1, 2. Balimacɛ dɔ ye mun lo faamu a yɛrɛ koo la ani a ye mun lo kɛ?

ROBERT batizera a saan 15. Nka, a tun ma tiɲɛn batoli ta sɔbɛ la. A ko: “N’ ma deli ka koo jugu kɛ. Nka n’ tun be to ka koow kɛ ten dɔrɔn. A tun be komi barika be n’ na Alako ta fan fɛ sabu n’ tun tɛ fɔn lajɛnw na ani n’ tun be piyɔniye kɔrɔsigi baara kɛ kalo damanin saan kɔnɔ. Nka, fɛɛn dɔ tun be n’ jɛn.”

² Robert tun m’a lɔn fɛɛn min y’a jɛn fɔɔ tuma min na a furula. Ale n’a muso tun be to ka ntalenw la ɲɔgɔn ye Bibulu koo la. A muso tun ka teli k’o ntalenw jaabili sɔrɔ sabu a barika tun ka bon Alako ta fan fɛ. Tuma caaman na, Robert tun t’a lɔn a bena min fɔ ani o tun be maloya bila a la. A ko: “A tun be komi ne tɛ foyi lɔn. N’ y’a miiri ko: ‘ N’ ka ɲi ka dɔ kɛ dɔ ye walisa ka se ka n’ muso ɲɛminɛ Alako ta fan fɛ.’ ” Robert y’o lo kɛ. A ko: “N’ ye Bibulu sɛgɛsɛgɛ, k’a sɛgɛsɛgɛ ani k’a sɛgɛsɛgɛ koɲuman. O kɔ, n’ y’a daminɛ ka faamuyali sɔrɔ. N’ ye Bibulu faamu ani min yɛrɛ kɔrɔtanin lo, o ye ko n’ be jɛnɲɔgɔnya teriman kɛra ni Jehova ye.”

3. a) An be kalan juman lo sɔrɔ Robert ka koo la? b) An bena ɲiningali jɔnjɔn jumanw lo lajɛ?

³ An be se ka kalan nafaman sɔrɔ Robert ka koo la. N’a sɔrɔ an be koo dɔw lɔn Bibulu koo la ani an be to ka na kafo ka lajɛnw na tuma o tuma. Nka, o koow dama t’an kɛ Alamɔgɔ  ye. N’a sɔrɔ an yɛrɛ ye ɲɛtaga kɛ Alako ta fan fɛ. Nka n’an y’an yɛrɛ sɛgɛsɛgɛ koɲuman, an bena a ye ko an bele be se ka ɲɛtaga kɛ tugun (Filip. 3:16). Barokun nin na, an bena ɲiningali jɔnjɔn saba jaabi: 1) Mun lo bena an dɛmɛ k’a lɔn n’an barika ka bon Alako ta fan fɛ? 2) An be se ka mun lo kɛ walisa ka to k’an barika bonya Alako ta fan fɛ? 3) N’an barika ka bon Alako ta fan fɛ, o be se k’an dɛmɛ cogo di an ka ɲɛnamaya kɔnɔ loon o loon?

4. Ladilikan min be sɔrɔ Efɛzikaw 4:23, 24 kɔnɔ, o ɲɛsinna jɔn lo ma?

⁴ Tuma min na an y’a daminɛ ka Ala bato, an ye yɛlɛmaniw kɛ an ka ɲɛnamaya faan bɛɛ la. An batizenin kɔ, an bele ka ɲi ka to ka yɛlɛmaniw kɛ. Bibulu b’a fɔ ko an ka to k’an ka “miiriya yɛlɛma.” (Efɛz. 4:23, 24). An bɛɛ ka ɲi ka to ka yɛlɛmaniw kɛ sabu an si dafanin tɛ. Hali n’an be Jehova batora kabi wagatijan, an ka ɲi ka to k’an barika bonya Alako ta fan fɛ.—Filip. 3:12, 13.

5. Ɲiningali jumanw lo be se k’an dɛmɛ k’an yɛrɛ sɛgɛsɛgɛ Alako ta fan fɛ?

⁵ An ye denmisɛn wala mɔgɔkɔrɔba ye wo, an bɛɛ ka ɲi k’an yɛrɛ sɛgɛsɛgɛ koɲuman. An k’an yɛrɛ ɲininga ko: “Yala n’ y’a kɔrɔsi ko n’ barika be bonyana Alako ta fan fɛ wa? Yala n’ be koow kɛ i ko Krista wa? Lajɛnw na, n’ ka kokɛcogo ani n’ miiricogo be mun lo yira? Min ye n’ ɲɛnako fɔlɔ ye, n’ ka kumaw be mun lo yira o koo la? Ne ka kalankɛcogo ani n’ sawura be mun lo yira? N’u ye n’ ladi, n’ b’o koo ta cogo min na, o be mun lo yira? N’u be n’ lasunna ka koo jugu kɛ, n’ b’o koo ta cogo di? Yala ne ye kerecɛn kɔgɔnin ye Alako ta fan fɛ wa?” (Efɛz. 4:13). N’an be miiri o ɲiningaliw jaabiliw la, o be se k’an dɛmɛ k’a lɔn an ye ɲɛtaga min kɛ Alako ta fan fɛ.

6. Mun lo be se k’an dɛmɛ fana k’a lɔn an ye ɲɛtaga min kɛ Alako ta fan fɛ?

⁶ Tuma dɔw la, an mako be dɛmɛ na walisa k’a lɔn an ye ɲɛtaga min kɛ Alako ta fan fɛ. Ciden Pol ko mɔgɔ min be miiri farisogo koo la, o tigi t’a lɔn ko a ka ɲɛnamaya kɛcogo man di Ala ye. Nka, Ala be koow jati cogo min na, Alamɔgɔ kɔni b’o faamu. A b’a lɔn ko ka tugu farisogo negew kɔ, o man di Jehova ye (1 Kor. 2:14-16; 3:1-3). N’an y’a daminɛ ka tugu farisogo negew kɔ, diinan mɔgɔkɔrɔw ka teli k’o lɔn joona sabu olu be ni Krista ka miiriya ye. N’u y’an lasɔmi o koo la, yala an be sɔn o ma ani ka tugu u ka ladiliw kɔ wa? N’an b’o kɛ, an b’a yira ka gwɛ ko an b’a fɛ k’an barika bonya Alako ta fan fɛ.—Waaj. 7:5, 9.

7. Ka lɔnniya sɔrɔ Bibulu koo la, an b’a lɔn cogo di k’o dɔrɔn tɛ se k’a to an be kɛ Alamɔgɔ ye?

⁷ Ka lɔnniya sɔrɔ Bibulu koo la, an k’a to an hakili la k’o dɔrɔn t’a to an be kɛ Alamɔgɔ ye. Galen, masacɛ Solomani tun be Jehova ka sariyaw lɔn kosɔbɛ. A ka hakilitigiya kuma dɔw sɛbɛra Bibulu kɔnɔ. Nka kɔfɛ, a tun be jɛnɲɔgɔnya min kɛra ni Jehova ye, o tora ka nagasi. A laban, a ma kantigiya kɛ Jehova ye tugun (1 Mas. 4:29, 30; 11:4-6). O b’a yira ko ka fara Bibulu ka lɔnniya kan, an mako be fɛɛn wɛrɛ la. An ka ɲi ka to ka ɲɛtaga kɛ Alako ta fan fɛ (Kɔlɔs. 2:6, 7). An be se k’o kɛ cogo di?

8, 9. a) Mun lo bena an dɛmɛ k’an ka limaniya sabati? b) N’an be kalan kɛ ani ka miiri o la, an ka laɲinita ka ɲi ka kɛ mun lo ye? (Jaa lajɛ, barokun daminɛ na.)

⁸ Saan kɛmɛkulu fɔlɔ la, Pol ye  kerecɛnw jija k’u ka “taga ɲa” Alako ta fan fɛ (Eburuw 6:1). An be se ka Pol ka ladiliw sira tagama cogo di? A kɔrɔtanin lo an ka gafe nin kalan: “A’ ye to Ala ka kanuya la.” O bena i dɛmɛ k’a faamu i be se ka Bibulu ka sariyakolow sira tagama cogo min na. N’i y’o gafe kalan ka ban, sɛbɛ wɛrɛw be yen i be se ka minw kalan walisa k’i ka limaniya sabati (Kɔlɔs. 1:23). I ye min kalan, i ka miiri o la ani Jehova deli a k’i dɛmɛ k’a faamu i be se k’o sira tagama cogo min na.

⁹ An k’a to an hakili la ko n’an be kalan kɛ ani ka miiri o la, an ka laɲinita ka ɲi ka kɛ nin lo ye: ka mɛnni kɛ Jehova fɛ ani k’an koo diya a ye (Zab. 40:9; 119:97). Fɛɛn o fɛɛn bena an bali an k’an barika bonya Alako ta fan fɛ, an ka banba k’an mabɔ o la fana.—Titi 2:11, 12.

10. Kanbelew ni sunguruw be se ka mun lo kɛ walisa k’u barika bonya Alako ta fan fɛ?

¹⁰ N’i ye kanbele wala sunguru ye, yala i ye laɲinita dɔw latigɛ Alako ta fan fɛ wa? Balimacɛ dɔ be Betɛli la ani kanbelew ni sunguru minw bena batize kafokulu ka lajɛnba la, a be to ka baro kɛ n’olu ye. A b’u ɲininga u ka laɲinitaw la sanni lajɛnba ka daminɛ. U caaman b’a fɛ ka Jehova bato cogo min na loon nataw la, u ka jaabiliw b’a yira k’u miirila o la koɲuman. U dɔw b’a fɛ ka kudayi cidenya baara kɛ wala ka taga yɔrɔ minw na weleweledalaw man ca. Nka tuma kelen kelen, kanbelew ni sunguru dɔw t’a lɔn u bena min fɔ. N’a sɔrɔ olu m’a faamu ko a kɔrɔtanin lo u ka laɲinitaw latigɛ Alako ta fan fɛ. N’i ye kanbele wala sunguru ye, i yɛrɛ ɲininga ko: “Yala ne be taga lajɛnw ni waajuli la sabu n’ bangebagaw b’o lo fɛ wa? Yala ne yɛrɛ be jɛnɲɔgɔnya teriman kɛra ni Jehova ye wa?” Tiɲɛn na, an bɛɛ lo ka ɲi ka laɲinitaw latigɛ an yɛrɛ ye, kanbelew ni sunguruw dɔrɔn tɛ. N’an be n’o laɲinitaw ɲɔgɔn ye, o bena an dɛmɛ k’an barika bonya Alako ta fan fɛ.—Waaj. 12:1, 13.

11. a) An ka ɲi ka mun lo kɛ walisa ka ɲɛtaga kɛ Alako ta fan fɛ? b) An be se ka jɔn lo ladegi min kofɔra Bibulu kɔnɔ?

¹¹ N’an y’a ye ko an ka ɲi ka yɛlɛmani don koo dɔw la, an k’a daminɛ k’o kɛ. A kɔrɔtanin lo kosɔbɛ an k’o kɛ walisa k’an barika bonya Alako ta fan fɛ, n’o tɛ, an niin be se ka to a la (Ɔrɔm. 8:6-8). Ka kɛ kerecɛn kɔgɔnin ye, o kɔrɔ tɛ ka kɛ mɔgɔ dafanin ye. An mako b’a la ka yɛlɛmani minw kɛ, Jehova ka hakili senu be se k’an dɛmɛ k’o kɛ. O bɛɛ n’a ta, an ka ɲi ka jijaliw kɛ. John Barr tun ye Koow Ɲɛnabɔla Jɛnkulu mɔgɔ dɔ ye. Tuma min na a tun be Luka 13:24 ɲɛfɔra, a y’a fɔ ko: “Mɔgɔ caaman tɛ sera ka don ni daa fitinin ye sabu u tɛ u jija sɔbɛ la k’u barika bonya Alako ta fan fɛ.” An ka ɲi ka Yakuba ladegi. Walisa ka duga sɔrɔ, a ye bondori kɛ kosɔbɛ ni mɛlɛkɛ dɔ ye (Zɛnɛzi 32:27-29). Tiɲɛn lo ko an be se ka ninsɔndiyaba sɔrɔ Bibulu kalan na. Nka, an man ɲi k’a kalan i n’a fɔ gafe tɔɔw. An ka ɲi ka banba ka nafolofɛnw sɔrɔ a kɔnɔ minw bena an dɛmɛ.

12, 13. a) Mun lo bena an dɛmɛ walisa an ka 1 Korɛntikaw 2:16 ka miiriyaw sira tagama? b) Ciden Piyɛri ka ɲɛyirali ani a ka ladili be se k’an dɛmɛ cogo di? c) I be se ka mun lo kɛ walisa k’i barika bonya Alako ta fan fɛ? (Koorilen nin lajɛ: “ Koo minw be se k’i dɛmɛ ka ɲɛtaga kɛ Alako ta fan fɛ.”)

¹² N’an b’an jija walisa k’an barika bonya Alako ta fan fɛ, hakili senu bena an dɛmɛ k’an miiricogo yɛlɛma. O dɛmɛ sababu fɛ, an bena a daminɛ dɔɔni dɔɔni ka kɛ ni Krista ka miiriya ye (1 Kor. 2:16). Ka fara o kan, hakili senu bena an dɛmɛ k’an mabɔ farisogo negelakow la ani ka kɛ ni jogo dɔw ye minw ka di Ala ye (Gal. 5:16, 22, 23). N’an y’a kɔrɔsi ko an  be to ka miiri bololafɛnw ani farisogo negelakow lo la, an kana an fari faga. An ka to ka hakili senu deli Jehova fɛ walisa a k’an dɛmɛ an ka miiri koo ɲumanw lo la (Luka 11:13). An ka miiri ciden Piyɛri koo la. A tun tɛ ni Krista ka miiriya ye tuma bɛɛ (Mat. 16:22, 23; Luka 22:34, 54-62; Gal. 2:11-14). Nka, a m’a fari faga ani Jehova y’a dɛmɛ. Dɔɔni dɔɔni, Piyɛri y’a daminɛ ka kɛ ni Krista ka miiriya ye. An fana be se ka kɛ ni Krista ka miiriya ye.

¹³ Kɔfɛ, Piyɛri ye jogo jɔnjɔn dɔw kofɔ minw be se k’an dɛmɛ (2 Piyɛri 1:5-8 kalan). An ka ɲi ka banba ka kɛ ni yɛrɛminɛli, muɲuli, kanuya ani jogo wɛrɛw ye. Loon o loon, an ka ɲi k’an yɛrɛ ɲininga ko: “Ne ka ɲi ka banba ka n’ jogo juman lo fisaya walisa ka barika sɔrɔ Alako ta fan fɛ?”

14. N’an barika ka bon Alako ta fan fɛ, o bena nɔɔ juman lo to an kan?

¹⁴ N’an be ni Krista ka miiriya ye, o bena nɔɔ to an ka kumacogo, an ka kokɛcogow kan baarakɛyɔrɔ wala lakɔliso la. O bena an dɛmɛ ka desizɔn ɲumanw ta loon o loon. O la, an ka desizɔnw bena a yira ko an b’an jijara ka Krista ladegi. N’an be ni Krista ka miiriya ye, o bena an bali ka koo dɔ kɛ min be se k’an ni Jehova ka jɛnɲɔgɔnya nagasi. O bena an dɛmɛ fana ka lɔ kelen kan hali ni tɔɔw b’an lasunna ka koo jugu kɛ. N’an ka ɲi ka koo dɔw latigɛ, an bena kɔn ka miiri ani k’an yɛrɛ ɲininga ko: “Bibulu ka sariyakolo jumanw lo be se ka ne dɛmɛ? Krista tun bena mun lo kɛ nin koo ɲɔgɔn na? A bena diya Jehova ye n’ ka mun lo kɛ?” An ka ɲi ka to ka miiri o cogo la. O la, an ka koo damanin lajɛ. O koo kelen kelen bɛɛ la, an bena a filɛ Bibulu ka sariyakolo minw be se k’an dɛmɛ ka desizɔn ɲuman ta.

15, 16. N’i be ni Krista ka miiriya ye, o be se k’i dɛmɛ cogo di a) ka furuɲɔgɔnma sugandi? b) ka teriw sugandi?

¹⁵ Ka furuɲɔgɔnma sugandi. Bibulu ka sariyakolo min ɲɛsinna o koo ma, o be sɔrɔ 2 Korɛntikaw 6:14, 15 kɔnɔ. (A kalan). Pol y’a yira ko mɔgɔ min be miiri farisogo koo la, o ni Alamɔgɔ tɛ kelen ye fewu, sabu u tɛ koow filɛ cogo kelen na. O sariyakolo be se k’an dɛmɛ cogo di ka furuɲɔgɔn sugandi?

¹⁶ Ka teriw sugandi. Bibulu ka sariyakolo min ɲɛsinna o koo ma, o be sɔrɔ 1 Korɛntikaw 15:33 kɔnɔ. (A kalan). Mɔgɔ min be se ka Alamɔgɔ ka limaniya nagasi, a t’o tigi kɛ a teri ye. Miiri k’a filɛ i be se k’o sariyakolo sira tagama koo minw na. Ɲɛyirali fɛ, ka teriya kɛ ni mɔgɔw ye ɛntɛrɛnɛti kan, i b’o koo jati cogo di? Yala i bena sɔn k’i seen don tulonko dɔw la ɛntɛrɛnɛti kan ni mɔgɔ dɔw ye i tɛ minw lɔn wa?

17-19. N’an ye Alamɔgɔ ye, o b’an dɛmɛ cogo di a) k’an mabɔ koo dɔw la minw tɛ foyi ɲɛ mɔgɔ ma Alako ta fan fɛ? b) ka laɲinitaw latigɛ? c) ka bɛnbaliyakow ɲɛnabɔ?

¹⁷ Koo minw b’an ka Alako bila farati la. Ciden Pol y’a kerecɛnɲɔgɔnw lasɔmi  o koo la Eburuw 6:1 kɔnɔ. (A kalan). An ka ɲi ‘ka faran koo jugu’ jumanw lo la? O ye koo ye minw tɛ foyi ɲɛ mɔgɔ ma Alako ta fan fɛ. O sariyakolo be se k’an dɛmɛ ka ɲiningali nunu jaabili sɔrɔ: “N’ b’a fɛ ka koo min kɛ, yala nafa b’a la wala nafa t’a la? Yala ne ka ɲi ka n’ seen don jagoko nin na wa? Mɔgɔ minw b’a ɲini ka duniɲa ka koow yɛlɛma, mun na n’ man ɲi ka jɛn n’olu ye?”

¹⁸ Laɲinitaw, Alako ta fan fɛ. Yezu ye ladili ɲuman dɔ di an ma a ka kalan na, a ye min kɛ kulu kan (Mat. 6:33). Alamɔgɔ ɲɛnako fɔlɔ ye Ala ka Masaya lo ye. O sariyakolo be se k’an dɛmɛ ka ɲiningali nunu jaabi: “Ni n’ tilara kolɛzi la, yala n’ ka ɲi ka taga inivɛrisite la wa? Yala ne ka ɲi ka sɔn baara nin na wa?”

¹⁹ Bɛnbaliya. Ni bɛnbaliya be an ni balima dɔ cɛ, Pol ye ladili min di Ɔrɔmukaw ma, o be se k’an dɛmɛ (Ɔrɔm. 12:18). An b’a fɛ ka “to hɛrɛ la ni mɔgɔ bɛɛ ye,” sabu an be Krista ladegi. Ni bɛnbaliya donna an ni mɔgɔ dɔ cɛ, an be mun lo kɛ do? Yala a ka gwɛlɛ an ma ka sɔn mɔgɔ wɛrɛ ka fɔta ma wa? Yala a lɔnnin lo ko an ye ‘hɛɛrɛ ɲinila’ ye wa?—Zaki 3:18.

20. Mun na an b’a fɛ ka ɲɛtaga kɛ Alako ta fan fɛ?

²⁰ Nunu ye koo damanin dɔrɔn ye minw b’a yira ko Bibulu ka sariyakolow be se k’an dɛmɛ ka desizɔn ɲumanw ta. O b’a yira ko an b’a to hakili senu k’an ɲɛminɛ. N’an ye Alamɔgɔ ye, an ka ɲɛnamaya bena an wasa ani k’an ninsɔndiya. An kumana Robert min koo la barokun daminɛ na, ale ko: “N’ tora ka jɛnɲɔgɔnya ɲuman kɛ ni Jehova ye minkɛ, n’ kɛra furucɛ ani denfa ɲuman ye. O ye n’ wasa ani ka n’ ninsɔndiya.” N’an y’an seko bɛɛ kɛ ka ɲɛtaga kɛ Alako ta fan fɛ, an fana bena duga caaman sɔrɔ. An bena ninsɔndiya sɔrɔ an ka ɲɛnamaya kɔnɔ sisan ani ka “ɲanamanya sɔbɛ sɔrɔ” loon nataw la.—1 Tim. 6:19, Biblu Ala ta Kuma.