1. Mun na i lanin b’a la ko fanga be Ala ka Kuma na? (Jaa lajɛ, barokun daminɛ na.)

KOMI an ye Jehova sagokɛlaw ye, an lanin b’a la ko Ala y’a ka Kuma min lase adamadenw ma, a “ɲanaman lo, fanga b’a la.” (Eburuw 4:12). Fanga min be Ala ka Kuma na, o ye an yɛrɛ ani mɔgɔ wɛrɛw ka ɲɛnamaya kɛcogo yɛlɛma. An balima dɔw tun ye soonw, dɔrɔgiminlaw wala kakalaw ye. Dɔ wɛrɛw tun be ni nafolo wala tɔgɔba ye, nka u y’a ye ko fɛɛn dɔ b’u jɛn u ka ɲɛnamaya kɔnɔ (Waaj. 2:3-11). Mɔgɔ minw tun tɛ ni jigiya ye, Bibulu sababu fɛ, u caaman ye kuun sɔrɔ u ka ɲɛnamaya la ani u be ni jigiya ye sisan. O mɔgɔ dɔw ka maana be to ka lakali an ka Kɔrɔsili Sangaso kɔnɔ barokun nin na: “La Bible transforme des vies.” N’a sɔrɔ i y’o barokun dɔw kalan ani u diyara i ye kosɔbɛ. I y’a ye fana ko hali n’u tun kɛra kerecɛnw ye ka ban, u bele tun be to ka ɲɛtaga kɛ Alako ta fan fɛ Bibulu ka dɛmɛ barika la.

2. Fanga min be Ala ka Kuma na, o ye nɔɔ juman lo to mɔgɔw kan saan kɛmɛkulu fɔlɔ la?

² Bi, mɔgɔ caaman be Ala ka Kuma kalan ani ka yɛlɛmanibaw kɛ u ka ɲɛnamaya kɔnɔ. O tɛ bari an na hali dɔɔni! O koo b’an hakili jigi saan kɛmɛkulu fɔlɔ balimaw na.  Olu ka jigiya tun ye ka ɲɛnamaya kɛ sankolo la (1 Korɛntikaw 6:9-11 kalan). Mɔgɔ minw tɛna sankolo Masaya sɔrɔ, ciden Pol kumana olu koo la. O kɔ, a y’a fɔ ko: “Aw dɔw tun be ten fana.” Nka, Ala ka Kuma ni hakili senu ka dɛmɛ sababu fɛ, o balimaw y’u ka ɲɛnamaya kɛcogo yɛlɛma. Hali n’u tun kɛra kerecɛnw ye, u dɔw ye jurumubaw kɛ ani u ka jɛnɲɔgɔnya nagasira ni Jehova ye. Ɲɛyirali fɛ, Bibulu b’a fɔ ko saan kɛmɛkulu fɔlɔ la, kerecɛn mɔlen dɔ tun gwɛnna ka bɔ kafo kɔnɔ ani kɔfɛ a segira ka kɛ kafoden dɔ ye tugun (1 Kor. 5:1-5; 2 Kor. 2:5-8). Fanga min be Ala ka Kuma na, o y’an balimaw dɛmɛ u sera ka yɛlɛmanibaw kɛ. O koo b’an jija yɛrɛ le!

3. An bena mun lo lajɛ barokun nin na?

³ Fanga be Ala ka Kuma na kosɔbɛ. Komi Jehova y’a ka Kuma di an ma, an b’a fɛ k’an jija ka baara ɲuman kɛ n’a ye (2 Tim. 2:15). Fanga min be Ala ka Kuma na, an be se k’a to o ka baara kɛ 1) an ka ɲɛnamaya kɔnɔ 2) waajuli la ani 3) n’an be kalan kɛra tintin kan. An bena o lo lajɛ barokun nin na. O bena an dɛmɛ k’a yira ko an b’an sankolola Faa kanu ani ko an b’a waleɲuman lɔn sabu a b’an kalan an nafa kosɔn.—Ezayi 48:17.

4. a) N’an b’a fɛ Ala ka Kuma ka nɔɔ to an kan, an ka ɲi ka mun lo kɛ? b) I be wagati sɔrɔ cogo di walisa ka Bibulu kalan?

⁴ N’an b’a fɛ Ala ka Kuma ka nɔɔ to an kan, an ka ɲi k’an jija k’a kalan loon o loon (Zozuwe 1:8). An caaman bolo degunnin lo kosɔbɛ. O n’a ta bɛɛ, an kana a to koo si, hali an ka kunkanbaaraw yɛrɛ, k’an bali ka Bibulu kalan loon o loon (Efɛzikaw 5:15, 16 kalan). Jehova Seere caaman ye labɛnw kɛ walisa ka wagati sɔrɔ ka se ka Bibulu kalan loon o loon. U b’o kɛ sɔgɔma, sufɛ wala wagati wɛrɛ la. Olu ni zaburu sɛbɛbaga ka miiriyaw ye kelen ye. Ale y’a sɛbɛ ko: “E ka sariya koo ka di ne ye haali. Loon o loon ne be miiri a la.”—Zab. 119:97.

5, 6. a) An ye min kalan Bibulu kɔnɔ, mun na a kɔrɔtanin lo an ka miiri o kan? b) An be se ka miiri o kan koɲuman cogo di? c) Ka Bibulu kalan ani ka miiri a kan, o be ele nafa cogo di?

⁵ Nka, Bibulu kalan dɔrɔn tɛ bɔri kɛ. An ye min kalan, an ka ɲi ka miiri o kan koɲuman (Zab. 1:1-3). N’an y’o kɛ, an bena se ka tagama ka kɛɲɛ ni Bibulu ka hakilitigiya kumaw ye. An be se ka Bibulu kalan sɛbɛ kan, wala telefɔni, tablɛti, ɔridinatɛri n’a ɲɔgɔnnaw kan. A mana kɛ min o min ye, an b’a fɛ k’a to Ala ka Kuma k’an ka ɲɛnamaya kɛcogo yɛlɛma. An b’a fɛ fana a k’an lasun ka koow kɛ.

⁶ An ye min kalan Bibulu kɔnɔ, an be se ka miiri o kan koɲuman cogo di? Mɔgɔ caaman y’a kɔrɔsi ko n’u ye fɛɛn  dɔ kalan Bibulu kɔnɔ, nafa b’a la u ka lɔ dɔɔni ani k’u yɛrɛ ɲininga ko: “Nin koo be mun lo yira ne la Jehova koo la? N’ ye min kalan, n’ b’o sira tagamana cogo di? N’ bele ka ɲi ka yɛlɛmani jumanw lo kɛ?” N’an be miiri Ala ka Kuma kan ani ka delili kɛ a koo la, o bena an lasun ka Bibulu ka ladiliw sira tagama koɲuman. O la, fanga min be Ala ka Kuma na, an bena o ye an ka ɲɛnamaya kɔnɔ.—2 Kor. 10:4, 5.

7. An ka ɲi ka baara kɛ ni Ala ka Kuma ye koɲuman waajuli la cogo di?

⁷ Mun lo bena an dɛmɛ ka baara kɛ ni Ala ka Kuma ye koɲuman waajuli la? N’an be waajuli kɛra wala n’an be mɔgɔw kalanna, an ka ɲi ka baara kɛ ni Bibulu ye bɛrɛbɛrɛ. Balimacɛ dɔ y’a fɔ ko: “N’i be waajuli kɛra soo ni soo ni Jehova ye, yala ele dɔrɔn lo bena to ka kuma mɔgɔw fɛ wala i bena a to ale fana ka kuma?” A tun b’a fɛ ka min fɔ, o ye ko: N’i be sin ka Ala ka Kuma kalan mɔgɔ dɔ ye waajuli la, a be komi i b’a tora Jehova yɛrɛ lo ka kuma o tigi fɛ. O la, n’i ye vɛrise bɛnnin dɔ kalan, nafa b’o la ka tɛmɛ i ka kumaw bɛɛ kan (1 Tes. 2:13). I k’i yɛrɛ ɲininga ko: “Ni n’ be kibaro diiman fɔra mɔgɔw ye, yala n’ be tɛmɛ sababuw bɛɛ fɛ ka Ala ka Kuma yɔrɔ dɔ kalan u ye wa?”

8. Ka vɛrise kalan mɔgɔ dɔ ye waajuli la, mun na o dɔrɔn tɛ bɔri kɛ?

⁸ Ka vɛrise dɔ kalan mɔgɔ dɔ ye waajuli la, o dɔrɔn tɛ bɔri kɛ. Mun na do? Sabu mɔgɔ caaman tɛ bɛrɛ lɔn Bibulu koo la. Dɔw yɛrɛ tɛ foyi faamu Bibulu la. Saan kɛmɛkulu fɔlɔ la, koow tun be ten le fana (Ɔrɔm. 10:2). O kosɔn, n’an ye bibulusen dɔ kalan mɔgɔ ye, an man ɲi k’a miiri k’o tigi bena a faamu a yɛrɛ ma. An ka ɲi ka segi vɛrise ka kumadenw n’a ka miiriya jɔnjɔnw kan ani k’u kɔrɔ ɲɛfɔ a ye. N’an b’o kɛ, an bena a to Ala  ka Kuma k’an lamɛnbaga dusukun sɔrɔ.—Luka 24:32 kalan.

9. An be min fɔ ka sɔrɔ ka bibulusen dɔ kalan, o be se ka mɔgɔw dɛmɛ cogo di ka bonya la Bibulu kan? Ɲɛyirali dɔ fɔ.

⁹ An be min fɔ ka sɔrɔ ka bibulusen dɔ kalan, o fana be se k’a to mɔgɔw be bonya la Bibulu kan. Ɲɛyirali fɛ, an be se k’a fɔ ko: “An k’a filɛ an Danbaga be min fɔ o koo la.” N’an barokɛɲɔgɔn tɛ kerecɛn ye, an be se k’a fɔ ko: “A filɛ Kitabu senuman be min fɔ o koo la.” N’an be mɔgɔ dɔ waajura min t’a mako don diinanko la, an be se k’a ɲininga ko: “Yala i delila ka ntalen kuma kɔrɔ nin mɛn wa?” Tiɲɛn na, an b’a fɛ k’an janto mɔgɔ kelen kelen bɛɛ ka koow cogoya la. Ani, an ka baro dadon cogo dɔ la min bena a to a tigi b’a mako don kibaro diiman na.—1 Kor. 9:22, 23.

10. a) Balimacɛ dɔ ka wale lakali. b) Fanga min be Ala ka Kuma na, ele y’o ye i ka waajuli baara la cogo di?

¹⁰ Mɔgɔ caaman y’a kɔrɔsi ko n’u be baara kɛ ni Ala ka Kuma ye waajuli la, o be nɔɔba to u lamɛnbagaw kan. An ka balimacɛ dɔ ka wale lajɛ. O balimacɛ tagara bɔ cɛkɔrɔba dɔ ye a tun be to ka an ka zurunaliw di min ma kabi saan damanin. Nka, sanni a ka Kɔrɔsili Sangaso kura di o cɛɛ ma dɔrɔn, a y’a latigɛ ka vɛrise dɔ kalan min tun be sɔrɔ o zurunali kɔnɔ. A ye 2 Korɛntikaw 1:3, 4 kalan Bibulu kɔnɔ. A fɔra o vɛrise kɔnɔ ko: “Ala tanu, . . . makaritigi lo, ale lo be mɔgɔ bɛɛ jigi tugu. Ale lo b’an jigi tugu an ka tɔɔrɔ bɛɛ la.” O kumaw y’o cɛɛ dusu sɔrɔ fɔɔ a ko an balimacɛ k’o vɛrise kalan tugun. O cɛɛ y’a fɔ ko ale n’a muso mako be dususalo la kosɔbɛ ani a y’a daminɛ k’a mako don Bibulu ka kumaw na. Fanga min be Ala ka Kuma na, o be nɔɔ to mɔgɔw kan waajuli la. Tiɲɛn tɛ?—Kɛw. 19:20.

11. Balima minw ka ɲi ka kalan kɛ tintin kan, olu be ni kunkanbaaraba juman lo ye?

¹¹ A ka di an bɛɛ ye ka taga kafo ka lajɛnw ni lajɛnbaw la. Kuun jɔnjɔn min kama an be taga o lajɛnw na, o ye ka Jehova bato. Ka fara o kan, an be kalan minw sɔrɔ yen, u b’an nafa kosɔbɛ. Balimacɛ minw be kalan kɛ tintin kan o lajɛnw na, nɛɛmaba lo u fɛ ka se k’o kɛ. Nka, u ka ɲi k’a faamu k’o ye kunkanbaaraba lo ye fana (Zaki 3:1). O kama, u ka ɲi k’u ka kalan basigi Ala ka Kuma lo kan tuma bɛɛ. N’i ka ɲi ka kalan dɔ kɛ tintin kan, fanga min be Ala ka Kuma na, i be se ka baara kɛ n’o ye cogo di walisa k’i lamɛnbagaw dusukun sɔrɔ?

12. Kalankɛla be se k’a ka kalan basigi Bibulu kan cogo di?

¹² I janto k’i ka kalan basigi Bibulu kan (Zan 7:16). O kɔrɔ ko di? O kɔrɔ ko, i be wale ni ɲɛyirali minw lakali ani i yɛrɛ ka kalan kɛcogo man kan k’i bali ka vɛrisew ɲɛfɔ bɛrɛbɛrɛ. A to i hakili la ko ka vɛrise damanin kalan o dɔrɔn t’a yira ko i ka kalan basiginin be Bibulu kan. N’i ye vɛrise caamanba fana kalan, u tɛna to mɔgɔw hakili la. O la, i bena vɛrise jɔnjɔn minw kalan, u sugandi ka ɲɛ. O kɔ, wagati ta k’u kalan, k’u ɲɛfɔ, ka ɲɛyiraliw di u koo la ani a yira mɔgɔ be se k’u sira tagama cogo min na (Neemi 8:8). N’i ka kalan basiginin be ɔriganisasiyɔn ka pilan dɔ kan, a lajɛ koɲuman ani vɛrise minw b’a kɔnɔ, olu fana sɛgɛsɛgɛ. A ɲini k’a lɔn jɛn min be pilan ka miiriyaw ni vɛrisew cɛ. O kɔ, vɛrise dɔw sugandi walisa ka pilan ka miiriyaw bɔ kɛnɛ kan. (Ladili ɲumanw be sɔrɔ gafe nin kalansen 21nan, 22nan ani 23nan  kɔnɔ: Tirez profit de l’École du ministère théocratique.) A kɔrɔtanin lo i ka Jehova deli a k’i dɛmɛ i k’a yira ka gwɛ ko nafa b’a ka Kuma na.—Ɛsidirasi 7:10; Talenw 3:13, 14 kalan.

13. a) Lajɛn dɔ la, bibulusen dɔ kalan ye nɔɔba to balimamuso dɔ kan cogo di? b) Lajɛnw na, an ka kalanw basiginin lo Bibulu kan. Ele be nafa sɔrɔ o kalanw na cogo di?

¹³ Balimamuso dɔ be Ɔsitarali jamana na. Tuma min na a tun ye denmisɛn ye, u ye koo jugu caaman kɛ a la. Kɔfɛ, a sɔnna Bibulu ka kibaro diiman na ani a y’a yɛrɛkun di Jehova ma ka batize. O n’a ta bɛɛ, a bele tun lanin t’a la ko Jehova b’ale kanu. Nka kɔfɛ, a lara o la. Mun lo y’a dɛmɛ k’a ka miiriya yɛlɛma? Lajɛn dɔ la, a ye bibulusen dɔ kalan lamɛn min ye nɔɔba to a kan. A miirila o vɛrise kan ani k’a filɛ o ni vɛrise wɛrɛw be taga ɲɔgɔn fɛ cogo min na. * Yala kafo ka lajɛn wala lajɛnba dɔ la, u delila ka bibulusen dɔ kalan min ye nɔɔ to i kan fana o cogo kelen na wa?—Neemi 8:12.

14. An b’a yira cogo di ko Jehova ka Kuma koo ka di an ye?

¹⁴ Jehova y’a ka Kuma di an ma, o min ye Bibulu ye. Yala an t’a waleɲuman lɔn o kosɔn wa? A y’a ka Kuma di an ma sabu a b’an kanu. Nka, o dɔrɔn tɛ. A ye layidu min ta ko a ka Kuma bena to, a y’o fana dafa (1 Piyɛri 1:24, 25). Siga t’a la, a ka ɲi an ka Ala ka Kuma kalan loon o loon ani k’a sira tagama. An ka ɲi fana ka baara kɛ n’a ye walisa ka mɔgɔ wɛrɛw dɛmɛ. N’an b’o kɛ, an b’a yira sɔbɛ la ko Ala ka Kuma koo ka di an ye ani ko an be Bibulu jati fɛɛn nafamanba ye. Min yɛrɛ kɔrɔtanin lo ka tɛmɛ fɛɛn bɛɛ kan, o ye ko n’an b’o kɛ, an b’a yira ko an be Jehova Ala kanu, ale min ye Bibulu Tigi ye.