Tiɲɛn na, mɔgɔ si tɛ se k’a fɔ Pol tun be cogo min na tigitigi. An b’a desɛn minw kɛ an ka gafew kɔnɔ, olu ye jaaw dama lo ye. Lɔnnikɛlaw bɔra fɛɛn kɔrɔ minw kan, o jaaw basiginin tɛ olu kan.

Nka sɛbɛ dɔw be Pol cogoya yira. Ɲɛyirali fɛ, Le Phare de la Tour de Sion (angilikan na), saan 1902 marisikalo tile fɔlɔ ta y’o sɛbɛ dɔ kofɔ ko: “Ka ɲɛsin Pol cogoya ma: . . . ‘Gafe Actes de Paul et de Thècle,’ . . . o min sɛbɛra saan 150 Krista tile la, o b’a yira Pol tun be cogo min na. N’a sɔrɔ o gafe ye Pol cogoya lakali ka ɲɛ. Mɔgɔw tun be Pol jati cogo min na a ka wagati la, n’a sɔrɔ u basigira o lo kan. A yirala yen ko Pol tun ka ‘surun, a kuncɛ nɛmunin lo, tɔgɔwaga lo, a kɔgɔnin lo, a ɲɛsiw ka ca ani a nunkala ka jan dɔɔni.’”

Lɔnniya gafe dɔ b’a fɔ o gafe kɔrɔ koo la ko: “A be se ka kɛ ko ‘Actes de Paul et de Thècle’ ka tarikiko dɔw ye tiɲɛn ye.” (The Oxford Dictionary of the Christian Church, saan 1997 ta). Saan kɛmɛkulu damanin ‘Actes de Paul et de Thècle’ sɛbɛnin kɔ, mɔgɔw tun be bonyaba la o gafe kan. O gafe kɔrɔ deen 80 bele be yen bi minw sɛbɛra Gɛrɛkikan na ani a bayɛlɛmana kaan wɛrɛw la. O la, an be se k’a fɔ ko an be Pol yira cogo min na an ka gafew kɔnɔ, o bɛnnin lo ni sɛbɛ kɔrɔ dɔw ye.

Nka, an k’a to an hakili la ko koo dɔw kɔrɔtanin lo ka tɛmɛ Pol cogoya kan. Tuma min na ciden Pol tun b’a ka cidenya baara kɛra, minw be miiri farisogo koow la, olu dɔw y’a kɔrɔfɔ ko ‘ale yɛrɛ ye barikantan ye, ko a ka kuma tɛ foyi ɲɛ.’ (2 Kor. 10:10, ABM). Nka, an kana ɲinɛ ko Pol kɛra kerecɛn ye sabu Yezu y’a yɛrɛ yira a la cogo kabakoman na. Yezu ye Pol ‘woloma walisa a k’ale tɔgɔ fɔ siya wɛrɛw n’u ka masaw’ ye (Kɛw. 9:3-5, 15; 22:6-8). Pol y’o baara dafa cogo min na, an ka miiri o la. Jehova y’a to ciden Pol ye Bibulu yɔrɔ minw sɛbɛ hakili senu barika la, an ka miiri k’a filɛ o be se k’an nafa cogo min na.

Sanni ciden Pol ka kɛ kerecɛn ye, a tun be koo minw kɛ, a ma waso o la. A fana m’a yɛrɛ cogoya lakali (Kɛw. 26:4, 5; Filip. 3:4-6). Nka a ko: “Ne ye cidenw bɛɛ la fitinin ye, ne man kan ka wele ko ciden yɛrɛ.” (1 Kor. 15:9). Kɔfɛ, a y’a sɛbɛ ko: “Ne min ye Ala ka mɔgɔw bɛɛ la kɔmɔgɔ ye. O bɛɛ n’a ta, Ala ye nɛɛma kɛ ne ye waasa ne ka Krista ka ɲumanya fɔ siya wɛrɛw ye, daan te ɲumanya min na.” (Efɛz. 3:8). N’a sɔrɔ an b’an yɛrɛ ɲininga Pol tun be cogo min na. Nka, an k’a lɔn ko Pol tun be kibaro diiman min fɔra mɔgɔw ye, o lo kɔrɔtanin lo ka tɛmɛ.