DUNIƝA kuru bɛɛ kɔnɔ, diinan mɔgɔkɔrɔw ka kunkanbaaraw ka di u ye kosɔbɛ. An b’u waleɲuman lɔn kosɔbɛ u ka baara kosɔn! Nka a ma mɛɛn, yɛlɛmani dɔ kɛra. Diinan mɔgɔkɔrɔ minw kɔrɔla, u k’olu k’u ka kunkanbaaraba dɔw kalifa kanbele dɔw ma minw ye diinan mɔgɔkɔrɔw ye. O yɛlɛmani ɲɛsinna kunkanbaara jumanw lo ma?

Kafokulu kɔrɔsibagaw ani minw be fɔrɔmasɔn di an ka Bibuluko lakɔliw la, olu tɛ se k’o baara kɛ tugun n’u ye saan 70 sɔrɔ. Diinan mɔgɔkɔrɔ minw be ni saan 80 ye, olu fana tɛ se ka kunkanbaara dɔw dafa tugun. U tɛ se ka kɛ diinan mɔgɔkɔrɔw jɛnkulu wala tɔnbolo ka kɔmite ka kɔrdinatɛriw ye. O kunkanbaaraw ka ɲi ka kalifa diinan mɔgɔkɔrɔw ma minw ye kanbelew ye. Balima cɛkɔrɔbaw y’o koo ta cogo di? U ye kantigiya kɛ Jehova n’a ka ɔriganisasiyɔn ye!

Ken tun ye tɔnbolo dɔ ka kɔmite kɔrdinatɛri ye saan 49 ɲɔgɔn kɔnɔ. A ko: “O yɛlɛmani diyara n’ ye kosɔbɛ. N’ y’o kunnafoni mɛn loon min na, o loon sɔgɔma, n’ tun ye Jehova deli ko an mako be kanbele dɔ la walisa a ka kɛ tɔnbolo ka kɔmite kɔrdinatɛri ye.” Duniɲa kuru bɛɛ kɔnɔ, balima  cɛkɔrɔba kantigiw be ni miiriya ɲuman ye o yɛlɛmani koo la i ko Ken. Nka, komi a tun ka di u ye ka baara kɛ u balimaw ye, dɔw jigi tigɛra dɔɔni a daminɛ na.

Esperandio tun ye diinan mɔgɔkɔrɔw jɛnkulu ka kɔrdinatɛri ye a ka kafo kɔnɔ. A ko: “O yɛlɛmani ye n’ dusu tiɲɛ dɔɔni.” Nka, a sɔnna a ma ko: “Komi n’ ka kɛnɛyako tun be nagasira, n’ mako tun be wagati la walisa ka n’ janto o la.” Esperandio tora ka baara kɛ Jehova ye ni kantigiya ye ani kafodenw b’a waleɲuman lɔn a ka baara kosɔn.

Dɔw tun ye kɔrɔsibaga tagamakɛlaw ye kabi saan caaman ani u y’o baara dabila o yɛlɛmani kosɔn. Olu be mun lo miiri do? Allan y’o baara kɛ saan 38 kɔnɔ. A ko: “N’ y’o mɛn loon min na, n’ dusu tiɲɛna.” O bɛɛ n’a ta, a sɔnna a ma ko nafa b’a la ka fɔrɔmasɔn di kanbelew ma. A tora ka baara kɛ Jehova ye ni kantigiya ye.

Saan 40 kɔnɔ, Russell tun ye kɔrɔsibaga tagamakɛla ye ani a tun be fɔrɔmasɔn di an ka Bibuluko lakɔliw la. A ko a daminɛ na, ale n’a muso jigi tigɛra. A y’a fɔ fana ko: “An ka cidenya baara tun ka di an ye kosɔbɛ ani fanga bele tun b’an na ka to k’o baara kɛ.” Russell n’a muso ye fɔrɔmasɔn ni lɔnniya minw sɔrɔ, u b’o kɛra k’u ka kafodenw mako ɲɛ.

N’a sɔrɔ an ma deli ka kɛ n’o balimaw dusukunnakow ɲɔgɔn ye. Nka, maana min lakalila Samuyɛli ka kitabu 2nan kɔnɔ, o be se k’an dɛmɛ k’o balimaw faamu.

Miiri k’a filɛ tuma min na masacɛ Dawuda dencɛ Abisalɔn murutira a kama. Dawuda bolila ka bɔ Zeruzalɛmu ka taga Maanayimu, Zurudɛn baji kɔrɔn fan fɛ. O yɔrɔ la, Dawuda n’a ka jama mako tun be dumunifɛnw na. I hakili b’a la min kɛra wa?

Cɛɛ saba bɔra o mara la ka na dilanw, dumunifɛnw ani minan dɔw di Dawuda n’a ka jama ma. Barizilayi tun y’o cɛɛw dɔ ye (2 Sam. 17:27-29). Komi Abisalɔn ka murutiliko tun banna, Dawuda tun be se ka kɔsegi Zeruzalɛmu sisan. Barizilayi y’a bila sira Zurudɛn baji daa la. Dawuda y’a fɔ a ye ko u ka taga ɲɔgɔn fɛ Zeruzalɛmu, ko ale bena to ka dumuni di a ma. Barizilayi mako tun t’o fɛɛnw na sabu “nafolotigi tun lo.” (2 Sam. 19:32-34). A tun be koo caaman lɔn. O kama, Dawuda tun b’a fɛ a ka kɛ ale ladibaga ye. Siga t’a la, Barizilayi tun bena nɛɛmaba sɔrɔ ka ɲɛnamaya kɛ masaso kɔnɔ ani ka baara kɛ yen!

Barizilayi tun b’a seko daan lɔn. O kama, a y’a fɔ ko ale be ni saan 80 ye. O kɔ, a y’a fɔ tugun ko: “Ne be se ka fɛnɲuman lɔn k’a bɔ fɛnjugu la wa?” A tun b’a fɛ ka mun lo fɔ? Barizilayi ye hakilitigiya sɔrɔ a ka ɲɛnamaya kɔnɔ. A bele tun be se ka ladili ɲumanw di i ko “cɛkɔrɔbaw” ye ladili ɲumanw di masacɛ  Orobowamu ma kɔfɛ cogo min na (1 Mas. 12:6, 7; Zab. 92:13-15; Talenw 16:31). O la, Barizilayi tun b’a fɛ ka mun lo fɔ tuma min na a ko ale tɛ se ka fɛɛn ɲuman ni fɛɛn jugu lɔn ka bɔ ɲɔgɔn na? N’a sɔrɔ a tun kaan be koo dɔw lo ma, a tun tɛ se ka minw kɛ tugun kɔrɔya kosɔn. A sɔnna a ma ko a tɛ se ka dumuni diyabɔ ani ka mɛnni kɛ ka ɲɛ tugun kɔrɔya kosɔn (Waaj. 12:4, 5). O kama, a y’a fɔ Dawuda ye ko a ka taga ni kanbele Kimuyamu ye Zeruzalɛmu. N’a sɔrɔ a dencɛ tun lo.—2 Sam. 19:36-41.

An kumana yɛlɛmani min koo la barokun daminɛ na, o bɛnnin lo ni Barizilayi ka kumaw ye. Tiɲɛn lo ko bi, o yɛlɛmani ma kɛ ka kɛɲɛ ni bɛɛ ka koow cogoya n’a seko dama lo ye i ko Barizilayi tun y’a kɛ cogo min na. Nka, an y’a filɛ koɲuman min tun bena balima cɛkɔrɔbaw nafa duniɲa kuru bɛɛ kɔnɔ.

Balima cɛkɔrɔbaw b’u seko daan lɔn. O kama, u y’a faamu ko komi ɲɛtaga be kɛra, kunkanbaara minw tun kalifara u ma kabi wagatijan, u ka ɲi k’o kalifa kanbelew ma. O la, Jehova ka ɔriganisasiyɔn bena sabati. Tuma caaman na, balima cɛkɔrɔbaw yɛrɛ lo be fɔrɔmasɔn di o kanbelew ma. U b’o kɛ i ko Barizilayi ye fɔrɔmasɔn di a dencɛ ma ani ciden Pol ye fɔrɔmasɔn di Timote ma cogo min na (1 Kor. 4:17; Filip. 2:20-22). Kanbele minw ye fɔrɔmasɔn sɔrɔ, olu be i n’a fɔ “boɲafɛnw,” Jehova ye minw di kafo ma walisa “Krista farisogo” ka barika sɔrɔ.—Efɛz. 4:8-12; Nɔnburuw 11:16, 17, 29 lajɛ.

Duniɲa kuru bɛɛ kɔnɔ, balima cɛkɔrɔba dɔw y’u ka kunkanbaara dɔw to yen. Nka, sababu wɛrɛw dira u ma ka dɛmɛ don Jehova ka baara la.

Marco tun ye kɔrɔsibaga tagamakɛla ye saan 19 kɔnɔ. A ko: “N’ ka kafo kɔnɔ, balimamuso dɔw cɛɛw tɛ Jehova Seerew ye. N’ ka koow cogoya yɛlɛmana minkɛ, n’ be se ka n’ mako don o cɛɛw la.”

Geraldo tun ye kɔrɔsibaga tagamakɛla ye saan 28 kɔnɔ. A ko: “Mɔgɔ dɔw sumanin lo Alako ta fan fɛ. An ka laɲinita kura ye k’olu dɛmɛ ani ka bibulukalan kɛ ni mɔgɔ caaman ye.” A y’a fɔ fana ko sisan, ale n’a muso be bibulukalan kɛra ni mɔgɔ 15 lo ye. A ko minw tun sumanin lo Alako ta fan fɛ, u fanba be to ka na lajɛnw na sisan.

An ye Allan min kofɔ, ale ko: “Sisan, sababu caaman b’an fɛ ka waajuli kɛ bɛrɛbɛrɛ. An be se ka waajuli kɛ jamayɔrɔw ni jagokɛyɔrɔw la ani an be se k’an sigiɲɔgɔnw waaju. U la mɔgɔ fila yɛrɛ nana Masaya Boon na.”

N’i ye balimacɛ kantigi ye, baara wɛrɛ kalifara min ma kafo kɔnɔ ani see bele b’i ye, i be se ka dɛmɛ don Jehova ka baara la cogo wɛrɛ la. I be se ka kanbelew dɛmɛ i ka kafo kɔnɔ ka koo caaman faamu. Russell min kofɔra ka tɛmɛ, ale ko: “Jehova be fɔrɔmasɔn dira kanbele setigiw ma ani a be baara kalifara u ma. Komi fanga b’u la, u be se ka mɔgɔw kalan ani ka kafodenw dɛmɛ bɛrɛbɛrɛ. U ka dɛmɛ be balimaw nafa kosɔbɛ!”—Koorilen nin lajɛ: “ Kanbelew dɛmɛ u ka baara kɛ bɛrɛbɛrɛ n’u ka setigiya ye.”

Kɔsa la, baara wɛrɛ kalifara i ma wa? N’o lo, koow filɛ ni ɲɛɛ ɲuman ye. I ye baara kɛ ni kantigiya ye ani o ye balima caaman nafa. I bele be se ka to k’o kɛ. Balimaw b’i kanu ani u bele bena to k’i kanu.

Min yɛrɛ kɔrɔtanin lo kosɔbɛ, o ye ko i koo ka di Jehova ye. I ‘ye baara min kɛ, ka koɲuman min kɛ ka tɛmɛ, ani i be minw kɛra sisan ka Ala ka mɔgɔw dɛmɛ, k’a yira Ala la ko a koo ka di i ye, Ala tɛna ɲinɛ o si kɔ.’ (Eburuw 6:10). O vɛrise b’an bɛɛ hakili sigi  ko Jehova b’a hakili to an ka kɛtaw la. Nka o dɔrɔn tɛ. I koo ka gwɛlɛ a ma fana. O kama, i ye jijali minw kɛ ani i be minw kɛra sisan walisa k’i koo diya a ye, a tɛna ɲinɛ o kɔ!

Hali ni baara wɛrɛ ma kalifa i ma, i be se ka dɔ kɛ dɔ ye. Cogo di do?

N’a sɔrɔ i ka kafo kɔnɔ, baara wɛrɛ kalifara balima cɛkɔrɔba kantigi dɔ ma. O balimacɛ ka lɔnniya be se k’i nafa. O kama, ladiliw ɲini a fɛ. A ye fɛɛn minw faamu saan caaman kɔnɔ, a filɛ a be koow kɛra ka kɛɲɛ n’o ye cogo min na.

I ye balimacɛ ye min kɔrɔla ani baara wɛrɛ kalifara i ma wa? I ye balimacɛ wala balimamuso ye min be nafa sɔrɔla o cɛkɔrɔba ka baara la wa? A mana kɛ min o min ye, a to i hakili la ko minw ye baara kɛ Jehova ye kabi wagatijan ani u bele be baara kɛra a ye, u koo ka gwɛlɛ a ma u ka kantigiya kosɔn.