Pol kumana cɛɛ dɔ koo la 2 Korɛntikaw 12:2, 3 kɔnɔ. A ko Ala y’o cɛɛ ta “ka taga . . . fɔ sankolo sabanan” kɔnɔ. O ye jɔn lo ye? Pol y’a yira sapitiri 11nan kɔnɔ ko ale ye Ala ka ciden ye (2 Kor. 11:5, 23). O kɔ, a ko ‘Matigi ye fɛɛn dɔw yira ale la’ ani ko ale ye ‘koo dɔw ye.’ A ka kumaw na, a ma balima wɛrɛ kofɔ. O la, a gwɛnin lo ko Pol tun kaan be ale yɛrɛ lo ma.—2 Kor. 12:1, 5.

O cogo la, mɔgɔ min tara “ka taga . . . fɔ sankolo sabanan” kɔnɔ ani “arijana” na, o ye Pol yɛrɛ lo ye (2 Kor. 12:2-4, Biblu Ala ta Kuma). A y’a fɔ ko ‘Matigi ye fɛɛn dɔw yira ale la.’ O kɔrɔ ko koo nataw lo yirala a la.

Pol ye “sankolo sabanan” min ye, o ye mun lo ye?

Bibulu kɔnɔ n’u ko “sankolo,” o be se ka ɲɛsin sankolo yɛrɛ yɛrɛ ma (Zɛnɛzi 11:4; 27:28; Mat. 6:26). Nka o dɔrɔn tɛ. Tuma dɔw la, o kumaden be ɲɛsin adamadenw ka kuntigiya ma (Dan. 4:20-22). A be se ka ɲɛsin fana Ala ka kuntigiya ma i n’a fɔ a be min kɛ a ka Masaya sababu fɛ.—Yir. 21:1.

Pol kumana “sankolo sabanan” koo la. A tun b’a fɛ ka mun lo fɔ? Tuma dɔw la, Bibulu be fɛɛn dɔ kofɔ fɔɔ siɲɛ saba walisa ka sinsin a kan wala k’a yira k’o fɛɛn kɔrɔtanin lo (Ezayi 6:3; Ezek. 21:32; Yir. 4:8). Tuma min na Pol kumana “sankolo sabanan” koo la, a be komi a tun kaan be kuntigiya dɔ lo ma min ɲɔgɔn tɛ yen. O ye Masiya ka Masaya lo ye, Yezu Krista n’a ka marakɛɲɔgɔn mɔgɔ 144 000 be min kun na (Étude perspicace des Écritures, gafe fɔlɔ lajɛ, ɲɛɛ 473, 476). Ciden Piyɛri y’o Masaya weele ko “sankolokura” an be min makɔnɔna.—2 Piyɛri 3:13.

Pol ye “arijana” min kofɔ, o ye mun lo ye?

N’u ko “arijana,” o be se ka ɲɛsin fɛɛn caaman ma: 1) Alijɛnɛ min bena kɛ dugukolo kan i ko Adama ni Awa tun be yɔrɔ min na a daminɛ na. 2) Hɛɛrɛ min bena kɛ an ni Jehova n’an balimaw cɛ duniɲa kura kɔnɔ. 3) Hɛɛrɛ min be sankolo la, o kɔrɔ “Ala ta arijana” min kofɔra Yirali 2:7 kɔnɔ (Biblu Ala ta Kuma).—Saan 2015, zuwekalo tile 15nan ka Kɔrɔsili Sangaso lajɛ (faransɛkan na), ɲɛɛ 8nan, § 8.

Pol ye alijɛnɛ min kofɔ 2 Korɛntikaw 12:4 kɔnɔ, n’a sɔrɔ o ɲɛsinna o fɛɛn saba nunu bɛɛ lo ma.

An ka ɲi ka min to an hakili la:

“Sankolo sabanan” min kofɔra 2 Korɛntikaw 12:2 kɔnɔ, n’a sɔrɔ o ɲɛsinna Masiya ka Masaya lo ma, Yezu Krista ni mɔgɔ 144 000 be min kun na. O lo weelela fana ko “sankolokura.”—2 Piyɛri 3:13.

O Masaya weelela “sankolo sabanan” sabu a ɲɔgɔn tɛ yen.

Pol tara “ka taga . . . arijana” min na, n’a sɔrɔ o ɲɛsinnin be fɛɛn saba lo ma minw bena kɛ duniɲa kura kɔnɔ wagati kelen na: 1) Alijɛnɛ min bena kɛ dugukolo kan. 2) Hɛɛrɛ min bena kɛ an ni Jehova n’an balimaw cɛ. O hɛɛrɛ bena tɛmɛ bi ta kan. 3) “Ala ta arijana” min be sankolo la.

O la, sankolo kura ni dugukolo kura lo bena kɛ duniɲa kura ye. Sankolo kura ye Ala ka sankolola gofɛrɛnɛman ye ani dugukolo kura ye Ala sagokɛlaw ye minw bena ɲɛnamaya kɛ alijɛnɛ kɔnɔ dugukolo kan. O ye labɛn kura lo ye.