1. Ka kɛɲɛ ni Matiyo 24:9 ye, ni duniɲamɔgɔw b’an kɔniya, mun na o man ɲi ka bari an na?

JEHOVA y’an dan walisa an ka mɔgɔ tɔɔw kanu ani olu fana k’an kanu. O kama ni mɔgɔ dɔ b’an kɔniya, o b’an dusu kasi ani n’a sɔrɔ o yɛrɛ be siranya bila an na. Ɲɛyirali fɛ, balimamuso dɔ tɔgɔ ko Georgina ani a be Erɔpu mara la. A ko: “Tuma min na n’ tun be ni saan 14 ye, n’ bamuso tun be n’ kɔniya sabu n’ be Jehova sago kɛ. O ye n’ dusu kasi kosɔbɛ ani n’ tun b’a jati ko n’ be n’ kelen na. N’ y’a daminɛ k’a miiri fana ko n’a sɔrɔ n’ tɛ mɔgɔ ɲuman ye.” * Balimacɛ Danylo y’a sɛbɛ ko: “Sɔrɔdasiw ye n’ bugɔ, ka n’ nɛni ani k’a fɔ ko u bena koo jugu kɛ n’ na sabu n’ ye Jehova Seere ye. O ye siranya ni maloya bila n’ na.” Ni mɔgɔw b’an kɔniya, o b’an dusu kasi kosɔbɛ. Nka, o tɛ bari an na sabu Yezu tun kɔnna k’a fɔ ko u bena an kɔniya.—Matiyo 24:9 kalan.

2-3. Mun na mɔgɔw be Yezu ka kalandenw kɔniya?

² Mun na mɔgɔw be Yezu ka kalandenw kɔniya? Sabu i ko Yezu, an “te diɲɛ ta ye.” (Zan 15:17-19). O kama, hali n’an be faamanw bonya, an t’u bato. Fɛɛn minw y’u ka kuntigiya tagamasiɲɛ ye, an t’olu fana bato. An be Jehova kelenpe lo bato. Joo min b’a fɛ ka adamadenw mara, an b’o lafasa. Nka Sutana n’a kɔmɔgɔw sɔnnin tɛ a ma ko joo be Ala lo fɛ ka kuntigiya kɛ an kun na (Zɛnɛzi 3:1-5, 15). An be waajuli kɛ ko Ala ka Masaya kelenpe lo bena adamadenw ka gwɛlɛyaw ɲɛnabɔ ani ko yanni dɔɔni, a bena Ala juguw bɛɛ halaki (Dan. 2:44; Yir. 19:19-21). O ye kibaro diiman ye  mɔgɔ majigininw fɛ, nka o ye kibaro goman ye mɔgɔ juguw fɛ.—Zab. 37:10, 11.

³ Mɔgɔw b’an kɔniya fana sabu an be Ala ka sariya tilenninw labato. O sariyaw ni duniɲamɔgɔw ta tɛ kelen ye fewu! Ɲɛyirali fɛ, Ala ye Sodɔmu ni Gɔmɔri halaki kakalayako minw kosɔn, mɔgɔ caaman t’a miiri k’o ye koo jugu ye (Zude 7). Komi an be Bibulu ka sariyaw labato ka ɲɛsin kakalayako ma, mɔgɔ caaman b’an lɔgɔbɔ ani u b’a miiri ko an ka koo ka gwɛlɛ kojugu!—1 Piyɛri 4:3, 4.

4. Ni mɔgɔw b’an kɔniya, jogo jumanw lo b’an dɛmɛ k’o koo muɲu?

⁴ Ni mɔgɔw b’an kɔniya ani n’u b’an nɛni, mun lo be se k’an dɛmɛ k’o muɲu? An ka ɲi ka la a la kosɔbɛ ko Jehova bena an dɛmɛ. Lanaya wala limaniya be komi nɛgɛkunbɛnnan ani a be se ka “Sutana ka biɲɛ tasumaman bɛɛ faga.” (Efɛz. 6:16). Nka limaniya dama tɛ bɔri kɛ. An ka ɲi ka kɛ ni kanuya fana ye. Mun na do? Sabu kanuya be mɔgɔ min na, o tigi “dusu te bɔ.” A be sabali fɛɛn bɛɛ la ani a be koo jugu bɛɛ muɲu (1 Kor. 13:4-7, 13). N’an be Jehova, an kerecɛnɲɔgɔnw ani hali an juguw yɛrɛ kanu, o b’an dɛmɛ cogo di ka kɔniya muɲu? An k’o lajɛ sisan.

5. Yezu sera ka mun lo kɛ sabu a tun b’a Faa kanu?

⁵ Yezu ye suu laban min kɛ n’a ka kalanden kantigiw ye, a y’a fɔ u ye ko: “Ne be n Faa kanu, o la, a ye min fɔ ne ye, ne b’o le kɛ.” (Zan 14:31). Komi Yezu tun be Jehova kanu, a sera ka kɔrɔbɔlibaw muɲu. N’an fana be Jehova kanu, an bena se k’o kɛ.

6. Ka kɛɲɛ ni Ɔrɔmukaw 5:3-5 ka fɔta ye, Jehova sagokɛlaw be duniɲamɔgɔw ka kɔniya jati cogo di?

⁶ Komi Jehova sagokɛlaw b’a kanu, o kanuya y’u dɛmɛ sanga ni wagati bɛɛ ka kɔrɔbɔliw muɲu. Ɲɛyirali fɛ, Yahutuw ka kititigɛsoba mɔgɔw tun y’a fɔ cidenw ye ko u kana waajuli kɛ tugun. Nka cidenw tun be Ala kanu minkɛ, o y’u lasun ka “Ala sago” kɛ sanni ka “adamadenw ta kɛ.” (Kɛw. 5:29; 1 Zan 5:3). O kanuya barikaman b’an balimaw dɛmɛ u ka to kantigiya la hali k’a sɔrɔ gofɛrɛnɛman setigi farimanw b’u kɛlɛla. Duniɲamɔgɔw b’an kɔniya, nka an t’a to o k’an fari faga. An yɛrɛ b’a jati ko nɛɛma lo an fɛ k’o kɔniya muɲu.—Kɛw. 5:41; Ɔrɔmukaw 5:3-5 kalan.

7. N’an somɔgɔw b’an kɛlɛla, an ka ɲi k’o koo ta cogo di?

⁷ Koo minw muɲu ka gwɛlɛ kosɔbɛ, u la dɔ ye n’an somɔgɔw wulila an kama. N’an y’a daminɛ k’an mako don tiɲɛn diinan na, an somɔgɔ dɔw be se k’a miiri ko mɔgɔw b’an lafilila le. Dɔw be se k’a miiri ko an kuun wulila (Mariki 3:21 lajɛ). U yɛrɛ be se ka fariya an ma. O man ɲi ka bari an na. Yezu y’a fɔ ko: “I ka mɔgɔw bena kɛ i juguw ye.” (Mat. 10:36). Nka, an somɔgɔw mana an minɛ cogo o cogo, an t’u jati an juguw ye. Ni dɔ tora ka fara an ka kanuya barika kan Jehova koo la, dɔ be fara an ka kanuya kan mɔgɔw koo la (Mat. 22: 37-39). Nka, an tɛna ban abada ka Bibulu ka sariyaw labato walisa k’an koo diya mɔgɔ dɔ ye.

8-9. Mun lo ye balimamuso dɔ dɛmɛ ka lɔ kelen kan kɔrɔbɔliba bɛɛ n’a ta?

⁸ Georgina min kofɔra ka tɛmɛ, ale sera ka lɔ kelen kan hali k’a sɔrɔ a bamuso tun b’a kɛlɛla kosɔbɛ. A y’a fɔ ko: “Ne ni n’ bamuso y’a daminɛ ka bibulukalan kɛ ni Jehova Seerew ye. Nka kalo wɔɔrɔ o kɔ, tuma min na n’ tun b’a fɛ ka taga lajɛnw na, n’ bamuso y’a daminɛ ka  n’ kɛlɛ. N’ bɔra a kala ma ko a tun be kumaɲɔgɔnya kɛ ni mɔgɔw ye minw be murutili kalanw kɛ ani a tun be to k’u ka ngalon kalanw fɔ n’ ye. A tun be to ka n’ nɛni, ka n’ kunsigi sama, ka n’ kaan dɛrɛ ani ka n’ ka sɛbɛw cɛ ka fili. Tuma min na n’ ye saan 15 sɔrɔ, n’ batizera. N’ bamuso tun b’a ɲinina ka n’ bali ka Jehova sago kɛ. O kama, a tagara n’ bila yɔrɔ dɔ la. O yɔrɔ la, n’ tun be ni sungurunin wɛrɛw ye, u dɔw tun be dɔrɔgi ta ani ka fariyakow kɛ. Mɔgɔ min ka ɲi k’i kanu ani k’a janto i la, n’o tigi yɛrɛ lo b’i kɛlɛ, o muɲu ka gwɛlɛ kosɔbɛ.”

⁹ Georgina y’o koo muɲu cogo di? A ko: “Loon min na n’ bamuso wulila n’ kama, o y’a sɔrɔ n’ tun ye Bibulu kuru bɛɛ kalan ka ban a ma mɛɛn. N’ tun lanin b’a la kosɔbɛ ko n’ ye tiɲɛn diinan sɔrɔ ani n’ tun magwɛrɛnin lo kosɔbɛ Jehova la. N’ tun b’a deli tuma o tuma ani a tun be n’ lamɛn. N’ bamuso tun tagara n’ bila yɔrɔ min na, ka n’ to o yɔrɔ la, balimamuso dɔ ye n’ weele a ka soo ani an ye Bibulu sɛgɛsɛgɛ ɲɔgɔn fɛ. O wagati la, balimaw ye n’ barika bonya Masaya Boon na. U ye n’ kɛ u ka denbaya mɔgɔ dɔ ye. N’ y’a faamu ko mɔgɔ o mɔgɔ mana wuli an kama, Jehova barika ka bon n’o tigi ta ye.”

10. An lanin b’a la ko an ka Ala Jehova bena mun lo kɛ tuma bɛɛ?

¹⁰ Ciden Pol y’a sɛbɛ ko foyi tɛ se “k’an faran ka bɔ Ala ka kanuya la min yirala an Matigi Yezu Krista sababu la.” (Ɔrɔm. 8:38, 39). An be se ka tɔɔrɔ tuma dɔw la. Nka, an ka la a la ko Jehova bena kɛ n’an ye tuma bɛɛ walisa k’an dusu saalo ani k’an barika bonya. I ko Georgina ka koo b’a yira cogo min na, Jehova be tɛmɛ an balimaw fana fɛ k’an dɛmɛ.

11. Yezu ye kanuya min kofɔ Zan 15:12, 13 kɔnɔ, o y’a ka kalandenw dɛmɛ cogo di? Ɲɛyirali dɔ fɔ.

¹¹ Yezu ka suu laban na, a y’a ka kalandenw hakili jigi ko u ka ɲɔgɔn kanu (Zan 15:12, 13 kalan). Kanuya min be mɔgɔ lasun k’a yɛrɛ saraka tɔɔw kosɔn, Yezu tun b’a lɔn k’o tun bena a ka kalandenw dɛmɛ u kaan bɛnnin ka to ani u ka se ka duniɲamɔgɔw ka kɔniya muɲu. An ka Tesaloniki kafo ka koo lajɛ. Kabi o kafo juu sigituma na, mɔgɔw tun b’o kafodenw tɔɔrɔ. O bɛɛ n’a ta, o  balimaw kɛra ɲɛyirali ɲumanw ye sabu u tora kantigiya la ani u tun be ɲɔgɔn kanu (1 Tes. 1:3, 6, 7). Pol y’u jija ko u ka to ka ɲɔgɔn kanu ani ko u yɛrɛ ka “dɔ fara” o kanuya kan (1 Tes. 4:9, 10). O kanuya tun bena u lasun ka mɔgɔ dusukasininw dusu saalo ani ka barikantanw dɛmɛ (1 Tes. 5:14). U ye Pol ka ladiliw sira tagama. Mun na an b’o fɔ? Sabu saan kelen ɲɔgɔn o kɔ, Pol y’a ka bataki filanan sɛbɛ ani a y’a fɔ u ye ko: “Kanuya min be aw ni ɲɔgɔn cɛ, o be bonyana ka taga ɲa.” (2 Tes. 1:3-5). O kanuya y’u dɛmɛ ka gwɛlɛyaw ni kɔrɔbɔliw muɲu.

12. Kɛlɛ tuma na jamana dɔ la, balimaw y’a yira cogo di ko u be ɲɔgɔn kanu?

¹² Danylo min kofɔra ka tɛmɛ, an k’ale n’a muso ka koo lajɛ. Tuma min na kɛlɛ sera u ka dugu la, u tora ka taga lajɛnw na, k’u seko bɛɛ kɛ waajuli la, ani dumunifɛn minw tun b’u fɛ, u tun b’o tilan n’u balimaw ye. Loon dɔ, sɔrɔdasiw nana Danylo ka soo n’u ka marifaw ye u bolo. Danylo ko: “U ko n’ ka Jehova sago kɛli dabila. N’ banna minkɛ, u ye n’ bugɔ, u ko u bena n’ ci ni marifa ye ani u tora ka ciri kɛ n’ kuun sanfɛ. Sanni u ka taga, u ye n’ bagabaga ko u bena segi ka na ani ko n’u nana, u bena n’ muso waajibiya ka la n’a ye. Nka, balimaw teliyara k’an bila ka taga dugu wɛrɛ la tɛrɛn kɔnɔ. N’ tɛna ɲinɛ abada o balima kanulenw ka kanuya kɔ. An senin o dugu la, o yɔrɔ balimaw ye dumuni di an ma ani u ye n’ dɛmɛ ka baara ni boon sɔrɔ! O kɛra sababu ye balima minw bolila ka bɔ kɛlɛyɔrɔw la, an sera ka siyɔrɔ di u ma.” O koow ɲɔgɔn b’a yira ko balimaya kanuya be se k’an dɛmɛ ka kɔniya muɲu.

13. Hakili senu b’an dɛmɛ cogo di ka muɲu Jehova batoli la hali ni mɔgɔw b’an kɔniya?

¹³ Yezu y’a fɔ a ka kalandenw ye ko u ka u juguw kanu (Mat. 5:44, 45). Yala o ka nɔgɔ wa? Ayi dɛ! Nka Ala ka hakili senu barika la o be se ka kɛ. Hakili senu deen faan dɔw ye kanuya, muɲuli, ɲumanya, sabali ani yɛrɛminɛ ye (Gal. 5:22, 23). O jogow b’an dɛmɛ ka kɔniya muɲu. An kɛlɛbaga caaman y’u sɔɔn yɛlɛma sabu u furucɛ, furumuso, deen wala u sigiɲɔgɔn dɔ y’a yira ko a be n’o jogow ye. U caaman yɛrɛ kɛra an  balima kanulenw ye. O la, mɔgɔ minw b’i kɔniya sabu i ye Jehova sagokɛla ye, n’a ka gwɛlɛ i ma k’u kanu, hakili senu deli Ala fɛ (Luka 11:13). Ani la a la kosɔbɛ ko ka mɛnni kɛ Ala fɛ, tuma bɛɛ, o lo ɲɔgɔn tɛ yen.—Talenw 3:5-7.

14-15. Ɔrɔmukaw 12:17-21 ye Yasmeen dɛmɛ cogo di k’a yira ko a b’a cɛɛ kanu hali k’a sɔrɔ a cɛɛ tun b’a kɛlɛ kojugu?

¹⁴ An ka balimamuso dɔ ka koo lajɛ min tɔgɔ ko Yasmeen. Tuma min na a kɛra Jehova Seere ye, a cɛɛ y’a miiri ko u y’a lafili le ani a y’a ɲini k’a bali a ka Ala sago kɛ. A y’a nɛni ani a y’a fɔ a somɔgɔw, legilizi ɲɛmɔgɔ ni subaga dɔ ye ko u k’a bagabaga. A y’a jalaki ko a y’a ka luu ci. A cɛɛ yɛrɛ delila ka na balimaw nɛni lajɛn dɔ la! Tuma caaman na, Yasmeen tun be kasi sabu a cɛɛ tun t’a minɛ ka ɲɛ.

¹⁵ Masaya Boon na, Yasmeen balimaw y’a dusu saalo ani k’a barika bonya. Diinan mɔgɔkɔrɔw y’a jija ko min fɔra Ɔrɔmukaw 12:17-21 kɔnɔ, a k’o sira tagama. (A kalan.) Yasmeen ko: “O tun man nɔgɔ. Nka, n’ ye Jehova deli a ka n’ dɛmɛ ani n’ ye n’ seko bɛɛ kɛ ka Bibulu ka ladiliw sira tagama. O la, ni n’ cɛɛ tun ye ɲamaɲama fili gwabugu la, n’ tun b’a filan. N’a tun ye n’ nɛni, n’ tun b’a jaabi ni ɲumanya ye. N’a tun man kɛnɛ fana, n’ tun be n’ janto a la.”

16-17. Yasmeen ka koo y’i dɛmɛ ka mun lo faamu?

¹⁶ Jehova ye Yasmeen duga sabu a y’a yira ko a b’a cɛɛ kanu. Yasmeen ko: “N’ cɛɛ y’a daminɛ ka la n’ na sabu a b’a lɔn ko n’ be tiɲɛn fɔ tuma bɛɛ. A y’a daminɛ ka n’ lamɛn ni bonya ye n’an be kuma diinan koo la ani a sɔnna ka bɛɛn sigi ni n’ ye luu kɔnɔ. Sisan, a be n’ jija n’ ka taga lajɛnw na. Ne ni n’ cɛɛ kaan bɛnnin lo sisan ani hɛɛrɛ b’an ka soo kɔnɔ. N’ jigi b’a la ko loon dɔ, n’ cɛɛ bena sɔn tiɲɛn diinan ma ani ka fara n’ kan an be Jehova sago kɛ ɲɔgɔn fɛ.”

¹⁷ Yasmeen ka koo b’a yira ko kanuya “be koo bɛɛ yafa, . . . a be la koo bɛɛ la, a be koo bɛɛ muɲu.” (1 Kor. 13:4, 7). Kɔniya barika ka bon ani a be tiɲɛnin kɛ. Nka kanuya barika ka bon ka tɛmɛ a kan. N’an be tɔɔw kanu, o be se k’a to u b’u ka miiriya yɛlɛma an koo la. N’an b’o kɛ, o ka di Jehova ye fana. Nka, hali n’an kɛlɛbagaw tora k’an kɔniya, an bele be se ka to ninsɔndiya la. Cogo di do?

18. Mun na an be se ka ninsɔndiya hali n’u b’an kɔniya?

¹⁸ Yezu ko: “Ni mɔgɔw b’aw kɔniya . . . aw dagamunin lo.” (Luka 6:22). An t’a fɛ u k’an kɔniya. N’u b’an kɔrɔbɔ an ka limaniya kosɔn, o man di an ye fana. O la, mun na an be se ka ninsɔndiya hali n’u b’an kɔniya? An ka kuun saba lajɛ. A fɔlɔ, n’an be kɔniya muɲu, an be Ala dusu diya (1 Piyɛri 4:13, 14). A filanan, nafa be kɛ an ka limaniya la ani a be sabati (1 Piyɛri 1:7). Ani a sabanan, an bena duga nafamanba sɔrɔ, o min ye ɲɛnamaya banbali ye.—Ɔrɔm. 2:6, 7.

19. Mun na cidenw ninsɔn tun ka di k’a sɔrɔ u y’u bugɔ?

¹⁹ Yezu tun ye ninsɔndiya min kofɔ, a ka cidenw y’o sɔrɔ dɔɔni a suu kununin kɔ. Tuma min na u ye cidenw bugɔ ani k’a fɔ u ye k’u kana waajuli kɛ tugun, u ninsɔn diyara. Mun na do? U ninsɔn diyara “bari Ala ye boɲa la u kan min kɛra u lɔgɔbɔko ye Yezu tɔgɔ kosɔn.” (Kɛw. 5:40-42). U tun be ni kanuya min ye u Matigi koo la, o barika tun ka bon ka tɛmɛ u juguw ɲɛsiran kan. Walisa k’o kanuya yira, u ma kibaro diiman fɔli dabila. Bi, an balima caaman be Jehova batora kantigiya la gwɛlɛyaw bɛɛ n’a ta. U lanin b’a la ko u ye baara min kɛ ani u ye kanuya min yira Jehova tɔgɔ koo la, a tɛna ɲinɛ o kɔ.—Eburuw 6:10.

20. An bena mun lo lajɛ barokun nata la?

²⁰ Mɔgɔw bena to k’an kɔniya fɔɔ duniɲa nin laban na (Zan 15:19). Nka, an man ɲi ka siran. I ko an bena a ye barokun nata la cogo min na, Jehova bena a sagokɛla kantigiw ‘jaa gwɛlɛya ani k’u tanga.’ (2 Tes. 3:3). O la, an ka to ka Jehova, an balimaw ani hali an juguw yɛrɛ kanu. N’an y’o ladili sira tagama, an kaan bɛnnin bena to ani an ka limaniya barika bena bonya. Ka fara o kan, an bena nɔɔrɔ la Jehova kan ani an bena a yira ko kanuya barika ka bon ni kɔniya ye fɔɔ ka taga ka na.