“Aw ka kɛ ɲumanlɔnbagaw ye”
YALA i b’i yɛrɛ jati ɲumanlɔnbaga ye wa? An kelen kelen bɛɛ ka ɲi ka miiri o ɲiningali koo la. Bibulu tun kɔnna k’a fɔ ko an ka wagati la, mɔgɔ caaman bena kɛ “ɲumanlɔnbaliw” ye (2 Tim. 3:2). N’a sɔrɔ i delila ka mɔgɔ dɔw kunbɛn minw b’a miiri ko tɔɔw lo ka ɲi ka koow kɛ olu ye wala ka fɛɛnw di u ma. U mana fɛɛn dɔ sɔrɔ, n’a sɔrɔ u b’a miiri ko kuun t’a la u k’o fɛɛn dibaga waleɲuman lɔn. Siga t’a la, i bena sɔn a ma k’o ɲɔgɔnna mɔgɔw ka jɛnɲɔgɔnya man di.
Jehova b’a fɔ a sagokɛlaw ye ko: “Aw ka kɛ ɲumanlɔnbagaw ye.” (Kɔlɔs. 3:15). N’an ye ɲumanlɔnbagaw ye, o b’an yɛrɛ nafa. Dalilu caaman b’o yira.
WALEƝUMANLƆN B’A TO AN BE NINSƆNDIYA SƆRƆ
Kuun jɔnjɔn minw kama an ka ɲi ka tɔɔw waleɲuman lɔn tuma bɛɛ, u dɔ ye k’o b’an ninsɔn diya. N’an ye mɔgɔ dɔ waleɲuman lɔn, o tigi be ninsɔn diya ani an yɛrɛ fana be ninsɔn diya. Mun na do? An ka ɲɛyirali dɔ lajɛ: Ni tɔɔw ye koo dɔ kɛ i ye, o b’a yira k’u b’u janto i la ani u b’a jati ko i ka kan n’o ye. I mana o ye, o b’i ninsɔn diya. O ɲɔgɔn lo kɛra Ruti la. Bowazi ye Ruti minɛ ni ɲumanya ye. Siga t’a la, Ruti ninsɔn diyara kosɔbɛ k’a ye ko mɔgɔ dɔ y’a janto ale la.—Ruti 2:10-13.
A kɔrɔtanin lo kosɔbɛ an ka Ala waleɲuman lɔn (1 Tes. 5:18). Siga t’a la, Ala b’an mako wasa cogo minw na farisogo ani Alako ta fan fɛ, i be miiri o la tuma dɔw la (Deter. 8:17, 18; Kɛw. 14:17). Nka sanni i ka miiri o la dɔrɔn, Ala be duga minw lase ele n’i ka mɔgɔ kanulenw ma, a ka ɲi i ka wagati ta ka miiri o la kosɔbɛ. N’i y’o kɛ, o bena dɔ fara i ka waleɲumanlɔn kan Ala koo la ani k’i dɛmɛ k’a faamu a b’i kanu cogo min na.—1 Zan 4:9.
Ala be koo ɲuman minw kɛ an ye, a ka ɲi an ka miiri u la. A ka ɲi fana an ka barika la a ye u kosɔn (Zab. 100:4, 5). Ni mɔgɔ be tɔɔw waleɲuman lɔn, o be kɛ sababu ye o tigi be ninsɔndiya sɔrɔ.
WALEƝUMANLƆN BE TERIYAW SABATI
Kuun wɛrɛ min kama a ka ɲi i ka kɛ ɲumanlɔnbaga ye, o ye k’o b’i n’i teriw ka jɛnɲɔgɔnya sabati. A ka di an bɛɛ ye k’a ye ko an koo ka di mɔgɔw ye. Ni mɔgɔ dɔ ye ɲumanya kɛ i ye, i kɔnɔ gwɛ k’a waleɲuman lɔn o kosɔn. O bena a to aw be kɛ teri sɔbɛw ye (Ɔrɔm. 16:3, 4). Ɲumanlɔnbagaw ka teli ka tɔɔw dɛmɛ fana. Mɔgɔ mana ɲumanya kɛ u ye, u b’o kɔrɔsi ani o b’u lasun k’a ɲini ka tɔɔw dɛmɛ. N’i be tɔɔw dɛmɛ, o bena a to i be ninsɔndiya sɔrɔ fana. O bɛnnin lo ni Yezu ka kuma nunu ye: “Nisɔndiya be mɔgɔ sɔnni na ka tɛmɛ sɔrɔli kan.”—Kɛw. 20:35.
Sɛgɛsɛgɛri dɔ kɛra waleɲumanlɔn koo la inivɛrisite dɔ la Kalifɔrni jamana na. Robert Emmons tun y’o ɲɛmɔgɔ dɔ ye. A ko: “Walisa ka kɛ ɲumanlɔnbagaw ye, an ka ɲi k’a faamu ko an mako be ɲɔgɔn na. Tuma dɔw la, an be mɔgɔw sɔn ani tuma wɛrɛw la, 1 Kor. 12:21). Tɔɔw be min kɛ ɲumanlɔnbaga ye, a b’a yira k’o ka di a ye kosɔbɛ. O la, yala i y’a kɛ i delinanko ye ka tɔɔw waleɲuman lɔn u ka ɲumanya kosɔn wa?
olu fana b’an sɔn.” An mako be tɔɔw la koo caaman na walisa ka to niin na ani ka ninsɔndiya sɔrɔ. Ɲɛyirali fɛ, u be se ka dumuni d’an ma wala k’an dɛmɛ n’an man kɛnɛ (WALEƝUMANLƆN ANI I KA KOOW FILƐCOGO
Kuun wɛrɛ min kama a ka ɲi i ka kɛ ɲumanlɔnbaga ye, o ye k’o b’i dɛmɛ ka koow filɛ ni ɲɛɛ ɲuman ye. Ɲumanlɔnbaga kunsɛmɛ be baara kɛ i ko tɛmɛ. Koo minw be kɛra a tigi gɛrɛfɛ, a kunsɛmɛ b’o sɛnsɛn, ka koo ɲumanw mara ani ka koo juguw to yen. O tigi ka teli ka sinsin koo ɲumanw lo kan sanni ka sinsin a ka gwɛlɛyaw kan. N’i be to ka tɔɔw waleɲuman lɔn, o bena i dɛmɛ i ka to ka koow filɛ ni ɲɛɛ ɲuman ye. N’i be koow filɛ ni ɲɛɛ ɲuman ye, o bena i lasun ka tɔɔw waleɲuman lɔn kosɔbɛ tugun. Tɔɔw be ɲuman min kɛ i ye, n’i be to ka miiri o la, o bena i dɛmɛ ka ciden Pol ka ladili nin sira tagama: “Aw ka nisɔndiya tuma bɛɛ Matigi kosɔn.”—Filip. 4:4.
N’i ye ɲumanlɔnbaga ye, o b’i dɛmɛ i kana miiri koo juguw la. N’an be tɔɔw waleɲuman lɔn, a ka gwɛlɛ kosɔbɛ ka ɲangoya kɛ, ka dimi mara ani an dusu tiɲɛnin ka to. Ɲumanlɔnbagaw man teli ka boliboli bololafɛnw nɔfɛ. Min b’u bolo, o b’u wasa.—Filip. 4:12.
KOO ƝUMAN MINW BƐƐ KƐRA I YE, MIIRI U LA!
Komi i ye kerecɛn ye, i b’a faamu ko ni laban loonw ka gwɛlɛyaw y’i dusu tiɲɛ ani k’i fari faga, o bena diya Sutana ye. A bena diya a ye fana k’a ye ko i tɛ ni miiriya ɲuman ye ani i be ŋunuŋunu koo bɛɛ la. N’i y’o mɔgɔ sugu ye, a bena gwɛlɛya mɔgɔw ma k’i lamɛn n’i be waajuli kɛra. Waleɲumanlɔn ni hakili senu deen be taga ɲɔgɔn fɛ. Ɲɛyirali fɛ, i ninsɔn diyanin lo sabu i b’a lɔn Ala ye koo ɲuman minw bɛɛ kɛ i ye. Ala ye layidu minw ta siniko la, i lanin b’o la fana.—Gal. 5:22, 23.
Min fɔra barokun nin na waleɲumanlɔn koo la, siga t’a la, i sɔnna o ma sabu i ye Jehova Seere ye. O bɛɛ n’a ta, i b’a ye ko a man nɔgɔ ka kɛ ɲumanlɔnbaga ye ani ka koow filɛ ni ɲɛɛ ɲuman ye tuma bɛɛ. Nka, kana a to o k’i fari faga. I be se ka kɛ ɲumanlɔnbaga ye. Cogo di do? I be se k’i ka waleɲumanlɔn yira koo minw na, wagati ta loon o loon ka miiri o la. N’i tora k’o kɛ, i bena kɛ ɲumanlɔnbaga ye. Minw be miiri u ka gwɛlɛyaw dɔrɔn koo la, i bena ninsɔndiya sɔrɔ bɛrɛbɛrɛ fana ka tɛmɛ olu kan. Ala ni tɔɔw be koo ɲumanw kɛ i ye minw b’i jija ani k’i ninsɔn diya. Miiri o koow la. N’a sɔrɔ i yɛrɛ be se k’a daminɛ k’u sɛbɛ. Ɲumanya minw kɛra i ye, i be se k’olu fila wala saba sɛbɛ loon o loon.
Sɛgɛsɛgɛrikɛlaw y’a fɔ ko n’an be tɔɔw waleɲuman lɔn tuma o tuma, an kunsɛmɛ be baara kɛ cogo min na, o be se ka yɛlɛma. U y’a yira fana k’o b’a to a tɛ gwɛlɛya an ma ka ninsɔndiya sɔrɔ. Ɲumanlɔnbaga ninsɔn diyanin lo. O la, koo ɲuman minw bɛɛ kɛra i ye ani i ye fɛɛn ɲuman minw sɔrɔ, to ka miiri u la ani kɛ ɲumanlɔnbaga ye! Koo ɲuman minw bɛɛ kɛra i ye, sanni i k’a miiri ko i ka kan n’o ye, “Masaba tanu, bari a ka ɲi.” A ka ɲi i ka ‘kɛ ɲumanlɔnbaga ye.’—1 Til. Kib. 16:34; Kɔlɔs. 3:15.