1. Duniɲa kɔnɔ, mɔgɔw b’u yɛrɛ nafa dɔrɔn lo ɲini. O be se ka mun lo kɛ an ka majigilenya la?

AN BE min kalan Ala ka Kuma kɔnɔ, mun na a ka gwɛlɛ k’o sira tagama? A ka gwɛlɛ sabu n’an majiginin tɛ, a man nɔgɔ ka koo ɲuman kɛ. Laban loon nunu na, a man nɔgɔ ka kɛ mɔgɔ majiginin ye sabu mɔgɔ caaman b’u “yɛrɛ kanu, ka wari kanu,” u ye “yɛrɛbonyalaw, kuncɛbaw” ani “yɛrɛminɛbaliw” ye (2 Tim. 3:1-3, NW). An b’a lɔn k’o man ɲi. Nka tuma dɔw la, a be komi minw b’o koow kɛ, koow be ɲɛ u bolo ani u be ɲɛnamaya diyabɔ (Zab. 37:1; 73:3). An yɛrɛ be se k’a fɔ ko: “Yala kuun b’a la tiɲɛn na n’ ka tɔɔw nafa ɲini fɔlɔ wa? Ni n’ majiginin lo, yala mɔgɔw bena to ka n’ bonya wa?” (Luka 9:48). Duniɲa kɔnɔ, mɔgɔw b’u yɛrɛ nafa dɔrɔn lo ɲini. N’an fana b’o ɲɔgɔn kɛ, jɛnɲɔgɔnya ɲuman min b’an ni balimaw cɛ kafo kɔnɔ, an bena o nagasi. A bena gwɛlɛya mɔgɔw fɛ fana k’a lɔn n’an ye kerecɛn sɔbɛw ye. Nka, mɔgɔ majiginin dɔw ka ɲɛyirali lakalila Bibulu kɔnɔ. N’an y’o mɔgɔw ka maanaw kalan ani k’u ladegi, an bena nafaba sɔrɔ o la.

2. Ala sagokɛla minw ye kantigiya kɛ galen, olu ka maanaw b’an nafa cogo di?

 ² Mun lo ye Ala sagokɛlaw dɛmɛ galen ka kɛ Ala teriw ye? U ye mun lo kɛ walisa k’u koo diya Ala ye? Mun lo y’u dɛmɛ u sera ka koo ɲuman kɛ? N’an y’u ka maana kalan Bibulu kɔnɔ ani ka miiri a kan, o bena an ka limaniya barika bonya.

3, 4. a) An be fɔrɔmasɔn sɔrɔ cogo di Alako ta fan fɛ? b) K’an yɛrɛ balo Alako ta fan fɛ, mun na o kɔrɔ tɛ dɔrɔn ka lɔnniya sɔrɔ?

³ An be fɔrɔmasɔn ni ladili ɲuman caaman sɔrɔ Bibulu, an ka gafew, jw.org, JW telewisɔn, lajɛnw ani lajɛnbaw sababu fɛ. Nka, Yezu y’a ɲɛfɔ ko k’an yɛrɛ balo Alako ta fan fɛ, o kɔrɔ tɛ dɔrɔn ka lɔnniya sɔrɔ. A y’a fɔ ko: “Ka n cibaga sago kɛ, o le ye n ka dumuni ye. Ne ka kan k’a ka baara kɛ fɔɔ ka se a daan na.”—Zan 4:34.

⁴ Ka Ala sago kɛ, o tun be komi dumuni Yezu fɛ. O kɔrɔ ko di do? N’an be dumuni ɲuman dumu, o b’an farikolo nafa ani an be to kɛnɛya la. O cogo kelen na, n’an be Ala sago kɛ, o b’an ninsɔndiya ani k’an ka limaniya barika bonya. Ɲɛyirali fɛ, n’a sɔrɔ loon dɔ i tagatɔ waajulikɛyɔrɔ la, i tun sɛgɛnnin lo ani i dusu tun man di. Nka i kɔsegitɔ, i m’a kɔrɔsi ko i ye fanga kura sɔrɔ ani i dusu tun ka di wa?

5. Nafa juman lo b’a la ka kɛ hakilitigi ye?

⁵ Jehova be min ɲini an fɛ, n’an b’o kɛ, o lo b’a yira ko an ye hakilitigiw ye (Zab. 107:43). Hakilitigiya be nafa min lase an ma, Bibulu b’a fɔ o koo la ko: “I ɲɛ bɛ bɔ fɛn o fɛn fɛ, o si tɛ a bɔ. . . . A na kɛ ɲɛnamaya jiri ye a minɛbaaw ye, mɔgɔ o mɔgɔ bɛ a mara, o ye dubaden ye.” (Talenw 3:13-18). Yezu y’a fɔ ko: “Aw y’o koo lɔn, n’aw y’o koo nin kɛ, aw dagamuna.” (Zan 13:17). Yezu ka kalandenw ka ɲi k’a ka cikanw sira tagama walisa ka ninsɔndiya sɔrɔ kudayi. U ka ɲi ka tugu Yezu ka ɲɛyirali kɔ ani k’a ka cikanw labato loon o loon u ka ɲɛnamaya faan bɛɛ la.

6. An be min kalan, mun na an ka ɲi ka to k’o sira tagama?

⁶ Bi, an fana be min kalan, an ka ɲi ka to k’o sira tagama. Miiri mekanisiɲɛ dɔ koo la. Baarakɛminanw ni minan wɛrɛw b’a fɛ ka fara lɔnniya kan. Nka o fɛɛnw tɛ foyi ɲɛ a ye n’a tɛ baara kɛ n’u ye. N’a sɔrɔ a ye mekanisiɲɛ baara kɛ saan caaman kɔnɔ ani a be koo caaman lɔn o koo la. Nka, a ye lɔnniya min sɔrɔ, a ka ɲi ka to ka baara kɛ n’o ye walisa ka se a ka baara la koɲuman. O cogo kelen na, tuma min na an y’a daminɛ ka Bibulu ka kalanw faamu, an dusu tun ka di sabu an tun mana min kalan, an tun b’o sira tagama. Walisa ka ninsɔndiya sɔrɔ kudayi, Jehova b’an kalan min na, an ka ɲi k’an yɛrɛ majigi ka to k’o sira tagama loon o loon.

7. Ala sagokɛla kantigi minw kofɔra Bibulu kɔnɔ, an ka ɲi ka mun lo kɛ walisa ka kalan sɔrɔ u ka koo la?

⁷ An ka koo dɔw lajɛ, o minw na a be se ka gwɛlɛya an ma k’an yɛrɛ majigi. An bena a ye cogo min na Ala sagokɛla kantigiw y’u yɛrɛ majigi o koow ɲɔgɔn na galen. Nka k’o kunnafoniw lajɛ, o dama tɛ mɔgɔ ka limaniya barika bonya. O kama, an ka ɲi ka miiri koɲuman o koow la ani k’u sira tagama.

8, 9. An be kalan juman lo sɔrɔ ciden Pol ka majigilenya koo la Kɛwaliw 14:8-15 kɔnɔ? (Jaa lajɛ, barokun daminɛ na.)

⁸ Ala b’a fɛ “mɔgɔ bɛɛ ka kisi ani ka se ka tiɲɛ lɔn.” (1 Tim. 2:4). Mɔgɔ caaman  minw ma tiɲɛn lɔn fɔlɔ, i be mun lo miiri olu koo la? Ciden Pol tun be Yahutuw waaju, olu minw tun be dɔ lɔn Jehova koo la. Nka, a ma dan olu dɔrɔn ma. Mɔgɔ minw tun be ngalon alaw bato, a ye olu fana waaju. O koo ye Pol ka limaniya kɔrɔbɔ. Cogo di do?

⁹ Ciden Pol ka tagama fɔlɔ la a ka misɔndenya baara sen fɛ, ale ni Barnabasi tagara Lisitire dugu la. Likawɔnika minw b’o dugu la, olu ye Pol ni Barnabasi jati alaw ye. U ye u ka batofɛnw tɔgɔ la u la ko Zusi ni Ɛrimɛsi. Yala Pol ni Barnabasi tɛmɛna o fɛ k’a ɲini k’u koo diya jama ye wa? U tɛmɛna dugu fila minw na ka sɔrɔ ka na Lisitire, u ye kɔrɔbɔli sɔrɔ yen. Yala u tara o ma k’a miiri ko mɔgɔw y’u minɛ cogo min na Lisitire, o ye koo ɲuman ye wa? Yala u y’a miiri ko jama ka kɛta bena a to mɔgɔ caaman be kibaro diiman mɛn wa? Ayi, u m’o miiri abada! U sinna k’u ka fani faran ani ka boli ka taga jama cɛma ka pɛrɛn ko: “Aw be mun le kɛra yan ten? Anw t’aw ɲɔgɔn mɔgɔw ye wa?”—Kɛw. 14:8-15.

10. Kɔrɔ juman na, Pol ni Barnabasi y’a jati k’olu ni Likawɔnikaw ye kelen ye?

¹⁰ Ciden Pol ni Barnabasi ko olu fana ye mɔgɔw ye. O kuma kɔrɔ ko di? A kɔrɔ ko olu fana ye mɔgɔ dafabaliw ye. U tun t’a fɛ k’a fɔ ko olu ka batoli ni Likawɔnikaw ka batoli ye kelen ye. Ala lo tun ye Pol ni Barnabasi ci misɔndenya baara la o dugu la (Kɛw. 13:2). U tun ye kerecɛn mɔlenw ye ani u tun be ni jigiya barikaman ye. Nka, u ma ta o ma k’a miiri k’u ka fisa ni tɔɔw ye. U y’a faamu ko Likawɔnikaw fana tun be se ka jigiya sɔrɔ ka taga ɲɛnamaya kɛ sankolo la n’u sɔnna kibaro diiman ma.

11. An be se ka ciden Pol ka majigilenya ladegi cogo di waajuli baara la?

¹¹ An be se ka ciden Pol ka majigilenya ladegi cogo di? A fɔlɔ, Jehova b’an dɛmɛna ka baara min kɛ, an kana ta o ma k’an yɛrɛ fisaya ni tɔɔw ye. A ka ɲi an kelen kelen bɛɛ k’an yɛrɛ ɲininga ko: “N’ be mun lo miiri n’ ka kafo ka kiinmɔgɔw koo la? Yala n’ be ni miiriya tilenbaliw ye mɔgɔ dɔw koo la wa?” Duniɲa kuru bɛɛ kɔnɔ, Jehova Seerew b’a ɲini k’a lɔn kaan minw be fɔ u ka kiinw kɔnɔ. U b’a fɛ ka mɔgɔ caamanba dɛmɛ u ka kibaro diiman mɛn. Tuma dɔw la yɛrɛ, mɔgɔw b’u yɛrɛ fisaya ni siyamɔgɔ minw ye, Jehova Seerew b’olu ka kaan ani u ka kokɛcogow degi. Nka u t’a miiri fewu k’u ka fisa n’o mɔgɔw ye. U yɛrɛ b’a ɲini ka mɔgɔ kelen kelen bɛɛ faamu walisa ka se ka mɔgɔ caamanba dɛmɛ u ka sɔn Masaya kibaro diiman ma.

12. Epafarasi y’a yira cogo di ko a b’a janto tɔɔw la tiɲɛn na?

¹² Cogo wɛrɛ min na an be se k’a yira ko an majiginin lo, o ye ka delili kɛ an balimaw ye, olu minw ye “an ka jigi ɲanaman ɲɔgɔn sɔrɔ.” (2 Piyɛri 1:1). Epafarasi tun b’o lo kɛ. Bibulu b’a kofɔ siɲɛ saba dɔrɔn ani ciden Pol ye bataki minw sɛbɛ, a kofɔra olu lo kɔnɔ. Ka Pol to kaso la Ɔrɔmu, a ye bataki ci Kɔlɔsikaw ma k’a fɔ ko Epafarasi ‘be to ka Ala deli u ye tuma bɛɛ.’ (Kɔlɔs. 4:12). Epafarasi tun be balimaw lɔn ka ɲɛ ani a tun b’a janto u la kosɔbɛ. Hali k’a sɔrɔ a tun be “kaso la” ni Pol ye, a ma to ka miiri a yɛrɛ dɔrɔn koo la ani ka ɲinɛ tɔɔw kɔ (Filem. 23). A ye dɔ kɛ dɔ ye  walisa k’u dɛmɛ. Epafarasi ye delili kɛ a balimaw ye ani a tun b’u tɔgɔ weele yɛrɛ a ka deliliw la. An fana be se k’o ɲɔgɔn kɛ. Barika b’o delili ɲɔgɔnw na.—2 Kor. 1:11; Zaki 5:16.

13. An be se ka Epafarasi ladegi cogo di an ka deliliw la?

¹³ Miiri k’a filɛ i be se ka delili kɛ mɔgɔ minw ye ani k’u tɔgɔ weele o delili la. Kafodenw ni denbayamɔgɔ minw be ni kunkanbaaraba ye, minw ka ɲi ka desizɔnba dɔ ta wala kɔrɔbɔli be minw kan, an be se ka delili kɛ olu ye i ko Epafarasi. Mɔgɔ caaman be delili kɛ balimaw ye minw tɔgɔ fɔra barokun nin na jw.org kan: “Témoins de Jéhovah emprisonnés en raison de leur foi.” (Yɔrɔ nin lajɛ: SALLE DE PRESSE > VEILLE JURIDIQUE.) Ka fara o kan, balima minw ka mɔgɔ kanulen dɔ sara, minw kisira balawo wala marifakɛlɛ ma kɔsa la ani wariko gwɛlɛya be minw kan, an kana ɲinɛ olu kɔ an ka deliliw la. A gwɛnnin lo ko balima caaman mako b’an ka deliliw la. N’an be delili kɛ u ye, an b’a yira ko an tɛ miiri an yɛrɛ dɔrɔn koo la, nka an be miiri mɔgɔ wɛrɛw koo la fana (Filip. 2:4). Jehova b’o deliliw ɲɔgɔn lamɛn!

14. Mun na Jehova ye lamɛnnikɛla ɲuman ye min ɲɔgɔn tɛ yen?

¹⁴ Fɛɛrɛ wɛrɛ min fɛ an b’a yira ko an majiginin lo, o ye ka lamɛnni kɛ koɲuman. Zaki 1:19 b’a fɔ ko an ka ɲi ka “lamɛnni kɛ ka ɲa.” Jehova ye ɲɛyirali ɲuman ye o koo la (Zɛnɛzi 18:32; Zozuwe 10:14). Ɲɛyirali fɛ, Jehova ni Musa ye baro min kɛ Ɛkizɔdi 32:11-14 kɔnɔ, o lajɛ. (O vɛrisew kalan.) Jehova mako tun t’a la Musa k’a kɔnɔnakow fɔ, o n’a t’a bɛɛ a y’a lamɛn. Mɔgɔ min delila ka fili, yala i be sɔn k’o tigi lamɛn ani k’a ka ladiliw sira tagama wa? Mɔgɔ limaniyanin minw bɛɛ be delili kɛ, Jehova kɔni be muɲu k’olu lamɛn.

15. An be se ka Jehova ladegi cogo di ka bonya la tɔɔw kan?

¹⁵ I yɛrɛ ɲininga ko: “Ni Jehova b’a yɛrɛ majigi ka mɔgɔw lamɛn i ko a ye Ibrayima, Arasɛli, Musa, Zozuwe, Manowa, Eliya ani Ezekiyasi lamɛn cogo min na, yala ne fana man ɲi k’o ɲɔgɔn kɛ wa? Yala n’ be se ka bonya la n’ balimaw bɛɛ kan k’u ka ladiliw lamɛn ani ka n’ seko kɛ k’u ka ladili ɲumanw sira tagama wa? Yala n’ ka kafomɔgɔw wala denbayamɔgɔ dɔw mako b’a la n’ ka n’ tulo malɔ k’u lamɛn koɲuman wa? N’ bena mun lo kɛ o koo ɲɔgɔn na?”—Zɛnɛzi 30:6; Kirit. 13:9; 1 Mas. 17:22; 2 Til. Kib. 30:20.

16. Masacɛ Dawuda ye mun lo kɛ tuma min na Simeyi y’a darabɔ?

¹⁶ Majigilenya b’an dɛmɛ fana ka se an dusu kɔrɔ ni dɔ ye koo jugu kɛ an na (Efɛz. 4:2). Ɲɛyirali ɲuman dɔ be sɔrɔ o koo la 2 Samuyɛli 16:5-13 kɔnɔ. (O vɛrisew kalan.) Masacɛ Sayuli somɔgɔ Simeyi ye Dawuda n’a ka baarakɛdenw nɛni. Dawuda tun be se ka daan sigi o la. Nka sanni a k’o kɛ, a ye Simeyi ka nɛniniw bɛɛ muɲu. Mun lo ye Dawuda dɛmɛ a sera k’a yɛrɛ minɛ? Walisa k’o jaabili sɔrɔ, an ka Zaburu 3nan lajɛ.

17. Mun lo y’a to Dawuda sera k’a yɛrɛ minɛ ani an be se k’a ladegi cogo di?

¹⁷ Dawuda ye Zaburu 3nan sɛbɛ tuma min na a dencɛ Abisalɔn tun b’a ɲinina k’a faga. Vɛrise 2nan ani 3nan ka kumaw  bɛnnin lo ni Samuyɛli ka kitabu 2nan sapitiri 16 kɔnɔkow ye. O wagati lo la Simeyi wulila Dawuda kama. Nka Dawuda ye fanga sɔrɔ k’a yɛrɛ minɛ. Cogo di do? Dawuda y’a fɔ Zaburuw 3:5 kɔnɔ ko: “Ne be n kaan kɔrɔta ka kule Masaba nɔfɛ, a be n jaabi k’a to a ka kulu senuman kan.” Ni mɔgɔ ye koo jugu kɛ an na, an ka ɲi ka delili kɛ i ko Dawuda y’a kɛ cogo min na. O la, Jehova bena a ka hakili senu di an ma walisa an ka se k’o koo muɲu. Yala koo dɔ be yen o min na i ka ɲi k’i yɛrɛ minɛ koɲuman wala ka yafa mɔgɔ dɔ ma wa? Yala i lanin b’a la ko Jehova ɲɛɛ b’i ka tɔɔrɔkow la ani ko a bena i duga wa?

18. N’an be to ka Jehova ka cikanw labato, o bena an nafa cogo di?

¹⁸ N’an be koo tilennin kɛ, an bena kɛ hakilitigiw ye ani Jehova bena an duga. Talenw 4:7 b’a fɔ ko: “I ka sɔn k’i ka nafolo bɛɛ di waasa ka kɛ hakilitigi ye.” Tiɲɛn lo ko hakilitigiya basiginin lo lɔnniya kan. Nka, a tɛ dan koow faamuyali dɔrɔn ma. An ka hakilitigiya be ye an ka desizɔnw lo fɛ, lɔnniya dama tɛ. Hali dugumɛnɛw be hakilitigiyakow kɛ. U be dumuni lajɛn tilemana kama (Talenw 30:24, 25). Krista be weele ko “Ala ka hakilitigiya” sabu a b’a Faa diyanyeko lo kɛ tuma bɛɛ (1 Kor. 1:24, ABM; Zan 8:29). Ala bena an fana duga n’an be to k’an majigi ani ka koo bɛnnin kɛ walisa k’a yira ko an ye hakilitigiw ye (Matiyo 7:21-23 kalan). O kama, an ka banba kafo ka kɛ hɛɛrɛyɔrɔ ye ani yɔrɔ min na bɛɛ be se ka Jehova bato ni majigilenya ye. Walisa ka se ka koo ɲuman kɛ, o be wagati ta ani an ka ɲi ka muɲu. Nka n’an b’o kɛ, an b’a yira ko an majiginin lo. O b’a to an be ninsɔndiya sɔrɔ sisan ani fɔɔ abada!