1, 2. a) Kerecɛn bangebaga dɔw b’u yɛrɛ ɲininga mun lo la n’u deenw b’a fɛ ka batɛmu ta? b) Mun na kalankɛla be batɛmu ɲinilaw ɲininga n’u y’u yɛrɛkun di Jehova ma? (Jaa lajɛ, barokun daminɛ na.)

SUNGURUNIN dɔ tɔgɔ ko Maria ani a lɔnin be batɛmu ɲinilaw cɛma. A bangebagaw ye kerecɛnw ye ani u b’a filɛra. Kalankɛla ye ɲiningali fila minw kɛ, Maria y’u jaabi ni kaanba ye. Dɔɔni o kɔ, a ye batɛmu ta.

² Maria bangebagaw dusu ka di a kɔrɔ sabu a y’a latigɛ k’a yɛrɛkun di Jehova ma ani ka batize. Nka wagati damanin ka kɔn o ɲɛ, a bamuso tun be jɔrɔla. A tun b’a yɛrɛ ɲiningara ko: “Yala Maria man dɔgɔ kojugu ka batɛmu ta wa? Yala a b’a lɔn ko k’a yɛrɛkun di Jehova ma, o ye sɔbɛko lo ye wa? Yala a man fisa a ka kɔnɔni kɛ ka sɔrɔ ka batɛmu ta wa?” Bangebaga caaman b’u yɛrɛ ɲininga o la n’u deenw b’a fɛ ka batize (Waaj. 5:4). K’i yɛrɛkun di Jehova ma ani ka batɛmu ta, o kɔrɔtanin lo kosɔbɛ kerecɛn ka ɲɛnamaya kɔnɔ. Koorilen nin lajɛ: “ Yala i y’i yɛrɛkun di Jehova ma wa?”

3, 4. a) Ciden Piyɛri y’a yira cogo di ko batɛmu kɔrɔtanin lo? b) Mun na an be se ka batɛmu suma ni kurun lɔli baara ye Nuhun ka wagati la?

 ³ Ciden Piyɛri ye batɛmu suma ni Nuhun ka kurun lɔli baara ye. A y’a fɔ ko: “Nin tun kɛra batizeli taamasiɲɛ ye, min b’aw kisi bii.” (1 Piyɛri 3:20, 21 kalan). O kurun y’a yira tɔɔw la ka gwɛ ko Nuhun tun b’a fɛ ka Ala sago kɛ n’a dusukun bɛɛ ye. Jehova ye baara min kalifa Nuhun ma, a y’o kɛ ka dafa ni kantigiya ye. Nuhun ka limaniya kosɔn, Jehova y’ale n’a ka denbaya kisi sanjiba wagati la. Piyɛri tun b’a fɛ k’an kalan mun lo la?

⁴ O kurun y’a yira bɛɛ la ko Nuhun limaniyanin lo. O cogo kelen na, mɔgɔw mana a ye ko dɔ be batɛmu tara, u b’a faamu ko a y’a yɛrɛkun di Ala ma. O tigi y’o kɛ sabu a limaniyanin lo Yezu la, ale min suu kununa. I ko Nuhun, mɔgɔ minw ye batɛmu ta, olu be mɛnni kɛ Ala fɛ ani a ye baara min kalifa u ma, u b’o kɛ k’a dafa. Nuhun kisira sanjiba wagati la. O cogo kelen na, minw batizera ani u be kantigiya kɛ Ala ye, olu fana bena kisi duniɲa jugu nin halaki tuma na (Mariki 13:10; Yir. 7:9, 10). Siga t’a la, a kɔrɔtanin lo kosɔbɛ an k’an yɛrɛkun di Jehova ma ani ka batize. O la, ni mɔgɔ dɔ y’a ka batɛmu bila ka suma ka sɔrɔ kuun bɛrɛ t’o la, a be se ka bɔnɛ ɲɛnamaya banbali la.

5. An bena mun lo lajɛ barokun nin na?

⁵ Sisan, an b’a lɔn ko batɛmu ye sɔbɛko lo ye. O kama, an ka ɲi k’a ɲini ka ɲiningali saba nunu jaabiliw lɔn: Bibulu be mun lo fɔ batɛmu koo la? Mɔgɔ ka ɲi ka mun ni mun lo kɛ ka sɔrɔ ka batɛmu ta? N’an b’an deen wala mɔgɔ wɛrɛ kalanna Bibulu la, mun na an ka ɲi k’a to an hakili la ko batɛmu kɔrɔtanin lo kosɔbɛ?

6, 7. a) Zan ka batɛmu kuun tun ye mun ye? b) Zan ye batɛmu juman lo kɛ min ɲɔgɔn tɛ yen?

⁶ Batɛmu fɔlɔ min kofɔra Bibulu kɔnɔ, Zan Batizelikɛla lo y’o kɛ (Mat. 3:1-6). Minw tun b’a to Zan k’u batize, u tun b’o kɛ walisa k’a yira ko u nimisara u ka jurumuw na. O kɔrɔ, u ye Musa ka sariya tiɲɛ ani u be nimisara o kosɔn. Nka, Zan ye batɛmu dɔ kɛ min tun kɔrɔtanin lo ka tɛmɛ batɛmu tɔɔw bɛɛ kan ani o tun ma ɲɛsin nimisali koo ma. Zan ye nɛɛmaba sɔrɔ ka Yezu batize, ale min tun ye Ala Dencɛ dafanin ye (Mat. 3:13-17). Yezu tun ma jurumu si kɛ. O kama, kuun tun t’a la a ka nimisa jurumu dɔ kosɔn (1 Piyɛri 2:22). Yezu ka batɛmu tun b’a yira ko a labɛnnin lo k’a yɛrɛ di walisa ka Ala sago kɛ.—Eburuw 10:7.

⁷ Tuma min na Yezu tun b’a ka waajuli baara kɛra dugukolo kan, a ka kalandenw fana ye mɔgɔw batize (Zan 3:22; 4:1, 2). O mɔgɔw ka batɛmu fana tun b’a yira k’u nimisara u ka jurumuw na sabu u ye Musa ka sariya tiɲɛ. Nka Yezu kununi kɔ ka bɔ saya la, minw tun b’a fɛ ka tugu a kɔ, olu tun ka ɲi ka batɛmu ta kuun wɛrɛ kama.

8. a) Yezu kununi kɔ ka bɔ saya la, a ye cikan juman lo di a ka kalandenw ma? b) Mun na kerecɛnw ka ɲi ka batɛmu ta?

⁸ Saan 33, Yezu kununi kɔ ka bɔ saya la, a y’a yɛrɛ yira mɔgɔ 500 ni kɔ la. O mɔgɔw cɛma, cɛɛw, musow ani n’a sɔrɔ denmisɛnw fana tun be yen. N’a sɔrɔ o wagati lo la a y’a fɔ ko: “Aw ye taga siyaw bɛɛ kɛ ne ka kalandenw ye k’u batize Faa, ni Dencɛ ni Nii Senuman tɔgɔ la, k’u kalan, waasa u ka ne ka kuma bato.” (Mat. 28:19, 20; 1 Kor. 15:6). A be komi Yezu ka kalanden caaman tun be yen tuma min na a y’o cikan di. O cikan b’a yira ko mɔgɔ o mɔgɔ b’a fɛ ka kɛ Yezu ka kalanden ye wala ka sɔn Yezu ka zuu ma, o tigi ka ɲi ka batize (Mat. 11:29, 30). Mɔgɔ min b’a fɛ ka Ala bato cogo bɛnnin na, a ka ɲi ka sɔn a ma ko Jehova be tɛmɛ Yezu lo fɛ k’a sago dafa. O kɔ, a tigi be sɔrɔ ka batɛmu ta. Jehova be sɔn o batɛmu ɲɔgɔn dɔrɔn lo la. Dalilu caaman be sɔrɔ Bibulu kɔnɔ minw b’a yira ko saan kɛmɛkulu fɔlɔ la, Krista ka kalandenw tun be batɛmu kɔrɔ faamu. U m’u ka batɛmu koo bila ka suma.—Kɛw. 2:41; 9:18; 16:14, 15, 32, 33.

9, 10. Etiyopika ni Sɔli ka ɲɛyirali be mun lo yira an na batɛmu koo la?

⁹ Kɛwaliw 8:35, 36 kalan. An ka Etiyopika dɔ ka ɲɛyirali lajɛ. O cɛɛ tun tuubira ka don Yahutu diinan na. A tun tagara Zeruzalɛmu walisa ka batoli kɛ ani a tun be kɔsegira a ka soo. Jehova ka mɛlɛkɛ dɔ y’a fɔ Filipu ye ko a ka gwɛrɛ o cɛɛ kɔrɔ ka “kibaru diman fɔ” a ye Yezu koo la. O Etiyopika ye mun lo kɛ do? A ye min kɛ, o b’a yira ka gwɛ ko a ye tiɲɛn kuma minw mɛn, u diyara a ye kosɔbɛ. Jehova be min ɲini kerecɛnw fɛ, o cɛɛ tun b’a fɛ k’o kɛ. O kama, a m’a ka batɛmu bila ka suma.

¹⁰ An ka ɲɛyirali wɛrɛ lajɛ. O ye Yahutucɛ dɔ ye min tɔgɔ tun ko Sɔli. Yahutu siya tun y’a yɛrɛkun di Jehova ma. Nka, Jehova banna o siya la sabu Yahutuw tun tɛ mɛnni kɛ a fɛ. Sɔli tun b’a miiri ko Yahutuw bele tun be Ala batora cogo ɲuman na. O kama, a tun be kerecɛnw tɔɔrɔ. A tun b’a miiri ko Yezu suu ma kunu. Nka loon dɔ, ka Yezu to sankolo la, a kumana Sɔli fɛ. Sɔli ye mun lo kɛ do? A sɔnna Yezu ka kalanden Ananiyasi ka dɛmɛ na ni ninsɔndiya ye.  Bibulu b’a fɔ ko: “O yɔrɔnin kelen bɛɛ, a sɔnna u y’a batize.” (Kɛw. 9:17, 18; Gal. 1:14). Kɔfɛ, Sɔli weelela ko ciden Pol. Pol y’a faamu ko Ala be tɛmɛ Yezu lo fɛ k’a sagonata dafa. A kɔrɔsi ko dɔɔni o kɔ dɔrɔn, Sɔli ye batɛmu ta. A ma koow bila ka suma.—Kɛwaliw 22:12-16 kalan.

11. a) Mun lo be Bibulu kalandenw lasun bi ka batɛmu ta? b) An mana mɔgɔ kuraw ye u be batɛmu tara, o be mun lo kɛ an na do?

¹¹ Bi, o kelen lo fana ni Bibulu kalandenw ye, u mana kɛ denmisɛnw wala mɔgɔkɔrɔbaw ye. Minw limaniyanin lo ani Bibulu ka kalanw ka di u ye sɔbɛ la, olu b’a fɛ n’u dusu bɛɛ ye k’u yɛrɛkun di Jehova ma ani ka batɛmu ta. Kalan min labɛnna batɛmu ɲinilaw kosɔn, o ye wagati kɛrɛnkɛrɛnnin ye lajɛnbaw la. Jehova Seerew ninsɔn ka di ni Bibulu kalandenw be sɔn tiɲɛn batoli ma ani ka ɲɛtaga kɛ fɔɔ k’a ɲini ka batɛmu ta. Bangebaga minw ye kerecɛnw ye, olu fana ninsɔn ka di kosɔbɛ n’u deenw be batɛmu ɲinilaw cɛma. Waajulibaara saan 2017 kɔnɔ, mɔgɔ 284 000 ni kɔ lo ye batɛmu ta walisa k’a yira k’u y’u yɛrɛkun di Jehova ma. Siga t’a la, o mɔgɔw y’a faamu ko walisa ka kɛ kerecɛn ye, fɔɔ u ka batize. Nka, u ye mun ni mun lo kɛ fɔlɔ ka sɔrɔ ka batɛmu ta?

12. Bibulu kalanden ka ɲi ka mun ni mun lo kɛ ka sɔrɔ ka batɛmu ta?

¹² Sanni Bibulu kalanden ka batɛmu ta, a ka ɲi ka tiɲɛn lɔn Ala koo la fɔlɔ. Ka fara o kan, Ala sagonata ye min ye adamadenw ni dugukolo koo la ani a ye min kɛ walisa ka adamadenw kisi, o tigi ka ɲi k’o faamu (1 Tim. 2:3-6). O kɔ, a ka ɲi ka kɛ ni limaniya ye. O lo bena a dɛmɛ ka Ala ka sariyaw labato ani ka koo jugu dabila (Kɛw. 3:19). O kɔrɔtanin lo sabu ni mɔgɔ dɔ y’a yɛrɛkun di Jehova ma ani a bele be koo jugu kɛra, Jehova tɛna sɔn a ka yɛrɛkundili ma (1 Kor. 6:9, 10). Nka o dɔrɔn tɛ. Mɔgɔ min b’a fɛ k’a yɛrɛkun di Jehova ma, o tigi ka ɲi ka taga kafo ka lajɛnw na, ka waajuli kɛ tuma o tuma ani ka mɔgɔw kalan tiɲɛn koo la. Yezu y’a fɔ ko a ka kalanden sɔbɛw ka ɲi k’o lo kɛ (Kɛw. 1:8). Bibulu kalanden ka ɲi k’o koow bɛɛ kɛ fɔlɔ. O kɔ, a be sɔrɔ k’a yɛrɛkun di Jehova ma delili la a kelen n’a kelen. Kɔfɛ, a b’o yira bɛɛ ɲɛɛ na batɛmu sababu fɛ.

13. N’an be bibulukalan kɛra ni mɔgɔ dɔ ye, mun na an ka ɲi k’a to an hakili la k’o tigi ka ɲi ka batize walisa ka kɛ kerecɛn sɔbɛ ye?

¹³ Koo minw kɔrɔtanin lo kosɔbɛ, an k’an deenw ni Bibulu kalanden wɛrɛw dɛmɛ k’o kɛ. Nka, an k’a to an hakili la ko ni mɔgɔ ma batize, a tɛ se ka kɛ Yezu ka kalanden sɔbɛ dɔ ye. N’an b’o to an hakili la, an bena baro kɛ o koo la n’an ka Bibulu kalandenw ye koɲuman. An tɛna siran ka kuma n’u ye wagati bɛnnin na walisa k’a yira ko a kɔrɔtanin lo kerecɛn k’a yɛrɛkun di Jehova ma ani ka batɛmu ta. Tiɲɛn na, an b’a fɛ an deenw ani Bibulu kalanden wɛrɛw ka ɲɛtaga kɛ fɔɔ ka batize!

14. Mun na an man kan ka mɔgɔ si waajibiya a ka batɛmu ta?

¹⁴ Bangebagaw wo, Bibulu kalanfaw wo, wala kafoden si man kan ka dɔ waajibiya a ka batɛmu ta. Mun na do? Sabu Jehova t’an si waajibiya k’ale bato (1 Zan 4:8). Nka, n’an be bibulukalan kɛra ni mɔgɔ dɔ ye, an k’a yira a la ka gwɛ ko a kɔrɔtanin lo a ka jɛnɲɔgɔnya ɲuman kɛ ni Jehova ye. Ni Bibulu kalanden ninsɔn ka di kosɔbɛ ka tiɲɛn lɔn Ala koo la ani Ala be min ɲini kerecɛnw fɛ, n’a b’a fɛ k’u bɛɛ kɛ sɔbɛ la, a bena a ɲini ka batɛmu ta.—2 Kor. 5:14, 15.

15, 16. a) Yala mɔgɔ ka ɲi ka sanda dɔ sɔrɔ fɔlɔ ka sɔrɔ ka batɛmu ta wa? A ɲɛfɔ. b) Mun na Bibulu kalanden ka ɲi ka batize ka kɛ Jehova Seere dɔ ye hali n’a tun ye batɛmu ta diinan wɛrɛ kɔnɔ?

 ¹⁵ Yala mɔgɔ ka ɲi ka sanda dɔ sɔrɔ fɔlɔ ka sɔrɔ ka batɛmu ta wa? Ayi. Bibulu kalandenw bɛɛ tɛ ɲɛtaga kɛ ani ka kɛ kerecɛn kɔgɔnin ye wagati kelen na. Mɔgɔ caaman ye batɛmu ta u denmisɛn tuma na ani u tora kantigiya la fɔɔ ka taga kɔrɔ. Bibulu kalanden dɔw tun kɔrɔla ka ban tuma min na u ye Bibulu ka kalanw lɔn ani ka batize. Dɔw yɛrɛ tun be ni saan 100 ni kɔ ye!

¹⁶ Balimamuso dɔ tun be bibulukalan kɛra ni musokɔrɔba dɔ ye. O muso tun ye batɛmu ta diinan caaman kɔnɔ. O kama, a ye balimamuso ɲininga ni kuun b’a la ale ka batize tugun. Balimamuso ye bibulusen dɔw yira a la walisa k’a ka ɲiningali jaabi. Bibulu be min ɲini kerecɛn sɔbɛw fɛ, o Bibulu kalanden y’o faamu ani dɔɔni o kɔ, a ye batɛmu ta. Hali ni bɛrɛ tun m’a jɛn saan 80 la, a m’a miiri ko kuun t’a la a ka batize. O ɲɛyirali be mun lo yira an na? Walisa Jehova ka sɔn an ka batɛmu na, fɔɔ an ka lɔnniya sɔbɛ sɔrɔ a sagonata koo la. O la, hali n’an ye batɛmu ta diinan wɛrɛ kɔnɔ, an bele ka ɲi ka batize walisa ka kɛ Jehova Seere dɔ ye.—Kɛwaliw 19:3-5 kalan.

17. Mɔgɔ ka ɲi ka miiri mun lo la a ka batɛmu loon na?

¹⁷ Mɔgɔ ka batɛmu loon ye ninsɔndiya loon lo ye. Nka, a kɔrɔ ye min ye k’i yɛrɛkun di Jehova ma ani ka batize, a tigi ka ɲi ka wagati ta ka miiri koɲuman o la. Bibulu be min ɲini kerecɛn sɔbɛw fɛ, an ka ɲi ka jijaliba lo kɛ walisa k’o bɛɛ kɛ. Yezu ka kalandenw man kan ka “taama u yɛrɛ sago la tugu, nga u k’o kɛ ale kosɔn, min sara ka kunun u ka nafa kosɔn.”—2 Kor. 5:15; Mat. 16:24.

18. An bena ɲiningali jumanw lo lajɛ barokun nata la?

¹⁸ I ko an y’a ye barokun nin na cogo min na, k’a latigɛ ka kɛ kerecɛn ye, o ye sɔbɛko lo ye. O lo kama Maria bamuso tun b’a yɛrɛ ɲiningara koo dɔw la i ko an y’a ye barokun daminɛ na cogo min na. N’i ye bangebaga ye, n’a sɔrɔ i delila k’i yɛrɛ ɲininga ko: “Yala n’ deen labɛnnin lo tiɲɛn na ka batɛmu ta wa? Yala a be ni lɔnniya sɔbɛ ye Jehova koo la walisa k’a yɛrɛkun di a ma wa? Yala a ka ɲi ka tila lakɔli la ani ka baara ɲuman sɔrɔ fɔlɔ ka sɔrɔ ka batɛmu ta wa? N’a ye jurumuba dɔ kɛ a ka batɛmu tanin kɔ do?” An bena o ɲiningaliw jaabi barokun nata la. Bangebaga minw ye kerecɛnw ye, an bena a filɛ fana cogo min na u be se ka batɛmu jati cogo bɛnnin na.