Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Mun lo b’a yira Bibulu kɔnɔ ko Ala be makari an na?

Ka Israɛldenw to jɔnya la Ezipiti, Ala tun b’u ka tɔɔrɔkow kala ma ani a makarila u la (Ɛkiz. 3:7; Ezayi 63:9). An danna Ala jaa la. O kama, an fana be se ka makari tɔɔw la. Ala be makari an na hali n’an b’a miiri ko an man kan n’a ka kanuya ye.—wp18.3-F, ɲɛɛ 8-9.

Yezu ka kalanw ye mɔgɔw dɛmɛ cogo di ka miiriya tilenbaliw kɛlɛ?

Yezu ka wagati la, Yahutu caaman tun be ni miiriya tilenbaliw ye. Krista y’a yira ka gwɛ ko an ka ɲi k’an yɛrɛ majigi ani an man ɲi ka waso an ka siya kosɔn. A y’a ka kalandenw jija k’u ka ɲɔgɔn minɛ i ko balimaw.—w18.06, ɲɛɛ 9-10.

Ala m’a to Musa ka don Layidu jamana kɔnɔ. An be kalan juman lo sɔrɔ o la?

Jɛnɲɔgɔnya ɲuman tun be Musa ni Jehova cɛ (Deter. 34:10). Israɛldenw ye saan 40 minw kɛ kongokolon kɔnɔ, o laban fan fɛ, u ŋunuŋununa tugun ko jii tɛ yen. Ala y’a fɔ Musa ye ko a ka kuma farakurun fɛ. Nka Musa m’o kɛ, a ye farakurun gosi. N’a sɔrɔ Jehova dimina Musa kɔrɔ sabu a m’ale ka cikanw labato. A ma bonya la Jehova kan fana o kabako kosɔn (Nɔnb. 20:6-12). O b’a yira ko a kɔrɔtanin lo an ka mɛnni kɛ Jehova fɛ ani an ka bonya la a kan.—w18.07, ɲɛɛ 13-14.

N’an b’an ka miiriyaw basigi koo yetaw dama kan, o ka teli k’an lafili cogo di?

Mɔgɔ caaman ka teli ka basigi koo yetaw lo kan. U b’u ka miiriya basigi koo saba nunu kan: mɔgɔ ka siya, nafolotigiya wala fantanya ani mɔgɔ sanda. Ala tɛ mɔgɔ bɔ mɔgɔ la. A kɔrɔtanin lo, an k’an jija k’a ladegi! (Kɛw. 10:34, 35)—w18.08, ɲɛɛ 8-12.

Balima cɛkɔrɔbaw be se ka tɔɔw dɛmɛ cogo jumanw na?

Hali ni dɔ bɔra balima cɛkɔrɔba dɔ ka kunkanbaaraw la, a bele koo ka gwɛlɛ Ala ma ani a be se ka koo caaman kɛ ka tɔɔw dɛmɛ. Balimamuso minw cɛɛ tɛ Jehova Seerew ye ani balima minw sumana Alako ta fan fɛ, a be se k’olu dɛmɛ. A be se fana ka bibulukalanw kɛ ani ka dɔ fara a ka waajuli baara kan.—w18.09, ɲɛɛ 8-11.

Kerecɛnw ka kalankɛ minanw ye mun ni mun lo ye?

U dɔw ye ladɛrɛsi sɛbɛw ani welelisɛbɛw ye. Sɛbɛnin deen seegi be yen minw labɛnna koɲuman. Kɔrɔsili Sangaso, Réveillez-vous !, kitabunin damanin, bibulukalan gafe deen fila ani videwo diiman naani be yen fana. O videwow dɔ kuun ko: Mun na i ka ɲi ka bibulukalan kɛ?​—w18.10, ɲɛɛ 16.

Ka kɛɲɛ ni Talenw 23:23 (NW) ye, kerecɛn be se ka “tiɲɛn san” cogo di?

An tɛ tiɲɛn san ni wari ye. Nka, an be wagati ta ani ka jijalibaw kɛ walisa ka tiɲɛnkalanw faamu.—w18.11, ɲɛɛ 4.

Oze y’a muso Gomɛri minɛ cogo min na, an be kalan juman lo sɔrɔ o la?

Gomɛri ye kakalaya kɛ siɲɛ caaman. Nka, Oze yafara a ma ani a m’u ka furu sa. Ni kerecɛn furuɲɔgɔn dɔ ye kakalaya kɛ, a furuɲɔgɔn be se ka yafa a ma. Ni furuɲɔgɔn jalakibali sɔnna ka cɛnimusoko kɛ n’a furuɲɔgɔn ye kokura, joo t’a fɛ tugun k’u ka furu sa.—w18.12, ɲɛɛ 13.