1-2. Jɔn lo be se ka Bibulu kalanden dɛmɛ a ka ɲɛtaga kɛ ka batize?

AMY be Fiji jamana na ani a ko: “N’ tun be min kalanna Bibulu kɔnɔ, o tun ka di n’ ye kosɔbɛ. N’ tun b’a lɔn ko tiɲɛn lo. Nka tuma min na n’ y’a daminɛ ka jɛn ni balimaw ye, o yɛrɛ lo ye n’ dɛmɛ ka yɛlɛmaniw kɛ ani ka ɲɛtaga kɛ fɔɔ ka batize.” Amy ka koo b’an dɛmɛ ka koo kɔrɔtanin dɔ faamu. Ni kafoden tɔɔw be Bibulu kalanden dɛmɛ, o ka teli ka kɛ sababu ye a be to ka ɲɛtaga kɛ ani ka batize.

² Weleweledala kelen kelen bɛɛ be se ka mɔgɔ kuraw dɛmɛ u ka kɛ kafoden dɔw ye (Efɛz. 4:16). Piyɔniye dɔ tɔgɔ ko Leilani ani a be Vanuwatu guun kan. A ko: “Ntalen kuma dɔ b’a fɔ ko deen ye bɛɛ ta ye. O cogo kelen na, Bibulu kalanden ye kafodenw bɛɛ ta lo ye. Tuma caaman na, ni mɔgɔ nana tiɲɛn sira kan, kafodenw bɛɛ lo ye dɔ kɛ dɔ ye.” Deen somɔgɔw, u teriw ani deen ka kalanfaw, u bɛɛ lo be dɔ kɛ dɔ ye walisa deen ka bonya ka kɛ baliku ye. U b’o kɛ u kɛtɔ ka deen jija ani k’a kalan koo nafamanw na. O cogo kelen na, kafodenw be se ka Bibulu kalandenw ladi, k’u jija ani ka kɛ ɲɛyirali ɲumanw ye u fɛ. O la, u bena u dɛmɛ u ka ɲɛtaga kɛ ani ka batize.—Talenw 15:22.

3. Ana, Dorin, ani Leilani ka kumaw b’i dɛmɛ ka mun lo faamu?

³ Mun na Bibulu kalanfa ka ɲi ka ninsɔn diya ni weleweledala tɔɔw be kalanden dɛmɛna? Ana be Mɔldavi jamana na ani dan na piyɔniye lo. A ko: “Ni Bibulu kalanden y’a daminɛ ka ɲɛtaga kɛ, a ka gwɛlɛ kosɔbɛ mɔgɔ kelen fɛ k’a makow bɛɛ wasa.” Dorin fana ye dan na piyɔniye ye Mɔldavi. A ko: “Ne tun tɛ se ka miiri koo min na abada, tuma caaman na, weleweledala wɛrɛw b’o fɔ ani  o be Bibulu kalanden dusukun sɔrɔ.” Balimamuso Leilani ye koo wɛrɛ fɔ min be se k’a to an be ninsɔndiya. A ko: “Ni kalanden y’a ye ko balima tɔɔw b’a kanu ani u b’u janto a la, o b’a dɛmɛ k’a faamu ko an ye Jehova sagokɛlaw lo ye.”—Zan 13:35.

4. An bena mun lo lajɛ barokun nin na?

⁴ Nka, n’a sɔrɔ i be i yɛrɛ ɲininga ko: “Ne be se ka Bibulu kalanden dɔ dɛmɛ cogo di a ka ɲɛtaga kɛ hali k’a sɔrɔ ne lo tɛ bibulukalan kɛra n’a ye?” An be se ka mun lo kɛ ni dɔ ko an k’a bila sira ka taga bibulukalan dɔ kɛ? An be se ka mun lo kɛ fana ni Bibulu kalanden dɔ y’a daminɛ ka na kafo ka lajɛnw na? Barokun nin na, an bena o ɲiningaliw jaabi ani an bena a filɛ diinan mɔgɔkɔrɔw be se ka Bibulu kalandenw dɛmɛ cogo min na u ka ɲɛtaga kɛ ani ka batize.

5. I ka ɲi ka mun lo kɛ ni dɔ ko i k’ale bila sira ka taga bibulukalan dɔ kɛ?

⁵ Bibulukalan tuma na, mɔgɔ fɔlɔ min ka kunkanbaara lo ka kalanden dɛmɛ a ka Bibulu faamu, o y’a ka kalanfa lo ye. Ni dɔ ko i k’ale bila sira ka taga bibulukalan dɔ kɛ, i ka ɲi k’i yɛrɛ jati a baarakɛɲɔgɔn lo ye. I ka kunkanbaara ye k’a dɛmɛ le (Waaj. 4:9, 10). I be se ka koo tigitigi jumanw lo kɛ walisa ka kɛ dɛmɛbaga ɲuman ye?

6. Ni dɔ ko i k’ale bila sira ka taga bibulukalan dɔ kɛ, sariyakolo min be sɔrɔ Talenw 20:18 kɔnɔ, i be se k’o sira tagama cogo di?

⁶ I yɛrɛ labɛn bibulukalan kama. A fɔlɔ, a ɲini kalanfa fɛ a ka dɔɔni fɔ i ye kalanden koo la (Talenw 20:18 kalan). I be se k’a ɲininga ko: “I be mun lo lɔn kalanden koo la? Aw bena kalansen juman lo lajɛ? I b’a fɛ kalanden ka mun lo faamu kalan nin na? Yala koo dɔ be yen n’ be se ka min kɛ wala k’a fɔ wa? N’ man ɲi ka mun lo kɛ wala k’a fɔ? Mun lo be se ka kalanden jija a ka ɲɛtaga kɛ?” Tiɲɛn lo ko kalanfa tɛna kalanden ka gundow lakali i ye. Nka a bena min fɔ i ye, o be se k’i dɛmɛ. Balimamuso dɔ tɔgɔ ko Joy ani misɔnden lo. Ale b’o baro ɲɔgɔn kɛ ni balimaw ye minw b’a bila sira ka taga bibulukalan kɛ. A ko: “O baro be n’ bilasirabaga dɛmɛ a k’a mako don kalanden na ani k’a lɔn a be se ka min fɔ kalan tuma na.”

7. N’i ka ɲi ka mɔgɔ dɔ bila sira bibulukalan dɔ la, mun na i ka ɲi k’i yɛrɛ labɛn?

⁷ Ni dɔ ko i k’a bila sira bibulukalan dɔ la, a ka ɲi i k’i yɛrɛ labɛn o kalan kama (Ɛsid. 7:10). Balimacɛ Dorin min kofɔra ka tɛmɛ, ale ko: “Ni n’ bilasirabaga y’a yɛrɛ labɛn kalan kama, o ka di n’ ye. O la, a be se k’a daa don baro la koɲuman.”  Ka fara o kan, kalanden bena a ye ko aw fila bɛɛ y’aw yɛrɛ labɛn koɲuman ani o bena kɛ ɲɛyirali ɲuman ye a fɛ. Hali n’i tɛ se ka kalansen kuru bɛɛ labɛn koɲuman, wagati damanin ta k’a miiriya jɔnjɔnw lajɛ.

8. I be se ka mun lo kɛ walisa i ka delili ka kalanden nafa?

⁸ Delili kɔrɔtanin lo bibulukalan tuma na. O la, kɔn ka miiri k’a filɛ i bena min fɔ ni kalanfa y’a ɲini i fɛ i ka delili kɛ. N’i y’o kɛ, i bena se ka koo tigitigiw fɔ i ka delili la minw bena kalanden nafa (Zab. 141:2). Hanae be Zapɔn. Tuma min na a tun be bibulukalan kɛra, balimamuso dɔ tun be to k’a ka Bibulu kalanfa bila sira. Hanae hakili bele b’o balimamuso ka deliliw la. A ko: “N’ y’a kɔrɔsi ko a be jɛnɲɔgɔnya ɲuman kɛra ni Jehova ye ani n’ tun b’a fɛ ka kɛ komi ale. A tun be n’ tɔgɔ weele a ka deliliw la minkɛ, n’ y’a ye ko n’ koo ka di a ye.”

9. Ka kɛɲɛ ni Zaki 1:19 ye, i be se ka mun lo kɛ walisa ka kɛ bilasirabaga ɲuman ye bibulukalan tuma na?

⁹ Kalanfa dɛmɛ bibulukalan tuma na. Balimamuso Omamuyovbi ye dan na piyɔniye ye Nizeriya ani a ko: “Bilasirabaga ɲuman be lamɛnni kɛ koɲuman bibulukalan tuma na. A b’a daa don baro la koɲuman, nka a tɛ kuma kojugu. A b’a lɔn ko Bibulu kalanfa lo be kalan ɲɛminɛ.” N’o lo, tuma juman lo i be se k’i daa don baro la ani i be se ka mun lo fɔ? (Talenw 25:11). Ni kalanfa ni kalanden be kumana, u lamɛn koɲuman (Zaki 1:19 kalan). O la, i bena se k’i daa don baro la wagati bɛnnin na. Nka i ka ɲi ka miiri ka sɔrɔ ka kuma. Ɲɛyirali fɛ, i man ɲi ka kuma kojugu, ka kuma tigɛ kalanfa daa wala k’a daminɛ ka kuma koo wɛrɛ la. Nka aw be kumana barokun min kan, i be se ka kalanden dɛmɛ ka koo dɔ faamu o koo la. I be se k’o kɛ, i kɛtɔ ka koo dennin dɔ lakali, ka ɲɛyirali dɔ ta wala ka ɲiningali dɔ kɛ. Tuma dɔw la, i be se k’a ye ko fɛɛn t’i fɛ k’a fɔ. Nka, n’i be kalanden tando ani k’a yira ko i b’i mako don a la, i bena se k’a dɛmɛ koɲuman a ka ɲɛtaga kɛ.

10. N’i y’i ka koo dɔ lakali kalanden ye, o be se k’a nafa cogo di?

¹⁰ I ka koo dɔ lakali kalanden ye. N’a bɛnnin lo, i be se k’a ɲɛfɔ kalanden ye i ye tiɲɛn lɔn cogo min na, i ye min kɛ ka see sɔrɔ gwɛlɛya dɔ kan wala Jehova y’i dɛmɛ cogo min na (Zab. 78:4, 7). N’a sɔrɔ kalanden mako b’a la k’o koo ɲɔgɔn lo mɛn. O be se k’a ka limaniya barika bonya ani k’a jija a ka to ka ɲɛtaga kɛ ani ka batize. N’a sɔrɔ o be se k’a dɛmɛ fana ka see sɔrɔ gwɛlɛya dɔ kan (1 Piyɛri 5:9). Gabriel be Berezil jamana na ani sisan piyɔniye lo. A hakili b’a la fɛɛn min y’a  dɛmɛ a ka bibulukalan tuma na. A ko: “Tuma min na n’ y’a mɛn koo minw ye balimaw sɔrɔ, o ye dɛmɛ k’a faamu ko Jehova b’a lɔn gwɛlɛya minw b’an kan. N’olu sera k’u ka gwɛlɛyaw muɲu, o kɔrɔ ko ne fana be se.”

11-12. Mun na an ka ɲi ka Bibulu kalanden bisimila ni dusudiya ye lajɛnw na?

¹¹ Walisa Bibulu kalanden ka ɲɛtaga kɛ ani ka batize, a ka ɲi ka to ka na kafo ka lajɛnw na ani k’a ɲini ka nafa sɔrɔ u la (Eburuw 10:24, 25). Siga t’a la, a ka kalanfa bena a weele ka na lajɛn na. N’a nana, an kelen kelen bɛɛ be se k’a jija walisa a ka to ka na lajɛnw na. An be se k’o kɛ cogo tigitigi jumanw na?

¹² Kalanden bisimila ni dusudiya ye (Ɔrɔm. 15:7). N’an be kalanden bisimila koɲuman lajɛnw na, n’a sɔrɔ o bena a lasun a be to ka na. Kana a niin degun, nka, a fo ni dusudiya ye ani a yira balima tɔɔw la. Baro kɛ n’a ye sabu a be se ka kɛ ko a ka kalanfa ma na fɔlɔ wala a be baara dɔ kɛra Masaya Boon na. Kalanden lamɛn koɲuman ani i mako don a la kosɔbɛ. N’i y’a bisimila ni dusudiya ye, o be se ka nɔɔ juman lo to a kan? An ka Dmitrii ka koo lajɛ. A batizera a saan damanin ye nin ye ani sisan kɔrɔsigi ciden lo. A miirila a ka lajɛn fɔlɔ koo la ani a ko: “N’ tun lɔnin be Masaya Boon daa la ani n’ hakili tun siginin tɛ. Balimacɛ dɔ ye n’ ye ani a ye n’ minɛ ni ɲumanya ye. A donna ni n’ ye Masaya Boon na. A barila n’ na k’a ye ko mɔgɔ caaman gwɛrɛla ka n’ fo. O diyara n’ ye kosɔbɛ fɔɔ n’ tun b’a fɛ lajɛnw ka kɛ loon bɛɛ lɔgɔkun kɔnɔ. N’ ye min ye o yɔrɔ la, n’ tun ma deli k’o ɲɔgɔn ye yɔrɔ si.”

13. I ka kɛwale ɲuman be se ka nɔɔ juman lo to Bibulu kalanden kan?

¹³ Kɛ ɲɛyirali ɲuman ye. I ka kɛwale ɲuman be se ka kalanden dɛmɛ a ka la a la ko a ye tiɲɛn diinan sɔrɔ (Mat. 5:16). Vitalii be Mɔldavi ani piyɔniye lo sisan. A ko: “N’ ye kafoden tɔɔw ka ɲɛnamaya kɛcogo, u miiricogo ani u ka kokɛcogow kɔrɔsi. O y’a to n’ lara a la ko Jehova Seerew ye tiɲɛn diinan lo ye.”

14. I ka ɲɛyirali ɲuman be se ka mɔgɔ dɔ dɛmɛ cogo di a ka to ka ɲɛtaga kɛ?

¹⁴ Walisa kalanden ka batɛmu saratiw dafa, a be min kalanna, a ka ɲi k’o sira tagama. O man nɔgɔ tuma bɛɛ. Nka, n’a y’a ye Bibulu ka sariyakolow b’i nafara cogo min na, o be se k’a lasun k’i ladegi (1 Kor. 11:1). An kumana Hanae min koo la, ale ko: “N’ tun be min kalanna, balimaw tun b’o sira tagamana ka ban. N’ y’a faamu n’ be se ka tɔɔw jija cogo min na, ka yafa u ma ani k’a yira ko n’ be u  kanu. Balimaw tun be tɔɔw tɔgɔ ɲuman fɔ tuma bɛɛ. N’ tun b’a fɛ k’u ladegi.”

15. Talenw 27:17 b’an dɛmɛ cogo di k’a faamu ko an ka ɲi ka teriya kɛ ni Bibulu kalanden ye n’a be to ka na lajɛnw na?

¹⁵ Teriya kɛ ni Bibulu kalanden ye. Ni kalanden tora ka na lajɛnw na, to k’i mako don a la kosɔbɛ (Filip. 2:4). I be se k’a ɲini k’a lɔn koɲuman. I be se k’a fɔ a ye ko i ninsɔn ka di k’a ye a ye ɲɛtaga minw kɛ. I be se fana k’a ɲininga a ka bibulukalan, a somɔgɔw ani a ka baara koo la. Nka, kana ɲiningaliw kɛ minw bena maloya bila a la. O barow be se k’a to aw b’aw magwɛrɛ ɲɔgɔn na kosɔbɛ. N’i kɛra Bibulu kalanden teri ye, i bena se k’a dɛmɛ a ka ɲɛtaga kɛ ani ka batize (Talenw 27:17 kalan). Hanae ye kudayi piyɔniye ye sisan. Tuma min na a y’a daminɛ ka taga lajɛnw na, a miirila o la ani a ko: “N’ ye teriw sɔrɔ kafo kɔnɔ minkɛ, n’ tun kɔrɔtɔnin lo lajɛnw wagati ka se ani n’ tun be taga u la hali ni n’ tun sɛgɛnnin lo. A tun ka di n’ ye ka wagati kɛ ni n’ teri kuraw ye. O ye n’ dɛmɛ ka n’ ka teriya sa ni tɔɔw ye minw tɛ Jehova batobagaw ye. N’ tun b’a fɛ ka n’ magwɛrɛ kosɔbɛ Jehova ni balimaw na. O kama, n’ y’a latigɛ ka batize.”

16. I be se ka koo wɛrɛ juman lo kɛ walisa a ka diya Bibulu kalanden ye ka kɛ kafo kɔnɔ?

¹⁶ Ni kalanden tora ka ɲɛtaga kɛ ani ka yɛlɛmaniw kɛ, a dɛmɛ a k’a ye ko a ye kafoden dɔ ye. Walisa k’o kɛ, i be se k’a weele ka wagati kɛ n’a ye i ka soo (Eburuw 13:2). Denis be Mɔldavi. A hakili b’a la tuma min na a tun be bibulukalan kɛra ani a ko: “Tuma caaman na, balimaw tun be ne ni n’ muso weele u ka soo walisa ka wagati kɛ n’an ye. U y’a fɔ an ye Jehova y’u dɛmɛ cogo min na. O kumaw y’an jija. O koow y’an dɛmɛ ka la a la ko an b’a fɛ ka Jehova sago kɛ ani ko an bena ninsɔndiyaba sɔrɔ o la.” Ni kalanden kɛra weleweledala ye, i be se k’a ɲini a fɛ aw ka waajuli kɛ ɲɔgɔn fɛ. Balimacɛ Diego be Berezil. A ko: “Balima caaman tun b’a ɲini n’ fɛ an ka waajuli kɛ ɲɔgɔn fɛ. O kɛra sababu ɲuman ye yɛrɛ le k’u lɔn koɲuman! O ye n’ dɛmɛ fana ka koo caaman lɔn ani n’ y’a ye ko n’ magwɛrɛnin lo kosɔbɛ Jehova ni Yezu la.”

17. Diinan mɔgɔkɔrɔw be se ka Bibulu kalandenw dɛmɛ cogo di?

¹⁷ Wagati kunmabɔ Bibulu kalandenw ye. Diinan mɔgɔkɔrɔw, n’aw b’a yira kalandenw na ko aw b’u kanu ani ko aw b’aw janto u la, o be se k’u dɛmɛ u ka ɲɛtaga kɛ ani ka batize. N’i ye diinan mɔgɔkɔrɔ ye, i be se ka kuma ni kalandenw ye tuma o tuma lajɛnw na. U  bena a ye ko i b’i janto u la, n’i b’i hakili to u tɔgɔ la sanko n’u y’a daminɛ ka lakalitaw kɛ. Ni balima dɔ be bibulukalan kɛra ni mɔgɔ dɔ ye, i be se ka wagati kunmabɔ walisa k’a bila sira. I be se ka Bibulu kalanden dɛmɛ cogo dɔ la, i yɛrɛ ma miiri min na. Balimamuso Jackie ye piyɔniye ye ani a be Nizeriya. A ko: “Kalanden caaman kabakoyara k’a mɛn ko balimacɛ min tun ye n’ bila sira ka na u ka kalan kɛ, diinan mɔgɔkɔrɔ lo. Bibulu kalanden dɔ y’a fɔ ko: ‘N’ ka pastɛricɛ tɛna o kɛ abada. Nafolotigi minw be wari di a ma, a be taga bɔ olu lo ye.’ ” O kalanden be na lajɛnw na sisan.

18. Min fɔra Kɛwaliw 20:28 kɔnɔ, diinan mɔgɔkɔrɔw be se k’o sira tagama cogo di?

¹⁸ Fɔrɔmasɔn di Bibulu kalanfaw ma ani u jija. Diinan mɔgɔkɔrɔw, kunkanbaaraba kalifara aw ma. Aw ka ɲi ka weleweledalaw dɛmɛ u ka kɛ waajulikɛlaw ni kalanfa ɲumanw ye (Kɛwaliw 20:28 kalan). Ni dɔ be maloya ka bibulukalan ɲɛminɛ i ɲɛɛ na, a fɔ a ye ko n’a b’a fɛ, i bena o kalan kɛ. Jackie y’a fɔ fana ko: “Tuma o tuma, diinan mɔgɔkɔrɔw be n’ ɲininga n’ ka Bibulu kalandenw koo la. N’a ka gwɛlɛ n’ ma ka bibulukalan dɔ kɛ, u be ladili nafamanw di n’ ma.” Diinan mɔgɔkɔrɔw be se ka Bibulu kalanfaw jija kosɔbɛ walisa u fari kana faga (1 Tes. 5:11). Jackie y’a fɔ tugun ko: “Ni diinan mɔgɔkɔrɔw be n’ jija ani k’a fɔ n’ ye ko n’ be baaraba min kɛra o ka di u ye, o be n’ dusu diya kosɔbɛ. O kumaw be barika don n’ na i ko jisuman be mɔgɔ lafiya cogo min na funteniba wagati la. U ka kuma ɲumanw b’a to n’ b’a ye ko n’ be n’ ka Bibulu kalandenw dɛmɛna koɲuman ani o be dɔ fara n’ ka ninsɔndiya kan.”—Talenw 25:25.

19. An kelen kelen bɛɛ be se ka ninsɔndiya juman lo sɔrɔ?

¹⁹ Hali n’an tɛ ni bibulukalan dɔ ye sisan, an be se ka mɔgɔ dɔ dɛmɛ a ka ɲɛtaga kɛ Alako ta fan fɛ. An be se ka kalanfa dɛmɛ, an kɛtɔ k’an yɛrɛ labɛn koɲuman ani k’an daa don baro la bibulukalan tuma na. Nka, an man ɲi ka kuma kojugu. Ni Bibulu kalandenw be na lajɛnw na, an be se ka teriya kɛ n’u ye ani ka kɛ ɲɛyirali ɲumanw ye u fɛ. Diinan mɔgɔkɔrɔw be se ka kalandenw jija, u kɛtɔ ka wagati kunmabɔ u ye. U be se ka Bibulu kalanfaw fana jija n’u be fɔrɔmasɔn di u ma ani n’u b’u tando. K’a lɔn ko an be se ka koo dɔ kɛ, hali ni koo dennin lo walisa ka mɔgɔ dɔ dɛmɛ a ka an sankolola Faa Jehova kanu ani k’a sago kɛ, o b’an ninsɔndiya yɛrɛ le!