BALIMA dɔw tun bɔra u ka jamanaw na ka taga jamana wɛrɛw la. Nka sisan, u caaman kɔsegira u ka jamanaw na. Komi u be Jehova n’u mɔgɔɲɔgɔn kanu, o lo y’u lasun ka taga waajuli kɛ yɔrɔ minw na weleweledalaw man ca (Mat. 22:37-39). U ye koo jumanw lo saraka ani u ye duga jumanw lo sɔrɔ? Walisa k’o lɔn, an ka kuma Kameruni jamana koo la. O jamana be Afiriki tileben fan fɛ.

Saan 1998, balimacɛ Onésime bɔra a ka jamana na Kameruni ka taga jamana wɛrɛ la. A tagara saan 14 kɛ tunga na. Loon dɔ kafo ka lajɛn dɔ la, balima dɔ ye ɲɛyirali dɔ ta waajuli baara koo la. A ko: “Teriman fila dɔw be jɛgɛ minɛna ani u fila siginin tɛ yɔrɔ kelen na. Ni dɔ be jɛgɛ caaman sɔrɔla a ka yɔrɔ la, yala tɔɔ kelen tɛna gwɛrɛ o yɔrɔ la walisa ka jɛgɛ caaman sɔrɔ fana wa?”

O ɲɛyirali y’a to Onésime y’a ɲini ka kɔsegi walisa ka taga balimaw dɛmɛ Kameruni sabu mɔgɔ caaman b’a fɛ ka bibulukalan kɛ o yɔrɔ la. Nka a tun be siranna dɔɔni. Komi a ye saan caaman kɛ tunga na, a tun b’a yɛrɛ ɲiningara n’a bena se ka sigi a faso la. Walisa k’a lɔn n’a tun bena se ka sigi Kameruni, a tagara kalo 6 kɛ yen. O kɔ saan 2012, a yɛlɛmana yen pewu.

Onésime ko: “N’ tun ka ɲi ka deli funteni na ani ɲɛnamaya kɛcogo la o yɔrɔ la. Masaya Boon na, n’ tun ka ɲi ka n’ yɛrɛ degi ka sigi baan jalanw kan tugun.” Onésime y’a fɔ fana ni yɛlɛmisɛn ye ko: “N’ tun mana n’ tulo malo koɲuman kalanw na, n’ tun be ɲinɛ Masaya Boon wɛrɛw ka sigilan magamaninw kɔ.”

Saan 2013, Onésime ye Géraldine furu. Ale tun ye saan 9 kɛ Faransi ani a kɔsegira Kameruni. O furuɲɔgɔnw kɛtɔ ka Alakow kɛ u ɲɛnako fɔlɔ ye, u ye duga jumanw lo sɔrɔ? Onésime ko: “Ne ni n’ muso ye Masaya waajulikɛlaw ka lakɔli kɛ ani an ye baara kɛ Betɛli la. Saan tɛmɛnin na, Bibulu kalanden mɔgɔ 20 batizera an ka kafo kɔnɔ. Sisan, a be n’ ɲɛɛ na ko n’ be jɛgɛminɛyɔrɔ ɲuman lo la.” (Mariki 1:17, 18). Géraldine ko: “N’ ye duga caaman sɔrɔ n’ yɛrɛ tun tɛ miirila minw na.”

Judith tun yɛlɛmana Etazini, nka a tun b’a fɛ ka dɔ fara a ka cidenya baara kan. A ko: “Tuma o tuma ni n’ tun tagara n’ somɔgɔw filɛ Kameruni, n’ tun be kasi n’ kɔsegitɔ sabu n’ tun be taga ka n’ ka Bibulu kalanden caaman to n’ kɔ.” Nka Judith tun be sigasigara ka yɛlɛma Kameruni. A tun  be ni baara dɔ ye min sara ka ca. O tun b’a dɛmɛ k’a janto a facɛ banabagatɔ la Kameruni. Nka Judith y’a jigi la Jehova kan ani a yɛlɛmana Kameruni. A ko Etazini ka fɛɛn dɔw lɔgɔ be to k’ale minɛ. A ye Jehova deli ko a k’ale dɛmɛ ka yɛlɛmaniw kɛ. Kafokulu kɔrɔsibaga dɔ n’a muso fana y’a jija kosɔbɛ.

Judith miiritɔ koo tɛmɛninw na, a ko: “Saan saba kɔnɔ, n’ ye ninsɔndiya sɔrɔ ka mɔgɔ 4 dɛmɛ u batizera.” Judith kɛra dan na piyɔniye ye. Bi, ale n’a cɛɛ Sam-Castel be kafokulu kɔrɔsili baara la. Nka Judith facɛ ka koo kɛra di? Ale n’a somɔgɔw ye dɔgɔtɔrɔso dɔ sɔrɔ min sɔnna ka lɔ n’a facɛ ka operasɔn koo ye. Ninsɔndiyako lo k’a lɔn k’o operasɔn kɛra ka ɲɛ.

Balimacɛ Victor tun tagara sigi Kanada. A ye barokun dɔ kalan Kɔrɔsili Sangaso kɔnɔ kalanbabaw koo la. O kɔ, a tun be kalan min kɛra inivɛrisite la, a tora ka miiri o koo la. A y’o kalan dabila ani ka baara dɔ degi wagati damanin kɔnɔ. A ko: “O y’a to n’ ye baara sɔrɔ joona ani n’ kɛra piyɔniye ye. N’ tun b’a fɛ k’o lo kɛ kabi wagatijan.” Kɔfɛ, Victor ye Caroline furu ani u tagara u somɔgɔw filɛ Kameruni. O yɔrɔ la, u tagara Betɛli filɛ. Balima dɔw y’u jija k’u ka miiri k’a filɛ n’u be se ka na dɛmɛ don Kameruni. Victor ko: “Foyi tun t’an bali ka sɔn o welekan ma sabu an tun y’an ka ɲɛnamaya kɛcogo nɔgɔya.” Hali k’a sɔrɔ kɛnɛyako tun be Caroline kan, an y’a latigɛ ka yɛlɛma Kameruni.

Victor ni Caroline ye kudayi piyɔniye baara daminɛ walisa ka se ka makodon mɔgɔ caaman dɛmɛ. U tun ye wari mara walisa ka se ka lɔ n’u yɛrɛ ye wagati dɔ la. O kɔ, u tagara baara kɛ Kanada kalo damanin kɔnɔ. O sababu la, u sera ka kɔsegi u ka piyɔniye baara la Kameruni. U ye duga jumanw lo sɔrɔ? O y’a to u sera ka Masaya waajulikɛlaw ka lakɔli kɛ, ka kɛ dan na piyɔniyew ye ani sisan u be lɔli baara la. Victor ko: “An tun fɛɛrɛbɔnin lo cogo min na Kanada, an y’o to yen k’an jigi la Jehova kan ani a y’a janto an na.”

Saan 2002, Alain tun be inivɛrisite la Alemaɲi jamana na. A ye sɛbɛnin nin kalan: Jeunes gens, qu’allez-vous faire de votre vie ? O y’a lasun ka laɲinita wɛrɛw latigɛ a yɛrɛ ye. Saan 2006, a ye Cidenyabaara degeli lakɔli kɛ ani u y’a ci ka taga a faso la Kameruni.

Kameruni, Alain ye baara dɔ sɔrɔ a tun be min kɛ tuma kelen kelen. Kɔfɛ, a ye baara wɛrɛ sɔrɔ min sara tun ka ca. Nka a tun be siranna k’o baara bena a bali ka waajuli kɛ bɛrɛbɛrɛ i ko fɔlɔ la. O kama, tuma min na u y’a ɲini a fɛ ko a ka kɛ dan na piyɔniye ye, a ma sigasiga. A ka patɔrɔn ko a bena dɔ fara a ka sara kan. Nka Alain banna ani a kɛra dan na piyɔniye ye. Kɔfɛ, Alain ye Stéphanie furu. Ale tun ye saan caaman kɛ Faransi. Stéphanie ye gwɛlɛya jumanw lo sɔrɔ a yɛlɛmanin kɔ Kameruni?

Stéphanie ko: “N’ ka bana misɛnw tun ka ca. Nka n’ tun be to ka furaw ta tuma o tuma ani o y’a to n’ ka bana misɛnw nɔgɔyara.” Jehova ye Stéphanie ni Alain duga u ka muɲuli kosɔn. Alain ko: “An tagara waajuli kɛ dugudennin dɔ la min  tɔgɔ ko Katé ani balima si tun tɛ yen o yɔrɔ la. An ye mɔgɔ caaman sɔrɔ yen minw tun b’a fɛ ka bibulukalan kɛ. Kɔfɛ, an tora ka bibulukalan kɛ n’u ye telefɔni na. U cɛma, mɔgɔ fila batizera ani jɛnkulu dɔ sigira sen kan.” Stéphanie ko: “Ka mɔgɔ dɛmɛ a k’a yɛrɛkun di Jehova ma, fɛɛn si tɛ mɔgɔ ninsɔndiya ka se o ma. K’an to yan, an y’o ninsɔndiya sɔrɔ siɲɛ caaman.” Sisan, Alain ni Stéphanie be kafokulu kɔrɔsili baara la.

Gisèle batizera tuma min na a tun be dɔgɔtɔrɔkalan kɛra Itali. Balimacɛ min n’a muso y’a ka bibulukalan kɛ, olu tun ye piyɔniyew ye ani u tun be ɲɛnamaya kɛra cogo nɔgɔman na. U ka ɲɛyirali y’a dusukun sɔrɔ ani a tun b’a fɛ ka dɔ fara a ka cidenya baara kan. O kama, a kɛra kudayi piyɔniye ye a ka dɔgɔtɔrɔkalan bantuma na.

Gisèle tun b’a fɛ ka kɔsegi Kameruni walisa ka baara kɛ Jehova ye bɛrɛbɛrɛ. Nka a tun be hami koo dɔw la. A ko: “N’ tun bena bɔnɛ n’ ka carte de séjour la Itali ani n’ tun bena taga ka n’ somɔgɔw ni n’ teriw to yen.” O bɛɛ n’a ta saan 2016 mɛkalo la, Gisèle yɛlɛmana Kameruni. Dɔɔni o kɔ, Gisèle furula Léonce ma ani Betɛli y’a ɲini u fɛ u ka yɛlɛma Ayos dugu la. Weleweledalaw tun man ca yen.

Ɲɛnamaya tun be cogo di Ayos dugu la? Gisèle ko: “Tuma caaman na, kuran tun be tigɛ lɔgɔkun caaman kɔnɔ ani an tun tɛ se k’an ka telefɔniw sarse. O kama wagati fanba la, an ka telefɔniw tun faganin lo. N’ ye tobili kɛcogo degi ni lɔgɔ ye ani an tun be to ka taga jii ta ni buruwɛtiw ye tɔrɔsi yeelen na. An tun b’o kɛ sufɛ tuma min na mɔgɔw tun man ca jii tayɔrɔ la.” Mun lo ye Gisèle n’a cɛɛ dɛmɛ ka see sɔrɔ o gwɛlɛyaw kan? Gisèle ko: “Jehova ka hakili senu y’an dɛmɛ ka see sɔrɔ an ka gwɛlɛyaw kan. Ne ni n’ cɛɛ ye ɲɔgɔn dɛmɛ. An somɔgɔw n’an teriw y’an jija fana ani tuma dɔw la, u tun be wari di an ma.”

Yala Gisèle ninsɔn ka di sabu a kɔsegira a faso la wa? A ko: “Siga si t’o la! A daminɛ na, an ye gwɛlɛyaw sɔrɔ ani an fari tun be faga tuma dɔw la. Nka an ye see sɔrɔ o gwɛlɛyaw kan minkɛ, ne ni n’ cɛɛ b’a jati ko an tun ka ɲi ka min kɛ, an y’o lo kɛ tigitigi. An jigi lanin be Jehova kan ani an magwɛrɛnin lo a la kosɔbɛ.” Léonce ni Gisèle ye Masaya waajulikɛlaw ka lakɔli kɛ ani sisan u ye dan na piyɔniyew ye.

Gwɛlɛyaw bɛɛ n’a ta, jɛgɛminɛlaw b’u jaa gwɛlɛya walisa ka se ka jɛgɛ caaman minɛ. O cogo kelen na, minw be kɔsegi u faso la, olu be sɔn ka fɛɛn caaman saraka walisa ka mɔgɔ kɔnɔgwɛw dɛmɛ. Siga t’a la, Jehova tɛna ɲinɛ o weleweledalaw kɔ sabu u ye baaraba kɛ ani u y’a yira ko a koo ka di u ye (Neemi 5:19; Eburuw 6:10). N’i be jamana wɛrɛ la ani weleweledalaw man ca i faso la, yala i be se ka kɔsegi yen wa? N’i y’o kɛ, i bena dugabaw sɔrɔ.—Talenw. 10:22.