DIANA be ni saan 80 ni kɔ ye. Kɔrɔya bana dɔ (Alzheimer) tun y’a cɛɛ minɛ ani a ye saan damanin kɛ mɔgɔkɔrɔbaw ladonyɔrɔ dɔ la ka sɔrɔ ka sa. Balimamuso Diana dencɛ fila fana sara ani kansɛri bana y’a minɛ a siin na. O bɛɛ n’a ta, Diana ka kafomɔgɔw tun mana a ye lajɛnw na wala waajuli la, a tun ninsɔn diyanin lo tuma bɛɛ.

John kɛra kɔrɔsibaga tagamakɛla ye saan 43 ni kɔ kɔnɔ. O baara tun ka di a ye kosɔbɛ ani a tun b’a fɛ k’a kɛ a sii bɛɛ la! Nka, a y’o baara lalɔ walisa k’a somɔgɔ dɔ ladon min tun man kɛnɛ. Mɔgɔ minw tun be John lɔn ka kɔrɔ, u mana a ye lajɛnbaw la, u b’a ye ko a b’a nɔɔ na. A bele ninsɔn ka di.

Mun lo y’a to Diana ni John ninsɔn diyanin lo ten? Mɔgɔ be se ka ninsɔndiya cogo di k’a sɔrɔ a be tɔɔrɔla dusukunnako ni farikolo ta fan fɛ? Mɔgɔ be se ka ninsɔndiya cogo di k’a sɔrɔ nɛɛma baara min tun ka di a ye kosɔbɛ a t’o la tugun? Bibulu b’an dɛmɛ k’o faamu. A fɔra a kɔnɔ ko: “Mɔgɔtilennin bena nisɔndiya Masaba [Jehova] kosɔn.” (Zab. 64:11). An be se k’o tiɲɛnkuma nafaman faamu bɛrɛbɛrɛ, n’an b’a lɔn ninsɔndiya banbali be sɔrɔ koo minw na ani a tɛ sɔrɔ minw na.

Tuma caaman na, koo dɔw be mɔgɔ ninsɔn diya. Ɲɛyirali fɛ, cɛɛ ni muso dɔ koo ka di ɲɔgɔn ye ani u furula ɲɔgɔn ma, mɔgɔ dɔ ye deen sɔrɔ wala kunkanbaara kalifara dɔ ma Jehova ka ɔriganisasiyɔn kɔnɔ. O koow be mɔgɔ ninsɔn diya sabu Jehova ka nilifɛnw lo. Ale lo ye furu jusigibaga ye, ale lo ye see di an ma walisa an ka se ka deen sɔrɔ ani ale fana lo be kunkanbaaraw kalifa an ma a ka ɔriganisasiyɔn kɔnɔ.—Zɛnɛzi 2:18, 22; Zab. 127:3; 1 Tim. 3:1.

Nka, o koow be mɔgɔ ninsɔn diya wagati dɔɔni dɔrɔn le. A fɔ man di nka, furuɲɔgɔn dɔ be se k’a tɔɲɔgɔn janfa wala a be se ka sa (Ezek. 24:18; Oze 3:1). Denmisɛn dɔw be ban ka mɛnni kɛ u wolobagaw ni Ala fɛ. Dɔw yɛrɛ be gwɛn ka bɔ kafo kɔnɔ. Ɲɛyirali fɛ, Samuyɛli dencɛw tun tɛ Jehova bato cogo bɛnnin na. Dawuda fana ka kɛtaw kosɔn, a ye gwɛlɛya  caaman lase a ka denbayamɔgɔw ma (1 Sam. 8:1-3; 2 Sam. 12:11). O koow ɲɔgɔn tɛ mɔgɔ ninsɔn diya, nka u be mɔgɔ dusu kasi yɛrɛ le.

An be se fana ka bɔnɛ nɛɛma baara dɔ la Jehova ka ɔriganisasiyɔn kɔnɔ. O be se ka kɛ sabu an man kɛnɛ, kunkanbaara dɔw kosɔn denbaya kɔnɔ wala yɛlɛmani dɔw kosɔn ɔriganisasiyɔn kɔnɔ. Minw bɔnɛna u ka nɛɛma baaraw la, u caaman y’a fɔ k’u tun be ninsɔndiya min sɔrɔ o baara la, u bɔnɛna o la fana.

An b’a faamu ko ninsɔndiya min be sɔrɔ o koow la, o tɛ mɛɛnta ye. Nka, yala ninsɔndiya sugu dɔ be yen mɔgɔ tɛ bɔnɛ min na gwɛlɛyaw bɛɛ n’a ta wa? Ɔnhɔn. Sabu Samuyɛli, Dawuda ani mɔgɔ wɛrɛw ninsɔndiyanin tora hali k’a sɔrɔ gwɛlɛyaw tun b’u kan.

Yezu tun b’a lɔn ninsɔndiya sɔbɛ ye min ye. Tuma min na a tun be sankolo la, Bibulu b’a fɔ ko “a tun be ɲagari [Jehova] ɲa kɔrɔ tuma bɛɛ.” (Talenw 8:30, Biblu Ala ta Kuma). Nka tuma min na a nana dugukolo kan, a ye gwɛlɛyabaw sɔrɔ. O bɛɛ n’a ta, Yezu ye ninsɔndiya sɔrɔ a Faa sago kɛli la (Zan 4:34). A tɔɔrɔla kosɔbɛ a satuma na. Yala a bele tun ninsɔn diyanin lo wa? Bibulu b’a fɔ ko: “A sɔnna ka tɔɔrɔ gwengwenlɔgɔ kan, . . . bari nisɔndiya min tun b’a kɔnɔna, a ɲaa tun b’o la.” (Eburuw 12:2). Yezu ye koo fila fɔ ninsɔndiya sɔbɛ koo la. An k’a filɛ an be se ka kalan minw sɔrɔ u la.

Loon dɔ, a y’a ka kalanden 70 ci ka taga waajuli kɛ. U ninsɔndiyaninba kɔsegira sabu u ye kabakow kɛ. U yɛrɛ ye jinaw gwɛn ka bɔ mɔgɔw la. Nka Yezu y’a fɔ u ye ko: “Aw kana nisɔndiya bari jinaw tun te se ka ban aw ka fɔta ma. Nga aw ka nisɔndiya bari Ala y’aw tɔgɔ sɛbɛn a fɛ sankolo la.” (Luka 10:1-9, 17, 20). Ka nɛɛma baara sɔrɔ, o lo t’an ninsɔn diya. Nka n’an koo ka di Jehova ye, o lo b’an ninsɔn diya sɔbɛ la. Tuma min na Jehova bena a sagokɛla kantigimanw duga, u bena ninsɔndiya kosɔbɛ.

Loon wɛrɛ tugun, ka Yezu to kuma na ni jamaba dɔ ye, a ka kalanw ye Yahutumuso  dɔ kabakoya kosɔbɛ. O kama, o muso y’a fɔ ko Yezu bamuso dagamunin lo. Nka, Yezu y’o muso ka miiriya latilen ko: “Mɔgɔ min be Ala ka kuma lamɛn, k’a bato, o le dagamunin lo.” (Luka 11:27, 28). Bangebagaw be se ka ninsɔndiya u deenw ka kɛwalew kosɔn. Nka, min be mɔgɔ ninsɔn diya kosɔbɛ, o ye ka mɛnni kɛ Jehova fɛ ani ka jɛnɲɔgɔnya ɲuman kɛ n’a ye.

K’a lɔn ko an koo ka di Jehova ye, o b’an ninsɔn diya kosɔbɛ. Tɔɔrɔ man di an ye. Nka, o t’an bali ka ninsɔndiya. N’an be tɔɔrɔw muɲu ni kantigiya ye, dɔ be fara an ka ninsɔndiya kan (Ɔrɔm. 5:3-5). Ka fara o kan, minw b’u jigi la Jehova kan, a be hakili senu di u ma. Ninsɔndiya y’o hakili senu deen faan dɔ ye (Gal. 5:22). O b’an dɛmɛ k’a faamu fɛɛn min kama Zaburuw 64:11 b’a fɔ ko: “Mɔgɔtilennin bena nisɔndiya Masaba kosɔn.”

O b’an dɛmɛ k’a faamu fana fɛɛn min kama Diana ni John ninsɔndiyanin tora gwɛlɛyaw bɛɛ n’a ta. Diana ko: “N’ ye n’ yɛrɛ kalifa Jehova ma i ko deen b’a yɛrɛ kalifa a bangebagaw ma cogo min na.” Diana y’a lɔn cogo di ko a koo ka di Ala ye? A ko: “Ne fɛ, a ye n’ duga sabu a ye see di n’ ma n’ ka to ka waajuli kɛ ni ninsɔndiya ye.” Tuma min na John tun tɛ kɔrɔsibaga tagamakɛla ye tugun, a fana tora ka waajuli kɛ ni kisɛya ye. A y’a ɲɛfɔ fɛɛn min y’a dɛmɛ. A ko: “Saan 1998, n’ y’a daminɛ ka mɔgɔw kalan Cidenyabaara degeli lakɔli la. Kabi o wagati, n’ ye kelenna kalan kɛ cogo min na, n’ tun ma deli k’o ɲɔgɔn kɛ.” A y’a fɔ ale n’a muso koo la ko: “An ka miiriya tun ye k’an seko kɛ Jehova ka baara la. O lo y’a to o yɛlɛmani ma gwɛlɛya an ma kojugu. An sɔnna o ma, hali an ma nimisa.”

Mɔgɔ caaman y’a kɔrɔsi fana ko min fɔra Zaburuw 64:11 kɔnɔ, o ye tiɲɛn ye. An ka furuɲɔgɔn dɔw ka ɲɛyirali lajɛ. U ye baara kɛ saan 30 ni kɔ Etazini Betɛli la. O kɔ, u k’u ka kɛ dan na piyɔniyew ye. U y’a fɔ ko: “Ni fɛɛn dɔ koo ka gwɛlɛ i ma ani i bɔnɛna o la, a bɛnnin lo i dusu ka tiɲɛ.” Nka u y’a fɔ fana ko: “I dusu tiɲɛnin tɛ se ka to fɔɔ abada.” U sinna ka to ka waajuli kɛ n’u ka kafodenw ye. U ko: “An ye delili kɛ fɛɛn tigitigi dɔw kosɔn. Jehova y’an ka deliliw jaabi cogo min na, o y’an jija ani k’an ninsɔndiya. An senin a ma mɛɛn, kafoden dɔw ye piyɔniye baara daminɛ ani Jehova y’an duga an ye bibulukalan fila sɔrɔ minw ye ɲɛtaga kɛ.”

Tiɲɛn fɔ ka di, a man nɔgɔ ka ninsɔndiya tuma bɛɛ. Wagati dɔw la, an dusu be tiɲɛ. Nka Jehova ye min fɔ Zaburuw 64:11 kɔnɔ, o b’an hakili sigi. Hali n’an fari fagara, an be se ka la a la ko n’an tora kantigiya la gwɛlɛyaw bɛɛ n’a ta, an “bena nisɔndiya Masaba kosɔn.” Ka fara o kan, Jehova ye layidu min ta “sankolokura, ni dugukolokura” koo la, an kɔrɔtɔnin lo o ka dafa. O kɔ, an bɛɛ bena kɛ mɔgɔ dafaninw ye ani Jehova bena fɛɛn minw bɛɛ kɛ, an bena “nisɔndiya kosɔbɛ tuma bɛɛ” olu kosɔn.—Ezayi 65:17, 18.

Miiri k’a filɛ: An bena kɛ kɛnɛya dafanin na ani loon o loon, an bena fanga kura sɔrɔ. Koo o koo y’an sɔrɔ ani u y’an dusu tiɲɛ kosɔbɛ, an hakili tɛna jigi olu si la tugun. Jehova b’an hakili sigi ko “mɔgɔw tena miiri koo tɛmɛninw na tugu, o tena na u hakili la tugu.” An ka mɔgɔ kanulenw suu bena kunu. An ninsɔn bena diya kosɔbɛ i ko bangebaga dɔw ninsɔndiyara cogo min na tuma min na Yezu y’u denmuso suu kunu. O sungurunin tun be ni saan 12 ye. Bibulu b’a fɔ ko a bangebagaw “kabakoyara ka dama tɛmɛ.” (Mariki 5:42). A laban, mɔgɔw bɛɛ bena kɛ mɔgɔ tilenninw ye dugukolo kan ani u bena “nisɔndiya Masaba [Jehova] kosɔn” fɔɔ abada!