1-2. Waajulikɛla 11:6 ɲɛsinna Masaya kibaro diiman waajuli baara ma cogo di?

JAMANA dɔw la, a ka di mɔgɔ caaman ye ka Masaya kibaro diiman mɛn. U mako b’o kibaro diiman lo la tigitigi! Nka jamana wɛrɛw la, mɔgɔw fanba t’u mako don Ala wala Bibulu koo la kosɔbɛ. I ka mara la, mɔgɔw fanba be Masaya kibaro diiman ta cogo di? A mana kɛ min o min ye, Jehova b’a fɛ an ka to ka waajuli kɛ fɔɔ wagati min na ale bena a fɔ k’o baara banna.

² Jehova ka wagati latigɛnin na, a bena daan sigi waajuli baara la, “diɲɛ laban be sɔrɔ ka se.” (Mat. 24:14, 36). Sanni o cɛ, Bibulu b’a fɔ an ye ko an ‘kana saliya don an yɛrɛ la.’ * An be se k’o cikan sira tagama cogo di?—Waajulikɛla 11:6 kalan. *

3. An bena mun lo lajɛ barokun nin na?

³ Barokun tɛmɛnin na, an ye koo naani lajɛ an ka ɲi ka minw kɛ walisa ka kɛ “diɲɛ mɔlaw ye ka mɔgɔw sɔrɔ,” o kɔrɔ, ka kɛ kibaro diiman weleweledala ɲumanw ye (Mat. 4:19). Barokun nin na, an bena koo saba lajɛ minw bena an jija kosɔbɛ an ka to ka waajuli kɛ, an ka koow cogoya mana kɛ min o min ye. An bena a ye fɛɛn min kama a kɔrɔtanin lo 1) an ka waajuli baara kɛ an ɲɛnako fɔlɔ ye, 2) an ka muɲu, ani 3) an ka kɛ ni limaniya barikaman ye.

4. Jehova ye baara min kalifa an ma, mun na an ka ɲi k’o kɛ an ɲɛnako fɔlɔ ye?

⁴ Yezu kɔnna k’a fɔ koo minw tun bena kɛ laban wagati la. A tun b’a lɔn k’o koow be se k’a ka kalandenw bali ka waajuli baara kɛ u ɲɛnako fɔlɔ ye. O kama, a y’a fɔ u ye ko u “labɛnnin ka to.” (Mat. 24:42). Bi koo dɔw ka teli k’an bali an k’an janto o lasɔmini kuma na. O koow ɲɔgɔn lo ye mɔgɔw bali k’u janto Nuhun ka lasɔmini kumaw na (Mat. 24:37-39; 2 Piyɛri 2:5). O kama, Jehova ye baara min kalifa an ma, an b’a fɛ k’o kɛ an ɲɛnako fɔlɔ ye.

5. Kɛwaliw 1:6-8 b’a yira cogo di ko waajuli tun bena kɛ fɔɔ yɔrɔjanw na?

⁵ Bi, a kɔrɔtanin lo kosɔbɛ an k’an sɔbɛ don Masaya waajuli baara la. Yezu tun kɔnna k’a fɔ ko ale sanin kɔ, a ka kalandenw tun bena waajuli kɛ wagatijan kɔnɔ ani fɔɔ yɔrɔjan na (Zan 14:12). Yezu sanin kɔ, a ka kalanden dɔw kɔsegira u ka jɛgɛminɛ baara la. A suu kununin kɔ, a ye kabako kɛ k’a ka kalanden dɔw dɛmɛ u ye jɛgɛ caaman minɛ. A tɛmɛna o fɛ k’a fɔ u ye tugun ko baara min kɔrɔtanin lo ka tɛmɛ baaraw bɛɛ kan, o ye ka waajuli kɛ ani ka mɔgɔw kɛ ale ka kalandenw ye (Zan 21:15-17). Dɔɔni sanni Yezu ka taga sankolo la, a y’a fɔ a ka kalandenw ye ko ale ye waajuli baara min daminɛ, o tɛna dan Israɛl jamana dɔrɔn ma. Nka, o bena se fɔɔ yɔrɔjan na (Kɛwaliw 1:6-8 kalan). Saan caaman o kɔ, Yezu ye yelifɛn dɔ yira ciden Zan na o koo la. A y’a yira koo minw tun bena kɛ “Matigi ka loon” na. * O yelifɛn na, Zan ye koo kabakoman nin ye: “Kibaru diman min ye waati bɛɛ ta ye,” mɛlɛkɛ dɔ tun b’o lasera “diɲɛ mɔgɔw bɛɛ ma, jamanaw kɔnɔ siyaw bɛɛ ma.” (Yir. 1:10; 14:6). Siga t’a la, Jehova b’a fɛ an  k’an seen don o baaraba la sanni a k’a fɔ ko a banna.

6. Mun lo be se k’an lasun an ka waajuli baara kɛ an ɲɛnako fɔlɔ ye?

⁶ Jehova be koo minw bɛɛ kɛra walisa k’an dɛmɛ, n’an be miiri o la, o bena an lasun an ka waajuli baara kɛ an ɲɛnako fɔlɔ ye. Ɲɛyirali fɛ, a be fɛɛn caaman dira an ma walisa k’an balo Alako ta fan fɛ. U dɔw ye gafe papiyelamanw, gafe minw be sɔrɔ ɛntɛrɛnɛti ni ɔridinatɛri kan, fɛɛn lamɛntaw, videwow ani JW Telewisɔn. Miiri k’a filɛ: An ka site web kan, kunnafoniw be sɔrɔ kaan 1  000 ni kɔ la! (Mat. 24:45-47). Duniɲa kɔnɔ, mɔgɔw kaan bɛnnin tɛ politikiko, diinanko ani wariko kosɔn. Nka, Ala sagokɛlaw mɔgɔ miliyɔn seegi ni kɔ kaan bɛnnin lo sɔbɛ la denbaya kelen kɔnɔ duniɲa kuru bɛɛ kɔnɔ. Ɲɛyirali fɛ saan 2019, awirilikalo tile 19nan na, duniɲa kuru bɛɛ kɔnɔ, Jehova Seerew ye kalan dɔ lamɛn min ɲɛsinna o loon ka tilera kalan ma. O loon sufɛ, mɔgɔ 20  919  041 lajɛnna walisa ka Yezu ka saya Hakilijigi lajɛn kɛ. Nɛɛma lo an fɛ k’o koow ye ani k’an niin don u la. N’an be miiri o la, o b’an lasun an ka to ka Masaya waajuli baara kɛ an ɲɛnako fɔlɔ ye.

7. Yezu ka ɲɛyirali b’an dɛmɛ cogo di an ka waajuli baara kɛ an ɲɛnako fɔlɔ ye?

⁷ Koo wɛrɛ be se k’an dɛmɛ ka waajuli baara kɛ an ɲɛnako fɔlɔ ye: o ye ka Yezu ladegi. Yezu m’a to foyi k’a bali ka seereya kɛ tiɲɛn koo la (Zan 18:37). Tuma min na Sutana tun b’a fɛ ka “diɲɛ jamanaw bɛɛ n’u ka nɔɔrɔ” di a ma, ani tuma min na mɔgɔw tun b’a fɛ k’a kɛ masacɛ ye, a ma sɔn o ma abada (Mat. 4:8, 9; Zan 6:15). A m’a to bololafɛnw nege k’a kunnatiɲɛ. A fana m’a to kɔrɔbɔliba ka siranya bila a la (Luka 9:58; Zan 8:59). N’u b’an ka limaniya kɔrɔbɔra, an ka miiri ciden Pol ka ladili la. O be se k’an dɛmɛ an ka to ka waajuli baara kɛ an ɲɛnako fɔlɔ ye. A ye kerecɛnw jija u ka Yezu ladegi walisa ‘u kana sɛgɛn, u fari be faga.’—Eburuw 12:3.

8. Muɲuli kɔrɔ ko di ani mun na a kɔrɔtanin lo kosɔbɛ bi?

⁸ Muɲuli kɔrɔ ko k’an dusu suman ka kɔnɔni kɛ walisa yɛlɛmani ka don koo dɔ la. A be se ka kɛ ko an be kɔnɔni kɛra walisa koo jugu dɔ ka ban, wala n’a sɔrɔ an be koo ɲuman dɔ makɔnɔna kabi wagatijan. O koow bɛɛ la, an ka ɲi ka muɲu. Kira Abakuki tun b’a fɛ sɔbɛ la fariyakow ka ban Zuda mara la (Abak. 1:2). Yezu ka kalandenw tun b’a miiri ko Ala ka Masaya tun bena sigi “o wagati yɛrɛ la” ani ka u bɔ Ɔrɔmukaw ka kuntigiya kɔrɔ (Luka 19:11). An kɔrɔtɔnin lo Ala ka Masaya ka juguya ban ani ka duniɲa kura sigi, o min kɔnɔ mɔgɔ tilenninw dama le bena kɛ yen (2 Piyɛri 3:13). Nka, an ka ɲi ka muɲu ani ka Jehova ka wagati latigɛnin kɔnɔ. A b’an kalan cogo minw na walisa an ka muɲu, an k’u dɔw lajɛ.

9. Ɲɛyirali jumanw lo b’a yira ko Jehova be muɲu?

⁹ Jehova ɲɔgɔn tɛ yen muɲuli koo la. A ye wagati caaman to Nuhun ye walisa a ka kurun lɔ ani ka waajuli kɛ “tilenninyako” la (2 Piyɛri 2:5; 1 Piyɛri 3:20). Tuma min na a tun y’a latigɛ ka Sodɔmu ni Gomɔrɛ halaki u ka juguya kosɔn ani Ibrayima y’a ɲininga siɲɛ caaman, a muɲuna k’a lamɛn (Zɛnɛzi 18:20-33). Israɛldenw ka murutili bɛɛ n’a ta, Jehova muɲuna kosɔbɛ u kɔrɔ saan kɛmɛkulu caaman kɔnɔ (Neemi 9:30, 31). Bi fana, an b’a yera ko Jehova be muɲu. Mɔgɔ minw b’a fɛ ka kɛ a  teriw ye, a be wagati to u ye walisa u ka ‘nimisa ka faran u ka kojuguw la.’ (2 Piyɛri 3:9; Zan 6:44; 1 Tim. 2:3, 4). Jehova ka ɲɛyirali b’a yira an na ko an ka ɲi ka muɲu n’an be mɔgɔw waajura ani n’an b’u kalanna. A be tɛmɛ ɲɛyirali wɛrɛ fɛ a ka Kuma kɔnɔ k’a yira an na ko an ka ɲi ka muɲu.

10. Sɛnɛkɛla min kofɔra Zaki 5:7, 8 kɔnɔ, ale ka koo be mun lo yira an na?

¹⁰ Zaki 5:7, 8 kalan. Sɛnɛkɛla ka koo b’a yira fɛɛn min kama an ka ɲi ka muɲu. Tiɲɛn lo ko falenfɛn dɔw be bonya joona joona. Nka u fanba tɛ ten, sanko minw be kisɛw kɛ. Israɛl jamana na, samiɲa tun be mɛɛn kalo wɔɔrɔ ɲɔgɔn. Sɛnɛkɛla tun be danni kɛ sanji fɔlɔ bennin kɔ ɔkutɔburukalo cɛmancɛ la. A tun be sumanw tigɛ sanji laban kɔ awirilikalo cɛmancɛ la (Mariki 4:28). An ka hakili sɔrɔ ka sɛnɛkɛla ka muɲuli ladegi. Nka, n’a sɔrɔ o man nɔgɔ an ma.

11. N’an be muɲu, o bena an dɛmɛ cogo di waajuli baara la?

¹¹ An adamaden dafabaliw b’a fɛ k’an ka baara tɔnɔ sɔrɔ yɔrɔnin kelen. Nka, n’an b’a fɛ an ka nankɔfɛnw ka falen ani ka den, fɔɔ an k’an janto u la tuma o tuma. O kɔrɔ ko an ka ɲi ka yɔrɔ sogi sogi, ka danni kɛ, ka biin bɔ ani ka nankɔ sɔn. N’an b’a fɛ ka mɔgɔw kɛ Krista ka kalandenw ye, o fana tɛ ɲɛ jijaliba kɔ. Walisa ka Bibulu kalandenw dɛmɛ u ka mɔgɔw kanu ani u kana kɛ ni miiriya tilenbaliw ye u koo la, o be wagati ta. N’an be muɲu, o bena a to an fari tɛ faga ni mɔgɔw tɛ an lamɛn waajuli la. Hali ni dɔw b’an lamɛn, an bele ka ɲi ka muɲu sabu an tɛ se k’u waajibiya u ka ɲɛtaga kɛ Alako ta fan fɛ. Tuma dɔw la, hali Yezu ka kalandenw yɛrɛ tun t’a ka kalanw faamu joona (Zan 14:9). An k’a to an hakili la ko an be danni kɛ ani k’a sɔn jii la. Nka, Ala lo b’a kɛ a be falen ka bonya.—1 Kor. 3:6.

12. An somɔgɔ minw tɛ Jehova Seerew ye, n’an b’u waajura, an be se k’a yira cogo di ko an be muɲu?

 ¹² An somɔgɔ minw tɛ Jehova Seerew ye, n’an b’u waajura, a be se ka gwɛlɛya an ma ka muɲu u kɔrɔ. Ladili min be sɔrɔ Waajulikɛla 3:7 kɔnɔ, o be se k’an dɛmɛ. O vɛrise b’a fɔ ko: “Jewaati be yen, kumawaati fana be ye.” An ka kɛwale ɲumanw be se ka kɛ seereya ye an somɔgɔw fɛ hali k’a sɔrɔ an yɛrɛ ma kuma. O wagati kelen na, an ka ɲi ka sababuw ɲini ka kuma u fɛ Jehova koo la (1 Piyɛri 3:1, 2). An ka ɲi ka mɔgɔw waaju ani k’u kalan ni kisɛya ye. Nka, an ka ɲi ka muɲu bɛɛ kɔrɔ, hali an somɔgɔw.

13-14. Mɔgɔ dɔw kofɔ an be se ka minw ladegi u ka muɲuli kosɔn.

¹³ An be se ka kalan sɔrɔ mɔgɔ kantigi dɔw fɛ muɲuli koo la. U dɔw kofɔra Bibulu kɔnɔ ani u dɔw ye an ka wagati mɔgɔw ye. Abakuki tun b’a fɛ sɔbɛ la koo jugu ka ban. Nka, a y’a fɔ ko: “Ne bena to n ka kɔlɔsilikɛyɔrɔ la.” (Abak. 2:1). O b’a yira ko a tun muɲunin lo. Ciden Pol y’a yira ko ale b’a fɛ n’a dusu bɛɛ ye k’a ka cidenya baara “kɛ ka ban.” O bɛɛ n’a ta, a muɲuna ka to “ka Ala ka nɛɛma kibaru diman nin fɔ mɔgɔw ye.”—Kɛw. 20:24.

¹⁴ An ka balimacɛ dɔ n’a muso ka koo lajɛ. U y’u ka diplomu sɔrɔ Gilead lakɔli la ani u y’u ci ka taga jamana dɔ la yɔrɔ min na Jehova Seerew man ca. Mɔgɔw fanba tɛ kerecɛnw ye ani u caaman tun tɛ sɔn ka bibulukalan kɛ fana. U ye Gilead lakɔli kɛ ni balima minw ye, olu tun be to ka kunnafoni diimanw lase u ma k’a yira ko olu be bibulukalan kɛra ni mɔgɔ caaman ye minw be ɲɛtaga kɛra. Nka, o balimacɛ n’a muso muɲuna ani u tora ka waajuli kɛ hali ni mɔgɔw fanba tun tɛ sɔn k’u lamɛn. U ye waajuli kɛ o jamana na fɔɔ saan seegi ani o kɔ, u ka Bibulu kalanden dɔ batizera. An be kalan juman lo sɔrɔ Abakuki, ciden Pol ani o balimacɛ n’a muso fɛ? U m’u fari faga ani Jehova y’u duga u ka kisɛya n’u ka muɲuli kosɔn. “Ala y’a daa di koo min na, minw be la Ala la, ka muɲu fɔɔ k’o sɔrɔ,” an ka “olu ladege.”—Eburuw 6:10-12.

15. Limaniya b’an dɛmɛ cogo di an cɛsirinin ka to ka waajuli kɛ?

¹⁵ An be kibaro min weleweleda, an lanin b’a la k’o ye tiɲɛn ye. O kama, a ka di an ye kosɔbɛ k’o fɔ mɔgɔ caamanba ye. Layidu kuma minw be sɔrɔ Ala ka Kuma kɔnɔ, an lanin b’u la fana (Zab. 119:42; Ezayi 40:8). An b’a yera ko Bibulu ka kiraya kumaw be dafara an ka wagati la. An b’a yera fana ko mɔgɔw ka ɲɛnamaya be fisaya kosɔbɛ n’u y’a daminɛ ka Bibulu ka ladiliw sira tagama. O koow bɛɛ b’a to an lanin b’a la kosɔbɛ ko mɔgɔ bɛɛ mako b’a la ka Masaya kibaro diiman mɛn.

16. Ka kɛɲɛ ni Zaburuw 46:2-4 ka fɔta ye, n’an limaniyanin lo Jehova ni Yezu la, o b’an dɛmɛ cogo di an cɛsirinin ka to ka waajuli kɛ?

¹⁶ An limaniyanin lo Jehova ni Yezu la fana (Zan 14:1). An be kibaro min weleweleda, o bɔra Jehova lo yɔrɔ ani ale lo ye Yezu sigi a ka Masaya kun na. Koo o koo mana an sɔrɔ, Jehova bena kɛ an dogoyɔrɔ n’an ka fanga ye (Zaburuw 46:2-4 kalan). Ka fara o kan, an lanin b’a la ko ka Yezu to sankolo la, a be waajuli baara ɲɛminɛna. Jehova ye setigiya ni kuntigiya min di a ma, a be tɛmɛ o fɛ k’o baara ɲɛminɛ.—Mat. 28:18-20.

17. Ɲɛyirali dɔ fɔ min b’a yira fɛɛn min kama an ka ɲi ka to ka waajuli kɛ.

¹⁷ Limaniya b’a to an lanin b’a la ko Jehova bena an duga an ka jijaliw kosɔn.  Ani tuma dɔw la, a b’o kɛ cogo dɔ la an yɛrɛ tun tɛ miirila min na (Waaj. 11:6). Ɲɛyirali fɛ, loon o loon mɔgɔ waa caaman be tɛmɛ an ka waajulikɛ tabaliw ni wotorow kɔrɔ. Yala nafa b’o waajuli kɛcogo la wa? Siga t’a la, nafa b’o la! An ka Masaya Cidenyabaara (saan 2014 novanburukalo ta) kumana inivɛrisite sunguru dɔ koo la min tun b’a fɛ ka barokun dɔ sɛbɛ Jehova Seerew koo la. A ma se ka Masaya Boon yɔrɔ lɔn. Nka, a ye an ka waajulikɛ tabali dɔ ye inivɛrisite la. A tun be min fɛ walisa k’a ka barokun sɛbɛ, a y’o sɔrɔ yen. A laban, a batizera ani sisan kudayi piyɔniye lo. O wale ɲɔgɔn b’an jija an ka to ka waajuli kɛ sabu a b’a yira ko mɔgɔw bele be yen minw mako b’a la ka Masaya kibaro mɛn.

18. Mun na an lanin b’a la ko Masaya waajuli baara bena ban Jehova ka wagati latigɛnin na?

¹⁸ An lanin b’a la ko Masaya waajuli baara bena ban a wagati la. An k’a filɛ min kɛra Nuhun ka wagati la. Jehova y’a yira ko ale be koow kɛ wagati latigɛnin na. Saan 120 ɲɔgɔn ka kɔn sanjiba ɲɛ, Jehova kɔnna k’o sanjiba natuma latigɛ. Saan caaman o kɔ, a y’a ɲini Nuhun fɛ a ka kurun lɔ. Nuhun tora k’a jija kosɔbɛ o baara la. N’a sɔrɔ a y’o kɛ saan 40 wala 50, sanjiba sɔrɔla ka na. Hali ni mɔgɔw tun tɛ mɛnni kɛ a fɛ, a bele tora ka waajuli kɛ k’u lasɔmi fɔɔ tuma min na Jehova y’a fɔ a ye ko a ka bɛgɛnw ladon kurun kɔnɔ. O kɔ, wagati latigɛnin na, Jehova “ye kurun daa tugu.”—Zɛnɛzi 6:3; 7:1, 2, 16.

19. N’an tɛ saliya don an yɛrɛ la, an bena duga jumanw lo sɔrɔ?

¹⁹ Yanni dɔɔni, Jehova bena daan sigi Masaya waajuli baara la. O kɔ, a bena Sutana ka duniɲa nin halaki ani ka duniɲa kura tilennin sigi. Sanni o cɛ, an ka to ka Nuhun, Abakuki ani mɔgɔ wɛrɛw ladegi, olu minw ma saliya don u yɛrɛ la. An ka waajuli baara kɛ an ɲɛnako fɔlɔ ye, ka muɲu, ka limaniya kosɔbɛ Jehova la ani ka la a ka layiduw la.