1, 2. a) Mɔgɔ caaman be Alako jati cogo di? b) An bena ɲiningali jɔnjɔn jumanw lo lajɛ barokun nin na?

KANADA, balimamuso dɔ y’a fɔ ko: “Ka kɛ Alamɔgɔ ye, o ye ne ninsɔndiya kosɔbɛ ani o ye n’ dɛmɛ ka loon o loon gwɛlɛyaw muɲu.” Berezil, balimacɛ dɔ y’a fɔ ko: “Ne ni n’ muso furula kabi saan 23. An ye ninsɔndiya sɔrɔ kosɔbɛ an ka furu la sabu an y’an jija ka kɛ Alamɔgɔw ye.” Filipine jamana na, balimacɛ dɔ ko: “Ka kɛ Alamɔgɔ ye, o ye ne dɛmɛ ka hakilisigi sɔrɔ ani ka bɛn ni n’ balimaw ye, u bɔyɔrɔ mana kɛ min o min ye.”

² A gwɛnin lo ko n’an ye Alamɔgɔ ye, o b’an nafa cogo caaman na. An be se ka mun lo kɛ walisa ka dɔ fara an ka Alako kan ani k’o nafa sɔrɔ? Bibulu be min fɔ Alamɔgɔw koo la, an ka ɲi k’o faamu fɔlɔ. O mɔgɔw b’a to Ala k’u ɲɛminɛ a ka hakili senu sababu fɛ ani u be ni Jehova ka miiriya ye. Barokun nin na, an bena ɲiningali jɔnjɔn saba jaabi: 1) N’u ko Alamɔgɔ, o kɔrɔ ko di? 2) Ɲɛyirali jumanw lo be se k’an dɛmɛ ka ɲɛtaga kɛ Alako ta fan fɛ? 3) N’an b’an jija ka kɛ ni “Krista ka miiriya” ye, o be se k’an dɛmɛ cogo di ka kɛ Alamɔgɔ ye?

3. Ka kɛɲɛ ni Bibulu ka fɔta ye, mɔgɔ min be miiri farisogo koow la faranfasi juman lo be ale ni Alamɔgɔ cɛ?

³ Ciden Pol y’an dɛmɛ k’a faamu Alamɔgɔ kɔrɔ ye min ye. A y’a yira ko “Alamɔgɔ” ni “mɔgɔ min be miiri farisogo koow la,” u tɛ kelen ye (1 Korɛntikaw 2:14-16 kalan). * Faranfasi jumanw lo b’u fila cɛ? A fɔra ko “mɔgɔ min be miiri farisogo koow la, ale tɛ sɔn Ala ka hakili senu ka koow ma sabu o ye nalomanya lo ye ale fɛ. A tɛ se k’o lɔn fana.” Nka, “Alamɔgɔ” be “fɛɛn bɛɛ sɛgɛsɛgɛ” ani a be ni “Krista ka miiriya ye.” Pol y’an jija ko an ka kɛ Alamɔgɔw ye. Faranfasi wɛrɛ jumanw lo b’o mɔgɔ sifa fila cɛ?

4, 5. Mɔgɔ min be miiri farisogo koow la, ale be koow kɛ cogo di?

⁴ Mɔgɔ min be miiri farisogo koow la, an k’a filɛ ale be koow kɛ cogo min na. Duniɲa kɔnɔ, mɔgɔ caaman be miiri farisogo koo lo la. Pol y’a fɔ k’o miiriya lo be “baara kɛ kan bilali denw kɔnɔ.” (Efɛz. 2:2, ABM ). O miiriya be mɔgɔw fanba lasun ka koow kɛ i ko tɔɔw. O kama, min bɛnnin lo u ɲɛɛ na, u b’o lo kɛ ani u t’u janto Ala ka sariyaw la. Mɔgɔ min be miiri farisogo koow la, ale ɲɛnako fɔlɔ ye ka tɔgɔba ni nafolofɛnw sɔrɔ. A joo ye min ye, a b’a miiri k’o lo kɔrɔtanin lo ka tɛmɛ fɛɛn bɛɛ kan.

⁵ Mɔgɔ min be miiri farisogo koow la, ale ka teli ka koo dɔw kɛ Bibulu be minw weele ko “farisogo sago.” (Gal. 5:19-21). Pol y’o mɔgɔw ka kokɛcogo dɔw kofɔ Korɛntikaw ka bataki fɔlɔ kɔnɔ. A k’o tigiw be mɔgɔw bila ɲɔgɔn na, u b’u daa don kɛlɛkow la, u be mɔgɔw lasun ka muruti, u be ɲɔgɔn weele kititigɛso la, u t’u ɲɛminɛbagaw bonya ani u be miiri u kɔnɔbara dɔrɔn lo la. Ni kɔrɔbɔli b’o ɲɔgɔnna mɔgɔ kan, a b’a fari faga ani a tɛ lɔ kelen kan (Talenw 7:21, 22). Zude kumana mɔgɔ dɔw koo la minw tɛ ni Jehova ka hakili senu ye sabu u be miiri farisogo koow la kojugu.—Zude 18, 19.

6. Alamɔgɔ be koow kɛ cogo di?

⁶ Nka, Alamɔgɔ be jɛnɲɔgɔnya min kɛ ni Ala ye, a b’a janto o la kosɔbɛ. A b’a to Jehova ka hakili senu k’a ɲɛminɛ ani a b’a jija ka “Ala ladege.” (Efɛz. 5:1). A be banba ka Jehova ka miiriya lɔn ani ka koow jati i ko Jehova. O tigi fɛ, Ala be yen tiɲɛn tiɲɛn na. O tigi be Jehova ka sariyaw labato a ka ɲɛnamaya faan bɛɛ la. Nka, mɔgɔ min be miiri farisogo koow la, ale t’o kɛ (Zab. 119:33; 143:10). Alamɔgɔ b’a jija ka kɛ ni “[hakili] senu den ye” sanni ka miiri farisogo koow la (Gal. 5:22, 23, ABM ). Walisa k’a faamu ka ɲɛ Alamɔgɔ kɔrɔ ye min ye, an ka ɲɛyirali dɔ lajɛ: Mɔgɔ min ka baara ye jago ye, o tigi be weele ko jagokɛla. O cogo kelen na, mɔgɔ min kisɛyanin lo Alakow la, a be fɔ k’o tigi ye Alamɔgɔ ye.

7. Bibulu be mun lo fɔ Alamɔgɔw koo la?

⁷ Bibulu b’a fɔ ko Alamɔgɔw be nafa caaman sɔrɔ. Matiyo 5:3 ko: “Mɔgɔ minw b’a lɔn k’u mako be Ala la, olu dagamunin lo, bari sankolo masaya ye u ta ye.” Ɔrɔmukaw 8:6 b’a yira fana ko nafa b’a la ka kɛ Alamɔgɔ ye. A fɔra yen ko: “Ka sɔn farisogo ka koo ma, o laban ye saya ye, nga ka sɔn nii senuman ta ma, o ye [ɲɛnamaya] ni hɛrɛ ye.” N’an be to ka miiri Alakow la, an be kɛ hɛɛrɛ la ni Ala  ani an yɛrɛ ye sisan yɛrɛ. An jigi b’a la fana ka ɲɛnamaya kɛ fɔɔ abada.

8. Mun na an ka ɲi ka jijaliba kɛ walisa ka kɛ ani ka to Alamɔgɔ ye?

⁸ An be duniɲa juguman lo kɔnɔ. Komi mɔgɔw fanba tɛ ni Ala ka miiriya ye, an ka ɲi ka jijaliba kɛ walisa k’an yɛrɛ tanga duniɲa mɔgɔw ka miiricogo ma. N’an tɛ ni Jehova ka miiriya ye, an bena kɛ ni duniɲa mɔgɔw ka miiriya lo ye. An be se ka mun lo kɛ walisa k’an yɛrɛ tanga duniɲa mɔgɔw ka miiriya ma? An be se ka ɲɛtaga kɛ cogo di Alako ta fan fɛ?

9. a) Mun lo be se k’an dɛmɛ ka kɛ Alamɔgɔ ye? b) An bena jɔn ni jɔn ka ɲɛyirali lo lajɛ?

⁹ Deen ka ɲi ka kalan sɔrɔ a bangebagaw fɛ ani k’u ka ɲɛyirali ɲuman ladegi. O cogo kelen na, minw be jɛnɲɔgɔnya ɲuman kɛ ni Jehova ye, an ka ɲi k’olu ladegi walisa ka kɛ Alamɔgɔ ye. Nka, minw be miiri farisogo koow la, olu ka koo b’an lasɔmi (1 Kor. 3:1-4). Ɲɛyirali ɲumanw ani ɲɛyirali juguw be Bibulu kɔnɔ. Komi an ka laɲinita ye ka kɛ Alamɔgɔ ye, an ka ɲɛyirali ɲuman dɔw lajɛ an be se ka minw ladegi. U dɔw ye Yakuba, Mariyamu ani Yezu ye.

10. Yakuba y’a yira cogo di ko a ye Alamɔgɔ ye?

¹⁰ An ka Yakuba ka koo lajɛ fɔlɔ. Ɲɛnamaya tun man nɔgɔ Yakuba fɛ, i ko a man nɔgɔ an caaman fɛ cogo min na bi. A kɔrɔcɛ Ezawu tun be miiri farisogo koow lo la ani a tun b’a fɛ ka Yakuba faga. Ka fara o kan, Yakuba burancɛ y’a nanbara siɲɛ caaman. Yakuba tun ka ɲi k’o koo bɛɛ muɲu. Yakuba tun ye Alamɔgɔ ye hali k’a sɔrɔ a tun be mɔgɔw cɛma minw be miiri farisogo koow la. Ala tun ye layidu min ta Ibrayima ye, Yakuba tun lanin b’a la k’o bena dafa ani a y’a ka wagati n’a ka fanga kɛ k’a ka denbayamɔgɔw ladon koɲuman. Olu tun bena kɛ ni lɔyɔrɔba ye Jehova sago  dafali koo la (Zɛnɛzi 28:10-15). Yakuba ka kumaw n’a ka kokɛcogow y’a yira ko a tun be miiri Ala sago n’a ka sariyaw koo la. Ɲɛyirali fɛ, tuma min na a tun be siranna Ezawu ɲɛ, a y’a fɔ Ala ye ko: “Ne b’i daali ko i ka ne kisi . . . E y’a fɔ ko i bena koɲuman kɛ ne ye, ka ne kɔmɔgɔw caya i n’a fɔ kɔgɔjida la cɛncɛn.” (Zɛnɛzi 32:7-13). Siga t’a la, Yakuba tun lanin be Ala ka layiduw la ani a y’o yira a ka ɲɛnamaya kɛcogo fɛ.

11. Mun lo b’a yira ko Mariyamu tun ye Alamɔgɔ ye?

¹¹ Sisan, an ka Mariyamu ka koo lajɛ. Mun na Jehova ye Mariyamu lo sugandi k’a kɛ Yezu bamuso ye? Siga t’a la, a y’o kɛ sabu Mariyamu tun ye Alamɔgɔ ye. An b’o lɔn cogo di? Tuma min na Mariyamu tagara bɔ a somɔgɔ Zakari ni Elizabɛti ye, a y’a yira ka gwɛ ko a ye Alamɔgɔ ye. Cogo di do? A ye Ala tando ni kuma diimanw ye (Luka 1:46-55 kalan). Mariyamu ka kumaw b’a yira ko Ala ka Kuma tun ka di a ye kosɔbɛ ani ko a tun be Heburukan sɛbɛninw lɔn koɲuman (Zɛnɛzi 30:13; 1 Sam. 2:1-10; Mal. 3:12). Ka fara o kan, hali ni Mariyamu ni Yusufu tun furula kura ye, u ma cɛnimusoko kɛ sanni Yezu ka wolo. O b’a yira ko Jehova sago lo tun y’u fila bɛɛ ɲɛnako fɔlɔ ye, u yɛrɛ negelakow tɛ (Mat. 1:25). O dɔrɔn tɛ. Koo minw tun be kɛra Yezu ka ɲɛnamaya kɔnɔ, ani Yezu tun ye hakilitigiya kuma minw fɔ, Mariyamu y’a janto u bɛɛ la kosɔbɛ. O kama, a tun “b’o koow bɛɛ mara a hakili la.” (Luka 2:51). O b’a yira ka gwɛ ko Ala sagonata tun ye min ye Masiya koo la, a tun b’a mako don o la kosɔbɛ. Mariyamu ka ɲɛyirali ka ɲi k’an dɛmɛ ka miiri k’a filɛ an be se ka Ala sago kɛ an ɲɛnako fɔlɔ ye cogo min na.

12. a) Yezu y’a Faa ladegi cogo di? b) An be se ka Yezu ladegi cogo di? (Jaa lajɛ, barokun daminɛ na.)

¹² Alamɔgɔw bɛɛ cɛma, Yezu ka ɲɛyirali lo ɲɔgɔn tɛ yen. A ka ɲɛnamaya n’a ka waajuli baara kuru bɛɛ la, a y’a yira ko a tun b’a fɛ k’a Faa Jehova ladegi. A ka miiriyaw, a dusukunnakow ani a ka kokɛcogow tun be i n’a fɔ Jehova ta. A tun be Jehova ka sariyaw labato fana (Zan 8:29; 14:9; 15:10). Ɲɛyirali fɛ, Ezayi kumana Jehova ka makari koo la ani Mariki ye Yezu dusukunnakow lakali a ka Evanzili kɔnɔ. Ezayi ni Mariki ka kumaw suma ni ɲɔgɔn ye (Ezayi 63:9; Mariki 6:34 kalan). Mɔgɔ minw mako be dɛmɛ na, yala an be sɔn ka makari u la i ko Yezu wa? Yezu ɲɛnako fɔlɔ tun ye ka kibaro diiman fɔ mɔgɔw ye ani k’u kalan (Luka 4:43). Minw ye Alamɔgɔw ye, olu be makari ani u b’a ɲini ka mɔgɔ wɛrɛw dɛmɛ.

13, 14. a) Balima minw ye Alamɔgɔw ye bi, an be se k’olu ladegi koo jumanw na? b) Ɲɛyirali dɔ fɔ.

¹³ Bi, balima caaman be yen minw ye Alamɔgɔw ye ani u b’u jija ka Krista ladegi. N’a sɔrɔ i y’a kɔrɔsi ko u kisɛyanin lo waajuli baara la, u be lonanw ladon koɲuman, u be makari ani jogo wɛrɛw b’u la. I ko anw, fiɲɛw b’u la ani u ye mɔgɔ dafabaliw ye. Nka, u be jijalibaw kɛ walisa ka kɛ ni jogo ɲumanw ye. Berezil jamana na, balimamuso Rachel ko: “Fɛɛn minw be sanga la duniɲa kɔnɔ, a tun ka di ne ye kosɔbɛ k’u sɔrɔ. O kama, n’ ka fanidoncogo tun bɛnnin tɛ. Nka, tuma min na n’ ye tiɲɛn lɔn, o ye n’ lasun ka jijalibaw kɛ walisa ka kɛ Alamɔgɔ ye. A tun man nɔgɔ n’ fɛ ka yɛlɛmaniw kɛ. Nka, tuma min na n’ sera k’o kɛ, n’ ye ninsɔndiya ani kuun bɛrɛ sɔrɔ n’ ka ɲɛnamaya la.”

 ¹⁴ Filipine jamana na, gwɛlɛya wɛrɛ lo tun be Reylene kan. Hali k’a sɔrɔ a tun be tiɲɛn sira kan, a y’a ka wagati fanba kɛ ka kalanbabaw kɛ ani ka baara ɲini min sara ka ca. A ko: “N’ tun be ni laɲinita minw ye Alako ta fan fɛ, n’ tun t’a ɲinina k’u dafa tugun. N’ y’a daminɛ k’a faamu ko fɛɛn dɔ be n’ jɛn n’ ka ɲɛnamaya kɔnɔ. O fɛɛn tun kɔrɔtanin lo ka tɛmɛ n’ ka baara kan. O kama, n’ ye n’ ka miiricogo yɛlɛma ani n’ ye Jehova ka baara kɛ n’ ɲɛnako fɔlɔ ye.” Jehova ka layidu minw be sɔrɔ Matiyo 6:33, 34 kɔnɔ, Reylene lanin b’o kumaw na sisan. A ko: “N’ lanin b’a la ko Jehova bena n’ mako wasa, siga t’o la!” N’a sɔrɔ o ɲɔgɔnna mɔgɔw b’i ka kafo kɔnɔ. I mana a ye u be Krista ladegira cogo min na, yala i t’a fɛ k’u ladegi wa?—1 Kor. 11:1; 2 Tes. 3:7.

15, 16. a) An ka ɲi ka mun lo kɛ walisa ka Krista ladegi? b) An be se ka mun lo kɛ walisa ka kɛ ni “Krista ka miiriya ye”?

¹⁵ An be se ka Yezu Krista ladegi cogo di? 1 Korɛntikaw 2:16 (NW ) b’a fɔ ko an ka ɲi ka kɛ ni “Krista ka miiriya ye.” Ɔrɔmukaw 15:5 b’an jija ko an ka kɛ ni miiriya kelen ye ni Yezu Krista ye. Walisa ka Krista ladegi, an ka ɲi k’a ka miiricogo, a ka kokɛcogow ani a dusukunnakow lɔn. O kɔ, an ka ɲi ka tugu a sennɔ kɔ. Yezu tun be jɛnɲɔgɔnya min kɛ ni Ala ye, o tun kɔrɔtanin lo ka tɛmɛ fɛɛn bɛɛ kan. O la, n’an be Yezu ladegi, a be komi an be Jehova lo ladegira. O kama, a kɔrɔtanin lo kosɔbɛ an k’a ɲini ka kɛ ni Krista ka miiriya ye.

¹⁶ An be se k’o kɛ cogo di? Yezu ka kalandenw y’a ka kabakow ye, k’a ka kalanw mɛn ani u y’a ye a tun be mɔgɔ sifa bɛɛ minɛ cogo min na. A tun be Ala ka sariyakolow sira tagama cogo min na, u y’o ye fana. Yezu ka kalandenw y’a fɔ ko: “A ye koo minw bɛɛ kɛ . . . anw y’o bɛɛ seere ye.” (Kɛw. 10:39). Bi, an tɛ se ka Yezu ye. Nka, Yezu ka maanaw be sɔrɔ Evanziliw kɔnɔ ani u be se k’an dɛmɛ k’a lɔn koɲuman. N’an be Matiyo, Mariki, Luka ani Zan ka kitabu kalan ani ka miiri o kan, an bena Yezu ka miiricogo lɔn. O cogo la, an bena se ka Yezu seen “nɔɔ ta” ani k’an jija ka kɛ n’a ka “miiriya ye.”—1 Piyɛri 2:21; 4:1.

17. N’an be ni Krista ka miiriya ye, o b’an nafa cogo di?

¹⁷ N’an be ni Krista ka miiriya ye, o b’an nafa cogo di? N’an be dumuni nafaman kɛ, o be barika don an na. O cogo kelen na, n’an b’a ɲini ka Krista ka miiriya lɔn, o b’an barika bonya Alako ta fan fɛ. Dɔɔni dɔɔni, an bena a lɔn Krista tun bena min kɛ koo kelen kelen bɛɛ la. O la, an bena se ka koow latigɛ minw bena a to an be kɛ ni dusukun gwɛnnin ye ani k’an koo diya Ala ye. N’aw y’a ye nafa minw b’a la ka kɛ ni Krista ka miiriya ye, yala kuun t’a la “k’a to Matigi Yezu Krista ka koo ka sigi aw kɔnɔ” wa?—Ɔrɔm. 13:14.

18. Ka kɛ Alamɔgɔ ye, i ye mun lo faamu o koo la barokun nin na?

¹⁸ An y’a ye barokun nin na, a kɔrɔ ye min ye ka kɛ Alamɔgɔ ye. An y’a ye fana ko mɔgɔ minw ye Alamɔgɔw ye, an be se k’olu ladegi. A laban, an y’a faamu ko n’an be ni “Krista ka miiriya ye,” o b’an dɛmɛ ka kɛ Alamɔgɔ ye. Nka, koo wɛrɛw fana be se k’an dɛmɛ ka kɛ Alamɔgɔw ye. A ka ɲi, an k’u lajɛ. Ɲɛyirali fɛ, an be se k’an yɛrɛ sɛgɛsɛgɛ cogo di walisa k’a lɔn n’an barika ka bon Alako ta fan fɛ? An be se ka koo wɛrɛ jumanw lo kɛ walisa k’an barika bonya Alako ta fan fɛ? Alakow be nɔɔ juman lo to an kan loon o loon? An bena o ɲiningaliw jaabi barokun nata la.