1, 2. N’an tora ka ɲɛtaga kɛ Alako ta fan fɛ, an bena se ka mun lo kɛ? Ɲɛyirali dɔ fɔ.

MIIRI k’a filɛ, u ye kado di deen dɔ ma ani a bangebagaw ko a k’a fɔ “i ni ce.” A bangebagaw ko a ka min fɔ, a y’o fɔ a kunfɛ. Nka deen bonyatɔ, a y’a daminɛ k’a faamu fɛɛn min kama a bangebagaw b’a miiri ko a kɔrɔtanin lo ka mɔgɔ waleɲuman lɔn. Sisan, ale yɛrɛ lo be sin ka mɔgɔw waleɲuman lɔn sabu a y’o degi a wolobagaw fɛ.

² O cogo kelen na, tuma min na an y’a daminɛ ka Jehova lɔn, an y’a faamu ko a kɔrɔtanin lo an k’a ka sariya jɔnjɔnw sira tagama. Nka komi an tora ka ɲɛtaga kɛ Alako ta fan fɛ, an ye koo caaman lɔn Jehova koo la: min ka di a ye, min man di a ye ani a be koow jati cogo min na. N’an be to ka koow latigɛ ani ka koow kɛ ka kɛɲɛ ni Jehova ka miiriya ye, an bena se ka koow jati i ko ale.

3. Mun na a man nɔgɔ tuma dɔ la ka koow jati i ko Jehova?

³ A ka di an ye k’a ɲini ka koow jati i ko Jehova. Nka, a man nɔgɔ tuma dɔw la sabu an ye mɔgɔ dafabaliw ye. Ɲɛyirali fɛ, an b’a lɔn Jehova be min miiri koo nunu na: cɛnimusokow, nafolo kanuya, waajuli baara, joliko ani a ɲɔgɔnnaw. Nka,  n’a sɔrɔ a ka gwɛlɛ an fɛ k’a faamu fɛɛn min kama a b’o koow jati o cogo la. An be se ka mun lo kɛ walisa dɔɔni dɔɔni, an ka se ka koow jati i ko Jehova? O be se k’an dɛmɛ cogo di ka desizɔn ɲumanw ta sisan ani sini ma?

4. K’an miiricogo yɛlɛma, o kɔrɔ ko di?

⁴ Ɔrɔmukaw 12:2 kalan. O vɛrise kɔnɔ, ciden Pol b’a yira an ka ɲi ka min kɛ walisa ka koow jati i ko Jehova. A ko an ‘kana an yɛrɛ kɛɲɛ ni bii diɲɛ ye.’ An y’a ye barokun tɛmɛnin na k’o kɔrɔ ko an ka ɲi ka ban duniɲamɔgɔw ka miiriyaw n’u ka kokɛcogow la. Pol y’a yira fana ko an ka ɲi k’an miiricogo yɛlɛma. O kɔrɔ ko an ka ɲi ka basigi Bibulu kan ka kelenna kalan kɛ, k’a ɲini k’a lɔn Ala be koow jati cogo min na ani ka miiri o kan. O kɔ, an b’an jija ka koow jati i ko Ala.

5. Ka kelenna kalan kɛ ani ka fɛɛn dɔ kalan sanfɛ sanfɛ, mun na o tɛ kelen ye?

⁵ Ka kelenna kalan kɛ, o be dan na ka fɛɛn dɔ kalan sanfɛ sanfɛ ani ka ɲiningaliw jaabiliw kɔrɔ ci. Kelenna kalan na, an be min kalan, an b’a filɛ o be min yira an na Jehova, a ka kokɛcogow n’a ka miiriya koo la. An b’an jija k’a ɲini k’a faamu fɛɛn min kama Jehova ye koo dɔ daga ani ka koo wɛrɛ haramuya. An b’a filɛ fana an ka ɲi ka yɛlɛma minw don an ka kokɛcogo n’an ka miiricogo la. Tiɲɛn lo ko tuma o tuma n’an be kelenna kalan kɛra, an tɛna jatiminɛ kɛ o koo kelen kelen bɛɛ la. Nka, an ye min kalan, a ka ɲi an ka miiri o kan. An ye wagati min latigɛ kalan kama, an k’o tilancɛ ta k’o kɛ.—Zab 119:97; 1 Tim 4:15.

6. Mun lo be kɛ n’an be miiri Ala ka Kuma kan?

⁶ N’an be Ala ka Kuma kalan tuma o tuma ani ka miiri a kan, kabako dɔ be kɛ. O b’a to an be la a la ko Jehova ka miiriya dafanin lo. A be koow jati cogo min na, an b’a daminɛ k’o faamu ani ka sɔn o ma. O la, an b’an miiricogo yɛlɛma ani dɔɔni dɔɔni, an bena to ka koow jati i ko Jehova.

7, 8. a) Jehova be mun lo miiri bololafɛnw koo la? (Jaaw lajɛ, barokun daminɛ na.) b) N’an be ni Jehova ka miiriya ye bololafɛnw koo la, mun lo bena kɛ an ɲɛnako fɔlɔ ye?

⁷ An ka miiriyaw be nɔɔ to an ka kɛwalew kan (Mariki 7:21-23; Zaki 2:17). An ka ɲɛyirali damanin lajɛ walisa k’o faamu ka ɲɛ. A fɔlɔ ɲɛsinna Yezu woloko ma. Jehova ye Yusufu ni Mariyamu sugandi walisa u k’ale Dencɛ lamɔ, hali k’a sɔrɔ fɛɛn bɛrɛ tun tɛ u bolo. O b’a yira ka gwɛ Jehova be min miiri bololafɛnw koo la (Lev. 12:8; Luka 2:24). Tuma min na Yezu wolola, Mariyamu ye “fani meleke a la k’a la kolokolo kɔnɔ, bari u tun ma yɔrɔ sɔrɔ lonanjigisow kɔnɔ.” (Luka 2:7). Ni Jehova tun b’a fɛ, a tun be se k’a to Yezu ka wolo yɔrɔ cɛɲumanba dɔ la. Nka, a m’o kɛ sabu a tun b’a fɛ Yezu ka lamɔ denbaya dɔ kɔnɔ min be Alakow kɛ a ɲɛnako fɔlɔ ye. O lo tun kɔrɔtanin lo kosɔbɛ Jehova fɛ.

⁸ Yezu woloko b’an dɛmɛ k’a faamu Jehova be bololafɛnw jati cogo min na. Bangebaga dɔw b’a fɛ u deenw kana fɔn foyi la bololafɛnw ta fan fɛ hali n’o bena u ni Jehova ka jɛnɲɔgɔnya nagasi. Nka, a gwɛnin lo ko an be jɛnɲɔgɔnya min kɛ ni Jehova ye, o lo kɔrɔtanin lo a ɲɛɛ kɔrɔ ka tɛmɛ fɛɛn bɛɛ kan. Yala i be ni Jehova  ka miiriya ye o koo la wa? I ka kɛwalew be mun lo yira?—Eburuw 13:5 kalan.

9, 10. I ko Jehova, an be se k’a yira cogo di ko kojuguba lo ka mɔgɔ kunnatiɲɛ?

⁹ Ɲɛyirali filanan: Ka mɔgɔ wɛrɛ kunnatiɲɛ, o kɔrɔ, ka kɛ sababu ye dɔ be jurumu kɛ wala a be tiɲɛn batoli dabila, Jehova be mun lo miiri o la? Yezu y’a fɔ ko: “Denmisɛn minw ye lanaya sɔrɔ, ni mɔgɔ dɔ kɛra sababu ye k’olu dɔ kunna cɛn, yanni a tigi k’o kɛ, ni kabakuru belebeleba tun sirila a kaan na k’a fili kɔgɔji kɔnɔ, o tun ka fisa a ma.” (Mariki 9:42). A gwɛnin lo ko Yezu fɛ, ka mɔgɔ wɛrɛ kunnatiɲɛ, o ye kojuguba lo ye! An do b’a lɔn ko Yezu be i ko a Faa Jehova. An be se ka la a la ko ni mɔgɔ dɔ ye Yezu ka kalanden dɔ kunnatiɲɛ, o man di Jehova ye fewu.—Zan 14:9.

¹⁰ Yala an be ni Jehova ni Yezu ka miiriya ye o koo la wa? An ka kɛwalew be mun lo yira? Ɲɛyirali fɛ, n’a sɔrɔ fanidoncogo wala kuun dilancogo dɔ ka di an ye. Nka, an bena mun lo kɛ n’o be mɔgɔ dɔw kɔnɔ gwan kafo kɔnɔ wala n’o be kakalayako nege don dɔw la? Yala balimaw kanuya bena an lasun an ka ban ka an yɛrɛ diyanyeko dɔw kɛ wa?—1 Tim. 2:9, 10.

11, 12. N’an be koo jugu kɔniya i ko Jehova ani n’an be ni yɛrɛminɛli ye, o b’an latanga cogo di?

¹¹ Ɲɛyirali sabanan: Tilenbaliyakow ka gwo Jehova ye (Ezayi 61:8). Komi an ye mɔgɔ dafabaliw ye, a b’a lɔn ko tuma dɔw la, a ka gwɛlɛ an fɛ ka koo ɲuman kɛ. Nka, a b’a fɛ an ka koo jugu kɔniya i ko ale (Amɔsi 5:15 kalan). Fɛɛn min kama Jehova be koo jugu kɔniya, an ka miiri o la. O bena an dɛmɛ ka koow jati i ko ale ani ka fanga sɔrɔ ka ban koo jugu ma.

¹² N’an be koo jugu kɔniya i ko Jehova, o bena an dɛmɛ fana k’a lɔn ko koo dɔw man ɲi hali ni Ala ka Kuma t’o fɔ ka gwɛ. Ɲɛyirali fɛ, kakalayadɔn dɔ be sanga la duniɲa kɔnɔ bi ani mɔgɔw b’a weele ko lap dancing. Dɔw b’a miiri k’o tɛ cɛnimusoko ye. O kama, u b’a jati k’o tɛ koo jugu ye. * Nka, yala Jehova b’o koo filɛ o cogo lo la wa? An k’a to an hakili la ko koo jugu sifa bɛɛ ka gwo a ye. An ka kɛ ni yɛrɛminɛli ye ani Jehova be koo minw kɔniya, an k’o kɔniya fana. O la, an bena se k’an yɔrɔ janya koo jugu sifa bɛɛ ma.—Ɔrɔm. 12:9.

13. Jehova be koow jati cogo min na, n’an be miiri o la sisan, mun na o bena an dɛmɛ ka desizɔn ɲumanw ta loon nataw la?

¹³ N’an be kelenna kalan kɛra, Jehova be koow jati cogo min na, a ka ɲi an ka miiri o la. O bena an dɛmɛ ka desizɔn ɲumanw ta loon nataw la. O la, n’an ka ɲi ka desizɔn dɔ ta joona joona koo dɔ la, an bena a lɔn an ka ɲi ka min kɛ sabu an kɔnna k’an yɛrɛ labɛn (Talenw 22:3). An ka ɲɛyirali dɔw lajɛ Bibulu kɔnɔ.

14. Yusufu sinna ka ban Potifar muso la. O be mun lo yira an na?

¹⁴ Tuma min na Potifar muso ye Yusufu kanbeletigɛ, a sinna ka ban. O b’a yira ko Jehova be min miiri furuɲɔgɔnw ka kantigiya koo la, Yusufu tun kɔnna ka miiri o la (Zɛnɛzi 39:8, 9 kalan). A y’a fɔ Potifar muso ye ko: “Mun na ne bena kojuguba kɛ ani ka Ala hakɛ ta?” O kumaw b’a yira ko Yusufu  tun be ni Ala ka miiriya ye. Anw do? Ɲɛyirali fɛ, n’an ka baarakɛɲɔgɔn dɔ y’a daminɛ k’an kanbeletigɛ wala k’an sungurutigɛ, an bena mun lo kɛ do? Wala, ni mɔgɔ dɔ ye malobaliya fɛɛn dɔ ci an ma an ka telefɔni kan do? * An k’a ɲini k’a lɔn Jehova b’o koow jati cogo min na ani an ka sɔn o ma. An bena desizɔn min ta, an ka kɔn k’o latigɛ fana. O la, n’o koow ɲɔgɔn y’an sɔrɔ, a tɛna gwɛlɛya an ma ka kantigiya kɛ Jehova ye.

15. An be se ka kantigiya kɛ Jehova ye cogo di i ko Heburu kanbele saba nunu y’a kɛ cogo min na?

¹⁵ An ka Heburu kanbele saba nunu ka ɲɛyirali lajɛ sisan: Sadiraki, Mesaki ani Abɛdenego. Tuma min na masacɛ Nebukadnezar ye jaa dɔ dilan ni sanu ye ani k’a fɔ k’u k’a bato, u banna pewu! U sinna ka masacɛ jaabi cogo min na, o b’a yira ko u ka ɲi ka min kɛ walisa ka kantigiya kɛ Jehova ye, u tun kɔnna ka miiri o la (Ɛkiz. 20:4, 5; Dan. 3:4-6, 12, 16-18). Anw do? N’an ka patɔrɔn y’a fɔ an ye ko an ka bolomafara dɔ di walisa u ka ngalon diinan ka fɛti dɔ labɛn, an bena mun lo kɛ do? Sanni an ka kɔnɔni kɛ o koo ɲɔgɔn ka kɛ, Jehova be min miiri o koo la, a ka fisa an ka miiri o la kabini sisan. O la, n’o koo ɲɔgɔn kɛra, a tɛna gwɛlɛya an ma k’a lɔn an ka ɲi ka min fɔ ani ka min kɛ i k’o Heburu kanbele saba.

16. N’an be Jehova ka miiriya faamu, o be se k’an dɛmɛ cogo di an k’an yɛrɛ labɛn barinankow kama, kɛnɛyako ta fan fɛ?

¹⁶ N’an be miiri Jehova ka kokɛcogow la, o b’an dɛmɛ ka kantigiya kɛ hali ni barinanko dɔ y’an sɔrɔ kɛnɛyako ta fan fɛ. An tɛ sɔn joli kuturu wala joli kɔnɔfɛn kunbabaw ka don an fari la (Kɛw. 15:28, 29). Nka, furakɛli fɛɛrɛ wɛrɛw be yen joliko be minw na. O ɲɔgɔn na, kerecɛn ka ɲi ka basigi Bibulu ka sariyakolow kan k’a latigɛ a yɛrɛ ma a bena min kɛ. Wagati juman lo an ka ɲi k’o latigɛ? Yala an bena kɔnɔni kɛ tuma min na an be dɔgɔtɔrɔso la, an be tɔɔrɔla ani mɔgɔw kɔrɔtɔnin lo an ka desizɔn ta wa? Ayi.  Sisan lo an ka ɲi ka sɛgɛsɛgɛri kɛ, k’an ka jolisɛbɛ dafa walisa k’a yira ka gwɛ an be min fɛ ani ka kuma an ka dɔgɔtɔrɔ fɛ. *

17-19. Jehova be koow jati cogo min na, mun na a ka ɲi an ka miiri o la sisan? Koo dɔ fɔ an ka ɲi ka kɔn k’an yɛrɛ labɛn min kama.

¹⁷ A laban, an ka miiri Yezu koo la. Piyɛri ye hakilintanya kɛ k’a fɔ a ye ko a ‘kana kɛ a yɛrɛ ma jugu ye.’ Yezu sinna k’a jaabi. O b’a yira ko Ala tun b’a fɛ a ka min kɛ, siga t’a la, a tun kɔnna ka miiri o la koɲuman. Kiraya kumaw tun be min fɔ a ka ɲɛnamaya n’a ka saya koo la dugukolo kan, a tun miirila o la fana. O lɔnniya ye fanga di a ma a tora ka kantigiya kɛ Jehova ye ani k’a niin saraka an bɛɛ kosɔn.—Matiyo 16: 21-23 kalan. *

¹⁸ Bi, Ala b’a fɛ an ka kɛ ale teriw ye ani an k’an seko bɛɛ kɛ ka kibaro diiman fɔ mɔgɔw ye (Mat. 6:33; 28:19, 20; Zaki 4:8). Nka i ko Piyɛri, n’a sɔrɔ mɔgɔ dɔw bena a ɲini k’an fari faga o baara la. O kɔrɔ tɛ k’u be ni ŋaniya jugu ye. Ɲɛyirali fɛ, i ka patɔrɔn be se k’a ɲini i fɛ i ka baara dɔ kɛ min sara ka ca. Nka, o baara b’i bali ka taga lajɛnw na ani ka waajuli kɛ n’i ka kafo ye. I bena mun lo kɛ o koo ɲɔgɔn na do? Wala n’i ye lakɔliden ye, u be se k’a ɲini i fɛ i ka taga kalan kɛ jamana wɛrɛ la, i ka somɔgɔw tɛ yɔrɔ min na. N’o kɛra, yala i bena delili kɛ, ka sɛgɛsɛgɛri kɛ ani ka kuma i somɔgɔw wala diinan mɔgɔkɔrɔw fɛ ka sɔrɔ ka desizɔn ta wa? Jehova be min miiri o koo la, a ka fisa i k’a ɲini k’o faamu ani ka sɔn o ma kabi sisan. O la, n’u y’o koo nunu dɔ ɲini i fɛ, a tɛna kɛ kɔrɔbɔli ye i ɲɛɛ na. I bena a lɔn i ka ɲi ka min kɛ sabu i kɔnna k’a latigɛ ka Jehova batoli kɛ i ɲɛnako fɔlɔ ye.

¹⁹ N’a sɔrɔ i be se ka miiri koo wɛrɛw la minw be se ka bari i la ani k’i ka kantigiya kɔrɔbɔ. Tiɲɛn lo ko an tɛ se ka kɔn k’an yɛrɛ labɛn koo bɛɛ la. Nka an ka kelenna kalan tuma na, a ka ɲi an ka wagati ta ka miiri Jehova ka koow filɛcogo la. O la, an ye min kalan, an hakili bena to o la ani an bena se k’o sira tagama koo tigitigi dɔw la. O kama, an ka kelenna kalan tuma na, an k’a ɲini k’a lɔn Jehova be koow jati cogo min na. N’an y’o lɔn, an ka sɔn o ma ani an ka miiri k’a filɛ o be se k’an dɛmɛ cogo min na ka desizɔn ɲumanw ta sisan ani sini ma.

20, 21. a) See min b’an ye ka koow latigɛ, mun na an bena o diyabɔ duniɲa kura kɔnɔ? b) An be se ka ninsɔndiya sɔrɔ cogo di kabini sisan?

²⁰ An bɛɛ kɔrɔtɔnin lo ka kɛ duniɲa kura kɔnɔ. An fanba ka jigiya ye ka ɲɛnamaya kɛ fɔɔ abada alijɛnɛ kɔnɔ dugukolo kan. Tɔɔrɔ minw b’an kan bi, u bɛɛ bena ban Ala ka Masaya wagati la. See min b’an fɛ ka koow latigɛ an yɛrɛ ma, an bele bena kɛ n’o ye. An kelen kelen bɛɛ bena se k’an diyanyekow latigɛ an yɛrɛ ma.

²¹ Nka, o kɔrɔ tɛ ko daan tɛna kɛ o setigiya la. Mɔgɔ majigininw bena to ka basigi Ala ka sariya n’a ka miiriya lo kan walisa k’a lɔn min ka ɲi ani min man ɲi. O bena a to an be ninsɔndiya kosɔbɛ ani ka hɛɛrɛ dafanin sɔrɔ (Zab. 37:11). Yanni o cɛ, an be se ka ninsɔndiya sɔrɔ sisan yɛrɛ, n’an b’an jija ka to ka koow jati i ko Jehova.