1, 2. Mun na bangebaga dɔw be hami n’u deen b’a fɛ ka batize?

SAAN o saan, Bibulu kalanden waa caaman b’u yɛrɛkun di Jehova ma ka batize. U caaman ye kanbelew ni sunguruw ye minw lamɔna tiɲɛn sira kan ani u y’a latigɛ ka ɲɛnamaya kɛ cogo dɔ la min ɲɔgɔn tɛ yen (Zab. 1:1-3). N’i ye bangebaga ye, siga t’a la, i kɔrɔtɔnin lo i deen ka batɛmu loon ka se.—3 Zan 4 lajɛ.

² O n’a ta bɛɛ, koo dɔw be se ka hami bila i la. N’a sɔrɔ i y’a ye ko denmisɛn dɔw batizera ani kɔfɛ u y’a daminɛ k’u yɛrɛ ɲininga ni nafa b’a la u ka Ala ka sariyaw sira tagama. U dɔw yɛrɛ ye tiɲɛn sira bila. O kama, i be se ka siran ko i deen k’a daminɛ ka Jehova bato ani kɔfɛ, a tɛ Jehova kanu tugun i ko a tun b’a kanu cogo min na a daminɛ na. O cogo la i deen bena kɛ i n’a fɔ Efɛzi kerecɛn dɔw saan kɛmɛkulu fɔlɔ la. Yezu y’a  fɔ olu koo la ko: “Aw tun be ne kanu cogo min na fɔlɔ la, aw te ne kanu ten tugu.” (Yir. 2:4). I be se ka mun lo kɛ walisa k’i deen tanga o ma, k’a dɛmɛ a ka kɔgɔ Alako ta fan fɛ ani “ka kisi”? (1 Piyɛri 2:2). Walisa k’o ɲiningali jaabi, an ka Timote ka ɲɛyirali lajɛ.

3. a) Timote kɛra kerecɛn ye tuma juman? A tun kalanna min na, a tun b’o sira tagama cogo di? b) Ciden Pol ye koo saba jumanw lo fɔ Timote koo la?

³ Ciden Pol tagara Lisitire a siɲɛ fɔlɔ la saan 47 (K. T. L.). N’a sɔrɔ o tuma na le Timote ye Yezu ka kalanw mɛn, a kanbele tuma na. A tun kalanna min na, a tun b’o sira tagama. Saan fila o kɔ, a y’a daminɛ ka Pol bila sira a ka misɔndenya baara la. Saan 16 o kɔ, Pol ye lɛtɛrɛ sɛbɛ Timote ma ko: “E kɔni kalanna koo minw na, ani ka sɔn u ma, jija k’o minɛ ka ɲa, bari i ye o koo kalan mɔgɔ min fɛ, i b’o tigi lɔn. Kabini i denmisɛn tuma, i ye Ala ka kuma [Heburukan sɛbɛninw] lɔn, min be se ka hakilitigiya d’i ma, min barika la mɔgɔ b’a jigi la Yezu Krista kan ka kisi.” (2 Tim. 3:14, 15). A kɔrɔsi ko Pol y’a fɔ ko Timote be 1) Ala ka Kuma lɔn, ko a 2) kalanna koo minw na, a sɔnna u ma ani ko 3) o be se ka hakilitigiya di a ma, min barika la mɔgɔ be la Yezu Krista la ka kisi.

4. I ye baara kɛ ni mun ni mun lo ye walisa k’i deenw kalan? (Jaa lajɛ, barokun daminɛ na.)

⁴ Kerecɛn bangebagaw, aw b’a fɛ fana aw deenw ka Ala ka Kuma lɔn, o min ye Heburukan sɛbɛninw ni Gɛrɛkikan sɛbɛninw ye. Mɔgɔ minw kofɔra Bibulu kɔnɔ ani koo minw lakalila yen, hali denmisɛn fitininw be se k’o faamu. Jehova ka ɔriganisasiyɔn ye gafew, kitabuninw ani videwo caaman labɛn denmisɛnw ye. Bangebagaw be se ka baara kɛ n’u ye k’u deenw dɛmɛ. U jumanw lo be sɔrɔ i ka kaan na? I deen ka ɲi ka Bibulu kɔnɔna kumaw lɔn walisa ka se ka jɛnɲɔgɔnya ɲuman kɛ ni Jehova ye.

5. a) A ‘kalanna koo minw na, a sɔnna u ma.’ O kuma kɔrɔ ko di? b) U ye kibaro diiman min fɔ Yezu koo la, an b’a lɔn cogo di ko Timote lara o la?

⁵ Mɔgɔ minw kofɔra Bibulu kɔnɔ ani koo minw lakalila yen, a ka ɲi i k’i deenw dɛmɛ u k’o lɔn. Nka, o dama tɛ bɔri kɛ. Kana ɲinɛ ko Timote tun ‘kalanna koo minw na, a sɔnna u ma.’ O kɔrɔ ko a tun lanin b’a la kosɔbɛ ko a tun be min kalanna o ye tiɲɛn ye. Timote tun be Heburukan sɛbɛninw lɔn kabi a denmisɛn tuma, o kɔrɔ tuma min na a tun ye deen fitinin ye. Kɔfɛ, a lara a la ko Yezu lo ye Masiya ye. Timote ka limaniya barika tun ka bon kosɔbɛ, fɔɔ a batizera ani a ye misɔndenya baara kɛ ni ciden Pol ye.

6. I be se k’i deenw dɛmɛ cogo di walisa u ye min kalan Ala ka Kuma kɔnɔ, u ka la o la?

⁶ I be se k’i deenw dɛmɛ cogo di u ka limaniya barikaman sɔrɔ walisa u kalanna koo minw na, u ka sɔn u ma i ko Timote? A fɔlɔ, muɲu u kɔrɔ. Walisa ka limaniya barikaman sɔrɔ, o be wagati caaman ta. I deenw tɛna sin ka la koo dɔ la sabu ele lanin b’o la. Deen kelen kelen bɛɛ ka ɲi ka “koo bɛɛ sɛgɛsɛgɛ” walisa ka la Bibulu ka fɔta la (1 Tesalonikaw 5:21 kalan). Bangebagaw, aw be se ka koo caaman kɛ k’aw deenw dɛmɛ u k’u ka limaniya barika bonya, sanko n’u ye ɲiningali dɔw kɛ. An ka ɲɛyirali dɔ lajɛ o koo la.

7, 8. a) Bangebaga dɔ be muɲu a denmuso kɔrɔ cogo di n’a b’a kalanna? b) I muɲuna i deen kɔrɔ koo juman lo la?

 ⁷ Thomas denmuso be ni saan 11 ye. Thomas ko: “N’ denmuso be se ka n’ ɲininga ko, ‘yala Jehova tun be se k’a kɛ bɛgɛnw be yɛlɛma yɛlɛma ka kɛ mɔgɔw ye walisa ɲɛnamaya ka kɛ dugukolo kan wa?’ wala ‘Mun na an t’an seen don duniɲa ka koo nunu na: ka vote ani k’a ɲini ka koow fisaya?’ Tuma dɔw la, n’ ka ɲi ka n’ yɛrɛ minɛ walisa n’ kana a fɔ a ye a ka ɲi ka la min na. Dalilu barikaman kelen dɔrɔn lo t’a to mɔgɔ be la koo dɔ la. Nka dalilu fitinin fitinin caaman lo.”

⁸ Thomas b’a lɔn ko a ka ɲi ka muɲu walisa k’a denmuso kalan. Tiɲɛn na, kerecɛn kelen kelen bɛɛ ka ɲi ka muɲuli kɛ (Kɔlɔs. 3:12). Thomas y’a faamu ko walisa k’a deen dɛmɛ a k’a ka limaniya sabati, o bena wagati caaman ta ani a ka ɲi ka baro kɛ n’a ye siɲɛ caaman. A denmuso be min kalanna, a ka ɲi ka basigi Bibulu kan ka hakilijagabɔ kɛ n’a ye o koo la. Thomas ko: “N’ denmuso be min kalanna, ne ni n’ muso b’a ɲini k’a lɔn n’a lanin b’o la tiɲɛn na ani n’o kalan bɛnnin lo a fɛ. An b’o kɛ sanko ni Bibulu ka kalan jɔnjɔnw yɛrɛ lo. N’a be ɲiningali kɛ, o ye koɲuman ye. Tiɲɛn na, n’a sɔnna koo dɔ la ani a ma ɲiningali kɛ, o yɛrɛ lo be siranya bila n’ na.”

9. I be se k’i deenw kalan Ala ka Kuma na cogo di?

⁹ Ni bangebagaw be muɲu u deenw kɔrɔ k’u kalan, dɔɔni dɔɔni, u deenw bena se ka limaniya “bonya lɔn, ani a janya, ani a dunya.” (Efɛz. 3:18, Biblu Ala ta Kuma). An ka ɲi k’u kalan ka kɛɲɛ n’u sanda ani u ka faamuyali ye. U be min kalanna, n’u lara o la kosɔbɛ, u bena se k’u ka lannakow lafasa tɔɔw ɲɛfɛ cogo nɔgɔman na, hali u ka lakɔli filankuruw yɛrɛ (1 Piyɛri 3:15). Ɲɛyirali fɛ, yala i deenw be se ka basigi Bibulu kan k’a ɲɛfɔ fɛɛn min be kɛ saya kɔ wa? Bibulu be min fɔ o koo la, yala o bɛnnin lo u fɛ wa? * Tiɲɛn na, i ka ɲi ka muɲu k’i deen kalan Ala koo la. Nka, n’i b’o kɛ o tɛ gwansan ye.—Deter. 6:6, 7.

10. Mun lo kɔrɔtanin lo n’i b’i deenw kalanna?

¹⁰ I ka ɲɛyirali ɲuman kɔrɔtanin lo fana sabu a be se k’i deenw dɛmɛ u k’u ka limaniya barika bonya. Stephanie be ni denmuso saba ye. A ko: “Kabi u denmisɛn tuma, n’ be n’ yɛrɛ ɲininga ko, ‘fɛɛn min kama ne lanin b’a la ko Jehova be yen, ko a b’an kanu ani ko a ka sariyaw tilennin lo, yala ne b’o kofɔ n’ deenw ye wa? Yala n’ deenw ɲɛɛ b’a la ko n’ be Jehova kanu tiɲɛn na wa?’ Yala n’ be se k’a ɲini n’ deenw fɛ u ka la koo dɔ la ni ne yɛrɛ lanin t’o la wa?”

11, 12. Hakilitigiya ye mun lo ye? Mun na an be se k’a fɔ ko mɔgɔ sanda dɔrɔn lo t’a yira ko a ye hakilitigi ye?

¹¹ I ko an y’a ye cogo min na, Timote tun be 1) Ala ka Kuma lɔn 2) a tun lanin be Bibulu ka kalanw na. Nka, Pol tun b’a fɛ ka mun lo fɔ tuma min na a ko Ala ka Kuma barika la Timote tun be se ka “hakilitigiya” sɔrɔ walisa ka kisi?

¹² Étude perspicace des Écritures (gafe 2nan), be hakilitigiya kɔrɔ ɲɛfɔ. A b’a fɔ ko Bibulu kɔnɔ, hakilitigiya kɔrɔ ko “ka se k’an ka lɔnniya n’an ka faamuyali kɛ  ka gwɛlɛyaw ɲɛnabɔ, k’an yɛrɛ tanga faratiw ma, ka laɲinita dɔw dafa ani ka tɔɔw ladi u k’o kɛ. Hakilitigiya ni nalomanya tɛ kelen ye.” Bibulu b’a fɔ ko “nalomankow le ka di denmisɛnw ye.” (Talenw 22:15). Nka, hakilitigiya b’a yira ko mɔgɔ ye kerecɛn kɔgɔnin ye Alako ta fan fɛ. Ni mɔgɔ kɔrɔla, o lo t’a yira ko a ye kerecɛn kɔgɔnin ye. Nka, n’a be ni Jehova ɲɛsiran ye ani n’a be mɛnni kɛ a fɛ, o lo b’a yira ko a ye kerecɛn kɔgɔnin ye Alako ta fan fɛ.—Zaburuw 111:10 kalan.

13. Kanbelew ni sunguruw be se k’a yira cogo di k’u ye hakilitigiya sɔrɔ o min barika la mɔgɔ be kisi?

¹³ Kanbelew ni sunguru minw kɔgɔra Alako ta fan fɛ, olu tɛ i n’a fɔ mɔgɔ “minw te se ka lɔ kelen kan” u ka farisogo negew ani u filankuruw ka degun kosɔn (Efɛz. 4:14). Nka, u be ɲɛtaga kɛra walisa ka “hakili sɔrɔ ka ɲumaman ni juguman lɔn ka bɔ ɲɔgɔn na.” (Eburuw 5:14). Ka fara o kan, u be desizɔn ɲumanw ta hali n’u bangebagaw wala baliku dɔ tɛ yen. U b’a yira o cogo la k’u be kɛra kerecɛn kɔgɔninw ye (Filip. 2:12). U ka ɲi ka kɛ n’o hakilitigiya ɲɔgɔn ye walisa ka kisi (Talenw 24:14 kalan). I be se k’i deenw dɛmɛ cogo di k’o hakilitigiya ɲɔgɔn sɔrɔ? A to i deenw k’i ka lannakow lɔn. I ka kumaw n’i ka kɛwalew fɛ, i ka ɲi k’a yira ko i b’i jijara ka Bibulu ka sariyaw labato.—Ɔrɔm. 2:21-23.

14, 15. a) Kanbelew ni sunguru minw b’a fɛ ka batize, olu ka ɲi ka miiri koo jumanw lo la minw kɔrɔtanin lo kosɔbɛ? b) N’an be Ala ka sariyaw labato, duga b’o la. I be se k’i deenw dɛmɛ cogo di u ka miiri o la?

¹⁴ K’a fɔ i deenw ye min ka ɲi ani min man ɲi, o dama tɛ se k’a to u ka limaniya barika be bonya. I ka ɲi k’u dɛmɛ fana u ka miiri ɲiningali nunu koo la: “Mun na Bibulu b’a fɔ ko koo dɔw daganin tɛ k’a sɔrɔ o koow ka di an ye? Mun na ne lanin b’a la ko Bibulu ka sariyaw be n’ nafa tuma bɛɛ?”—Ezayi 48:17, 18.

 ¹⁵ N’i deen b’a fɛ ka batize, a dɛmɛ a ka miiri kerecɛn ka kunkanbaaraw la. A be mun lo miiri o kunkanbaaraw koo la? U nafaw ye jumanw lo ye? Gwɛlɛya jumanw lo b’u la? Mun na o nafaw ka bon ni gwɛlɛyaw ye? (Mariki 10:29, 30). A kɔrɔtanin lo kosɔbɛ a ka miiri o ɲiningaliw koo la koɲuman ka sɔrɔ ka batize. N’i deen be mɛnni kɛ Ala fɛ, duga b’o la, nka n’a tɛ mɛnni kɛ a fɛ, o nɔfɛkow ka jugu. I deen dɛmɛ fana a ka miiri o koo la. O la, a bena la a la ko n’a be Bibulu ka sariyaw sira tagama, o bena a nafa tuma bɛɛ.—Deter. 30:19, 20.

16. I deen batizenin kɔ, n’a y’a daminɛ ka sigasiga a ka lannakow la, i ka ɲi ka mun lo kɛ do?

¹⁶ I deen batizenin kɔ, n’a y’a daminɛ ka sigasiga a ka lannakow la do? Ɲɛyirali fɛ, duniɲa ka koow be se ka diya i deen ye. A be se k’a yɛrɛ ɲininga ni nafa b’a la tiɲɛn na ka Bibulu ka sariyaw labato (Zab. 73:1-3, 12, 13). I bena o koo ta cogo min na, o lo bena a to i deen bena a latigɛ ka Jehova bato wala k’a mabɔ a la. I deen ye denmisɛn ye wo, kanbele wala sunguru ye wo, banba walisa i kana kɛlɛ kɛ n’a ye o koo la. Nka, a to a k’a lɔn ko i b’a kanu ani ko i b’a fɛ k’a dɛmɛ.

17, 18. Ni kanbele wala sunguru dɔ be sigasigara a ka lannakow la, bangebagaw be se k’a dɛmɛ cogo di?

¹⁷ Tiɲɛn lo ko kanbele wala sunguru min batizera, ale y’a yɛrɛkun di Jehova lo ma. O kɔrɔ, a y’a daa di ko a bena Ala kanu ani k’a sago kɛ a ɲɛnako fɔlɔ ye (Mariki 12:30 kalan). Jehova tɛ o koo ta tulonko ye. O kama, an fana ka ɲi k’o ta sɔbɛko ye (Waaj. 5:3, 4). I deen hakili jigi o koo la. Nka, o kɛ nɛmɛnɛmɛ ani wagati bɛnnin na. Jehova ka ɔriganisasiyɔn ye gafe minw labɛn bangebagaw ye, i ka ɲi k’o kalan fɔlɔ. O kɔ, a yira ka gwɛ i deen na ko a ye desizɔn min ta k’a yɛrɛkun di Jehova ma ani ka batize, o ye sɔbɛko lo ye. A yira a la fana ko a bena duga caaman sɔrɔ o la.

¹⁸ Ɲɛyirali fɛ, i be se ka ladili ɲumanw sɔrɔ gafe nin laban yɔrɔ la: Les jeunes s’interrogent. Réponses pratiques (gafe fɔlɔ), cɛtigɛ nin jukɔrɔ, kunnafoniw yɔrɔ la: “Les parents s’interrogent.” A fɔra yen ko: “I kana sin k’a miiri ko i deen be banna i ka lannakow la. Tuma caaman na, gwɛlɛya dɔw lo b’a kan.” A be se ka kɛ ko a filankuruw lo b’a niin tɔɔrɔla. A be se ka kɛ fana ko a b’a miiri ko a b’a kelen na wala ko kerecɛn kanbele ni sunguru tɔɔw be ɲɛtaga kɛra joona joona ka tɛmɛ ale kan. A ɲɛfɔra o gafe kɔnɔ fana ko, o kɔrɔ tɛ ko i deen banna i ka lannakow la. N’a sɔrɔ gwɛlɛya wɛrɛw lo b’a kan. O kɔ, ladiliw dira bangebagaw ma k’a yira u be se k’u deenw dɛmɛ cogo min na n’u be sigasigara tiɲɛn koo la.

19. Bangebagaw be se k’u deenw dɛmɛ cogo di u ka “hakilitigiya” sɔrɔ walisa ka kisi?

¹⁹ Bangebagaw, kunkanbaaraba ni nɛɛmaba b’aw fɛ. Aw ka ɲi k’aw deenw “kolo k’u ladi, ani k’u kalan ka kɛɲɛ ni Matigi sago ye.” (Efɛz. 6:4). I ko an y’a ye cogo min na, aw ka ɲi k’u kalan Bibulu kɔnɔnakow la. U kalanna min na, aw ka ɲi k’u dɛmɛ fana u ka la o la. Tiɲɛn na, ni u lara o la kosɔbɛ, o lo bena u lasun k’u yɛrɛkun di Jehova ma ani ka baara kɛ a ye n’u dusukun bɛɛ ye. An jigi b’a la ko Jehova ka Kuma, a ka hakili senu ani aw ka jijaliw bena a to aw deenw be “hakilitigiya” sɔrɔ walisa ka kisi.