Sara * ko: “Kuma man di n’ ye ani n’ lanin tɛ n’ yɛrɛ la kosɔbɛ. O kama, minw lanin lo u yɛrɛ la kojugu ani u be ja kelen kan, a man di n’ ye ka jɛn n’olu ye. Nka, minw dusu sumanin lo ani u majiginin lo, a ka di n’ ye ka jɛn n’olu ye. N’ be se ka n’ dusukunnakow ni n’ ka gwɛlɛyaw fɔ u ye. O mɔgɔ suguw lo ye n’ teri sɔbɛw ye.”

Sara ka kumaw b’a yira ko mɔgɔ dususumanin koo ka di tɔɔw ye. O jogo ka di Jehova ye fana. A ka Kuma b’an jija ko: “Aw ka kɛ . . . mɔgɔsabalininw ye.” (Kɔlɔs. 3:12). Dususuman * kɔrɔ ko di? Yezu y’a yira cogo di ko a be n’o jogo ye? O jogo be se k’a to an be ninsɔndiya sɔrɔ cogo di?

Mɔgɔ dususumanin ye hɛɛrɛkɛla ye. A be tɔɔw minɛ ni ɲumanya ye ani a hakili siginin be to hali ni dɔ y’a dusu gwan.

Gɛrɛkikan kumaden min bayɛlɛmana Bibulu kɔnɔ ko “dususuman,” o ɲɛsinna kongokɔnɔso ma u ye min kolo. Hali k’a sɔrɔ u y’a kolo, fanga bele b’a la. O cogo kelen na, mɔgɔ dususumanin tɛ fagobagatɔ ye. Nka fanga b’a la. Mun na an b’o fɔ? Sabu a be se ka see sɔrɔ a ka jogo juguw kan ani ka to hɛɛrɛ la ni tɔɔw ye.

An be se k’a miiri ko: “Ne kɔni tɛ mɔgɔ dususumanin ye.” Mɔgɔ caaman muɲunin tɛ ani u be ja kelen kan. O kama, a man nɔgɔ ka kɛ mɔgɔ dususumanin ye (Ɔrɔm. 7:19). Siga t’a la, walisa ka kɛ n’o jogo ye, fɔɔ an ka jijali kɛ. Nka, Jehova be se ka fanga di an ma a ka hakili senu barika la walisa an k’an jija k’o laɲinita dafa (Gal. 5:22, 23). Mun na an ka ɲi k’an jija ka kɛ mɔgɔ dususumaninw ye?

Mɔgɔ dususumanin koo ka di tɔɔw ye. I ko Sara min kofɔra ka tɛmɛ, a ka di an ye ka jɛn ni mɔgɔ dususumaninw ye. Yezu ye ɲɛyirali ɲuman ye dususuman ani ɲumanya koo la (2 Kor. 10:1). Hali denmisɛn minw tun t’a lɔn, u tun b’a fɛ ka kɛ n’a ye.—Mariki 10:13-16.

Dususuman b’an yɛrɛ ani tɔɔw nafa. N’an ye mɔgɔ dususumanin ye, an tɛ dimi joona ani an tɛ koow kɛ ni dusu ye (Talenw 16:32).  An tɛ don tɔɔw gasi la fana sanko an ka mɔgɔ kanulenw. O b’a to an tɛ to k’an yɛrɛ jalaki. O be tɔɔw nafa fana sabu an b’an dusukunnakow n’an ka kokɛcogow kɔrɔsi walisa an kana don u gasi la.

Yezu tun be ni kunkanbaarabaw ye ani a bolo tun degunnin lo. O bɛɛ n’a ta, a tun be bɛɛ minɛ ni dususuman ye. A ka wagati la, sɛgɛn ni tɔɔrɔ tun be mɔgɔ caaman kan ani u mako tun be lafiya la. U lafiyara tuma min na Yezu y’a fɔ u ye ko: “Aw ye na ne fɛ . . . sabu ne sabarinin lo, ne majiginin lo fana.”—Mat. 11:28, 29, Biblu Ala ta Kuma.

I ko Yezu, an be se ka kɛ mɔgɔ dususumanin ye cogo di? An ka Bibulu kalan walisa k’a lɔn Yezu ye mɔgɔw minɛ cogo min na ani a ye koow kɛ cogo min na wagati gwɛlɛw na. O la, ni koo dɔ kɛra min ka teli k’an dusu gwan, an bena an jija ka Yezu ladegi (1 Piyɛri 2:21). An ka koo saba lajɛn minw ye Yezu dɛmɛ a kɛra mɔgɔ dususumanin ye.

Yezu tun majiginin lo. A ko ale “sabarinin lo, [a] majiginin lo fana.” (Mat. 11:29, Biblu Ala ta Kuma). Bibulu be sabari wala dususuman ni majigilenya kofɔ ɲɔgɔn fɛ sabu u tɛ taga ka ɲɔgɔn dan.—Efɛz. 4:1-3.

Majigilenya b’a to an tɛ dimi joona. Mɔgɔw tun be Yezu kɔrɔfɔ ko a ye “nugubagatɔ” ni “dɔrɔtɔ” ye. A y’o koo ta cogo di? A ye koow kɛ ni dususuman ye. O y’a to mɔgɔw y’a ye a ka kɛwalew fɛ ko “lɔnniya ka kɛtaw b’a ka tilenninya yira.”—Mat. 11:19.

Ni dɔ ye kuma jugu fɔ i ma i ka siya wala i bɔyɔrɔ koo la, i jija k’a tigi jaabi ni dususuman ye. Peter ye diinan mɔgɔkɔrɔ ye ani a be bɔ Afirikidisidi. A ko: “Ni dɔ ka kumaw ye n’ dusu gwan, n’ be n’ yɛrɛ ɲininga ko: ‘Yezu tun bena o koo ta cogo di?’ ” A y’a fɔ fana ko: “N’ be n’ jija walisa n’ kana dimi joona.”

Yezu tun b’a lɔn ko adamadenw ye dafabaliw ye. A ka kalandenw tun b’a fɛ ka koo ɲuman kɛ. Nka, u tun t’o lo kɛ tuma bɛɛ u ka dafabaliya kosɔn. Ɲɛyirali fɛ, Yezu ka suu laban na, a y’a fɔ Piyɛri, Zaki ni Zan ye ko u ka to ɲɛɛ na n’ale ye. Nka, u ma se k’o kɛ. Yezu y’u faamu ani a ko: “Koɲuman miiriya bɛ mɔgɔ kɔnɔ, nka a farisogo baraka ka dɔgɔ.” (Mat. 26:40, 41, Biblu Ala ta Kuma). Komi Yezu y’a faamu ko a ka cidenw ye dafabaliw ye, o y’a to a ma dimi u kɔrɔ.

Balimamuso Mandy tun ka teli ka mɔgɔ jalaki. Nka sisan, a b’a jija kosɔbɛ ka kɛ mɔgɔ dususumanin ye i ko Yezu. A ko: “N’ be n’ jija k’a to n’ hakili la ko adamadenw bɛɛ ye dafabaliw ye. N’ be sinsin u ka jogo ɲumanw lo kan fana i ko Jehova b’a kɛ cogo min na.” Yezu tun b’a faamu ko adamadenw ye dafabaliw ye. Yala a ka ɲɛyirali be se k’i dɛmɛ i ka tɔɔw minɛ ni dususuman ye wa?

Yezu ye koow to Ala bolo. K’a to dugukolo kan, a ye tilenbaliyakow muɲu. Mɔgɔw ma Yezu faamu, u y’a mafiɲɛya ani u y’a tɔɔrɔ. O n’a ta bɛɛ, a y’a dusu suman u kɔrɔ sabu a tun b’a “ta to Ala ma dɔrɔn, ale min be kiti tigɛ ka tilen.” (1 Piyɛri 2:23). Yezu tun b’a lɔn ko a sankolola Faa tun bena a dɛmɛ a ka muɲuli kɛ ani ko a tun bena a tɔɔrɔbagaw ɲangi wagati bɛnnin na.

N’u ye tilenbaliyako kɛ an na ani an ye koo bɛnbaliw kɛ dimi kosɔn, an ka teli k’an ka koo tɔɔ juguya. O lo kama Bibulu b’a fɔ ko: “Mɔgɔ min dusu gwannin lo, o tigi te kotilennin kɛ Ala ɲakɔrɔ.” (Zaki 1:20). Hali ni joo b’an fɛ, n’an dimina, an ka teli ka koo bɛnbaliw kɛ sabu an ye mɔgɔ dafabaliw ye.

Balimamuso Cathy be Alemaɲi ani a tun b’a miiri ko: “N’i m’i yɛrɛ lafasa, mɔgɔ si tɛna o kɛ i ye.” Nka, a ka koow filɛcogo yɛlɛmana tuma min na a ye Jehova lɔn ani a y’a jigi la a kan. A ko: “Sisan, kuun t’a la n’ ka to k’a ɲini ka n’ yɛrɛ lafasa. N’ be se ka koow kɛ ni dususuman ye sabu n’ b’a lɔn ko Jehova bena duniɲa ka tilenbaliyakow bɛɛ ɲɛnabɔ.” N’u ye  tilenbaliyako kɛ i la, Yezu ladegi i kɛtɔ k’i jigi la Ala kan. O bena i dɛmɛ i dusu sumanin ka to.

Yezu ko n’an b’a fɛ ka ninsɔndiya sɔrɔ, an ka ɲi ka kɛ mɔgɔ dususumaninw ye. A ko: “Minw sabalinin lo, olu dagamunin lo.” (Mat. 5:5). A filɛ dususuman b’an dɛmɛ cogo min na koo dɔw la.

Dususuman b’an dɛmɛ ka gwɛlɛyaw ɲɛnabɔ furu kɔnɔ. Balimacɛ Robert be bɔ Ɔsitarali. A ko: “N’ ye kuma jugu caaman fɔ n’ muso ma dimi kosɔn, nka n’ tun t’o lo miiri. Kuma do be komi jii, n’a bɔnna, a tɛ se ka cɛ. N’ dusu tiɲɛna yɛrɛ le tuma min na n’ y’a ye ko n’ ka kumaw ye n’ muso dusu kasi kosɔbɛ.”

“An bɛɛ be fili cogo caaman na” an ka kumaw fɛ ani an be kuma minw fɔ an kunfɛ, o be se ka na ni bɛnbaliya ye an ka furu kɔnɔ (Zaki 3:2). N’o kɛra, dususuman b’an dɛmɛ an k’an yɛrɛ minɛ ani an k’an kumacogo kɔrɔsi.—Talenw 17:27.

Robert y’a jija kosɔbɛ ka kɛ ni dususuman ni yɛrɛminɛli ye. Mun lo sɔrɔla o la? A ko: “Sisan, ni ne ni n’ muso ma bɛn kelen ma, n’ be n’ jija k’a lamɛn koɲuman ani ka kuma ni dususuman ye. N’ be n’ jija fana n’ kana dimi. O y’an ka jɛnɲɔgɔnya fisaya kosɔbɛ.”

Dususuman b’an dɛmɛ ka bɛn ni tɔɔw ye. Minw be dimi joona, olu teriw man ca. Nka, dususuman b’an dɛmɛ “ka to . . . hɛrɛ” la ni tɔɔw ye (Efɛz. 4:2, 3). Cathy min kofɔra, ale ko: “Dususuman ye n’ dɛmɛ ka jɛnɲɔgɔnya ɲuman kɛ ni bɛɛ ye, hali n’a man nɔgɔ ka bɛn ni dɔw ye.”

Dususuman b’a to an hakili be sigi. “Hakilitigiya min bɛ na ka bɔ sankolo la,” Bibulu be jɛɛn sigi o ni dususuman ani hɛɛrɛ cɛ (Zaki 3:13, 17, Bible senuma). Mɔgɔ dususumanin ‘hakili siginin’ lo (Talenw 14:30). Martin y’a jija ka kɛ mɔgɔ dususumanin ye. A ko: “Sisan, n’ tɛ ja kelen kan, n’ hakili siginin lo kosɔbɛ ani n’ ninsɔn ka di.”

N’a sɔrɔ an ka ɲi ka bondori lo kɛ walisa ka kɛ mɔgɔ dususumanin ye. Balimacɛ dɔ ko: “Tiɲɛn fɔ ka di, hali bi, n’ dusu be gwan kosɔbɛ tuma dɔw la.” Nka, Jehova lo b’an jija an ka kɛ mɔgɔ dususumaninw ye. O la, an be bondori min kɛra o kama, a bena an dɛmɛ (Ezayi 41:10; 1 Tim. 6:11). A bena an ka fɔrɔmasɔn tɔɔ laban ani ka ‘barika don an na.’ (1 Piyɛri 5:10). I ko ciden Pol, an bena se ka “Krista ka makari [dususuman, NW] n’a ka ɲumanya” ladegi.—2 Kor. 10:1.