1. Kerecɛnw b’a fɛ ka la mun lo la fɔlɔ, u deenw be sɔrɔ ka batize?

TUMA min na Blossom Brandt y’a latigɛ ka batize, min kɛra, a y’o lakali ko: “Kabi kalo caaman, n’ tora k’a fɔ n’ facɛ ni n’ bamuso ye ko n’ b’a fɛ ka batize. Tuma caaman olu yɛrɛ tun be to ka kuma ni n’ ye o koo la. U tun b’a fɛ ka la a la ko n’ ye desizɔn min ta, n’ b’a faamu k’o ye sɔbɛko lo ye. N’ batizera saan 1934, desanburu tile 31. O kɛra koo kɔrɔtaninba ye n’ ka ɲɛnamaya kɔnɔ.” Bi fana, kerecɛnw b’a fɛ k’u deenw dɛmɛ u ka desizɔn ɲumanw ta. Ni deenw ma batɛmu ta k’a sɔrɔ kuun t’a la u ka kɔnɔni kɛ, o be se k’olu ni Jehova ka jɛnɲɔgɔnya nagasi (Zaki 4:17). Bangebaga hakilitigiw b’a fɛ ka la a la fɔlɔ k’u deenw labɛnnin lo ka kɛ Krista ka kalandenw ye ka sɔrɔ ka batize.

2. a) Kafokulu kɔrɔsibaga dɔw ye mun lo kɔrɔsi? b) An bena mun lo lajɛ barokun nin na?

² Kafokulu kɔrɔsibaga dɔw y’a kɔrɔsi ko kanbelew ni  sunguru caaman ma batize halibi k’a sɔrɔ u bangebagaw ye kerecɛnw ye. U dɔw yɛrɛ sii be ɲini ka se saan 20 ma. Tuma caaman na, u be taga lajɛnw na ani u be waajuli kɛ. U b’u yɛrɛ jati Jehova Seerew ye. Nka, u bele m’u yɛrɛkun di Jehova ma ani ka batize. Mun na do? Tuma dɔw la, bangebagaw lo b’a miiri ko u deenw labɛnnin tɛ batɛmu kama. Barokun nin na, an bena koo naani lajɛ minw b’a to bangebaga dɔw t’u deenw jija u ka batize.

3. Blossom bangebagaw tun be jɔrɔla mun lo la?

³ An kumana Blossom min koo la dakun fɔlɔ kɔnɔ, ale tun ye denmisɛn ye. O kama, a bangebagaw tun be jɔrɔla n’a be batɛmu kɔrɔ faamu ani n’a b’a lɔn ko sɔbɛko lo. Bangebagaw be se k’a lɔn cogo di n’u deen labɛnnin lo k’a yɛrɛkun di Jehova ma?

4. Yezu ka cikan min be sɔrɔ Matiyo 28:19, 20 kɔnɔ, o be se ka bangebagaw dɛmɛ cogo di bi?

⁴ Matiyo 28:19, 20 kalan. Barokun tɛmɛnin na, an y’a ye ko Bibulu t’a fɔ mɔgɔ ka ɲi ka batɛmu ta sanda min na. Nka, a kɔrɔ ye min ye ka mɔgɔw kɛ Krista ka kalandenw ye, a ka ɲi bangebagaw ka miiri o la koɲuman. Matiyo 28:19 kɔnɔ, gɛrɛkikan kumaden min bayɛlɛmana ko “kɛ ne ka kalandenw ye,” o kɔrɔ ko ka mɔgɔ kalan ani k’a ɲini k’a tigi dɛmɛ a ka kɛ Krista ka kalanden ye. U ye mɔgɔ min kalan Krista ka cikanw na, n’a y’u faamu ani a b’a fɛ k’u sira tagama, o tigi lo ye Krista ka kalanden ye. O kama, kerecɛn ka ɲi k’a ɲini k’a deen kalan kabi a denmisɛn tuma walisa k’a dɛmɛ a ka batize ka kɛ Krista ka kalanden ye. Tiɲɛn lo ko ni deen ka dɔgɔ kojugu, a tɛ se ka batɛmu saratiw dafa. Nka, Bibulu b’a fɔ ko Ala ka kuma be se ka diya hali denmisɛnw ye ani u be se k’a faamu.

5, 6. a) Bibulu be min fɔ Timote koo la, o b’an dɛmɛ ka mun lo faamu a ka batɛmu koo la? b) Bangebaga hakilitigiw be se k’u deenw dɛmɛ koɲuman cogo di?

⁵ Timote tun ye Krista ka kalanden ye min y’a latigɛ ka Jehova sago kɛ hali k’a sɔrɔ a bele tun ye denmisɛn ye. Ciden Pol ko Timote y’a daminɛ ka Bibulu ka tiɲɛn kalanw faamu kabi a “denmisɛn tuma.” Timote facɛ tun tɛ Jehova bato. Nka, Ala ka Kuma koo diyara Timote ye, a bamuso n’a mamamuso sababu lo la. O kɛra sababu ye Timote kɛra ni limaniya barikaman ye (2 Tim. 1:5; 3:14, 15). A yɛrɛ tun ma saan 20 sɔrɔ fɔlɔ, nka a tun be saratiw dafa walisa ka kunkanbaaraw sɔrɔ kafo kɔnɔ.—Kɛw. 16:1-3.

⁶ Tiɲɛn lo ko denmisɛnw tɛ kelen ye. U bɛɛ tɛ kɛ kolɔnbagaw ye wagati kelen na. Dɔw be tiɲɛn kalanw faamu, u be desizɔn ɲumanw ta ani u b’a fɛ ka batize u denmisɛn tuma. Nka, dɔw be kɔrɔbaya dɔɔni ka sɔrɔ ka batɛmu saratiw dafa. Bangebaga hakilitigiw t’u deenw lasun u ka batize. Nka, u b’u dɛmɛ ka ɲɛtaga kɛ Alako ta fan fɛ ka kɛɲɛ n’u ka koow cogoya ye. Min fɔra Talenw 27:11 kɔnɔ, ni deen b’a janto o la koɲuman, o b’a bangebagaw ninsɔndiya. (O vɛrise kalan). Nka, bangebagaw ka ɲi k’a to u hakili la k’u ka laɲinita ye k’u deenw dɛmɛ u ka kɛ Krista ka kalandenw ye. K’o to u hakili la, u ka ɲi k’u yɛrɛ ɲininga ko: “Yala ne deen be Ala lɔn ka ɲɛ walisa ka se k’a yɛrɛkun di a ma ani ka batize wa?”

7. Yala mɔgɔ ka ɲi ka Bibulu ka tiɲɛn kalanw bɛɛ faamu ka sɔrɔ ka batize wa? A ɲɛfɔ.

⁷ Ni bangebagaw b’u deenw kalanna, u b’a fɛ u ka tiɲɛn kalanw faamu koɲuman. O lɔnniya lo bena a to u deenw b’a ɲini k’u yɛrɛkun di Ala ma. Nka, o kɔrɔ tɛ ko deen ka ɲi ka Bibulu ka tiɲɛn kalanw bɛɛ faamu ka sɔrɔ k’a yɛrɛkun di Ala ma ani ka batize. Krista ka kalanden kelen kelen bɛɛ ka ɲi k’a ɲini ka Bibulu ka kalan wɛrɛw faamu hali u batizenin kɔ (Kɔlɔsikaw 1:9, 10 kalan). O la, mɔgɔ ka ɲi ka lɔnniya hakɛ juman lo sɔrɔ ka sɔrɔ ka batize?

8, 9. Ciden Pol ni kasobon kɔrɔsibaga ka koo be mun lo yira an na?

⁸ Denbaya dɔ ye ɲɛnamaya kɛ saan kɛmɛkulu fɔlɔ la ani a ka koo be se ka bangebagaw dɛmɛ bi (Kɛw. 16:25-33). Saan 50 fan fɛ, Pol y’a ka voyazi filanan kɛ a ka misɔndenya baara la. A tagara Filipi jamana na. Ka Pol n’a tagamaɲɔgɔn Silasi to yen, mɔgɔw bagara u ma k’u don kaso la. Sufɛ, dugukoloyɛrɛyɛrɛ dɔ kɛra ka kasobon yuguyugu ani ka daaw bɛɛ yɛlɛ. Kasobon kɔrɔsibaga siranna sabu a tun b’a miiri ko kasodenw bolila. O kama, a tun b’a fɛ k’a yɛrɛ faga. Nka, Pol y’a bali k’o kɛ. O kɔ, Pol ni Silasi y’o cɛɛ n’a ka denbayamɔgɔw kalan Yezu koo la. U ye minw mɛn Yezu koo la, u lara o la ani u y’a faamu ko a kɔrɔtanin lo u k’o sira tagama. O kama, u sinna ka batize. An be kalan juman lo sɔrɔ o koo la?

⁹ N’a sɔrɔ kasobon kɔrɔsibaga tun ye Ɔrɔmu sɔrɔdasi dɔ ye min be antɛrɛti la. A tun tɛ Ala ka Kuma lɔn. O kama, walisa ka kɛ kerecɛn ye, a tun ka ɲi ka Bibulu ka kalan jɔnjɔnw faamu, k’a lɔn Jehova be min ɲini a sagokɛlaw fɛ ani k’a jija ka Yezu ka kalanw sira tagama. U y’a dɛmɛ wagati dɔɔni kɔnɔ ka Bibulu ka kalan jɔnjɔn minw faamu, o lo y’a lasun ka batize. Siga t’a la, a tora ka dɔ fara a ka lɔnniya kan a batizenin kɔ. O la, i bena mun lo kɛ n’i deen y’a fɔ i ye ko a b’a fɛ ka batɛmu ta sabu a be Jehova kanu ani a b’a fɛ ka mɛnni kɛ a fɛ? N’a sɔrɔ i be se k’a fɔ a ye ko a ka kaan bɔ diinan mɔgɔkɔrɔw ma walisa u k’a filɛ n’a be batɛmu saratiw dafa. * I ko kerecɛn batizenin tɔɔw, i deen bena to ka dɔ fara a ka lɔnniya kan Jehova sagonata koo la. A bena o kɛ a ka ɲɛnamaya kuru bɛɛ kɔnɔ ani fɔɔ abada.—Ɔrɔm. 11:33, 34.

10, 11. a) Bangebaga dɔw be mun lo miiri? b) Mun lo be se ka deenw latanga tiɲɛn na?

¹⁰ Bangebaga dɔw b’a miiri ko a ka fisa u deen kana batɛmu ta fɔlɔ. Mun na do? Sabu u b’a fɛ u deen ka tila lakɔli la ani ka baara ɲuman sɔrɔ fɔlɔ. N’a sɔrɔ u b’o kɛ ni ŋaniya ɲuman ye. Nka, yala o bena u deen nafa tiɲɛn na wa? Yala o bɛnnin lo ni Bibulu ka fɔta ye wa? Jehova ka Kuma b’an jija ka mun lo kɛ?—Waajulikɛla 12:1 kalan.

¹¹ Jehova be koow jati cogo min na ani a sago ye min ye, duniɲa nin n’a kɔnɔfɛnw b’o kɛlɛ. A kɔrɔtanin lo an k’o to an hakili la (Zaki 4:7, 8; 1 Zan 2:15-17; 5:19). N’i deen be jɛnɲɔgɔnya ɲuman kɛ ni Jehova ye, o lo bena a latanga. O la, Sutana, a ka duniɲa ani  miiriya juguw tɛna nɔɔ to a kan. Ni bangebagaw be lakɔli ni baara bila fɛɛn bɛɛ ɲɛ, u deenw bena mun lo miiri do? N’a sɔrɔ u bena a miiri ko fɛɛn minw be duniɲa kɔnɔ, olu kɔrɔtanin lo ka tɛmɛ u ni Jehova ka jɛnɲɔgɔnya kan. Minw b’u deenw kanu, yala olu b’a fɛ duniɲamɔgɔw lo k’a yira u deenw na u ka ɲi ka min kɛ walisa koow ka ɲɛ u bolo wa? N’an be Jehova sago kɛ an ɲɛnako fɔlɔ ye, o dɔrɔn lo bena a to an be hɛɛrɛ sɔbɛ sɔrɔ ani koow bena ɲɛ an bolo.—Zaburuw 1:2, 3 kalan.

12. Mun na bangebaga dɔw b’a fɛ u deen ka kɔnɔni kɛ ka sɔrɔ ka batɛmu ta?

¹² Muso dɔ y’a ɲɛfɔ fɛɛn min kama ale tun t’a fɛ a deen ka batɛmu ta. A ko: “ N’ be maloya k’a fɔ, nka a kuun fɔlɔ ye ko n’ tun be siranna u kana na a gwɛn ka bɔ kafo kɔnɔ.” I k’o balimamuso, bangebaga dɔw b’a miiri ko a ka fisa u deen ka sanda dɔ sɔrɔ fɔlɔ ka sɔrɔ ka batɛmu ta. O la, a tɛna hakilintanyako dɔw kɛ (Zɛnɛzi 8:21; Talenw 22:15). N’a sɔrɔ u b’a miiri ko: “Ni n’ deen ma batize, a tɛ se ka gwɛn ka bɔ kafo kɔnɔ.” Mun na o miiriya bɛnnin tɛ?—Zaki 1:22.

13. Mɔgɔ minw ma batize, yala Jehova bena olu ɲininga u ka kɛtaw la wa? A ɲɛfɔ.

¹³ Tiɲɛn lo ko bangebagaw t’a fɛ u deen ka batɛmu ta n’a labɛnnin tɛ k’a yɛrɛkun di Jehova ma. Nka, a bɛnnin tɛ fana u k’a miiri ko n’u deen ma batize Jehova tɛna a ɲininga a ka kɛtaw la. Mun na o miiriya bɛnnin tɛ do? Sabu minw batizera, Jehova tɛna olu dɔrɔn lo ɲininga u ka kɛtaw la. Deen min b’a lɔn min ka ɲi ani min man ɲi, Jehova bena ale fana ɲininga a ka kɛtaw la (Zaki 4:17 kalan). O kama, bangebaga hakilitigiw t’u deenw bali ka batɛmu ta. Nka, u b’u seko bɛɛ kɛ ka kɛ ɲɛyirali ɲumanw ye u deenw fɛ. U b’u deenw kalan kabi u denmisɛn tuma walisa Jehova ka sariya tilenninw ka diya u ye (Luka 6:40). N’i deen be Jehova kanu, o lo bena a to a tɛ jurumuba kɛ sabu a bena a ɲini ka Jehova ka sariya tilenninw labato.—Ezayi 35:8.

14. Bangebaga minw b’u deenw dɛmɛna walisa u ka batɛmu ta, diinan mɔgɔkɔrɔw be se k’olu dɛmɛ cogo di?

¹⁴ Bangebaga minw b’u deenw dɛmɛna walisa u ka batɛmu ta, diinan mɔgɔkɔrɔw be se k’olu dɛmɛ. Kerecɛn be se ka laɲinita minw latigɛ Alako ta fan fɛ, diinan mɔgɔkɔrɔw ka ɲi ka koo ɲuman fɔ o koo la. Balimamuso dɔ hakili b’a la ko tuma min na a tun be ni saan wɔɔrɔ dɔrɔn ye, balimacɛ Charles T. Russell ye baro kɛ n’ale ye. A ko: “A kumana ni n’ ye n’ ka laɲinitaw koo la miniti 15 kɔnɔ.” Mun lo sɔrɔla o la do? Kɔfɛ, o balimamuso kɛra piyɔniye ye ani a y’o baara kɛ saan 70 ni kɔ kɔnɔ. Tiɲɛn na, n’an be kuma ɲuman fɔ tɔɔw ye ani k’u jija, o be se ka nɔɔ ɲuman to u kan wagatijan kɔnɔ (Talenw 25:11). Diinan mɔgɔkɔrɔw be se ka bangebagaw n’u deenw niin don baara dɔw la minw be kɛ Masaya Boon na. U be se k’a ɲini denmisɛnw fɛ u ka baara dɔw kɛ ka kɛɲɛ n’u sanda n’u seko ye.

15. Kafodenw be se ka denmisɛnw dɛmɛ cogo jumanw na?

¹⁵ Kafodenw fana be se ka denmisɛnw dɛmɛ n’u b’u janto koɲuman u la. O kɔrɔ ko u ka ɲi ka kɔrɔsili kɛ k’a filɛ denmisɛnw be ɲɛtaga kɛra cogo min  na. Yala denmisɛn dɔ ye lakalita ɲuman wala kalan dɔ kɛ lajɛn na wa? Yala a sera ka kɔrɔbɔli dɔ muɲu, wala a tɛmɛna sababu dɔ fɛ ka seereya kɛ lakɔli la wa? N’o lo, kana sigasiga k’a tando ni kɔnɔgwɛ ye. I be se k’a latigɛ ka kuma ni denmisɛnw ye sanni lajɛn ka daminɛ ani lajɛn bannin kɔ. O la, u bena a faamu k’u ye kafoden dɔw ye fana.—Zab. 35:18.

16, 17. a) Mun na a kɔrɔtanin lo denmisɛnw ka batɛmu ta? b) Bangebagaw be se ka ninsɔndiyaba juman lo sɔrɔ? (Jaa lajɛ, barokun daminɛ na.)

¹⁶ Bangebagaw be ni nɛɛmaba minw ye, u dɔ ye “k’u [deenw] kolo k’u ladi, ani k’u kalan ka kɛɲɛ ni [Jehova] sago ye.” (Efɛz. 6:4; Zab. 127:3). Galen, deen tun mana wolo Israɛl siya la, a yɛrɛkun tun dinin lo Jehova ma ka ban. Nka, an deenw tɛ ten. Ni bangebagaw be Jehova kanu ani tiɲɛn batoli ka di u ye, o kɔrɔ tɛ k’u deenw fana bena o lo kɛ. Kabi u deen wolotuma, bangebagaw ka ɲi k’a ɲini k’a dɛmɛ a ka kɛ Yezu ka kalanden dɔ ye. O kɔrɔ, a k’a yɛrɛkun di Ala ma ani ka batɛmu ta. O lo kɔrɔtanin lo ka tɛmɛ fɛɛn bɛɛ kan. Ni mɔgɔ dɔ y’a yɛrɛkun di Jehova ma, ka batɛmu ta ani ka Jehova bato ni kantigiya ye, o lo be se ka kɛ sababu ye o tigi be kisi tɔɔrɔba wagati la.—Mat. 24:13.

¹⁷ Tuma min na Blossom Brandt tun b’a fɛ ka batize, a bangebagaw tun b’a fɛ ka la a la ko a labɛnnin lo batɛmu kama. U lara a la minkɛ ko a tun labɛnnin lo, u sɔnna a ka batize ani u y’a dɛmɛ. Suu min kɔnna Blossom ka batɛmu loon ɲɛ, a facɛ ye koo ɲumanba dɔ kɛ. Blossom y’o lakali ko: “A y’a fɔ an bɛɛ ye ko an k’an kunbiri gwan duguma ani a ye delili kɛ. A y’a fɔ Jehova ye ko a ninsɔn ka di k’a ye ko a denmuso y’a latigɛ k’a yɛrɛkun di a ma.” Saan 60 ni kɔ o kɔ, Blossom y’a fɔ ko: “Aw be se ka la a la ko n’ tɛna ɲinɛ o suu kɔ abada!” Bangebagaw, an jigi b’a la ko aw fana bena ninsɔndiyaba sɔrɔ k’a ye ko aw deenw y’u yɛrɛkun di Jehova ma ani ka batize.