Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Lonanw be se k’a lɔn cogo di u ka ɲi k’u deenw dɛmɛ Alako ta fan fɛ kaan min na?

Aw be jamana min kɔnɔ, aw deenw bena o yɔrɔ ka kaan degi ni mɔgɔ wɛrɛw ye ani lakɔliso la. N’u be kaan caaman fɔ, o be se k’u nafa. Bangebagaw ka ɲi k’a filɛ u deenw bena Bibulu ka kalanw faamu koɲuman kaan min na ani ka ɲɛtaga kɛ. O kɔ, u ka ɲi k’a latigɛ n’u bena lajɛnw kɛ jamana ka kaan na wala u yɛrɛ ka kaan na. Fɛɛn min bena deenw nafa Alako ta fan fɛ, o lo ka ɲi ka kɛ bangebagaw ɲɛnako fɔlɔ ye, olu yɛrɛ diyanyekow tɛ.—w17.05, ɲɛɛ 9-11.

Yezu tun kaan be mun lo ma tuma min na a ye Piyɛri ɲininga ko: “I be ne kanu ka tɛmɛ nunu kan wa?” (Zan 21:15).

Jɛgɛ minw tun bilanin be Piyɛri gɛrɛfɛ, n’a sɔrɔ Yezu tun kaan b’olu lo ma. Wala, n’a sɔrɔ a tun kaan be Piyɛri ka jɛgɛminɛ baara lo ma. Yezu sanin kɔ, Piyɛri y’a ka jɛgɛminɛ baara daminɛ kokura. Kerecɛnw ka ɲi ka baloɲini baara jati ka dama kɛɲɛ.—w17.05, ɲɛɛ 22-23.

Mun na Ibrayima y’a ɲini a muso fɛ a k’a fɔ ko ale y’a kɔrɔcɛ ye? (Zɛnɛzi 12:10-13).

Tiɲɛn na, Sara ye Ibrayima faden ye. Ni Sara tun y’a fɔ ko Ibrayima y’ale cɛɛ ye, u tun be se ka Ibrayima faga. Ala tun y’a daa di Ibrayima ma ko a bena bɔnsɔn min sɔrɔ, o koo tun tɛna dafa.—wp-F 17.3, ɲɛɛ 14-15.

Minw tun b’a fɛ ka Heburukan degi, Elias Hutter tɛmɛna fɛɛrɛ juman lo fɛ k’u dɛmɛ?

Heburukan kumaden minw be sɔrɔ Bibulu kɔnɔ, a ye fɛɛrɛ dɔ kɛ walisa ka kalandenw dɛmɛ k’u faranfasi ni sigininden dɔw ye minw nɔrɔnin lo kumaden ɲɛfɛ (ɲɛnɔrɔ) wala a kɔfɛ (kɔnɔrɔ). A y’o kumadenw bɔ papiye kan ani u sɛbɛra ka fin. Nka, u ɲɛnɔrɔw n’u kɔnɔrɔw sɛbɛra ka misɛnya. O fɛɛrɛ ɲɔgɔn kɛra Traduction du monde nouveau kɔnɔ, jukɔrɔla kunnafoniw be sɔrɔ min kɔnɔ.—wp-F 17.4, ɲɛɛ 11-12.

Kerecɛn ka ɲi ka miiri mun lo la n’a b’a fɛ ka marifa mara a yɛrɛ fɛ walisa k’a yɛrɛ latanga mɔgɔ wɛrɛw ma?

Ala be niin jati fɛɛn senuman ye. Yezu m’a ɲini a ka kalandenw fɛ u ka murujan kɛ k’u yɛrɛ lafasa (Luka 22:36, 38). An ka ɲi ka murujanw yɛlɛma k’u kɛ dabaw ye. Niin kɔrɔtanin lo ka tɛmɛ bololafɛnw kan. An b’an janto tɔɔw dusukunnakow la ani an b’a fɛ ka kɛ ɲɛyirali ɲuman ye (2 Kor. 4:2).—w17.07, ɲɛɛ 31-32.

Matiyo ni Luka ye min sɛbɛ Yezu ka ɲɛnamaya daminɛ koo la dugukolo kan, mun na o tɛ kelen ye?

Matiyo sinsinna Yusufu ka koow lo kan: Yusufu ye min kɛ tuma min na a bɔra a kala ma ko Mariyamu kɔnɔman lo ani mɛlɛkɛ dɔ ye min fɔ a ye siko la walisa a ka boli ka taga Ezipiti. Luka sinsinna Mariyamu ka koow lo kan: Mariyamu tagara bɔ Elizabɛti ye ani a ye min kɛ tuma min na Yezu denmisɛnman tora Alabatoso kɔnɔ.—w17.08, ɲɛɛ 32.

Koo jumanw lo kɛra farati ye Bibulu ma?

Kumaw ani kumaden minw tun be Bibulu kɔnɔ galen, olu kɔrɔw yɛlɛmana pewu! Mɔgɔw tun be kaan minw fɔ wagati dɔ la, u yɛlɛmana sabu yɛlɛmaniw donna politikikow la. U y’a ɲini ka mɔgɔw bali ka Bibulu bayɛlɛma mɔgɔw ka kaanw na.—w17.09, ɲɛɛ 19-21.

Yala an kelen kelen bɛɛ be ni mɛlɛkɛ ye min b’an latanga wa?

Ayi. Yezu y’a fɔ ko a ka kalandenw ka mɛlɛkɛw be Ala ɲɛɛ kɔrɔ (Mat. 18:10). O kɔrɔ ko mɛlɛkɛw b’u mako don a ka kalandenw na. O kɔrɔ tɛ ko mɛlɛkɛw b’u kelen kelen bɛɛ latanga cogo kabakoman na.—wp-F 17.5, ɲɛɛ 5.

Kanuya sifa juman lo kɔrɔtanin lo ka tɛmɛ?

O kanuya basiginin be Bibulu ka sariyakolow lo kan ani a be weele gɛrɛkikan na ko agapɛ. A b’a to mɔgɔ koo be diya i ye. A t’a yɛrɛ nafa ɲini, nka a be koo ɲuman kɛ tɔɔw nafa kosɔn.—w17.10, ɲɛɛ 7.