TIƝƐN na, mɔgɔw b’a fɛ ka ɲɛnamaya kɛ ninsɔndiya la. Nka, duniɲa laban loon nunu na, wagatiw ka gwɛlɛ bɛɛ fɛ (2 Tim. 3:1). Tilenbaliyakow, bana, baarako, saya ani dusukasiko wɛrɛw be se k’a to dɔw ka ninsɔndiya be nagasi dɔɔni dɔɔni. Hali Ala sagokɛlaw yɛrɛ be se k’u fari faga ani ka bɔnɛ dɔɔni dɔɔni u ka ninsɔndiya la. N’o koo ɲɔgɔn y’i sɔrɔ, i be se k’i ka ninsɔndiya sɔrɔ tugun cogo di?

Walisa k’o ɲiningali jaabi, an ka ɲi k’a faamu fɔlɔ ninsɔndiya sɔbɛ ye min ye. O kɔ, an bena a ye dɔw tora ninsɔndiya la cogo min na gwɛlɛyaw bɛɛ n’a ta. An bena a ye fana an be se ka min kɛ walisa ka to ninsɔndiya la ani ka dɔ fara a kan yɛrɛ.

Ka yɛlɛ wala ka to ka ɲagali, o lo tɛ ninsɔndiya ye. An ka ɲɛyirali dɔ ta: Ni mɔgɔ ye dɔrɔ min kojugu, o be se k’a to a be yɛlɛko caaman. Nka ni dɔrɔ bɔra a ɲɛɛ na, a tɛ yɛlɛko tugun sabu a b’a faamu ko a ka gwɛlɛyaw bele b’a kan. O tigi ye yɛlɛko min kɛ wagati kunkurunin kɔnɔ, o tɛ ninsɔndiya sɔbɛ ye.—Talenw 14:13.

Ninsɔndiya sɔbɛ ye dusukunnako barikaman lo ye. A yirala ko “ni mɔgɔ ye fɛɛn dɔ sɔrɔ wala n’a jigi b’a la ka fɛɛn ɲuman dɔ sɔrɔ, o be dusukunnako min lawuli,” o lo ye ninsɔndiya sɔbɛ ye. Ka kɛ ninsɔndiya la, o kɔrɔ ko, i dusu ka di hali ni gwɛlɛya dɔ y’i sɔrɔ wala n’u ye koo ɲuman dɔ kɛ i ye (1 Tes. 1:6). O la, mɔgɔ hakili be se ka ɲagami koo dɔ kosɔn ani a bele dusu ka di. Ɲɛyirali fɛ, u ye cidenw bugɔ sabu u kumana Krista koo la. Nka, u “nisɔn diyanin bɔra kiti tigɛyɔrɔ la, bari Ala ye boɲa la u kan min kɛra u lɔgɔbɔko ye Yezu tɔgɔ kosɔn.” (Kɛw. 5:41). U ma ninsɔndiya sabu u y’u bugɔ. Nka, u ye kantigiya min kɛ, o lo y’u ninsɔndiya.

Mɔgɔ tɛ wolo ni ninsɔndiya ye ani ninsɔndiya tɛ na a yɛrɛ ma fana. Mun na do? Sabu ninsɔndiya sɔbɛ ye Ala ka hakili senu deen faan dɔ ye. Ala ka hakili senu sababu fɛ, an be se ka “jogokura” don an yɛrɛ la. Ninsɔndiya y’o jogokura faan dɔ ye (Efɛz. 4:24; Gal. 5:22). N’an be ni ninsɔndiya ye, an bena se ka gwɛlɛyaw muɲu.

Jehova tun b’a fɛ koo ɲumanw lo ka kɛ dugukolo kan. Koo jugu minw be kɛra bi, o t’a sago ye. Nka, mɔgɔjuguw ka kɛwalew tɛ Jehova bali ka ninsɔndiya. Bibulu b’a fɔ ko: “Sebagaya ni nisɔndiya le b’a sigiyɔrɔ la.” (1 Til. Kib. 16:27). Ka fara o kan, a sagokɛlaw be koo ɲuman minw bɛɛ kɛra, o be “[Jehova] ninsɔndiya.”—Talenw 27:11.

An be se ka Jehova ladegi cogo di? Ni koow tɛ kɛra i n’a fɔ an tun b’a miiri cogo min na, an kana an dusu tiɲɛ. Sanni an ka hami kojugu, fɛɛn ɲuman minw b’an fɛ an ka  miiri olu la ani an ka muɲu ka siniɲasigi ɲuman makɔnɔ. *

Mɔgɔ caaman kofɔra Bibulu kɔnɔ minw tora ninsɔndiya la gwɛlɛyaw bɛɛ n’a ta. Ibrayima y’olu dɔ ye. A niin tun be farati la ani mɔgɔw ye gwɛlɛya caaman la a kan (Zɛnɛzi 12:10-20; 14:8-16; 16:4, 5; 20:1-18; 21:8, 9). O gwɛlɛyaw bɛɛ n’a ta, a tora ninsɔndiya la. Mun lo y’a dɛmɛ do? A tun be ni jigiya min ye ka ɲɛnamaya kɛ duniɲa kura kɔnɔ Masiya ka kuntigiya wagati la, a tun be miiri o la koɲuman (Zɛnɛzi 22:15-18; Eburuw 11:10). Yezu ko: “Aw faa Ibrayima nisɔn tun diyara, bari a miirila ko a bena ne ka tile ye.” (Zan 8:56). An bena ninsɔndiya min sɔrɔ sinima, n’an be miiri o la, an bena Ibrayima ladegi.—Ɔrɔm. 8:21.

I ko Ibrayima, Pol n’a tagamaɲɔgɔn Silasi tun be miiri Ala ka layiduw koo la. U ka limaniya barika tun ka bon ani u tora ninsɔndiya la gwɛlɛyaw bɛɛ n’a ta. Ɲɛyirali fɛ, u y’u bugɔ kosɔbɛ ani k’u don kaso la. O bɛɛ n’a ta, “dugutilama, Poli ni Silasi tun be dɔnkili lara ka Ala tanu.” (Kɛw. 16:23-25). U sera k’o tɔɔrɔ muɲu sabu u tora ka miiri Ala ka layiduw koo la. Pol ni Silasi ninsɔndiyanin tora sabu u tun b’a lɔn k’u be tɔɔrɔla Krista tɔgɔ lo kosɔn. Nafa min b’a la ka baara kɛ Ala ye kantigiya la, n’an be miiri o la, an bena se ka Pol ni Silasi ladegi.—Filip. 1:12-14.

Bi fana, balimacɛ ni balimamuso caaman tora ninsɔndiya la gwɛlɛyaw bɛɛ n’a ta. Saan 2013, novanburukalo la, fɔɲɔba Haiyan ye tiɲɛni kɛ Filipine jamana cɛmancɛ yɔrɔ la. O fɔɲɔ ye Jehova Seerew ka boon waa kelen ni kɔ halaki pewu! George ka boon tun be Takloban dugu la ani a halakira pewu. A ko: “Tiɲɛniba kɛra. O bɛɛ n’a ta, balimaw ninsɔn tun ka di. An ninsɔn tun ka di cogo min na, o tɛ se ka lakali.” Jehova ye koo minw bɛɛ kɛ an ye, n’an be miiri o la gwɛlɛyabaw wagati la ani n’an b’a waleɲuman lɔn, an ninsɔndiyanin bena to. Jehova ye fɛɛn wɛrɛ jumanw lo di an ma minw b’an ninsɔndiya?

An be jɛnɲɔgɔnya min kɛ ni Ala ye, o lo b’an ninsɔndiya ka tɛmɛ fɛɛn bɛɛ kan. Miiri k’a filɛ: An be duniɲa kuru bɛɛ Masaba lɔn. Ale lo ye an Faa, an ka Ala n’an Teri ye!—Zab. 71:17, 18.

An ninsɔn ka di fana sabu Jehova ye niin di an ma ani an be se ka ɲɛnamaya diyabɔ (Waaj. 3:12, 13). Jehova sababu lo la an be tiɲɛn sira kan. O lo kama, an be se k’a sagonata faamu ani an b’a lɔn an ka ɲi ka ɲɛnamaya kɛ cogo min na (Kɔlɔs. 1:9, 10). Nka, adamadenw fanba t’a lɔn u ka ɲɛnamaya kuun ye min ye. Pol y’o faranfasi yira ka gwɛ. A y’a sɛbɛ ko: “ ‘Mɔgɔ ɲaa ma fɛɛn min ye ka ye, n’a tulo ma min mɛn ka ye, ni fɛɛn min miiriya ma don ka ye mɔgɔ kɔnɔ, Ala y’o le labɛn a kanubagaw ye.’ Ala y’o koo dogoninw yira an na [hakili] senuman barika la.” (1 Kor. 2:9, 10). An ninsɔn ka di ka Jehova sagonata faamu.

Jehova ye koo wɛrɛw kɛ a sagokɛlaw ye. An ninsɔn ka di sabu Jehova b’an ka jurumuw yafa (1 Zan 2:12). Ala ka ɲumanya sababu la, an jigi b’a la ka ɲɛnamaya kɛ duniɲa kura kɔnɔ, o min bena sigi sen kan yanni dɔɔni (Ɔrɔm. 12:12). Nka kabi sisan, Jehova ye teri caaman di an ma, an be jɛn ni minw ye k’a bato (Zab. 133:1). Bibulu b’an hakili sigi ko Jehova b’a sagokɛlaw tanga Sutana n’a ka jinaw ma (Zab. 91:11). Ala ye duga minw bɛɛ kɛ an ye, n’an be miiri o la, dɔ bena fara an ka ninsɔndiya kan.—Filip. 4:4.

Kerecɛn min ninsɔn ka di ka ban, ale be se ka dɔ fara a ka ninsɔndiya kan wa? Yezu ko: “Ne y’o koo nunu fɔ aw ye janko aw ka nisɔndiya sɔrɔ ne fɛ, ani aw ka nisɔndiya kosɔbɛ.” (Zan 15:11). O b’a yira ko an be se ka dɔ fara an ka ninsɔndiya kan. An be jijali minw kɛ walisa ka dɔ fara an ka ninsɔndiya kan, o be se ka suman ni tasuma ye. Walisa ka tasuma fanga bonya, fɔɔ i ka lɔgɔ don a la. O cogo kelen na, Ala ka hakili senu lo be dɔ fara an ka ninsɔndiya kan. O kama, to ka Jehova deli tuma o tuma walisa ka hakili senu sɔrɔ ani to ka miiri Bibulu kɔnɔnakow kan sabu a sɛbɛra hakili senu barika lo la.—Zab. 1:1, 2; Luka 11:13.

An be se ka dɔ fara an ka ninsɔndiya kan fana n’an b’an seen don bɛrɛbɛrɛ baara dɔw la minw ka di Jehova ye (Zab. 35:27; 112:1). Mun na do? Sabu an danna walisa ka “siran Ala ɲɛ ka a ka ci fɔlenw mara. O de ye wajibi ye mɔgɔw bɛɛ kan.” (Waaj. 12:15, ABM ). O kɔrɔ ko Ala y’an dan walisa an k’a sago kɛ. O kama, n’an be baara kɛ Jehova ye, an be ninsɔndiyaba sɔrɔ o la. *

N’an be to ka dɔ fara an ka ninsɔndiya kan, an bena nafa caaman sɔrɔ o la. Ɲɛyirali fɛ, an koo bena diya an sankolola Faa ye kosɔbɛ n’an be to k’a bato ni ninsɔndiya ye, gwɛlɛyaw bɛɛ n’a ta (Deter. 16:15; 1 Tes. 5:16-18). Ka fara o kan, n’an ye ninsɔndiya sɔbɛ sɔrɔ, bololafɛnw tɛna kɛ an ɲɛnako fɔlɔ ye tugun. Nka, an bena a ɲini ka fɛɛn caaman saraka Ala ka Masaya kosɔn (Mat. 13:44). N’an y’a ye baara ɲuman min be kɛra n’o fɛɛnw ye, o bena dɔ fara an ka ninsɔndiya kan. Nka o dɔrɔn tɛ, an dusu bena diya an yɛrɛ kɔrɔ ani o bena tɔɔw ninsɔndiya kosɔbɛ fana.—Kɛw. 20:35; Filip. 1:3-5.

Lɔnnikɛla dɔ ye sɛgɛsɛgɛri kɛ kɛnɛyakow kan Nebraska ka inivɛrisite la Etazini. Sɛgɛsɛgɛri minw bɛɛ kɛra kɛnɛyakow kan, a y’u caaman lajɛ. O kɔ, a y’a fɔ ko: “N’i ninsɔn ka di ani fɛɛn minw b’i fɛ sisan, n’u b’i wasa, i ka teli ka kɛ kɛnɛya la sinima.” O kuma bɛnnin lo ni Bibulu ka fɔta nin ye: “Nisɔndiya be banabagatɔ kɛnɛya.” (Talenw 17:22). Tiɲɛn na, n’i be dɔ fara i ka ninsɔndiya kan, i ka kɛnɛyako bena fisaya.

O la, hali n’an be gwɛlɛyaw wagati lo la, an be se ka ninsɔndiya sɔbɛ sɔrɔ n’an be hakili senu deli Jehova fɛ, n’an b’a ka Kuma kalan ani ka miiri a kan. Mun lo be se k’an dɛmɛ ka dɔ fara an ka ninsɔndiya kan? An be duga minw sɔrɔ bi, an ka miiri o la, an ka mɔgɔ kantigiw ladegi ani k’a ɲini ka Ala sago kɛ. N’an y’o kɛ, min sɛbɛra Zaburu 64:11 kɔnɔ, o bena dafa an koo la. A fɔra yen ko: “Mɔgɔtilennin bena nisɔndiya Masaba kosɔn. A ben’a yɛrɛ kalifa a ma.”