1. Yezu ka suu laban na, a kumana mun lo koo la n’a ka kalandenw ye min kɔrɔtanin lo?

YEZU ye suu laban min kɛ n’a ka kalandenw ye, a kumana kanuya koo la siɲɛ 30 ɲɔgɔn. A y’a fɔ u ye ko u ka kan “ka ɲɔgɔn kanu.” (Zan 15:12, 17). U tun bena ɲɔgɔn kanu kosɔbɛ, fɔɔ mɔgɔw tun bena a ye o fɛ k’u y’ale ka kalanden sɔbɛw ye (Zan 13:34, 35). O kanuya tɛ dusukunnakow dama lo ye. Jogo barikaman lo ani o jogo be mɔgɔ min na, o tigi t’a yɛrɛ nafa ɲini. Yezu y’a fɔ ko: “K’i yɛrɛ nii di i teriw kosɔn, kanuya wɛrɛ te yen min ka fisa n’o ye. Aw ye ne teriw ye ni aw be sɔn ka ne ka cii bato.”—Zan 15:13, 14.

2. a) Bi, mun lo b’a yira ko an ye Jehova sagokɛlaw ye? b) An bena ɲiningali jumanw lo jaabi barokun nin na ?

² Bi, Jehova sagokɛlaw be ɲɔgɔn kanu sɔbɛ la, u t’u yɛrɛ nafa ɲini ani u kaan bɛnnin lo. O kanuya lo b’a yira k’u ye Ala sagokɛlaw ye (1 Zan 3:10, 11). An ka jamana, an ka siya, an ka kaan, an bɔyɔrɔ ani an lamɔcogo mana kɛ min o min ye, an be ɲɔgɔn kanu kosɔbɛ! Nka, n’a sɔrɔ an b’an yɛrɛ ɲininga ko: “Mun na kanuya kɔrɔtanin lo kosɔbɛ bi? Jehova  ni Yezu b’an barika bonya ni kanuya ye cogo di? Kanuya min be ‘dɔ fara mɔgɔ wɛrɛw barika kan,’ an kelen kelen bɛɛ be se k’o yira cogo di?”—1 Kor. 8:1, ABM.

3. An be wagati gwɛlɛ minw na, u be nɔɔ jumanw to mɔgɔw kan?

³ An be wagati gwɛlɛw lo la ani “tɔɔrɔ ni ɲani” ka ca (Zab. 90:10; 2 Tim. 3:1-5). Mɔgɔ caamanba tɔɔrɔnin lo fɔɔ duniɲa lɔgɔ bɔra u la. Saan o saan, mɔgɔ 800000 ni kɔ b’u yɛrɛ faga. O kɔrɔ ko sekɔndi 40 o sekɔndi 40 kɔnɔ, mɔgɔ kelen b’a yɛrɛ faga. A fɔ man di nka, hali balima dɔw y’u yɛrɛ faga gwɛlɛyaw kosɔn.

4. Bibulu kɔnɔ, mɔgɔ jumanw lo tun y’a fɔ ko n’u sara o ka fisa?

⁴ Bibulu sɛbɛwagati la, Jehova sagokɛla kantigi dɔw dusu kasira kosɔbɛ gwɛlɛyaw kosɔn, fɔɔ u yɛrɛ tun b’a miiri ko n’u sara o ka fisa. Ɲɛyirali fɛ, Zɔbu tun tɔɔrɔnin lo kosɔbɛ ani a y’a fɔ ko: “Koo nigɛ bɔra! . . . Tɔnɔ te n ka ɲɛnamaya la tugu.” (Zɔbu 7:16; 14:13). Zonasi jigi tigɛra fɔɔ a y’a fɔ ko: “Sisan Masaba, e ka kalifa minɛ ne la, bari ne ka sa, o ka fisa ne ma ne ka to nii na.” (Zonasi 4:3). Dusukasi kosɔn, kira kantigi Eliya fana y’a fɔ ko: “A ser’a daan ma, sisan Masaba, ne nii minɛ.” (1 Mas. 19:4). Nka, o sagokɛla kantigiw tun koo ka gwɛlɛ Jehova ma ani a tun t’a fɛ u ka sa. Sanni a k’u jalaki o miiriya juguw kosɔn, a y’u dɛmɛ ɲɛnamaya diyara u ye tugun. A y’u barika bonya ni kanuya ye fana walisa u ka to ka baara kɛ ale ye kantigiya la.

5. Mun na balima caaman mako b’a la an k’u kanu bi ka tɛmɛ sanga ni wagati bɛɛ kan?

⁵ Bi, gwɛlɛyaw b’an balima caaman kan ani u mako b’a la an k’u kanu. Mɔgɔw be balima dɔw lɔgɔbɔ wala k’u tɔɔrɔ. U be dɔ wɛrɛw kɔrɔfɔ wala k’u tɔgɔjugu fɔ u ka baarakɛyɔrɔ la. A be se ka kɛ fana k’u sɛgɛnnin lo sabu u be lɛri caaman kɛ baara la wala u niin degunnin lo u ka baara kosɔn. Gwɛlɛyaw be dɔ wɛrɛw fana kan u ka denbaya kɔnɔ. N’a sɔrɔ u furuɲɔgɔnma tɛ Jehova Seere ye ani a b’u kɛlɛ tuma o tuma. O koow n’a ɲɔgɔnnaw lo b’a to balima caaman b’a miiri ko fanga t’u la tugun ani u yɛrɛ b’a daminɛ ka miiri ko nafa si t’u la. Jɔn lo be se k’u dɛmɛ do?

6. Jehova b’a sagokɛlaw barika bonya ni kanuya ye cogo di?

⁶ Jehova b’a sagokɛlaw hakili sigi ko a b’u kanu ani ko a bena to k’u kanu fɔɔ abada. Miiri k’a filɛ Israɛlden kantigiw jijara cogo min na tuma min na Jehova y’a fɔ u ye ko: “Aw koo ka gwɛlɛ ne ma, aw ye fɛnba ye ne fɛ, aw koo ka di n ye fana. . . . Aw kana siran, bari, ne be ni aw ye.” (Ezayi 43:4, 5). An b’a lɔn ko an kelen kelen bɛɛ koo ka gwɛlɛ Jehova ma. * Bibulu b’a fɔ ko: “Kɛlɛmasaŋana lo, a be see d’i ma. A nisɔndiyanin lo i kosɔn kosɔbɛ.”—Sof. 3:16, 17.

7. Bamuso b’a deen kanu cogo min na, cogo juman na Jehova b’an kanu ten? (Jaa lajɛ, barokun daminɛ na.)

⁷ Jehova ye layidu ta ko a bena a sagokɛlaw dɛmɛ ani k’u dusu saalo u ka gwɛlɛyaw mana kɛ min o ye min ye. A  ko: “Aw bena siin min, u bena aw ta u gɛrɛn na, k’aw nigɛnigɛ u kunbiri kan. Bamuso b’a deen dusu saalo cogo min na, ne bena aw dusu saalo ten.” (Ezayi 66:12, 13). Miiri k’a filɛ: Bamuso dɔ b’a deen ta ani a be tulon kɛra n’a ye! O deen latanganin lo a bamuso bolo. O cogo kelen na, Jehova b’a sagokɛlaw kanu kosɔbɛ ani a b’a fɛ u k’a ye ko u latanganin lo. O kama, la a la ko i koo ka gwɛlɛ Jehova ma.—Zer. 31:3.

8, 9. Yezu ka kanuya b’an barika bonya cogo di?

⁸ Kuun wɛrɛ be yen min b’an dɛmɛ k’a lɔn ko Jehova b’an kanu. Bibulu b’a fɔ ko: “Ala ye diɲɛ kanu haali, fɔɔ a y’a Deen kelenpe ci mɔgɔw ma, waasa ni mɔgɔ min y’a jigi la a kan, o tigi kana halaki, nga o ka [ɲɛnamaya] banbali sɔrɔ.” (Zan 3:16). Yezu y’a niin saraka an kosɔn. O b’a yira ko ale fana b’an kanu ani o kanuya b’an barika bonya. Ala ka Kuma b’a fɔ ko “hakiliɲagami” wala “tɔɔrɔ” tɛ se “k’an faran ka bɔ Krista ka kanuya la.”—Ɔrɔm. 8:35, 38, 39.

⁹ Tuma dɔw la, an ka gwɛlɛyaw b’an barika dɔgɔya farikolo ani dusukunnako ta fan fɛ. U yɛrɛ be se k’a to an tɛ ninsɔndiya sɔrɔ Jehova ka baara la tugun. Krista b’an kanu cogo min na, n’an be to ka miiri o la, o be se ka fanga di an ma walisa an ka se ka gwɛlɛyaw muɲu (2 Korɛntikaw 5:14, 15 kalan). Yezu ka kanuya b’a to ɲɛnamaya lɔgɔ tɛ bɔ an na ani a b’an lasun ka baara kɛ Jehova ye. O kanuya be se k’a to an t’an fari faga hali ni gwɛlɛya nunu b’an kan: balawo, tɔɔrɔ, jigitigɛ wala hami.

10, 11. Balima minw jigi tigɛra, jɔn lo ka kan k’u barika bonya? A ɲɛfɔ.

¹⁰ Jehova be tɛmɛ kafo sababu fɛ fana k’an barika bonya ni kanuya ye. N’an b’an balimaw kanu, an b’a yira ko an be Jehova kanu. An b’an seko bɛɛ kɛ k’u dɛmɛ walisa u k’a lɔn ko nafa b’u la ani ko Jehova b’u kanu (1 Zan 4:19-21). Ciden Pol ye kerecɛnw jija ko: “Aw ka ɲɔgɔn jija ka dɔ fara ɲɔgɔn barika kan, i  ko aw b’a kɛ cogo min na ka ban.” (1 Tes. 5:11, ABM). Kafo kɔnɔ, bɛɛ be se ka Jehova ni Yezu ladegi u kɛtɔ ka balimaw dusu saalo ani k’u jija. Diinan mɔgɔkɔrɔw dɔrɔn lo man kan k’o kɛ.—Ɔrɔmukaw 15:1, 2 kalan.

¹¹ Kafo kɔnɔ, hakiliɲagami bana be dɔw la ani u mako be furakɛli la (Luka 5:31). Diinan mɔgɔkɔrɔw ani kafoden tɔɔw b’a lɔn ko olu tɛ dɔgɔtɔrɔw ye minw be hakiliɲagami bana furakɛ. Nka, u be ni kunkanbaaraba ye. U ka ɲi ka mɔgɔ jigitigɛninw dusu saalo, ka “barikatanw dɛmɛ, ani ka muɲu bɛɛ kɔrɔ.” (1 Tes. 5:14). An kelen kelen bɛɛ ka kan k’a yira ko an be mɔgɔ jigitigɛninw kanu ani ko an be muɲu u kɔrɔ. Ka fara o kan, an ka ɲi k’u dusu saalo an ka kumaw fɛ. O la, an bena u barika bonya. Yala i b’a ɲini ka tɔɔw barika bonya wa? I be se ka mun lo kɛ walisa k’u dusu saalo ani k’u jija kosɔbɛ tugun?

12. Balimamuso dɔ ka kafomɔgɔw y’a jija cogo di?

¹² Balimamuso dɔ be bɔ Erɔpu jamana dɔ la. Ale ko: “Tuma dɔw la, a be n’ kɔnɔ ka n’ yɛrɛ faga. Nka, mɔgɔ caaman be n’ dɛmɛ. N’ ka kafomɔgɔw ye n’ niin kisi. Balimaw be n’ jija kosɔbɛ ani u be n’ kanu tuma bɛɛ. Hali ni mɔgɔ damanin dɔrɔn lo b’a lɔn ko hakiliɲagami bana be n’ na, kafomɔgɔw be n’ dɛmɛ tuma bɛɛ. Balimacɛ dɔ n’a muso be i n’a fɔ n’ bangebagaw Alako ta fan fɛ. U b’u janto n’ na koɲuman ani u labilanin lo ka n’ dɛmɛ suu fara tile kan.” Hakiliɲagami bana be minw na, tiɲɛn lo ko bɛɛ tɛ se k’u dɛmɛ cogo kelen na. Nka, an kelen kelen bɛɛ be se k’an seko kɛ k’u dɛmɛ. *

13. An ka ɲi ka mun lo kɛ walisa ka tɔɔw dusu saalo?

¹³ Lamɛnni kɛ koɲuman (Zaki 1:19). An b’a yira ko an b’an balimaw kanu n’an be makari u la k’u lamɛn. I balima ɲininga nɛmɛnɛmɛ walisa k’a dusukunnakow faamu. A to a k’a ye i ɲɛda fɛ ko i b’i janto a la sɔbɛ la. N’a be kumana, muɲu k’a lamɛn koɲuman ani kana kuma tigɛ a daa. N’i b’a lamɛn koɲuman, i bena se k’a lɔn a dusukunnakow ye min ye sɔbɛ la ani o fana bena a to a be la i la. O la, a tɛna gwɛlɛya a ma k’i lamɛn n’i b’a ɲinina k’a dɛmɛ. I bena se ka mɔgɔw dusu saalo kosɔbɛ n’i b’a yira ko i b’i janto u la sɔbɛ la.

14. Mun na an t’a fɛ ka tɔɔw jalaki?

¹⁴ Kana u jalaki. Hakiliɲagami bana be mɔgɔ min na, a tigi ka koow be se ka juguya n’a b’a miiri ko an b’a jalakira. O bena a to a be gwɛlɛya an ma k’a tigi dɛmɛ. Bibulu b’a fɔ ko: “Mɔgɔ min be kuma a kunfɛ, a be digi mɔgɔ la i ko murujan. Nga lɔnnikɛla ka kuma be mɔgɔ dusu suma.” (Talenw 12:18). Hakiliɲagami bana be mɔgɔ min na, an kɔni tɛna tugu ka kuma fɔ min bena digi a la. Nka, n’an be kuma an kunfɛ, o be se k’a tɔɔrɔ kosɔbɛ. An k’a to an balima k’a lɔn ko an b’a fɛ k’a faamu sɔbɛ la. O  la, an bena se k’a hakili sigi.—Mat. 7:12.

15. Sɛgɛsɛgɛrikɛ minan jumanw lo be se k’an dɛmɛ ka balimaw jija ni kanuya ye?

¹⁵ Mɔgɔw dusu saalo ni Ala ka Kuma ye (Ɔrɔmukaw 15:4, 5 kalan). Dususalo ni jigitugu kuma nafamanw lo fanin be Ala ka Kuma senuman kɔnɔ. “Ala min be muɲuli di mɔgɔ ma ani k’a jigi tugu,” ale lo ye Bibulu tigi ye. Ka fara Bibulu kan, sɛgɛsɛgɛrikɛ minanw b’an fɛ i n’a fɔ Index des publications des Témoins de Jéhovah ani Guide de recherche. U be se k’an dɛmɛ ka vɛrisew wala gafe dɔw sɔrɔ, an be se ka basigi minw kan ka balimaw dusu saalo ani k’u jija.

16. Hakiliɲagami bana be mɔgɔ minw na, jogo jumanw lo bena an dɛmɛ k’u jija?

¹⁶ A yira ko i b’u kanu ani i dusu suma u kɔrɔ. Jehova ye “makaritigi” Ala ye, a “be mɔgɔ bɛɛ jigi tugu” ani a be “ɲumanya” kɛ a sagokɛlaw ye (2 Korɛntikaw 1:3-6 kalan; Luka 1:78; Ɔrɔm. 15:13). Ciden Pol ye ɲɛyirali ɲuman ye sabu a ye Jehova ka makari ladegi. A ko: “An sabalilen tun don aw cɛma, i ko denbatigi bɛ a yɛrɛ denw mara cogo min na. O dama tɛ, an tun bɛ aw kanu kosɛbɛ, o de kosɔn an labɛnnen tun don ka Ala ka Kibaru Duman di aw ma, hali an niw yɛrɛ, katuguni aw ko diyara an ye kosɛbɛ.” (1 Tes. 2:7, 8, ABM). Hakiliɲagami bana be mɔgɔ minw na, an k’an dusu suma u kɔrɔ i ko Jehova b’a kɛ cogo min na. O la, u be delili kɛra walisa ka dususalo min sɔrɔ, an bena se k’o lase u ma!

17. Koo filɛcogo juman lo bena an dɛmɛ k’an balimaw barika bonya kanuya la?

¹⁷ An k’a lɔn ko an balimaw ye mɔgɔ dafabaliw ye. Koow filɛ ka dɛmɛ kɛɲɛ. Kana a ɲini i balimaw fɛ u ka kɛ mɔgɔ dafaninw ye. N’o tɛ, i jigi ka teli ka tigɛ (Waaj. 7:21, 22). A to i hakili la ko Jehova tɛ koo ɲini a sagokɛlaw fɛ u tɛ se ka min kɛ. N’an be Jehova ladegi, an bena se ka balimaw ka dafabaliyakow muɲu (Efɛz. 4:2, 32). An kana a to u k’a miiri ko u tɛ bɛrɛ kɛra Jehova ka baara la. Nka u be min kɛra, an k’u tando o kosɔn. O be se k’u jija. N’an b’an kɔnɔ gwɛ ka tɔɔw tando, an bena se k’u barika bonya kanuya la. O be se fana k’u dɛmɛ ka ninsɔndiya Jehova ka baara la. Sanni an k’u suma ni tɔɔw ye, a ka fisa an k’u tando.—Gal. 6:4.

18. Mun na an b’a fɛ ka tɔɔw barika bonya ni kanuya ye?

¹⁸ Jehova sagokɛla kelen kelen bɛɛ koo ka gwɛlɛ kosɔbɛ ale ni Yezu ma (Gal. 2:20). An b’an balimaw kanu kosɔbɛ. O kama, an ka ɲi k’u minɛ ni ɲumanya ye. “An ka banba ka to hɛrɛ la ɲɔgɔn fɛ ani ka ɲɔgɔn dɛmɛ ka barika sɔrɔ.” (Ɔrɔm. 14:19). An bɛɛ kɔrɔtɔnin lo ka kɛ alijɛnɛ kɔnɔ. Farifaga tɛna kɛ yen tugun! Mɔgɔ tɛna bana, marifakɛlɛ, saya, tɔɔrɔ ani jigitigɛ tɛna kɛ yen tugun. Gwɛlɛya tɛna kɛ denbaya kɔnɔ fana. Yezu Krista ka saan waa kelen mara tɛmɛnin kɔ, adamadenw bɛɛ bena kɛ mɔgɔ dafaninw ye. Minw bena kantigiya kɛ kɔrɔbɔli laban na, olu bena kɛ Jehova deenw ye dugukolo kan ani u bena “Ala denw ta hɔrɔnya nɔɔrɔ sɔrɔ.” (Ɔrɔm. 8:21, ABM). O kama, an bɛɛ ka kɛ ni kanuya ye min be mɔgɔ barika bonya. An ka ɲɔgɔn dɛmɛ ka kisi ani ka don Ala ka duniɲa kura cɛɲumanba kɔnɔ.