani ka ɲɛnamaya kɛ fɔɔ abada.—Mat. 28:19, 20; 1 Piyɛri 3:21.

2. Mun na i man kan ka siran k’i yɛrɛkun di Jehova ma?

² Hali ni batɛmu be duga caaman lase mɔgɔ ma, a be na ni kunkanbaara ye fana. Cogo di do? I ka batɛmu loon na, u y’i ɲininga ko: “Yezu Krista ka saraka barika la, yala i nimisara i ka jurumuw la ani i y’i yɛrɛkun di Jehova ma k’a sago kɛ wa?” I y’a fɔ ko ɔnhɔn. I ka batɛmu sababu fɛ, i y’a yira ko i y’i yɛrɛkun di Jehova ma. O kɔrɔ, i y’i daa di ko i bena Jehova kanu ani k’a sago kɛ i ɲɛnako fɔlɔ ye. O ye sɔbɛko lo ye. Yala  i ka ɲi ka nimisa sabu i y’i daa di Jehova ma wa? Ayi, i man kan ka nimisa. N’i y’a to Jehova k’i ɲɛminɛ, i tɛna nimisa o la fewu! Miiri k’a filɛ: Minw tɛ Jehova lɔn, olu be Sutana fanga lo kɔrɔ. Sutana mako t’u la ani a mako tɛ ele fana na hali dɔɔni. A yɛrɛ dusu bena diya n’i bɔnɛna ɲɛnamaya banbali la sabu i banna Jehova la ka tugu ale kɔ.

3. I y’i yɛrɛkun di Jehova ma minkɛ, i ye duga jumanw lo sɔrɔ o la?

³ I y’i yɛrɛkun di Jehova ma ani ka batɛmu ta minkɛ, miiri k’a filɛ a y’i duga cogo min na. Komi i batizera, i be se k’a fɔ sisan ni hakilisigi ye ko: “Masaba be ni ne ye, ne tena siran foyi ɲa. Adamadenw be se ka mun kɛ ne la?” (Zab. 118:6). Ka jɛnɲɔgɔnya ɲuman kɛ ni Ala ye ani k’a lɔn ko i koo ka di a ye, nɛɛmaba tɛ tɛmɛ o kan.

4, 5. a) K’an yɛrɛkun di Jehova ma, mun na o ye an yɛrɛ ka kunkanbaara lo ye? b) Gwɛlɛya jumanw lo be kerecɛnw kan u sanda mana kɛ min o min ye?

⁴ N’i batizera, jɛnɲɔgɔnya min be ele ni Jehova cɛ, kana o jati i n’a fɔ i bangebagaw ka nafolofɛn dɔ, i be se ka min sɔrɔ cɛɛn ye. Hali n’i bele b’i bangebagaw ka soo, i ka kisili b’i yɛrɛ lo bolo, a t’i bangebagaw bolo. Mun na a kɔrɔtanin lo i k’o to i hakili la? Sabu i tɛ se k’a lɔn tuma bɛɛ i bena gwɛlɛya minw sɔrɔ sini. Ɲɛyirali fɛ, n’i batizera kabi i denmisɛn tuma, i bena gwɛlɛya wɛrɛw sɔrɔ n’i kɛra kanbele wala sunguru ye. I ka dusukunnataw fana bena yɛlɛma. Sungurunin dɔ y’a fɔ ko: “N’a sɔrɔ lakɔliso la, a tɛ foyi kɛ denmisɛn na ka ban ka gato dɔ dumu min kɛra wololon sanyɛlɛma seli kama sabu a ye Jehova Seere ye. Nka saan damanin o kɔ, cɛnimusoko nege bena gwan a la. O tuma na, a ka ɲi ka la a la kosɔbɛ ko ka tugu Jehova ka sariyaw kɔ, o be mɔgɔ nafa tuma bɛɛ.”

⁵ Kanbelew ni sunguruw dɔrɔn lo tɛna gwɛlɛya wɛrɛw sɔrɔ. Baliku minw be batɛmu ta, olu fana ka limaniya bena kɔrɔbɔ cogo dɔ la u yɛrɛ ma miiri min na. U ka gwɛlɛyaw be se ka kɛ furu kɔnɔ, kɛnɛyako wala u ka baarako ye. Tiɲɛn na, an sanda mana kɛ min o min ye, an kelen kelen bɛɛ ka ɲi ka kantigiya kɛ Jehova ye koo caaman sen fɛ.—Zaki 1:12-14.

6. a) I y’i daa di Jehova ma ko i bena kantigiya kɛ a ye a mana kɛ min o min ye. O kɔrɔ ko di? b) I be kalan juman lo sɔrɔ Filipikaw 4:11-13 la?

⁶ Walisa ka se ka kantigiya kɛ Jehova ye tuma bɛɛ, kana ɲinɛ ko i y’i daa di Jehova ma ko i bena a sago kɛ, a mana kɛ min o min ye. O kɔrɔ ko i y’a fɔ duniɲa kuru bɛɛ Masaba ye ko i bena a sago kɛ hali n’i teriw ani i bangebagaw t’a batora tugun (Zab. 27:10). Koo bɛɛ la, dɛmɛ ɲini Jehova fɛ. A fɔ a ye ko i y’i daa di a ma koo min na, a k’i dɛmɛ k’o dafa.—Filipikaw 4:11-13 kalan.

7. Ka baara kɛ i yɛrɛ ka kisili kosɔn “ni Alaɲasiran ye kosɔbɛ,” o kɔrɔ ko di?

⁷ Jehova b’a fɛ i ka kɛ a teri ye. Nka walisa k’aw ka teriya sabati ani ka baara kɛ i yɛrɛ ka kisili kosɔn, i ka ɲi ka dɔ kɛ dɔ ye. Filipikaw 2:12 b’a fɔ ko: “Aw ka jija ka baara kɛ aw ka kisili kosɔn ni Alaɲasiran ye kosɔbɛ.” O kuma kɔrɔ ko i ka ɲi k’a filɛ i bena min kɛ walisa ka to k’i ka teriya sabati ni Jehova ye ani ka to kantigiya la gwɛlɛyaw bɛɛ n’a ta. Kana la i yɛrɛ la kojugu. A to i hakili la ko dɔw ye Ala bato saan caaman kɔnɔ, nka a laban, u ma to kantigiya la. Mun lo be se k’ele dɛmɛ ka baara kɛ i yɛrɛ ka kisili kosɔn?

8. Kelenna kalan ye mun lo ye? Mun na a kɔrɔtanin lo?

⁸ Walisa ka teriya kɛ ni Jehova ye, an ka ɲi ka mɛnni kɛ a fɛ ani ka kuma a fɛ. I be se ka mɛnni kɛ Jehova fɛ cogo minw na, a fɔlɔ ye ka kelenna kalan kɛ. O kɔrɔ ko i ka ɲi ka Bibulu n’an ka gafew kalan ani ka miiri u kan. Ka Bibulu kalan, o kɔrɔ tɛ k’a ka kumaw to an hakili la dɔrɔn i n’a fɔ an be tagara ɛkizamɛn dɔ lo kɛ. Nka, a be i n’a fɔ i be tagara voyazi dɔ la ani i be fɛɛn ɲuman caaman ye sira kan. O cogo kelen na, kelenna kalan b’i dɛmɛ ka fɛɛn kuraw faamu Jehova koo la. O lo bena i dɛmɛ k’i magwɛrɛ Ala la ani ale fana bena a magwɛrɛ i la.—Zaki 4:8.

9. Mun lo y’i dɛmɛ i ka kelenna kalan na?

⁹ Jehova ka ɔriganisasiyɔn ye fɛɛn caaman labɛn minw be se k’i dɛmɛ ka Bibulu sɛgɛsɛgɛ koɲuman. Ɲɛyirali fɛ, barokun dɔ be sɔrɔ jw.org kan min kuun ko: “Explore la Bible!” (Adolescents yɔrɔ lajɛ jw.org kan). A be se k’i dɛmɛ ka kalan nafamanw sɔrɔ Bibulu ka maanaw la. Gafe nin ka kalankɛfɛn dɔw be sɔrɔ jw.org kan fana: “Kalan tigitigi juman be Bibulu kɔnɔ?” U be se k’a to i b’i ka limaniya sabati ani ka se k’i ka lannakow fɔ tɔɔw ye. Ladili dɔw dira saan 2009, awirilikalo ka Réveillez-vous ! kɔnɔ barokun nin na: “Les jeunes s’interrogent: Comment trouver du plaisir à lire la Bible?” U be se k’i dɛmɛ i ka kelenna kalan na. Ka Bibulu kalan ani ka miiri a kan, o kɔrɔtanin lo sabu o be se k’i dɛmɛ ka baara kɛ i ka kisili kosɔn.—Zaburuw 119:105 kalan.

10. Mɔgɔ minw batizera, mun na u ka ɲi ka delili kɛ?

¹⁰ N’an be Bibulu kalan, an be mɛnni kɛ Jehova fɛ. N’an be delili kɛ, an be kuma n’a ye. Kerecɛn man kan k’a miiri ko delili ye delinanko dama ye wala fɛɛn dɔ, min bena a kunnadiya walisa a ka kokɛtaw ka ɲɛ. Nka delili ye kumaɲɔgɔnya ye, an be min kɛ n’an Danbaga ye. Jehova b’a fɛ k’an ka deliliw lamɛn (Filipikaw 4:6 kalan). N’i be hamina gwɛlɛya dɔ kosɔn, Bibulu b’a  fɔ ko i “k’i ka koow to Masaba bolo.” (Zab. 55:23). Yala i lanin b’o la tiɲɛn na wa? Balima caaman be se k’i hakili sigi k’o ladili ye olu dɛmɛ. A be se k’ele fana dɛmɛ!

11. Mun na i ka ɲi ka barika la Jehova ye tuma o tuma?

¹¹ Nka, an man kan ka delili kɛ dɔrɔn sabu an b’a fɛ Jehova k’an dɛmɛ. Bibulu b’a fɔ ko: “Aw ka kɛ ɲumanlɔnbagaw ye.” (Kɔlɔs. 3:15). Tuma dɔw la, an ka gwɛlɛyaw be se k’an hakili ɲagami fɔɔ, an be duga caaman minw sɔrɔ, an t’o ye tugun. Nin kɛ k’a filɛ: Loon o loon, miiri fɛɛn saba ɲɔgɔn na i be Jehova waleɲuman lɔn minw kosɔn. O kɔ, delili kɛ k’a fo u kosɔn. Sungurunin dɔ tɔgɔ ko Abigail ani a batizera a saan 12. A ko: “Ne fɛ, mɔgɔ si man kan n’an ka tandoli ye duniɲa kuru bɛɛ kɔnɔ ka se Jehova ma. A ye nilifɛnw di an ma. O kama, an ka ɲi ka tɛmɛ sababu kelen kelen bɛɛ fɛ k’a fo u kosɔn. Loon dɔ, n’ ye ɲiningali nin mɛn min ye n’ lasun ka miiri: ‘I ye barika la Jehova ye fɛɛn minw kosɔn bi, n’i kununa sini sɔgɔma k’a sɔrɔ k’o fɛɛnw dɔrɔn lo b’i fɛ, mun ni mun lo bena kɛ i fɛ?’”

12, 13. Jehova ye ɲumanya kɛ ele yɛrɛ ye cogo min na, mun na a kɔrɔtanin lo i ka miiri o la?

¹² Jehova ye masacɛ Dawuda dɛmɛ ka gwɛlɛya caaman muɲu. Jehova y’a dɛmɛ minkɛ, Dawuda y’a fɔ ko: “Aw k’a filɛ k’a lɔn ko Masaba ka ɲi. Mɔgɔ minw b’u yɛrɛ kalifa a ma, o tigiw dagamuna.” (Zab. 34:9). O vɛrise b’a yira ko an ka ɲi ka Jehova ka ɲumanya nɛnɛ k’a filɛ an yɛrɛ ma. N’i be Bibulu n’an ka gafew kalan ani ka taga lajɛnw na, i bena a lɔn Jehova ye dɔw dɛmɛ cogo min na ka to kantigiya la. N’i ka jɛnɲɔgɔnya be sabatira ni Jehova ye, i ka ɲi ka jatiminɛ kɛ k’a filɛ Jehova ye ele yɛrɛ dɛmɛ cogo minw na. Yala ele yɛrɛ y’a nɛnɛ k’a ye ko Jehova ka ɲi wa?

¹³ Kerecɛnw bɛɛ ye Jehova ka ɲumanya ye cogo kɛrɛnkɛrɛnnin dɔ la. Jehova y’an kelen kelen bɛɛ weele walisa an k’an magwɛrɛ ale n’a Dencɛ la. Yezu y’a fɔ ko: “Mɔgɔ si te se ka sɔn ne ma ni n Faa sababu tɛ.” (Zan 6:44). Yala i lanin b’a la ko Jehova lo y’i weele k’i magwɛrɛ ale la wa? Wala i b’a miiri ko: “Jehova ye n’ bangebagaw lo weele ani ne tugura u kɔ dɔrɔn.” A to i hakili la ko i y’i yɛrɛkun di Jehova ma tuma min na ani ka batize, ele yɛrɛ ye nɛɛma sɔrɔ ka jɛnɲɔgɔnya ɲuman kɛ n’a ye. Sisan, Jehova b’i lɔn tiɲɛn na. Bibulu b’an hakili sigi ko: “Ala koo ka di mɔgɔ min ye, [a] b’o tigi lɔn.” (1 Kor. 8:3). O kama, i be ni lɔyɔrɔ min ye Jehova ka ɔriganisasiyɔn kɔnɔ, o jati nɛɛmaba ye.

14, 15. Waajuli baara be se k’i dɛmɛ cogo di k’i ka limaniya sabati?

¹⁴ I be se ka Jehova ka ɲumanya ye n’a ye jagwɛlɛya d’i ma walisa i k’i ka lannakow fɔ tɔɔw ye. O be se ka kɛ waajuli kɛyɔrɔ la wala lakɔliso la. N’a sɔrɔ a ka gwɛlɛ dɔw fɛ k’u ka lannakow fɔ u filankuruw ye lakɔliso la. N’a sɔrɔ i b’a faamu fɛɛn min kama u be siran k’o kɛ. U t’a lɔn u filankuruw bena o koo ta cogo min na. A yɛrɛ be se ka gwɛlɛya i ma ka kuma jama ɲɛfɛ. Mun lo be se k’i dɛmɛ?

¹⁵ A fɔlɔ, miiri k’a filɛ fɛɛn min kama i lanin be i ka lannakow la. Kalankɛfɛn dɔw be jw.org kan. N’u be sɔrɔ i ka kaan na, wagati ta k’u lajɛ. U labɛnna walisa k’i dɛmɛ ka miiri i ka lannakow kan, k’a filɛ fɛɛn min kama i lanin b’u la ani i be  se k’u ɲɛfɔ tɔɔw ye cogo min na. N’i lanin b’u la kosɔbɛ ani i labɛnnin lo koɲuman, o bena i lasun ka seereya kɛ Jehova koo la.—Zer. 20:8, 9.

16. Mun lo be se k’i dɛmɛ i kana sigasiga k’i ka lannakow fɔ tɔɔw ye?

¹⁶ Hali n’i y’i yɛrɛ labɛn, i be se ka sigasiga k’i ka lannakow fɔ mɔgɔw ye. Balimamuso dɔ be ni saan 18 ye ani a batizera a saan 13. A ko: “N’ be n’ ka lannakow lɔn. Nka tuma dɔw la, a man nɔgɔ ka n’ ka miiriyaw fɔ.” A y’o gwɛlɛya ɲɛnabɔ cogo di? A ko: “N’ be kuma n’ yɛrɛ kumacogo la ni hakilisigi ye. N’ ka klasidenw be koo minw kɛ, u be kuma u koo la cogo nɔgɔman na. N’ fana ka ɲi k’o lo kɛ. O kama ni n’ be koo dɔ lakalila, n’ be se k’a fɔ ko, ‘o loon na, n’ tun be bibulukalan kɛra ani . . . ’ O kɔ, n’ be taga ɲɛ ni n’ ka kuma ye. Hali ni n’ be min fɔra o ɲɛsinnin tɛ Bibulu ma tigitigi, o b’a to dɔw b’a ɲini k’a lɔn n’ b’o bibulukalan kɛ cogo min na. Tuma dɔw la u be n’ ɲininga o koo la. Ni n’ be to ka koow kɛ o cogo la, koow be nɔgɔya n’ fɛ. O kɔ, n’ ninsɔn be diya kosɔbɛ!”

17. Mun lo be se k’i dɛmɛ k’i ka lannakow fɔ tɔɔw ye?

¹⁷ Ni tɔɔw b’a ye ko i b’i janto u la ani k’u bonya, a ka nɔgɔ u fɛ k’i bonya fana ani k’i ka lannakow jati. Ɲɛyirali fɛ, Olivia be ni saan 17 ye ani a batizera a denmisɛn tuma na. A ko: “N’ tun be siran tuma bɛɛ ko ni n’ kumana Bibulu koo la, tɔɔw bena a miiri ko n’ ka Alako y’a dama tɛmɛ.” O kɔ, Olivia y’a daminɛ ka koow jati cogo wɛrɛ la. Koo minw be siranya bila a la, sanni a ka miiri o la kojugu, a tun b’a fɔ a yɛrɛ ye ko: “Kanbelew ni sunguru caaman tɛ foyi lɔn Jehova Seerew koo la. U be Jehova Seere minw lɔn, o ye an dɔrɔn lo ye. O kama, u bena koow ta cogo min na, o be bɔ an ka kokɛcogow lo la. O la, u bena mun lo miiri n’an be maloya wala n’an be siran k’an ka lannakow fɔ u ye? Wala n’an hakili siginin tɛ n’an be kumana? U be se k’a miiri ko an be maloya sabu an ye Jehova Seere ye. Komi an lanin t’an yɛrɛ la, u yɛrɛ be se ka koo dɔw kɛ wala ka kuma dɔw fɔ minw bena digi an na. Nka, n’an be kuma an ka lannakow la cogo nɔgɔman na i n’a fɔ an be deli ka kuma cogo min na, u ka teli k’an bonya.”

18. I ka ɲi ka mun lo kɛ walisa ka baara kɛ i yɛrɛ ka kisili kosɔn?

¹⁸ I ko an y’a ye cogo min na, ka baara kɛ i yɛrɛ ka kisili kosɔn, o ye kunkanbaaraba lo ye. Walisa k’o kunkanbaara dafa, i ka ɲi ka Ala ka Kuma kalan ani ka miiri a kan. Ka fara o kan, Jehova y’i dɛmɛ cogo min na, i ka ɲi ka miiri o la koɲuman ani ka delili kɛ. Ni be to k’o kɛ, o bena i dɛmɛ ka la a la kosɔbɛ ko Jehova y’i teri ye. O bena i lasun fana k’i ka lannakow fɔ tɔɔw ye.—Zaburuw 73:28 kalan.

19. Mun na kuun b’a la i ka baara kɛ i yɛrɛ ka kisili kosɔn?

¹⁹ Yezu y’a fɔ ko: “Ni mɔgɔ min b’a fɛ ka tugu ne kɔ, o tigi kana miiri a yɛrɛ ka nafa la. A k’a ka gwengwenlɔgɔ ɲun ka tugu ne kɔ.” (Mat. 16:24). Tiɲɛn na, walisa ka tugu Yezu kɔ, kerecɛn kelen kelen bɛɛ ka ɲi k’a yɛrɛkun di Jehova ma ani ka batize. O be sababu di i ma ka duga caaman sɔrɔ sisan ani ka ɲɛnamaya kɛ fɔɔ abada duniɲa kura kɔnɔ. O kama, i jija k’i seko bɛɛ kɛ ka to ka baara kɛ i yɛrɛ ka kisili kosɔn!