O vɛrise be mɔgɔ lasun ka miiri. A b’a fɔ ko: “N’i y’a ye n’u be dɛsɛbagatɔw tɔɔrɔla jamana kɔnɔ, ni tilenninya te yen fɔɔ ɲɔgɔntɔɲɔ, i kana kabakoya o la. Bari, mɔgɔbaba mana kɛ yen, mɔgɔbaba wɛrɛw le b’ale kunna. Mɔgɔba wɛrɛ fana ka kɛ olu kunna.”—Waaj. 5:7.

N’an be dan adamadenw ka koow jati cogo dɔrɔn ma, a be se ka kɛ an ɲɛɛ na k’o vɛrise ɲɛsinna faamanw dɔrɔn lo ma. Nka, n’an ye wagati ta ka miiri a kan koɲuman, an b’a ye ko a b’an dɛmɛ ka tiɲɛnko dɔ faamu Jehova koo la min b’an dusu saalo ani k’an hakili sigi.

Waajulikɛla 5:7 be kuma kuntigi dɔ koo la min be tilenbaliyakow kɛ ani a b’a fanga digi fantanw kan. O kuntigi ka ɲi k’a to a hakili la ko a be se ka kɛ ko kuntigi wɛrɛ b’a filɛra min lɔyɔrɔ ka bon n’ale ta ye. N’a sɔrɔ kuntigi wɛrɛw be yen fana minw lɔyɔrɔ ka bon n’u bɛɛ ta ye. A fɔ man di, nka adamadenw ka gofɛrɛnɛmanw na, a be se ka kɛ k’o kuntigiw bɛɛ ye nanbaramɔgɔw ye ani jama be tɔɔrɔ u ka tilenbaliyakow kosɔn.

Nka, hali n’a be komi jigiya foyi tɛ yen, an k’a lɔn ko minw be kuntigiya kɛra adamadenw kun na, Jehova b’olu ka kɛtaw kɔrɔsira. O koo b’an dusu saalo yɛrɛ le! An be se ka dɛmɛ ɲini Ala fɛ ani k’an ka koow to a bolo (Zab. 55:23; Filip. 4:6, 7). An b’a lɔn ko Jehova “ɲaa be diɲɛ bɛɛ la, a ka koo be mɔgɔ minw dusu la, a be barika don olu la.”—2 Til. Kib. 16:9.

O la, Waajulikɛla 5:7 b’an dɛmɛ k’a faamu ko mɔgɔ lɔyɔrɔ mana kɛ min o min ye adamadenw ka gofɛrɛnɛman na, dɔ lɔyɔrɔ ka bon n’a ta ye. Min yɛrɛ kɔrɔtanin lo, o ye k’o vɛrise b’an hakili jigi ko Jehova lo ye Kuntigiba ye ani ko a ka Kuntigiya ɲɔgɔn tɛ yen. Sisan, a be tɛmɛna a Dencɛ Yezu Krista fɛ ka kuntigiya kɛ. Ale lo be masaya la Ala ka Masaya kun na. Sebagayabɛɛtigi min be mɔgɔw bɛɛ n’u ka kɛtaw kɔrɔsira, tilenbaliya si tɛ a la, ani a Dencɛ fana be ten.