1. An be se hakilitigiya sɔrɔ cogo di? An be nafa juman lo sɔrɔ o la?

HAKILITIGIYA bɔra Jehova lo yɔrɔ ani a b’a tɛgɛ labila ka hakilitigiya di tɔɔw ma. Zaki 1:5 b’a fɔ ko: “N’o y’a sɔrɔ n’aw dɔ dɛsɛnin lo hakilitigiya la, o tigi k’a daali Ala fɛ, . . . A tigɛ man gwɛlɛ, a be mɔgɔ bɛɛ sɔn ka ɲa. A t’an sɔngɔ ka sɔrɔ k’an sɔn.” An be se ka hakilitigiya sɔrɔ cogo minw na, u dɔ ye ka sɔn Ala ka kololi ma. An ka ɲi ka sɔn a ma fana ko hakilitigiya be se k’an latanga tagamacogo ani Alako ta fan fɛ (Talenw 2:10-12). O la, an bena “to Ala ka kanuya la, . . . ka [ɲɛnamaya] banbali kɔnɔ.”—Zude 21.

2. An be se ka mun lo kɛ walisa Ala ka kololi ka diya an ye?

² An lamɔcogo ani an ka dafabaliya b’a to a man nɔgɔ tuma dɔw la ka sɔn kololi ma wala k’a jati ko nafa b’a la. N’an yɛrɛ y’a ye nafa min be kololi la, o b’a to an b’a faamu ko Jehova b’an kanu kosɔbɛ! Talenw 3:11, 12 b’a fɔ ko: “N deen, kana ban Masaba ka ladili ma. . . . Bari, Masaba b’a diyanamɔgɔ le ladi.” An k’a to an hakili la ko Jehova b’an ɲɛ lo fɛ (Eburuw 12:5-11 kalan). Komi Jehova b’an lɔn ka ɲɛ, a b’an kolo cogo bɛnnin na ani k’a dama kɛɲɛ. An ka kololi sifa naani lajɛ: 1) Yɛrɛkololi, 2) bangebagaw ka kololi, 3) kololi, kafo kɔnɔ ani 4) fɛɛn min be digi mɔgɔ la ka tɛmɛ kololi kan.

3. Deen be se k’a yɛrɛ degi yɛrɛkololi la cogo di? Ɲɛyirali dɔ fɔ.

³ Yɛrɛkololi kɔrɔ dɔ ye ka kɛ ni yɛrɛminɛli ye walisa k’an ka kɛwalew n’an ka miiriyaw kɔrɔsi. An tɛ wolo ni yɛrɛkololi ye nka an ka ɲi k’a degi le. Ɲɛyirali fɛ, ni deen be nɛgɛsoboli degira, a bangebaga dɔ be nɛgɛso minɛ walisa a kana ben. Nka ni deen be sera nɛgɛsoboli la dɔɔni dɔɔni, a bangebaga b’a to a be taga a kelen sekɔndi damanin, a be sɔrɔ k’a minɛ tugun. Kɔfɛ, ni deen sera nɛgɛsoboli la koɲuman, bangebaga b’a to deen be taga a kelen ani a tɛ nɛgɛso minɛ tugun. O cogo kelen na, bangebagaw ka ɲi ka muɲu u deenw kɔrɔ k’u kalan ka kɛɲɛ ni Jehova “ka kololi ni a ka laadili ye.” O cogo la, u b’u deenw dɛmɛ u k’u yɛrɛ kolo ani ka kɛ ni hakilitigiya ye.—Efɛz. 6:4, ABM.

4, 5. a) Mun na yɛrɛkololi ye “jogokura” faan dɔ ye min kɔrɔtanin lo? b) Mun na an man ɲi k’an farifaga hali n’an filila?

⁴ O cogo kelen na, minw ye Jehova lɔn u baliku tuma na, hali n’u y’u yɛrɛ kolo, u tɛ kerecɛn kɔgɔninw ye fɔlɔ. Nka, n’u y’a daminɛ ka “jogokura ta” ani k’u jija ka Krista ladegi, o tuma na le u bena kɛ kerecɛn kɔgɔninw ye (Efɛz. 4:23, 24). Yɛrɛkololi b’an dɛmɛ ka “siran Ala ɲa ani ka ban nin diɲɛ nigɛjuguw la, waasa k’an to bii diɲɛ na, an ka se k’an yɛrɛ minɛ ka taama tilenninya la Ala ɲakɔrɔ.”—Titi 2:12.

⁵ Nka, an bɛɛ ye jurumukɛlaw ye (Waaj. 7:20). O kama n’an filila, o kɔrɔ tɛ ko an m’an yɛrɛ kolo ka ɲɛ. Talenw 24:16 b’a fɔ ko: “Mɔgɔtilennin be ben siɲɛ caaman ka wili.” Mun lo bena a dɛmɛ ka wuli do? Ala ka hakili senu lo, a yɛrɛ ka fanga tɛ (2 Korɛntikaw 4:7 kalan). O hakili senu deen ka jogo dɔ ye yɛrɛminɛli ye. O jogo ni yɛrɛkololi be taga ɲɔgɔn fɛ kosɔbɛ.

6. An be se ka kɛ Ala ka Kuma kalanbaga ɲumanw ye cogo di? (Jaa lajɛ, barokun daminɛ na.)

⁶ Koo nunu fana be se k’an dɛmɛ an k’an yɛrɛ kolo: ka delili kɛ n’an dusu bɛɛ ye, ka Bibulu sɛgɛsɛgɛ ani ka miiri a kan. Nka n’a ka gwɛlɛ i fɛ ka Bibulu sɛgɛsɛgɛ do? N’a sɔrɔ i t’a jati ko i ye kalankɛla ɲuman ye. Nka a to i hakili la ko n’i y’a to Jehova y’i dɛmɛ, a bena a kɛ a ka Kuma be diya i ye (1 Piyɛri 2:2). A fɔlɔ, Jehova deli a k’i dɛmɛ i k’i yɛrɛ kolo walisa k’a ka Kuma kalan. O kɔ, koow kɛ ka kɛɲɛ n’i ka delili ye. N’a sɔrɔ a daminɛ na, i be se k’i ka kalan wagati surunya. Dɔɔni dɔɔni, a tɛna gwɛlɛya i fɛ ka kalan kɛ ani kalan bena diya i ye kosɔbɛ! I be wagati min kɛ ka miiri Jehova ka kuma kan i kelen na, o bena diya i ye kosɔbɛ!—1 Tim. 4:15.

7. N’an b’an yɛrɛ kolo, o b’an dɛmɛ cogo di ka laɲinitaw dafa Alako ta fan fɛ?

⁷ N’an b’an yɛrɛ kolo, o b’an dɛmɛ fana k’an ka laɲinitaw dafa Alako ta faan fɛ. An ka sotigi dɔ ka ɲɛyirali lajɛ. Ale fɛ, a tun kisɛyanin tɛ i ko fɔlɔ la ani o tun b’a hakili ɲagami. O kama, a y’a latigɛ ka kɛ kudayi piyɔniye ye. A ye barokun dɔw kalan o koo la an ka gafew kɔnɔ ani a ye delili kɛ fana. O bɛɛ kɛra sababu ye k’a ka limaniya sabati ani ka piyɔniye baara nege don a la kosɔbɛ! Tuma o tuma n’a see b’a ye, a be labɛnw kɛ fana walisa ka kɛ piyɔniye kɔrɔsigi ye. Mun lo sɔrɔla o la? Gwɛlɛyaw bɛɛ n’a ta, a ɲɛɛ jɔlen tora a ka laɲinita kan ani kɔfɛ a sera ka kɛ kudayi piyɔniye ye.

8-10. Mun lo be se ka kerecɛn bangebagaw dɛmɛ walisa u ka se k’u deenw lamɔ u ka Jehova bato? Ɲɛyirali dɔ fɔ.

⁸ Jehova ye nɛɛma di bangebagaw ma u k’u deenw lamɔ ka kɛɲɛ ni “Matigi ka kololi ni a ka laadili ye.” (Efɛz. 6:4, ABM). O man nɔgɔ bi duniɲa nin kɔnɔ (2 Tim. 3:1-5). Denmisɛnw tɛ ɲuman ni juguman lɔn ka bɔ ɲɔgɔn na u wolotuma na ani u dusukun kolonin tɛ. O kama, u mako be kololi la walisa ka se ka ɲuman ni juguman lɔn (Ɔrɔm. 2:14, 15). Bibulu sɛgɛsɛgɛrikɛla dɔ y’a ɲɛfɔ ko Gɛrɛkikan kumaden min bayɛlɛmana ko “kolo,” o kɔrɔ be se ka kɛ “deen yiriwali” ye. O ye ka deen lamɔ walisa a ka kɛ baliku sɔbɛ ye.

⁹ Deen minw kolola ni kanuya ye, olu latanganin lo. U b’a faamu ko fɛɛn minw ka di u ye, u tɛ se k’u bɛɛ kɛ. U b’a faamu fana ko u ka desizɔnw n’u ka kɛwalew be ni nɔfɛkow ye. O kama, a kɔrɔtanin lo bangebagaw ka Jehova deli a k’u ɲɛminɛ. A to i hakili la ko ni wagati be tɛmɛ, deen kolocogo be yɛlɛma ani a tɛ kɛ cogo kelen na yɔrɔ bɛɛ la fana. Ni bangebagaw be mɛnni kɛ Ala fɛ, u tɛna u deenw lamɔ u kunfɛ ani u tɛna basigi adamadenw ka hakilitigiya kan fana.

¹⁰ An be se ka kalan sɔrɔ Nuhun ka koo la. Tuma min na Jehova y’a fɔ a ye ko a ka kurun lɔ, Nuhun tun t’a lɔn a bena o kɛ cogo min na. O kama, a y’a jigi la Jehova kan. Bibulu b’a fɔ ko Jehova “ye min fɔ Nuhun ye, a y’o bɛɛ kɛ.” (Zɛnɛzi 6:22). Mun lo sɔrɔla o la? Nuhun sera k’o kurun lɔ ka ban siɲɛ kelen. O cogo la, Nuhun n’a ka denbaya kisira. Nuhun tun ye bangebaga ɲuman ye fana. Mun na do? Sabu a jigi tun lanin be Ala ka hakilitigiya lo kan. O la, a y’a deenw kalan koɲuman ani a tun ye ɲɛyirali ɲuman ye u fɛ. Nka o tun man nɔgɔ sabu ka kɔn sanjiba ɲɛ, mɔgɔw tun ka jugu!—Zɛnɛzi 6:5.

11. Mun na bangebagaw ka ɲi k’u jija kosɔbɛ k’u deenw lamɔ?

¹¹ N’i ye bangebaga ye, Jehova ye min fɔ, i be se k’o “bɛɛ kɛ” cogo di? Mɛnni kɛ Jehova fɛ. A to a k’i dɛmɛ k’i deenw kolo. A be tɛmɛ a ka Kuma n’a ka ɔriganisasiyɔn fɛ ka ladili minw di an ma, o sira tagama. Kɔfɛ, i deenw bena i waleɲuman lɔn o kosɔn. Balimacɛ dɔ y’a fɔ ko: “ N’ bangebagaw ye n’ lamɔ cogo min na, ne b’u waleɲuman lɔn kosɔbɛ o kosɔn. U y’u seko kɛ ka n’ dusukun sɔrɔ. N’ sera ka ɲɛtaga kɛ Alako ta fan fɛ olu barika lo la.” Bangebagaw ka jijaliw bɛɛ n’a ta, denmisɛn dɔw b’u mabɔ Jehova la. Nka minw b’u seko kɛ k’u deen kalan tiɲɛn koo la, olu dusukun t’u kɛlɛ. U jigi b’a la fana k’u deen bena segi ka na Jehova ma loon dɔ.

12, 13. a) Bangebagaw, n’aw deen dɔ gwɛnna ka bɔ kafo kɔnɔ, aw be se k’a yira cogo di ko aw be mɛnni kɛ Ala fɛ? b) Denbaya dɔ ye nafa juman lo sɔrɔ sabu bangebagaw ye mɛnni kɛ Jehova fɛ?

 ¹² N’u deen gwɛnna ka bɔ kafo kɔnɔ, o be bangebagaw ka kantigiya kɔrɔbɔ kosɔbɛ. Balimamuso dɔ denmuso gwɛnna ka bɔ kafo kɔnɔ ani a bɔra u ka soo. O balimamuso ko: “ N’ tun be dalilu dɔw ɲini an ka gafew kɔnɔ, n’ tun be se ka basigi minw kan walisa ka se ka wagati kɛ ni n’ denmuso ni n’ mamaden ye.” Nka a cɛɛ y’a dɛmɛ ni kanuya ye, a y’a faamu k’u deen ka koo t’u kunko ye tugun ani ko u ka ɲi ka kantigiya kɛ Jehova lo ye.

¹³ Saan damanin o kɔ, denmusoman kɛra Jehova Seere dɔ ye tugun. A bamuso ko: “Sisan, ka loon damanin nin bɔ a la, a be n’ weele telefɔni na wala a be sms ci n’ ma loon o loon. A be ne ni n’ cɛɛ bonya kosɔbɛ sabu a b’a lɔn ko an ye mɛnni kɛ Ala lo fɛ. Jɛnɲɔgɔnya ɲuman b’an ni ɲɔgɔn cɛ.” N’i deen dɔ gwɛnna ka bɔ kafo kɔnɔ, yala i bena i “jigi la [Jehova] kan sɔbɛ la” ani i tɛna i “bolo la i yɛrɛ ka lɔnniya kan” wa? (Talenw 3:5, 6). A to i hakili la ko Jehova ka kololi b’a yira ko a b’an kanu kosɔbɛ ani ko a ye hakilitigi ye. Kana ɲinɛ abada ko a y’a Dencɛ di bɛɛ kosɔn, hali i deen yɛrɛ. Ala t’a fɛ mɔgɔ si ka halaki (2 Piyɛri 3:9 kalan). O kama, bangebagaw, a’ ye la a la ko Jehova ka kololi n’a ka ɲɛminɛli b’an nafa hali n’a ka gwɛlɛ aw fɛ ka mɛnni kɛ a fɛ. Sɔn Jehova ka kololi ma, kana a ɲini k’o sɔsɔ.

14. Jehova be tɛmɛ “so kunna sigibaa dannamɔgɔ” fɛ k’an kalan. An be nafa jumanw lo sɔrɔ o la?

¹⁴ Jehova y’a daa di ko a bena a janto kerecɛn kafo la, k’a tanga ani k’a kalan. A b’o kɛ cogo caaman na. Ɲɛyirali fɛ, a y’a Dencɛ sigi kafo kun na. Yezu fana ye “so kunna sigibaa dannamɔgɔ” sigi walisa a ka dumuni di a sagokɛlaw ma Alako ta fan fɛ wagati bɛnnin na ani k’u dɛmɛ ka to kantigiya la (Luka 12:42, ABM). O “so kunna sigibaa” be kalan nafamanw di an ma ani a b’an kolo fana. Yala i delila ka kalan dɔ mɛn wala ka barokun dɔ kalan an ka gafe dɔ kɔnɔ min y’i dɛmɛ k’i ka miiriya wala i ka kɛwalew yɛlɛma wa? I be se ka ninsɔndiya sabu i y’o yɛlɛmaniw kɛ. O b’a yira ko i b’a to Jehova k’i kolo.—Talenw 2:1-5.

15, 16. a) An be se ka nafa sɔrɔ diinan mɔgɔkɔrɔw ka baara la cogo di? b) An be se ka mun lo kɛ walisa diinan mɔgɔkɔrɔw ka ninsɔndiya sɔrɔ kosɔbɛ u ka baara la?

¹⁵ Yezu fana ye diinan mɔgɔkɔrɔw sigi walisa u k’u janto kafodenw na ni kanuya ye. Bibulu b’u weele ko: “Nili fɛnw.” (Efɛz. 4:8, 11-13, ABM). U ka baara be se k’an nafa cogo di? An be se k’u ka limaniya n’u ka ɲɛyirali ladegi. U be basigi Bibulu kan ka ladili minw di an ma, an ka ɲi k’u sira tagama (Eburuw 13:7, 17 kalan). A to i hakili la ko diinan mɔgɔkɔrɔw b’an kanu ani u b’a fɛ an ka jɛnɲɔgɔnya ɲuman kɛ ni Ala ye. N’u y’a ye ko an be fɔn lajɛnw na ani an kisɛyanin tɛ tugun, u bena teliya k’an dɛmɛ joona. U bena an lamɛn ani k’an jija ni kanuya ye ani ka ladili ɲumanw di an ma ka bɔ Bibulu kɔnɔ. Yala i b’a jati k’u ka dɛmɛ b’a yira ko Jehova b’i kanu wa?

¹⁶ A to i hakili la ko a man nɔgɔ diinan mɔgɔkɔrɔw fɛ k’an ladi. Miiri k’a filɛ, masacɛ Dawuda tun ye jurumuba kɛ ani a y’a ɲini k’o dogo. Yala a tun ka nɔgɔ kira Natan fɛ ka Dawuda ladi wa? Ayi (2 Sam. 12:1-14). Piyɛri min tun ye Yezu ka ciden 12 dɔ ye, ale tun ye a balima Yahutuw fisaya ni balima wɛrɛw ye minw  tun ye kerecɛnw ye. Siga t’a la, ciden Pol tun ka ɲi k’a jaa gwɛlɛya walisa ka Piyɛri kolo (Gal. 2:11-14). O la, i be se ka mun lo kɛ walisa a kana gwɛlɛya diinan mɔgɔkɔrɔw fɛ k’i ladi? I yɛrɛ majigi, u waleɲuman lɔn ani a to u ka se ka kuma n’i ye cogo nɔgɔman na. A jati ko u ka dɛmɛ b’a yira ko Jehova b’i kanu. O bena i nafa ani diinan mɔgɔkɔrɔw bena ninsɔndiya sɔrɔ kosɔbɛ u ka baara la.

17. Diinan mɔgɔkɔrɔw ye balimamuso dɔ dɛmɛ cogo di?

¹⁷ Balimamuso dɔ y’a fɔ ko koo dɔw y’ale sɔrɔ a ka ɲɛnamaya kɔnɔ. O kama, a tun ka gwɛlɛ ale fɛ ka Jehova kanu. O koo tun b’a hakili ɲagami kosɔbɛ. A y’a faamu ko a ka ɲi ka kuma diinan mɔgɔkɔrɔw fɛ. A ko: “U ma n’ jalaki wala ka n’ kɔrɔfɔ. Nka, u tun be n’ jija ani ka n’ barika bonya. Kafo ka lajɛn kelen kelen bɛɛ bannin kɔ, hali n’u bolo tun degunnin lo cogo o cogo, u dɔ tun be n’ ɲininga ko n’ be cogo di? Koo dɔw tun ye n’ sɔrɔ ka kɔrɔ. O kama, a tun ka gwɛlɛ n’ fɛ ka la a la ko n’ ka kan ni Ala ka kanuya ye. Siɲɛ caaman na, Jehova tɛmɛna kafodenw ni diinan mɔgɔkɔrɔw fɛ k’a yira n’ na ko a be n’ kanu. N’ be Jehova deli a ka n’ dɛmɛ n’ kana n’ mabɔ a la fewu!”

18, 19. Mun lo be digi mɔgɔ la ka tɛmɛ kololi kan? Ɲɛyirali dɔ fɔ.

¹⁸ Tiɲɛn lo ko kololi be digi mɔgɔ la. Nka n’an banna Jehova ka kololi ma, o be digi an na ka tɛmɛ (Eburuw 12:11). An ka Kayɛn ani masacɛ Sedesiyasi ka koo lajɛ. Tuma min na Jehova y’a ye ko Kayɛn b’a dɔgɔcɛ Abɛli kɔniya ani ko a tun b’a fɛ k’a faga, Jehova y’a ladi ko: “Mun na i dimina, mun na i ɲaa kumuna? N’i ye koɲuman kɛ, i kuun bena kɔrɔta. Nga n’i te koɲuman kɛ, hakɛ yɔrɔ man jan i la. A b’i dɛndɛna, nga e kɔni ka ban.” (Zɛnɛzi 4:6, 7). Kayɛn ma mɛnni Jehova fɛ ani a y’a dɔgɔcɛ faga. A ye sɛgɛn ni tɔɔrɔ lase a yɛrɛ ma gwansan! (Zɛnɛzi 4:11, 12). O tɔɔrɔ digira a la ka tɛmɛ Jehova ka kololi kan.

¹⁹ Masacɛ jugu Sedesiyasi tun ye fagobagatɔ ye. A ka masaya wagati kɛra wagati gwɛlɛ ye Zeruzalɛmukaw fɛ. Kira Zeremi y’a lasɔmi siɲɛ caaman ko a k’a ka kɛwale juguw dabila. Nka, Sedesiyasi ma sɔn Jehova ka kololi la. O nɔfɛko juguyara (Zer. 52:8-11). Siga t’a la, Jehova b’a fɛ k’an kisi tɔɔrɔ gwansan ma.—Ezayi 48:17, 18 kalan.

20. Minw be sɔn Ala ka kololi ma ani minw be ban a ma, siniɲasigi be mun lo mara olu ye?

²⁰ Duniɲa kɔnɔ bi, mɔgɔ caaman be Ala ka kololi mafiɲɛya ani u t’u janto a la. Nka yanni dɔɔni, minw bɛɛ be ban Ala ka kololi ma, a nɔfɛko bena juguya u ma (Talenw 1:24-31). O la, an ka Ala ka “ladili lamɛn ka kɛ hakilitigiw ye.” Talenw 4:13 b’a fɔ ko i k’o ladili “minɛ ka ɲa, kan’a to o be bɔ i kunna. A mara ka ɲa, e ka sii sɔrɔ sababu lo.”