N’ wolola saan 1983. N’ ka denmisɛnya daminɛ na, n’ tun ka kɛnɛ. Nka n’ ye saan tan sɔrɔ tuma min na, n’ fari yɔrɔ bɛɛ y’a daminɛ ka n’ dimi kosɔbɛ. Saan fila ɲɔgɔn o kɔ, n’ wulila loon dɔ sɔgɔma ani n’ tun tɛ se ka n’ fari lamaga tugun. N’ ye koo bɛɛ lajɛnnin kɛ, nka n’ ma se ka n’ seenw lamaga, fanga tun tɛ u la. Kabi o loon, n’ ma se ka tagama. N’ ka bana y’a to n’ ma janya tugun. Bi, n’ bele ka dɔgɔ i ko denmisɛn.

Kalo damanin n’ bananin kɔ, n’ tun tɛ se ka bɔ soo. O wagati la le, Jehova Seere fila nana bɔ an ye. Ni mɔgɔw tun nana bɔ an ye, n’ tun be dogo. Nka o loon na, n’ sɔnna o musow ka kuma n’ fɛ. U kumatɔ alijɛnɛ koo la, n’ hakili jigira n’ tun ye kuma minw mɛn tuma min na n’ tun be ni saan 5 ɲɔgɔn ye. O wagati la, misɔnden dɔ tun be to ka na an ka dugu la siɲɛ kelen kalo kɔnɔ ani a tun be bibulukalan kɛ ni n’ facɛ ye. O misɔnden tɔgɔ ko Jethro ani a be bɔ Surinami. Jethro tun be n’ minɛ ni ɲumanya ye yɛrɛ le! A tun koo ka di n’ ye kosɔbɛ. N’ mamacɛ ni n’ mamamuso tagara ni n’ ye Jehova Seerew ka lajɛn damanin na fana minw tun be kɛ an ka dugu la. O kama, muso minw nana bɔ an ye, tuma min na u dɔ ye n’ ɲininga ni n’ b’a fɛ ka dɔ lɔn tugun Ala koo la, n’ y’a fɔ ko ɔnhɔn. O muso tɔgɔ ko Florence.

Florence kɔsegira ka na n’a cɛɛ ye, a tɔgɔ ko Justus. Ani u y’a daminɛ ka bibulukalan kɛ ni n’ ye. Tuma min na u y’a ye ko n’ tɛ se kalan na, u ye n’ degi a la. Wagati damanin o kɔ, n’ tun be se ka kalan kɛ n’ yɛrɛ ma. Loon dɔ, Florence n’a cɛɛ y’a fɔ n’ ye ko u y’u ci ka taga waajuli kɛ Surinami. A fɔ man di, nka, mɔgɔ tun tɛ yen Orealla u tun be se ka n’ ka bibulukalan kalifa min ma. Nka, n’ dusu ka di k’a ye ko Jehova ma ɲinɛ n’ kɔ.

Dɔɔni o kɔ, piyɔniye dɔ nana Orealla ani a ye n’ kunbɛn tuma min na a tun be waajuli kɛra bugu ni buguw la. A tɔgɔ ko Floyd. Tuma min na a ye bibulukalan kofɔ n’ ye, n’ yɛlɛla. A ye n’ ɲininga ko: “Mun na i be yɛlɛla?” N’ y’a fɔ a ye ko n’ ye bibulukalan kɛ kitabunin Ala be mun ɲini an fɛ? kɔnɔ ka ban. Ani ko n’ ye kalan daminɛ gafe La connaissance qui mène à la vie éternelle kɔnɔ. * N’ y’a ɲɛfɔ a ye fɛɛn min kama bibulukalan lalɔra. Floyd  ye gafe Connaissance tɔɔ laban ni n’ ye. Nka u y’ale fana ci ka taga waajuli kɛ yɔrɔ wɛrɛ. Bibulu kalanfa tun tɛ n’ fɛ tugun.

Nka saan 2004, u ye dan na piyɔniye fila ci ka na waajuli kɛ Orealla. U tɔgɔ ko Granville ani Joshua. Waajuli kɛtɔ bugu ni buguw la, u ye n’ kunbɛn. Tuma min na u ye n’ ɲininga ni n’ b’a fɛ ka bibulukalan kɛ, n’ yɛlɛla. N’ ko u ka bibulukalan kɛ ni n’ ye gafe Connaissance kɔnɔ, k’a ta a daminɛ na. N’ ka kalanfa tɔɔw tun ye n’ kalan min na, n’ tun b’a fɛ k’a filɛ n’u bena n’ kalan o lo la. Granville y’a fɔ n’ ye ko lajɛnw be kɛ yan an ka dugu kɔnɔ. N’ tun b’a fɛ ka taga o lajɛnw na, hali k’a sɔrɔ n’ tun ma bɔ n’ ka soo a saan tan ɲɔgɔn ye nin ye. O kama, Granville ye n’ ta ka n’ don nanbara wotoro kɔnɔ ani ka n’ puse ka taga ni n’ ye Masaya Boon na.

Kɔfɛ, Granville ye n’ jija ko n’ ka n’ tɔgɔ sɛbɛ Ala ka Mara cidenyabaara lakɔli la. A ko: “I ye nanbara ye, nka, i be se ka kuma. Loon dɔ, i bena forobakalan kɛ. Siga t’a la, o bena kɛ.” A ka jijali kumaw ye n’ hakili sigi.

N’ y’a daminɛ ka waajuli kɛ ni Granville ye. Nka, sira caaman tun man ɲi Orealla dugu la. O kama, a tun ka gwɛlɛ ka nanbara wotoro puse. O la, n’ y’a ɲini Granville fɛ a ka n’ don buruwɛti kɔnɔ. O tun ye fɛɛrɛ ɲuman ye yɛrɛ le. N’ batizera saan 2005, awirilikalo la. Dɔɔni o kɔ, balimacɛw ye fɔrɔmasɔn di n’ ma walisa n’ ka se ka gafew ani sono koo ɲɛnabɔ Masaya Boon na.

A fɔ man di nka saan 2007, bato ye n’ facɛ mandimi ani a sara o kɔ. O ye an somɔgɔw dusu kasi kosɔbɛ. Granville ye delili kɛ n’an ye ani a ye Bibulu ka dususalo kuma dɔw kalan an ye. Saan fila o kɔ, kasara wɛrɛ y’an sɔrɔ min y’an hakili ɲagami kosɔbɛ. Bato jigira jii jukɔrɔ ni Granville ye ani a sara.

Diinan mɔgɔkɔrɔ tun t’an ka kafo kɔnɔ tugun ani kɔrɔsigi ciden kelen lo tun be yen. N’ dusu kasira kosɔbɛ n’ teri sɔbɛ Granville saya kosɔn. A tun be n’ dɛmɛ tuma bɛɛ n’ ka n’ magwɛrɛ Jehova la ani n’ ka n’ makoɲɛfɛn wɛrɛw sɔrɔ. Lajɛn min kɛra a sanin kɔ, n’ tun ka ɲi ka kalangwɛ kɛ Kɔrɔsili Sangaso kalan na. N’ sera ka dakun fɔlɔ ni filanan kalan. Nka o kɔ, n’ y’a daminɛ ka kasi ani n’ ɲɛji tora ka jigi. O kama, n’ jigira ka bɔ tintin kan.

N’ y’a daminɛ ka ninsɔndiya tuma min na balimacɛ dɔw bɔra kafo wɛrɛ kɔnɔ ka na an dɛmɛ Orealla. Betɛli ye dan na piyɔniye dɔ ci fana ka na an dɛmɛ. A tɔgɔ ko Kojo. N’ bamuso ni n’ dɔgɔcɛ y’a daminɛ ka bibulukalan kɛ ani u batizera. O ye n’ ninsɔn diya kosɔbɛ. Saan 2015 marisikalo la, n’ kɛra kɔrɔsigi ciden ye. Dɔɔni o kɔ, n’ ye n’ ka forobakalan fɔlɔ kɛ. O loon na, n’ miirila Granville ka kumaw na. N’ ye yɛlɛmisɛn kɛ ani n’ kasira. A tun y’a fɔ ko: “Loon dɔ, i bena forobakalan kɛ. Siga t’a la, o bena kɛ.”

JW telewisɔn ka videwow sababu fɛ, n’ ye balima caaman koo mɛn minw ka koo bɔnin be n’ ta ma. Hali k’a sɔrɔ u man kɛnɛ, u be sera ka koo caaman kɛ ani u ninsɔn ka di. Ne fana be se ka koo dɔw kɛ. N’ b’a fɛ ka n’ seko bɛɛ kɛ Jehova ka baara la. O kama, n’ kɛra kudayi piyɔniye ye. Saan 2019, sɛtanburukalo la, n’ ye kibaro diiman dɔ mɛn n’ yɛrɛ tun tɛ miirila min na! A fɔra ko n’ kɛra diinan mɔgɔkɔrɔ ye an ka kafo kɔnɔ. Weleweledala 40 ɲɔgɔn lo be yen.

Balimacɛ ni balimamuso kanulen minw ye bibulukalan kɛ ni n’ ye ani ka n’ dɛmɛ Jehova sago kɛli la, n’ b’u waleɲuman lɔn. N’ be Jehova yɛrɛ lo waleɲuman lɔn kosɔbɛ sabu a ma ɲinɛ n’ kɔ.