1-2. Ladili min be sɔrɔ Talenw 4:25 kɔnɔ, an be se k’o sira tagama cogo di? Ɲɛyirali dɔ fɔ.

MIIRI ɲɛyirali saba nunu na. Balima musokɔrɔba dɔ be miirila koo tɛmɛnin dɔw la minw y’a ninsɔn diya. Hali ni koow man nɔgɔ a fɛ bi, a bele b’a seko bɛɛ kɛra Jehova ka baara la (1 Kor. 15:58). Loon o loon, a be miiri k’a yɛrɛ n’a somɔgɔw n’a teriw ye alijɛnɛ kɔnɔ. Balimamuso wɛrɛ hakili jigira ko a kerecɛnɲɔgɔn dɔ y’a hakɛ ta. Nka a y’a latigɛ ko a tɛna o koo mara a kɔnɔ (Kɔlɔs. 3:13). Balimacɛ dɔ hakili b’a ka jurumu tɛmɛninw na. Nka a be se ka koo minw bɛɛ kɛ walisa ka kantigiya kɛ Jehova ye sisan, a y’a latigɛ ka to ka miiri o lo la.—Zab. 51:12.

² Koo juman lo bɔnin be ɲɔgɔn ma o kerecɛn saba ka koow la. U bɛɛ hakili be u ka koo tɛmɛninw na, nka u tɛ to ka miiri o la tuma bɛɛ. U ɲɛɛ sinnin lo sinikow lo ma.—Talenw 4:25 kalan.

3. Mun na an ka ɲi k’an “ɲaa sin” sinikow ma?

³ Mun na a kɔrɔtanin lo an k’an “ɲaa sin” sinikow ma? Mɔgɔ tɛ se ka tagama sira tilennin kan n’a be to ka filɛri kɛ kɔfɛ tuma bɛɛ. O cogo kelen na, an tɛ se ka baara kɛ Jehova ye bɛrɛbɛrɛ n’an be to ka miiri koo tɛmɛninw na tuma bɛɛ.—Luka 9:62.

4. An bena mun lo lajɛ barokun nin na?

⁴ Barokun nin na, an bena koo saba lajɛ minw be se k’a to an be to ka miiri koo tɛmɛninw na tuma bɛɛ. * O koo saba ye  nunu ye: 1) koo tɛmɛninw ɲɛnafin, 2) ka dimi mara an kɔnɔ, ani 3) k’an yɛrɛ jalaki kojugu. O koo kelen kelen bɛɛ la, an bena a ye cogo min na Bibulu ka sariyakolow be se k’an dɛmɛ walisa an “tɛmɛna fɛɛn minw kan,” an kana to ka miiri u la. An bena a ye fana cogo min na o sariyakolow be se k’an dɛmɛ an k’an jija “ka taga ɲafɛ.”—Filip. 3:13.

5. A fɔra Waajulikɛla 7:10 kɔnɔ ko an kana mun lo kɛ?

⁵ Waajulikɛla 7:10 kalan. A kɔrɔsi ko o vɛrise t’a fɔ ko koo jugu lo an k’an yɛrɛ ɲininga ko: “Mun na fɔlɔfɔlɔ tile tun ka di?” O vɛrise t’o fɔ sabu k’an hakili jigi koo ɲuman tɛmɛninw na, o ye Jehova ka nilifɛn dɔ lo ye. Nka, o vɛrise b’a fɔ ko: “Kan’a fɔ ko: ‘Mun na fɔlɔfɔlɔ tile ka fisa ni sisan ta ye?’ ” O la, an man ɲi k’an ka koo tɛmɛninw suman n’an ka koow ye bi ani k’a miiri ko an ka koow man ɲi bi hali dɔɔni. Bibulu bayɛlɛmani wɛrɛ b’o vɛrise bayɛlɛma ten ko: “Kana i yɛrɛ ɲininga ko: ‘Eeh, mun na kunu tun ka di kosɔbɛ ni bi ye?’ Hakilitigiyako tɛ k’i yɛrɛ ɲininga o la.”

6. Mun na hakilitigiyako tɛ an ka to k’a miiri ko kunu tun ka fisa bi ye? Ɲɛyirali dɔ fɔ.

⁶ Mun na hakilitigiyako tɛ an ka to k’a miiri ko kunu tun ka fisa bi ye? Ni wagati tɛmɛninw ɲɛnafin be dɔ la, o be se k’a to a be miiri koo ɲuman tɛmɛninw dɔrɔn lo la. Wala a ye gwɛlɛya minw sɔrɔ, a be ɲinɛ o kɔ. An ka Israɛldenw ka koo lajɛ. U bɔnin kɔ Ezipiti, tɔɔrɔ min tun b’u kan yen, u ɲinɛna o kɔ joona joona. Nka u tun be dumuni diiman min kɛ yen, u tora ka miiri o lo la. U tora k’a fɔ ko: “An tun be jigɛ min ɲimi gwansan Ezipiti jamana na, an hakili b’o la, ani kɔnkɔnburuw, ni melɔnw, ni puwarow, ni jaba, ani layi.” (Nɔnb. 11:5). Nka, yala u tun b’o dumuniw kɛ “gwansan” le tiɲɛn na wa? Ayi dɛ! Israɛldenw tɔɔrɔla kosɔbɛ o wagati la sabu u tun be jɔnya lo la Ezipiti (Ɛkiz. 1:13, 14; 3:6-9). O bɛɛ n’a ta, kɔfɛ, Israɛldenw ɲinɛna u ka tɔɔrɔ kɔ ani u tun b’a fɛ koow ka kɛ i ko fɔlɔ la. Jehova  tun ye koo ɲuman minw kɛ u ye a wagati damanin ye nin ye, u tun tɛ miiri o la. Nka u tun be dumuni diiman minw kɛ Ezipiti, u tora ka miiri o lo la. Jehova dimina kosɔbɛ o kosɔn.—Nɔnb. 11:10.

7. Mun lo ye balimamuso dɔ dɛmɛ walisa koo tɛmɛninw ɲɛnafin kana a minɛ?

⁷ Mun lo be se k’an dɛmɛ walisa koo tɛmɛninw ɲɛnafin kana an minɛ? An ka balimamuso dɔ ka koo lajɛ. A y’a daminɛ ka baara kɛ Buruklini Betɛli la saan 1945. Saan damanin o kɔ, a furula betɛliden dɔ ma ani u ye baara kɛ Betɛli la saan caaman kɔnɔ. Nka saan 1976, a cɛɛ banana. O balimamuso ko tuma min na a cɛɛ y’a faamu ko a satuma surunyana, a ye ladili ɲuman dɔ di a ma walisa k’a dɛmɛ a k’ale saya dusukasi muɲu. A cɛɛ y’a fɔ a ye ko: “An ye ninsɔndiya min sɔrɔ an ka furu kɔnɔ, mɔgɔ caaman t’o ɲɔgɔn sɔrɔ abada!” Nka a y’a jija fana ko: “An ye wagati diiman minw kɛ ɲɔgɔn fɛ, i tɛna ɲinɛ u kɔ. Nka, kana to ka miiri o la tuma bɛɛ. Wagati dɔ bena na se, dɔ bena bɔ i ka dusukasi la. Koo min y’i sɔrɔ, kana i fari faga wala k’i dusu tiɲɛ kojugu o kosɔn. An ye wagati diiman minw kɛ ɲɔgɔn fɛ Jehova ka baara la, ninsɔndiya o kosɔn. . . . Ka miiri koo ɲuman tɛmɛninw na, o ye Ala ka nilifɛn ye.” O ye ladili ɲuman ye yɛrɛ le!

8. An balimamuso ye nafa juman lo sɔrɔ a cɛɛ ka ladili la?

⁸ An balimamuso tugura a cɛɛ ka ladili kɔ. A ye Jehova sago kɛ kantigiya la fɔɔ a satuma na, a saan 92. Saan damanin ka kɔn a satuma ɲɛ, a ko: “N’ ye saan 63 minw kɛ kudayi cidenya baara la, ni n’ miirila o la, tiɲɛn na n’ b’a ye ko n’ ye ninsɔndiya sɔrɔ kosɔbɛ!” Mun na do? A y’a ɲɛfɔ ko: “Fɛɛn min b’a to an ninsɔn be diya, o ye ko an be denbaya ɲuman kɔnɔ. An be ni jigiya ye fana ka ɲɛnamaya kɛ n’o denbayamɔgɔw ye alijɛnɛ kɔnɔ dugukolo kan ani ka an Danbaga Jehova bato ɲɔgɔn  fɛ fɔɔ abada. Ale lo ye tiɲɛn Ala kelenpe ye.” * An balimamuso ɲɛɛ tun sinnin lo sinikow ma. A ye ɲɛyirali ɲuman yɛrɛ lo ye an fɛ!

9. Ka kɛɲɛ ni Levitiki 19:18 ye, tuma juman lo la a be se ka gwɛlɛya an ma kosɔbɛ ka yafa mɔgɔ dɔ ma?

⁹ Levitiki 19:18 kalan. N’an balima, an teri wala an somɔgɔ dɔ y’an hakɛ ta, tuma caaman na a ka gwɛlɛ an ma ka yafa o tigi ma. Ɲɛyirali fɛ, balimamuso dɔ bagara balimamuso wɛrɛ ma ko a y’a ka wari soɲɛ. Kɔfɛ, o balimamuso ye yafa deli. Nka a bagara balimamuso min ma, ale diminin tora ani a tun be to ka miiri o koo la tuma bɛɛ. Yala o koo ɲɔgɔn delila k’i sɔrɔ wa? Hali n’o koo ɲɔgɔn ma deli k’an sɔrɔ tigitigi, n’a sɔrɔ an fanba delila ka dimi dɔ kɔrɔ ani k’a miiri ko an tɛna se ka yafa a ma abada.

10. N’an diminin lo dɔ kɔrɔ, mun lo be se k’an dɛmɛ?

¹⁰ N’an diminin lo dɔ kɔrɔ, mun lo be se k’an dɛmɛ? An k’a to an hakili la ko Jehova ɲɛɛ be koo bɛɛ la. Koo o koo b’an kan, Jehova b’o kala ma. Ɲɛyirali fɛ, ni mɔgɔ dɔ be tilenbaliyako kɛra an ma, Jehova b’o lɔn (Eburuw 4:13). N’an be tɔɔrɔla, o b’ale fana tɔɔrɔ (Ezayi 63:9). A ye layidu ta fana ko mɔgɔw ka tilenbaliyakow ye tɔɔrɔ minw lase an ma, a bena na u bɛɛ ban.—Yir. 21:3, 4.

11. N’an be yafa, an be nafa juman lo sɔrɔ o la?

¹¹ An k’a to an hakili la ko n’an be yafa, o b’an yɛrɛ nafa. U tun bagara balimamuso min ma, ale nana o lo faamu. Balimamuso min tun bagara a ma, kɔfɛ, a sera ka yafa a ma. A y’a faamu ko n’an be yafa tɔɔw ma, Jehova fana be yafa an ma (Mat. 6:14). A tun b’a lɔn ko a balimamuso ye min kɛ, o ye koo jugu ye, nka a y’a latigɛ ka yafa a ma. O y’a to a ninsɔn diyara kosɔbɛ ani a sera ka Jehova ka baara kɛ bɛrɛbɛrɛ.

12. Min fɔra 1 Zan 3:19, 20 kɔnɔ, o b’an dɛmɛ ka mun lo faamu?

¹² Vɛrise nunu kalan: 1 Zan 3:19, 20. An bɛɛ b’an yɛrɛ jalaki tuma dɔw la. Ɲɛyirali fɛ, dɔw ye min kɛ sanni u ka tiɲɛn lɔn, u be to k’u yɛrɛ jalaki o kosɔn. Dɔw fana ye fili minw kɛ u batizenin kɔ, u be to k’u yɛrɛ jalaki o kosɔn (Ɔrɔm. 3:23). Tiɲɛn na, an b’a fɛ ka koo tilennin lo kɛ. Nka, “an bɛɛ be fili cogo caaman na.” (Zaki 3:2; Ɔrɔm. 7:21-23). Hali n’a man di an ye k’an yɛrɛ jalaki, n’an b’an yɛrɛ jalaki tuma dɔw la, o b’an nafa. Mun na do? Sabu o be se k’a to an b’an ka ɲɛnamaya kɛcogo yɛlɛma ani an b’an jija walisa an kana an ka fili tɛmɛninw kɛ tugun.—Eburuw 12:12, 13.

13. Mun na an man ɲi ka to k’an yɛrɛ jalaki kojugu?

¹³ Faan wɛrɛ fɛ, an be se ka to k’an yɛrɛ jalaki kojugu, o kɔrɔ, ka to k’an yɛrɛ jalaki hali k’a sɔrɔ an nimisara ani Jehova y’a yira ko a yafara an ma. A man ɲi an k’an yɛrɛ jalaki o cogo la (Zab. 31:11; 38:4, 5). Mun na do? An ka balimamuso dɔ ka koo lajɛ, min tun be to k’a yɛrɛ jalaki a ka jurumu tɛmɛninw kosɔn. A ko: “N’ tun b’a jati ko kuun t’a la n’ ka n’ jija kosɔbɛ Jehova ka baara la sabu n’ tun b’a miiri ko n’ a sɔrɔ n’ tɛna kisi.” An caaman be se ka kɛ n’o balimamuso ka miiriya ɲɔgɔn ye. O kama, a kɔrɔtanin lo kosɔbɛ an kana to k’an yɛrɛ jalaki kojugu. Mun na do? Sabu Sutana bena ninsɔndiya yɛrɛ le n’an ye Jehova sago kɛli dabila k’a sɔrɔ Jehova yafara an ma.—2 Korɛntikaw 2:5-7, 11 lajɛ.

14. An be se ka la a la cogo di ko Jehova b’a fɛ ka yafa an ma?

 ¹⁴ N’a sɔrɔ an b’an yɛrɛ ɲininga ko: “N’ be se ka la a la cogo di ko Jehova b’a fɛ ka yafa n’ ma?” N’an y’an yɛrɛ ɲininga o la, o b’a yira ko Jehova b’a fɛ ka yafa an ma. A saan caaman ye nin ye, a tun fɔra Kɔrɔsili Sangaso kɔnɔ ko: “N’a sɔrɔ an be to ka fili dɔ kɛ siɲɛ caaman. A be se ka kɛ ko an ma see sɔrɔ an ka fiɲɛ dɔ kan ka sɔrɔ k’a daminɛ ka Jehova sago kɛ. . . . Kana i fari faga. Kana a miiri ko i ye jurumu min kɛ, Jehova tɛna o yafa i ma. Sutana b’a fɛ i k’o lo miiri jaatika! I dusu tiɲɛnin lo minkɛ i ka jurumu kosɔn, o b’a yira ko i tɛ mɔgɔ jugu ye ani ko Jehova bena sɔn ka yafa i ma. To k’i majigi ani ka Ala deli a ka yafa i ma. A deli a k’i dɛmɛ i ka kɛ ni miiriya ɲuman ye i yɛrɛ koo la ani a k’i dɛmɛ i kana o fili kɛ tugun. Hali ni denfitinin ye gwɛlɛya dɔ sɔrɔ siɲɛ caaman na, a be taga dɛmɛ ɲini a facɛ fɛ tuma bɛɛ. O cogo kelen na, to ka dɛmɛ ɲini Jehova fɛ. A bena nɛɛmaba kɛ i ye a kɛtɔ k’i dɛmɛ.” *

15-16. Dɔw ye mun lo miiri tuma min na u y’a faamu ko Jehova yafara u ma?

¹⁵ Jehova sagokɛla caaman ye dususalo sɔrɔ tuma min na u y’a faamu ko Jehova yafara u ma. Barokun dɔ tun be to ka bɔ Kɔrɔsili Sangaso kɔnɔ min kuun ko: “La Bible transforme des vies.” A saan damanin ye nin ye, u la dɔ ye balimacɛ dɔ dusukun sɔrɔ. O barokun na, balimamuso dɔ y’a fɔ ko koo minw y’ale sɔrɔ a ka ɲɛnamaya kɔnɔ, o y’a to a tun ka gwɛlɛ ale ma ka la a la ko Jehova b’ale kanu. A bele tun be n’o miiriya ye saan caaman a batizenin kɔ. Nka tuma min na a miirila kosɔbɛ kunmabɔsara koo la, o y’a to a lara a la ko Jehova b’ale kanu. *

¹⁶ O balimamuso ka koo ye nɔɔ juman lo to balimacɛ kan? A y’a sɛbɛ ko: “N’ kanbele tuma, n’ tun be to ka porno filɛ ani a tun ka gwɛlɛ n’ ma kosɔbɛ k’a dabila. Kɔsa la, n’ y’a daminɛ k’a filɛ tugun. N’ ye dɛmɛ ɲini diinan mɔgɔkɔrɔw fɛ ani n’ ye n’ jija ka see sɔrɔ o gwɛlɛya kan. Diinan mɔgɔkɔrɔw ye n’ dɛmɛ k’a faamu ko Jehova be n’ kanu ani  ko a b’a fɛ ka yafa n’ ma. Nka tuma dɔw la, n’ bele b’a miiri ko nafa foyi tɛ n’ na ani ko Jehova tɛ n’ kanu. [O balimamuso] ka koo ye n’ jija yɛrɛ le! Sisan, n’ y’a faamu ko ni n’ y’a miiri ko Ala tɛna yafa n’ ma, a kɛra komi n’ b’a fɔra le ko a Dencɛ ka saraka tɛ se ka n’ ka jurumuw bɛɛ datugu. N’ y’o barokun bila n’ bolo kɔrɔ walisa tuma o tuma ni n’ y’a daminɛ k’a miiri ko nafa foyi tɛ n’ na, n’ ka se k’a kalan ani ka miiri a kan.”

17. Mun lo ye ciden Pol dɛmɛ walisa a kana to k’a yɛrɛ jalaki kojugu?

¹⁷ O ɲɛyiraliw ɲɔgɔn b’an hakili jigi ciden Pol koo la. Yanni a ka kɛ kerecɛn ye, a tun ye jurumuba dɔw kɛ. Pol ye min kɛ, a ma ɲinɛ o kɔ. Nka a tun tɛ to ka miiri o la tuma bɛɛ (1 Tim. 1:12-15). A tun b’a jati ko kunmabɔsara ye nilifɛn ye Ala ye min kɛ ale ye (Gal. 2:20). O kama, Pol ma to k’a yɛrɛ jalaki kojugu, nka a tora k’a seko bɛɛ kɛ Jehova ka baara la.

18. An ye mun lo ye barokun nin na?

¹⁸ An ye koo minw lajɛ barokun nin na, an be kalan jumanw lo sɔrɔ o la? 1) Ka miiri koo ɲuman tɛmɛninw na, o ye Jehova ka nilifɛn ye. Nka an ka ɲɛnamaya tun ka di cogo o cogo saan tɛmɛninw na, duniɲa kura kɔnɔ, a bena diya ka tɛmɛ o kan. 2) Dɔw be se k’an hakɛ ta. Nka n’an yafara u ma, an bena se k’an jija Jehova ka baara la. 3) N’an b’an yɛrɛ jalaki kojugu, o be se k’an bali ka Jehova sago kɛ ninsɔndiya la. O la, i ko Pol, an ka ɲi ka la a la ko Jehova yafara an ma.

19. An b’a lɔn cogo di ko duniɲa kura kɔnɔ, an tɛna to k’an yɛrɛ jalaki koo tɛmɛninw kosɔn?

¹⁹ An jigi b’a la ka ɲɛnamaya kɛ fɔɔ abada. Ani Ala ka duniɲa kura kɔnɔ, an tɛna to k’an yɛrɛ jalaki koo tɛmɛninw kosɔn. Bibulu b’a fɔ o wagati koo la ko: “Mɔgɔw tena miiri koo tɛmɛninw na tugu.” (Ezayi 65:17). Miiri k’a filɛ: An dɔw kɔrɔla Jehova ka baara la. Nka duniɲa kura kɔnɔ, an bena kɛ kanbelew ni sunguruw ye tugun (Zɔbu 33:25). O la, an k’an jija an kana to ka miiri koo tɛmɛninw na tuma bɛɛ. Nka, an ka to ka miiri duniɲa kura koo la ani k’an seko bɛɛ kɛ walisa ka kɛ yen!