Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

An ka ɲi ka kerecɛn mɔlenw jati cogo di?

An b’u ka limaniya jati fɛɛnba ye. Nka an t’a jati k’u ka fisa ni tɔɔw ye. An tɛ bonya la mɔgɔ kan k’a dama tɛmɛ. Ka ɲɛsin u ka jigiya koo ma, an tɛna u ɲininga koo dɔw la minw t’an ka koo ye.— w20.01, ɲɛɛ 29.

Mun lo b’a to i lanin b’a la ko Jehova b’a mako don ele la?

Bibulu b’a yira ko Jehova b’a mako don i la kabi i ma wolo fɔlɔ yɛrɛ. A b’i ka deliliw lamɛn. A b’i dusukunnakow n’i k’a miiriyaw lɔn. I ka kɛwalew be se k’a dusu kasi wala k’a dusu diya (1 Til. Kib. 28:9; Talenw 27:11). A y’i dɛmɛ, i sera k’i magwɛrɛ a la.—w20.02, ɲɛɛ 12.

Koo jumanw lo la an ka ɲi ka kuma ani koo jumanw lo la an ka ɲi ka je?

An ninsɔn ka di ka kuma Jehova koo la. An be kuma fana n’an y’a ye ko mɔgɔ dɔ be sira jugu tara. Ni diinan mɔgɔkɔrɔw y’a ye ko dɔ mako be ladili la, u b’a ladi. Bali sigira an ka baara kan jamana minw na, an ka baara be kɛra cogo min na yen, an t’a ɲini ka kunnafoniw sɔrɔ o koo la ani an t’u jɛnsɛn fana. Koo minw ye gundo koow ye, an t’u jɛnsɛn.—w20.03, ɲɛɛ 20-21.

Tɔɔn minw kofɔra Zowɛli sapitiri 2nan kɔnɔ, mun na olu be dan na ni Yirali sapitiri 9nan taw ye?

Tɔɔn minw kofɔra Zowɛli 2:20–3:2 kɔnɔ, Ala y’u gwɛn ani a ye layidu ta ko u ye tiɲɛni min kɛ, ale bena o ɲɔgɔn segi Israɛldenw ma. O kɔ, Ala y’a ka hakili senu jigi mɔgɔ dɔw kan. O koow dafara tuma min na Babilɔnikaw nana Israɛldenw kama ani o kɔ. Yirali 9:1-11 be kuma kerecɛn mɔlenw lo koo la an ka wagati la. U be i n’a fɔ tɔnkulu sabu u be Ala ka kitikow fɔ ni jagwɛlɛya ye duniɲa juguman nin koo la. O kitikow be duniɲamɔgɔw tɔɔrɔ.—w20.04, ɲɛɛ 3-6.

Jɔn lo ye saheli yanfan fɛ masacɛ ye bi?

Irisi n’a jɛnɲɔgɔnw lo. U ye Ala sagokɛlaw kɛlɛ, ka bali sigi waajuli baara kan ani u y’a yira ko Jehova Seerew koo ka gwo u ye. Saheli yanfan fɛ masacɛ ani worodugu yanfan fɛ masacɛ be ɲɔgɔn kɛlɛla.—w20.05, ɲɛɛ 13.

Jogo kɔnɔntɔn minw kofɔra Galatikaw 5:22, 23 kɔnɔ, yala olu dɔrɔn lo ye hakili senu deen faanw ye wa?

Ayi, olu dɔrɔn tɛ. Hakili senu b’an dɛmɛ ka kɛ ni jogo ɲuman wɛrɛw ye i n’a fɔ tilenninya (Efɛz. 5:8, 9).—w20.06, ɲɛɛ 17.

Farati minw b’a la k’an ka fotow wala videwow bila ɛntɛrɛnɛti kan, u dɔ ye juman lo ye?

An b’an ka fotow wala videwo minw bila ɛntɛrɛnɛti kan, o be se k’a to mɔgɔw b’a miiri ko an b’an yɛrɛ yirala le ani ko an majiginin tɛ.—w20.07, ɲɛɛ 6-7.

Weleweledalaw be kalan juman lo sɔrɔ jɛgɛminɛla ŋanaw fɛ?

Jɛgɛminɛla ŋanaw b’u ka baara kɛ wagati ani yɔrɔ minw na u ka teli ka jɛgɛ sɔrɔ. U be ni baarakɛminan ɲumanw ye ani u be se baara kɛcogo la n’u ye. U b’u jaa gwɛlɛya ka baara kɛ hali ni yɔrɔ ɲɛɛ man ɲi. An be se k’o ɲɔgɔn kɛ waajuli baara la.—w20.09, ɲɛɛ 5.

An be se ka Bibulu kalandenw dɛmɛ cogo minw na u ka Jehova kanu kosɔbɛ, u la dɔw ye jumanw ye?

An be se k’u jija u ka Bibulu kalan loon o loon ani ka miiri a kan. An be se ka delili kɛcogo yira u la fana.—w20.11, ɲɛɛ 4.

A fɔra 1 Korɛntikaw 15:22 kɔnɔ ko “mɔgɔ bɛɛ fana bena kunu Krista barika la.” O mɔgɔw ye jɔnw lo ye?

Ciden Pol tun t’a fɔra le ko adamadenw bɛɛ suu bena kunu. Nka, a tun kaan be kerecɛn mɔlenw lo ma, “Yezu Krista ye minw wele k’u saniya k’u kɛ Ala ta ye.” (1 Kor. 1:2; 15:18).—w20.12, ɲɛɛ 5-6.

Ni kerecɛn mɔlenw yɛlɛmana “ɲaa tugu n’a yɛlɛ cɛ, buru laban fiyɛtuma” na, u bena mun lo kɛ o kɔ?—1 Kor. 15:51-53.

U bena fara Krista kan ka siyaw bɛɛ mara ni nigɛbere ye (Yir. 2:26, 27).—w20.12, ɲɛɛ 12-13.