LOON dɔ Yezu y’a fɔ ko: “Nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). O tiɲɛnkuma ɲɛsinna an ni Jehova ka jɛnɲɔgɔnya ma. Cogo di do? Jehova ye fɛɛn caaman di an ma minw b’an ninsɔndiya. An be se ka ninsɔndiyaba sɔrɔ fana n’an be Jehova sɔn. An be se ka mun lo di Jehova ma? Talenw 3:9 b’a fɔ ko: “Masaba boɲa n’i bolofɛnw ye.” An ‘bolofɛn’ nafamanw ye an ka wagati, an ka setigiya, an fanga ani an ka wari n’a ɲɔgɔnnaw ye. N’an b’o fɛɛnw kɛ ka dɛmɛ don tiɲɛn batoli la, an be Jehova sɔn o cogo lo la. O lo b’a to an be ninsɔndiya kosɔbɛ.

A ka ɲi an ka to k’an ka wari n’a ɲɔgɔnnaw di Jehova ma. Mun lo bena an dɛmɛ an kana ɲinɛ k’o kɛ? Ciden Pol y’a fɔ Korɛntikaw ye k’u ka ‘fɛɛn dɔ bɔ u ka sɔrɔta la k’o mara gɛrɛfɛ’ walisa k’o kɛ bolomafara ye (1 Kor. 16:2). I be se ka tɛmɛ fɛɛrɛ minw fɛ walisa ka nili kɛ i ka mara la, i be se k’o lɔn cogo di? Hakɛ to ka koorilen lajɛ jukɔrɔ.

Niliw tɛ se ka kɛ ɛntɛrɛnɛti kan jamanaw bɛɛ la. Nka, i be se ka kunnafoniw sɔrɔ nili kɛcogo wɛrɛw koo la yɔrɔ nin na: “Soutenir notre œuvre mondiale.” Jamana dɔw la, mɔgɔw ka teli ka ɲiningali minw kɛ niliw koo la, olu jaabiliw be sɔrɔ yen.