1-2. Ka kɛɲɛ ni Matiyo 5:11 ye, an ka ɲi ka kɔrɔbɔliw jati cogo di?

YEZU ye layidu ta a ka kalandenw ye ko u bena ninsɔndiya sɔbɛ sɔrɔ. A y’u lasɔmi fana ko minw b’ale kanu, u bena kɔrɔbɔliw sɔrɔ (Mat. 10:22, 23; Luka 6:20-23). An ninsɔn ka di ka kɛ Krista ka kalandenw ye. Nka, a be mun lo kɛ an na n’an somɔgɔw wala faamanw wulila an kama sabu an be Jehova sago kɛra? N’an baarakɛɲɔgɔnw wala an ka lakɔli filankuruw b’an lasunna ka koo jugu kɛ do? Siga t’a la, o be se ka siranya bila an na.

² Kɔrɔbɔli tɛ ninsɔndiyako ye mɔgɔw fanba fɛ. Nka, Ala ka Kuma b’a fɔ an ye ko an ka ninsɔndiya kɔrɔbɔli tuma na. Ɲɛyirali fɛ, ciden Zaki y’a sɛbɛ ko ni kɔrɔbɔliw b’an kan an man ɲi k’an jigi tigɛ, nka an ka ɲi ka ninsɔndiya (Zaki 1:2, 12). Yezu fana y’a fɔ ko an dagamunin lo, o kɔrɔ an be ninsɔndiya hali ni kɔrɔbɔliw b’an kan (Matiyo 5:11 kalan). An ninsɔn diyanin be se ka to cogo di gwɛlɛyaw bɛɛ n’a ta? Zaki ye lɛtɛrɛ min sɛbɛ kerecɛn fɔlɔw ma, n’an y’o kɔnɔko damanin lajɛ, o be se k’an dɛmɛ ka koo caaman faamu. An k’a filɛ fɔlɔ o kerecɛnw ye gwɛlɛya minw sɔrɔ.

3. Zaki kɛnin Yezu ka kalanden ye, dɔɔni o kɔ mun lo kɛra?

³ Tuma min na Yezu baden Zaki kɛra a ka kalanden ye, dɔɔni o kɔ, kɔrɔbɔli cunna kerecɛnw kan Zeruzalɛmu (Kɛw. 1:14; 5:17, 18). Kerecɛnw kɛlɛbagaw ye Yezu ka kalanden Etiyɛni faga. O kama, kerecɛn caaman “ye dugu bila jagoya la, ka jɛnsɛn dugudenninw na, Zude mara, ani Samari mara la.” Kɔfɛ, u tagara fɔɔ Sipɔrɔ ani  Antiyɔsi (Kɛw. 7:58–8:1; 11:19). Yezu ka kalandenw ye gwɛlɛya caaman sɔrɔ. O bɛɛ n’a ta, u tun mana taga yɔrɔ o yɔrɔ, u tun be kibaro diiman fɔ ni dusudiya ye. U ye dɛmɛ don ka kafow sigi Ɔrɔmu masaya yɔrɔ caaman na (1 Piyɛri 1:1). Nka o kɔ, u ye gwɛlɛya caaman wɛrɛw sɔrɔ.

4. Kerecɛn fɔlɔw ye gwɛlɛya wɛrɛ jumanw lo sɔrɔ?

⁴ Kerecɛn fɔlɔw ye gwɛlɛya caaman sɔrɔ. Ɲɛyirali fɛ, saan 50 fan fɛ Krista tile la, Ɔrɔmu masacɛ Kulodi ko Yahutuw bɛɛ ka bɔ Ɔrɔmu dugu la. O kama, Yahutu minw tun kɛra kerecɛnw ye, olu waajibiyara k’u ka soow to yen ani ka yɛlɛma yɔrɔ wɛrɛw la (Kɛw. 18:1-3). Saan 61 fan fɛ Krista tile la, ciden Pol y’a sɛbɛ ko u ye a kerecɛnɲɔgɔnw nɛni jama ɲɛɛ na, k’u don kaso la ani k’u bololafɛnw soɲɛ (Eburuw 10:32-34). I ko mɔgɔ tɔɔw, kerecɛn dɔw tun ye fantanw ye ani dɔw tun man kɛnɛ fana.—Ɔrɔm. 15:26; Filip. 2:25-27.

5. An bena ɲiningali jumanw lo jaabi?

⁵ Zaki y’a ka lɛtɛrɛ sɛbɛ ka kɔn saan 62 ɲɛ Krista tile la. Gwɛlɛya minw tun b’a balimaw kan o wagati la, a tun b’o kala ma kosɔbɛ. Jehova y’a kɛ Zaki y’o lɛtɛrɛ sɛbɛ o kerecɛnw ma walisa ka ladili nafamanw di u ma. O ladiliw tun bena u dɛmɛ u ninsɔn diyanin ka to gwɛlɛyaw bɛɛ n’a ta. An ka Zaki ka lɛtɛrɛ kɔnɔkow lajɛ ani ka ɲiningali nunu jaabi: Zaki tun kaan be ninsɔndiya sugu juman lo ma? Mun lo be se ka kerecɛn ka ninsɔndiya nagasi? Hakilitigiya, limaniya ani jagwɛlɛya be se k’an dɛmɛ cogo di an ninsɔn diyanin ka to gwɛlɛya sifa bɛɛ n’a ta?

6. Ka kɛɲɛ ni Luka 6:22, 23 ye, mun na kerecɛn be se ka ninsɔndiya gwɛlɛyaw bɛɛ n’a ta?

⁶ Mɔgɔw be se k’a miiri ko ni u be kɛnɛya la, wari caaman b’u fɛ ani bɛɛn b’u ka denbaya kɔnɔ, o dɔrɔn lo be se k’a to u be ninsɔndiya. Nka Zaki kumana ninsɔndiya sugu min koo la, o ye Ala ka hakili senu deen faan dɔ lo ye. O ninsɔndiya basiginin tɛ an ka koow cogoya kan (Gal. 5:22). Kerecɛn be ninsɔndiya sɔbɛ la n’a be Yezu ladegi ani n’a b’a lɔn ko ale koo ka di Jehova ye (Luka 6:22, 23 kalan; Kɔlɔs. 1:10, 11). Kerecɛn ka ninsɔndiya be i ko tasuma min be mɛnɛna lanpan kɔnɔ. O tasuma mɛnɛnin be to sabu a latanganin lo fɔɲɔ ni sanji ma. O cogo kelen na, an ninsɔn diyanin be se ka to an ka gwɛlɛyaw mana kɛ min o min ye. Bana wala fantanya t’an ka ninsɔndiya nagasi. An ninsɔn diyanin be to fana hali n’u b’an lɔgɔbɔ wala n’an somɔgɔw wala mɔgɔ wɛrɛw b’an kɛlɛ. Tuma o tuma ni mɔgɔw b’a ɲini k’an ka ninsɔndiya nagasi, dɔ lo be fara a kan. An be gwɛlɛya minw sɔrɔ an ka limaniya kosɔn, o b’a yira ko an ye Krista ka kalanden sɔbɛw ye (Mat. 10:22; 24:9; Zan 15:20). O lo kama Zaki y’a sɛbɛ ko: “N badenw, kɔrɔbɔli sifa o sifa mana se aw ma, aw k’aw yɛrɛ jati mɔgɔdagamuninw ye.”—Zaki 1:2.

7-8. Ni kɔrɔbɔliw b’an kan, cogo juman na o b’an ka limaniya barika bonya?

⁷ Zaki y’a ɲɛfɔ fɛɛn min kama kerecɛn be sɔn ka kɔrɔbɔlibaw muɲu. A ko: “Aw b’a lɔn ko tɔɔrɔ minw be sɔrɔ Yezu kosɔn, k’o be kɛ sababu ye aw be kɛ muɲubagaw ye.” (Zaki 1:3). An be se ka kɔrɔbɔliw suma ni tasuma ye, u be muru dilan ni min ye. N’u ye muru don tasuma na ani o kɔ a sumana, a nigɛ barika be bonya. O cogo kelen na, n’an ye kɔrɔbɔliw muɲu, an ka limaniya barika be bonya. O lo kama Zaki y’a sɛbɛ ko: “Muɲuli nin ka dafa, waasa aw ka kɛ mɔgɔdafaninw ye, ani fiɲɛ kana sɔrɔ aw la fewu.” (Zaki 1:4). N’an b’a ye ko kɔrɔbɔliw b’a to an ka limaniya barika be bonya, o b’an dɛmɛ an k’u muɲu ni ninsɔndiya ye.

⁸ Zaki ka lɛtɛrɛ kɔnɔ, a ye gwɛlɛya dɔw kofɔ fana minw be se k’an ka ninsɔndiya nagasi. O ye gwɛlɛya jumanw lo ye ani an be se ka see sɔrɔ u kan cogo di?

9. Mun na an mako be hakilitigiya la?

⁹ Gwɛlɛya: N’an t’a lɔn an ka ɲi ka min kɛ. Ni gwɛlɛyaw b’an kan, an ka Jehova deli a k’an dɛmɛ walisa an bena min latigɛ, o k’a dusu diya. An k’a deli fana walisa an ka desizɔnw k’an balimaw nafa ani u k’an dɛmɛ an ka to kantigiya la (Zer. 10:23). An mako be hakilitigiya la walisa k’a lɔn an ka  ɲi ka min kɛ ani ka min fɔ an kɛlɛbagaw ye. N’an t’a lɔn an ka ɲi ka min kɛ, o be se k’an fari faga ani k’an ka ninsɔndiya nagasi.

10. Ka kɛɲɛ ni Zaki 1:5 ye, an ka ɲi ka mun lo kɛ walisa ka hakilitigiya sɔrɔ?

¹⁰ Fɛɛrɛ: Hakilitigiya deli Jehova fɛ. N’an b’a fɛ ka to ka gwɛlɛyaw muɲu ninsɔndiya la, a fɔlɔ an ka ɲi ka Jehova deli a ka hakilitigiya di an ma walisa an ka desizɔn ɲumanw ta (Zaki 1:5 kalan). Nka, n’a b’an ɲɛɛ na ko Jehova t’an ka delili jaabira joona joona do? Zaki ko an ka ɲi ka to ka hakilitigiya “daali Ala fɛ” tuma o tuma. Jehova tɛna dimi ani a tɛna an jalaki o kosɔn. An sankolola Faa “tigɛ man gwɛlɛ, a be mɔgɔ bɛɛ sɔn ka ɲa.” O la, n’an be hakilitigiya deli a fɛ walisa k’an ka gwɛlɛyaw muɲu, a bena o di an ma (Zab. 25:12, 13). Gwɛlɛya minw b’an kan, a b’o kala ma ani n’an be tɔɔrɔla, o b’a dusu tiɲɛ. A labilanin lo k’an dɛmɛ fana. Siga t’a la, o b’a to an be ninsɔndiya kosɔbɛ. Nka, Jehova be hakilitigiya di an ma cogo di?

11. An ka ɲi ka koo wɛrɛ juman lo kɛ walisa ka hakilitigiya sɔrɔ?

¹¹ Jehova be hakilitigiya di an ma a ka Kuma sababu fɛ (Talenw 2:6). Walisa ka hakilitigiya sɔrɔ, an ka ɲi ka Ala ka Kuma n’an ka gafew sɛgɛsɛgɛ. Nka, an man ɲi ka dan o ma. An ye min kalan Ala ka Kuma kɔnɔ, an ka ɲi k’o sira tagama. Zaki y’a sɛbɛ ko an kana dan ka ‘Ala ka kuma lamɛn. Nga an k’o lamɛn, k’a bato.’ (Zaki 1:22). N’an be Ala ka ladiliw sira tagama, an be kɛ hɛɛrɛmɔgɔw ye, an be koow kɛ k’a dama kɛɲɛ ani an be makari tɔɔw la kosɔbɛ (Zaki 3:17). O jogow b’an dɛmɛ ka gwɛlɛya sifa bɛɛ muɲu ninsɔndiya la.

12. Mun na a kɔrɔtanin lo an ka Bibulu lɔn koɲuman?

¹² Ala ka Kuma be i ko dugalen. A b’an dɛmɛ k’a lɔn an ka ɲi ka yɛlɛmanin  minw kɛ ani an be se k’o kɛ cogo min na (Zaki 1:23-25). Ɲɛyirali fɛ, Ala ka Kuma sɛgɛsɛgɛnin kɔ, an be se k’a ye ko an ka ɲi k’an jija walisa ka se an dusu kɔrɔ. A be se ka kɛ ko mɔgɔw wala gwɛlɛya dɔw b’a to an dusu be gwan. O koo ɲɔgɔn na, Jehova be se k’an dɛmɛ an ka se an dusu kɔrɔ. O la, an bena se ka koow kɛ ni dususuman ye gwɛlɛyaw tuma na. An bena se ka miiri koɲuman fana ani ka desizɔn ɲumanw ta (Zaki 3:13). Tiɲɛn na, a kɔrɔtanin lo kosɔbɛ an ka Bibulu lɔn koɲuman!

13. Mɔgɔ minw kofɔra Bibulu kɔnɔ, mun na an ka ɲi k’u ka koo sɛgɛsɛgɛ?

¹³ Tuma dɔw la, an ka filiw lo b’a to an b’a faamu an man ɲi ka min kɛ. Nka ka kalan sɔrɔ o cogo la, o be mɔgɔ tɔɔrɔ. Hakilitigiya sɔrɔcogo ɲuman ye ka kalan sɔrɔ mɔgɔw ka kɛwale ɲumanw n’u ka kɛwale juguw la. O lo kama Zaki b’an jija ko an ka Jehova sagokɛlaw ka ɲɛyirali lajɛ Bibulu kɔnɔ i n’a fɔ Ibrayima, Rahab, Zɔbu ani kira Eli (Zaki 2:21-26; 5:10, 11, 17, 18). O mɔgɔ kantigiw sera ka gwɛlɛyaw muɲu ninsɔndiya la. U ka ɲɛyirali b’a yira ko Jehova ka dɛmɛ barika la, an fana be se k’o kɛ.

14-15. N’an be sigasigara koo dɔw la, mun na an man ɲi k’an ɲɛɛ tugu o kan?

¹⁴ Gwɛlɛya: N’an be sigasigara an ka lannako dɔw la. Tuma dɔw la, a be se ka gwɛlɛya an ma ka fɛɛn dɔw faamu Ala ka Kuma kɔnɔ. Wala a be se ka kɛ ko Jehova m’an ka deliliw jaabi i ko an tun b’a fɛ cogo min na. O be se k’a to an be sigasiga. N’an y’an ɲɛɛ tugu o kan, o be se k’an ka limaniya barika dɔgɔya ani an be jɛnɲɔgɔnya min kɛra ni Jehova ye, k’o nagasi (Zaki 1:7, 8). O sigasigaliw yɛrɛ be se k’an ka jigiya nagasi siniɲasigi koo la.

¹⁵ An be ni jigiya min ye siniɲasigi koo la, ciden Pol y’o suma ni nigɛ gwiliman ye min be kurunba lalɔ (Eburuw 6:19). O nigɛ b’a to kurun be lɔ yɔrɔ kelen fɔɲɔ tuma na ani a b’a bali a ka taga gosi faraw la. O nigɛ gwiliman sirinin lo kurun na ni jɔlɔkɔ dɔ lo ye. N’o jɔlɔkɔ sirinin tora kurun na, o lo b’a to nafa be kɛ o nigɛ gwiliman na. Nka n’a sonna, a barika be dɔgɔya. O cogo kelen na, n’an b’an ɲɛɛ tugu an ka sigasigaliw kan, o b’an ka limaniya bari dɔgɔya. N’an be sigasiga, ni gwɛlɛyaw b’an kan, an tɛna la a la ko Jehova bena a ka layiduw dafa. N’an ka limaniya nagasira, an ka jigiya fana be nagasi. I ko Zaki y’a fɔ cogo min na, “mɔgɔ min be sigasiga, o tigi bɔnin be baji fɛ, fɔɲɔ be min lamaga ka taga n’a ye faan bɛɛ.” (Zaki 1:6). N’a sɔrɔ o mɔgɔ sugu tɛna ninsɔndiya fewu!

16. N’an be sigasigara koo dɔw la, an ka ɲi ka mun lo kɛ?

¹⁶ Fɛɛrɛ: Dɔ kɛ dɔ ye walisa i kana sigasiga tugun ani i ka limaniya barika bonya. Kana koow bila ka suma. Kira Eli ka wagati la, Jehova sagokɛlaw tun be sigasigara u ka lannakow la. Eli y’a fɔ u ye ko: “Aw nɔrɔnin bena to faan fila la fɔɔ ka taga se waati jumɛn ma? N’a kɛra ko [Jehova] le ye Ala ye, aw ka tugu ale kɔ. N’a kɛra ko Baali lo fana, aw ka tugu ale kɔ.” (1 Mas. 18:21). O kelen lo bi fana. An ka ɲi ka sɛgɛsɛgɛri dɔw kɛ walisa ka la a la ko Jehova lo ye Ala ye, Bibulu y’a ka Kuma ye ani ko Jehova Seerew y’a sagokɛlaw ye (1 Tes. 5:21). O sɛgɛsɛgɛriw b’a to an tɛ sigasiga tugun ani an ka limaniya barika be bonya. An be sigasigara koo minw na, n’an mako be dɛmɛ na walisa k’o faamu, an be se ka kaan bɔ diinan mɔgɔkɔrɔw ma. N’an b’a fɛ ka to ka Jehova sago kɛ ninsɔndiya la, an man ɲi ka koow bila ka suma!

17. Mun lo ka teli ka kɛ n’an fari fagara?

¹⁷ Gwɛlɛya: Farifaga. Bibulu b’a fɔ ko:  “Ni i ja tigɛra degun don na, i barika bɛ dɔgɔya.” (Talenw 24:10, Bible senuma). Eburukan kumaden min bayɛlɛmana ko “ja tigɛra,” o kɔrɔ ko fana “fari fagara.” N’i fari fagara, i ka ninsɔndiya ka teli ka nagasi.

18. Muɲuli kɔrɔ ko di?

¹⁸ Fɛɛrɛ: I jigi la Jehova kan walisa a k’i jaa gwɛlɛya i ka se ka muɲuli kɛ. An mako be jagwɛlɛya la walisa k’an ka gwɛlɛyaw muɲu (Zaki 5:11). Zaki ye kumaden min fɔ ko “muɲu,” o ɲɛsinna mɔgɔ dɔ ma min be lɔ yɔrɔ kelen. O b’a to an be miiri sɔrɔdasi dɔ koo la min b’a jaa gwɛlɛya ka to a lɔyɔrɔ la. A tɛ boli kɛlɛ mana gwan cogo o cogo.

19. An be kalan juman lo sɔrɔ ciden Pol ka koo la?

¹⁹ Ciden Pol ye ɲɛyirali ɲuman ye an fɛ jagwɛlɛya ani muɲuli koo la. Tuma dɔw la, a tun b’a ye ko fanga bɛrɛ tɛ ale la. Nka, a sera ka muɲuli kɛ sabu a tun b’a jigi la Jehova kan walisa a k’a barika bonya (2 Kor. 12:8-10; Filip. 4:13). An fana be se k’o barika n’o jagwɛlɛya ɲɔgɔn sɔrɔ, n’an be sɔn a ma ni majigilenya ye ko an mako be Jehova ka dɛmɛ na.—Zaki 4:10.

20-21. An be se ka la mun lo la?

²⁰ An ka la a la ko Jehova lo tɛ gwɛlɛyaw la an kan walisa k’an ɲangi. Zaki b’an hakili sigi ko: “Ni kojugukɛ nigɛ donna min na, o tigi kan’a fɔ ko Ala nɔɔ lo. Bari kojugu nigɛ te Ala minɛ fewu. A fana te mɔgɔ si nigɛ ka don kojugu la.” (Zaki 1:13). N’an lanin b’o la, o bena a to an b’an magwɛrɛ an sankolola Faa kanutigi la kosɔbɛ.—Zaki 4:8.

²¹ Jehova “te yɛlɛma.” (Zaki 1:17). A ye kerecɛn fɔlɔw dɛmɛ gwɛlɛyaw wagati la ani a bena an kelen kelen bɛɛ dɛmɛ bi fana. Jehova deli n’i dusu bɛɛ ye a ka hakilitigiya, limaniya ani jagwɛlɛya di i ma. A bena i ka deliliw jaabi. O la, i be se ka la a la ko a bena i dɛmɛ i ninsɔn diyanin ka to gwɛlɛyaw bɛɛ n’a ta!