Koo min lakalila Deteronɔmu 22:25-27 kɔnɔ, o kuun tɛ k’a yira k’o cɛɛ ye jurumu kɛ sabu o koo lɔnnin lo ka ban. Sariya tun be sinsin min kan, o ye k’a yira k’o sunguru jalakibali lo. An k’a filɛ min kɔnna ka fɔ o koo ɲɛ.

Ka kɔn o vɛrisew ɲɛ, u kumana cɛɛ dɔ koo la min lara ni sunguru maminɛnin dɔ ye “dugu kɔnɔ.” Sunguru maminɛnin tun be jati i n’a fɔ muso furunin. O kama, jalaki tun be ben o cɛɛ kan ko a ye ɲamɔgɔya kɛ. Nka, o sunguru do? Jalaki tun be ben ale fana kan sabu “a tun be dugu kɔnɔ, a do ma kule.” N’a tun y’o kɛ, siga t’a la mɔgɔw tun bena a kulekan mɛn ani u tun bena na a dɛmɛ. O la, cɛɛ wo sunguru wo, a tun be jati k’u fila bɛɛ ye jurumu kɛ.​—Deter. 22:23, 24.

Deteronɔmu 22:25-27 kɔnɔ, koo wɛrɛ lakalila min be dan na. A fɔra yen ko: “Nga n’a y’a sɔrɔ ko cɛɛ nin ye sunguru maminɛnin kunbɛn kongo kɔnɔ, ka la n’a ye fanga la, cɛɛ le ka kan ka faga. Aw kana foyi kɛ sunguru la bari a ma hakɛ kɛ min ka kan ni fagali ye. A be i n’a fɔ cɛɛ dɔ le wilila a tɔɲɔgɔn kama, k’a faga bari cɛɛ nin ye sunguru maminɛnin nin kunbɛn kongo kɔnɔ, sunguru nin tun kulera, nga mɔgɔ ma sɔrɔ k’a dɛmɛ.”

Nin koo la, kititigɛlaw tun be la o sunguru la. Mun na do? Sabu u tun b’a jati ko a “kulera, nga mɔgɔ ma sɔrɔ k’a dɛmɛ.” O kama, a tun jalakibali lo. Nka cɛɛ min y’o koo kɛ, a tun be jati ko a benna o sunguru kan ani ko a ye ɲamɔgɔya kɛ. Mun na do? Sabu a ‘lara n’a ye fanga la,’ k’a sɔrɔ o sunguru tun maminɛnin lo.

Sariya tun be sinsin min kan, o ye k’a yira ko sunguru jalakibali lo. Nka, o sariya tun b’a fɔ dɔrɔn k’o cɛɛ benna o sunguru kan ani a ye ɲamɔgɔya kɛ n’a ye. An ka la a la ko kititigɛlaw tun be “sɛgɛsɛgɛli kɛ kosɔbɛ” o koo la. O kɔ, u tun be desizɔn ta ka kɛɲɛ ni Ala ka cikanw ye, o minw tun ɲɛfɔra ka gwɛ siɲɛ caaman Ala ka sariya kɔnɔ.​—Deter. 13:15 *; 17:4; Ɛkiz. 20:14.