1. Tuma juman lo la a be se ka gwɛlɛya an ma ka Jehova sago kɛ?

TUMA juman lo la a be se ka gwɛlɛya i ma ka Jehova sago kɛ? Wagati min na gwɛlɛya caaman b’i kan wala tuma min na ɲɛsuma b’i kan? Ni gwɛlɛyaw b’an kan, an ka teli k’an jigi la Jehova kan. Nka, an be mun lo kɛ ni hɛɛrɛ b’an kan? Yala an be ɲinɛ ko a kɔrɔtanin lo an ka Ala sago kɛ wa? Jehova ye Israɛldenw lasɔmi ko o koo ɲɔgɔn tun be se k’u sɔrɔ.—Deter. 6:10-12.

2. Masacɛ Aza ye ɲɛyirali juman lo to an ye?

² Masacɛ Aza kɛra ɲɛyirali ɲuman ye an fɛ sabu a ye koow kɛ ni hakilitigiya ye a kɛtɔ k’a jigi bɛɛ la Jehova kan. A ye Jehova sago kɛ gwɛlɛya ani hɛɛrɛ wagati la. Kabi a denmisɛn tuma, a “y’a jigi bɛɛ la Masaba kan.” (1 Mas. 15:14). A y’a yira ko a y’a jigi bɛɛ la Jehova kan cogo minw na, u la dɔ ye ko a ye ngalon diinan ka batoli tunu ka bɔ Zuda. Bibulu b’a fɔ ko “a ye lonanw ka sarakabɔyɔrɔw ani sɔnnikɛyɔrɔw cɛn, ka jokabakuruw ci, ani ka Asera jaaw tigɛ k’u ben.” (2 Til. Kib. 14:2, 4). A yɛrɛ ye a mamamuso Maaka bɔ masamusoya la sabu ale tun be mɔgɔw jija u ka joo bato.—1 Mas. 15:11-13.

3. An bena mun lo lajɛ barokun nin na?

³ Aza ye ngalon diinan ka batoli tunu ka bɔ Zuda. Nka, a ma dan o ma. A ye Zuda mara mɔgɔw dɛmɛ u ye Jehova bato kokura. Jehova ye Aza ani Zuda mara mɔgɔw duga. A y’a to hɛɛrɛ kɛra u ka  jamana kɔnɔ. * Saan tan kɔnɔ, ‘hɛrɛ kɛra jamana kɔnɔ’ Aza ka masaya wagati la (2 Til. Kib. 13:23; 14:3, 5). Barokun nin na, an bena a filɛ Aza ye min kɛ o hɛɛrɛ wagati la. O kɔ, an bena saan kɛmɛkulu fɔlɔ kerecɛnw ka koo lajɛ. I ko Aza, olu fana ye koow kɛ hakilitigiya la, hɛɛrɛ wagati la. A laban, an bena ɲiningali nin jaabi: I be jamana min kɔnɔ, n’i be sera ka Jehova bato hɛɛrɛ la, i be se ka koow kɛ ni hakilitigiya cogo di o hɛɛrɛ wagati la?

4. Ka kɛɲɛ ni 2 Tilew Kibaru 14:1, 5, 6 ye, Aza ye mun lo kɛ hɛɛrɛ wagati la?

⁴ Vɛrise nunu kalan: 2 Tilew Kibaru 14:1, 5, 6. Aza y’a fɔ jama ye ko Jehova lo ye ‘lafiya di u ma faan bɛɛ la.’ Aza m’a miiri ko o hɛɛrɛ wagati ye lafiɲɛ wagati lo ye. Nka, a y’a daminɛ ka duguw lalaga, ka kogow ni sangasow lɔ ani ka koonw don duguw dondaw la. A y’a fɔ Zuda mara mɔgɔw ye ko: “Jamana nin b’an bolo halibi.” O kuma kɔrɔ ko di do? O kɔrɔ ko u jugu si tɛ yen min bena u bali ka yaala yaala jamana kɔnɔ ani ka lɔli kɛ. A ye jama jija ko u ka koow kɛ ni hakilitigiya ye o hɛɛrɛ wagati la.

5. Mun na Aza y’a ka kɛlɛbolo barika bonya?

⁵ Aza y’a ka kɛlɛbolo barika bonya fana hɛɛrɛ wagati la (2 Til. Kib. 14:7). Yala o kɔrɔ ko a jigi tun lanin tɛ Jehova kan wa? Ayi, o tɛ. Komi ale lo tun ye masacɛ ye, a tun b’a lɔn ko a ka kunkanbaara lo ka jamanadenw labɛn gwɛlɛya nataw kama. Aza tun ma la a la ko hɛɛrɛ min be Zuda mara la, o bena mɛɛn kudayi, ani tiɲɛn tun b’a fɛ.

6. Kerecɛn fɔlɔw ye mun lo kɛ hɛɛrɛ wagati la?

⁶ Tiɲɛn lo ko kerecɛn fɔlɔw ye kɔrɔbɔli sɔrɔ tuma caaman na. Nka, u ye hɛɛrɛ sɔrɔ wagati dɔ la fana. U ye mun lo kɛ o hɛɛrɛ wagati la? O kerecɛn kantigiw tora ka waajuli kɛ. A fɔra Kɛwaliw ka kitabu kɔnɔ ko “u tun be Matigi boɲa.” U tora ka kibaro diiman fɔ minkɛ, u tora “ka caya ka taga.” A tun gwɛnin lo ko Jehova b’u dugara sabu u ye waajuli kɛ ni kisɛya ye hɛɛrɛ wagati la.—Kɛw. 9:26-31.

7-8. Pol ni kerecɛn tɔɔw ye mun lo kɛ tuma min na u ye sababu sɔrɔ ka waajuli kɛ? A ɲɛfɔ.

⁷ Saan kɛmɛkulu fɔlɔ kerecɛnw tɛmɛna sababuw bɛɛ fɛ ka kibaro diiman fɔ mɔgɔw ye. Ɲɛyirali fɛ, tuma min na Pol y’a faamu ko a tun be se ka mɔgɔ caaman waaju Efɛzi dugu la, a tora yen walisa ka waajuli kɛ.—1 Kor. 16:8, 9.

⁸ Pol ni kerecɛn tɔɔw ye sababu wɛrɛ sɔrɔ ka mɔgɔ caaman waaju, tuma min na kɛnɛkɛnɛli koo ɲɛnabɔra saan 49 Krista tile la (Kɛw. 15:23-29). Min latigɛra kɛnɛkɛnɛli koo la, Pol n’a tɔɲɔgɔnw y’o fɔ kafow ye. O kɔ, u bɛɛ y’u jija ka “Matigi ka kibaru diman fɔ.” (Kɛw. 15:30-35). Mun lo sɔrɔla o la? Bibulu b’a fɔ ko: “Krista ka jama jigi tun be sabatira ka taga ɲa. Loon o loon, dɔ tun be fara u kan.”—Kɛw. 16:4, 5.

9. Koow be di jamana caaman na bi? An be se k’an yɛrɛ ɲininga mun lo la?

⁹ Jamana caaman na bi, an be se ka waajuli kɛ an sago la. I be jamana min na, yala i be sera ka Jehova sago kɛ i ko i b’a fɛ cogo min na wa? N’o lo, i yɛrɛ ɲininga ko: “Ne be mun lo kɛra o hɛɛrɛ wagati la?” Laban loonw ye ninsɔndiya wagati ye Jehova sagokɛlaw fɛ sabu u jijanin lo kosɔbɛ ka waajuli kɛ ani ka mɔgɔw kalan. O baaraba ɲɔgɔn ma kɛ ka ye duniɲa kɔnɔ (Mariki 13:10). O baara be sababu caaman di an ma!

10. Ladili min be sɔrɔ 2 Timote 4:2 kɔnɔ, o b’an jija an ka mun lo kɛ?

¹⁰ I be se ka koow kɛ ni hakilitigiya ye cogo di hɛɛrɛ wagati la? (2 Timote 4:2 kalan). I ka koow cogoya sɛgɛsɛgɛ k’a filɛ ni ele wala i somɔgɔ dɔ tɛ se ka dɔ fara a ka waajuli baara kan. N’a sɔrɔ aw dɔ yɛrɛ be se ka kɛ piyɔniye ye. Sisan tɛ wagati ye k’a ɲini ka wari ni bololafɛn caaman sɔrɔ sabu an tɛna kisi n’o fɛɛnw ye tɔɔrɔba wagati la.—Talenw 11:4; Mat. 6:31-33; 1 Zan 2:15-17.

11. Dɔw ye mun lo kɛ ka se ka kibaro diiman lase mɔgɔ caamanba ma?

¹¹ Weleweledala caaman ye kaan wɛrɛ degi walisa ka se ka tɔɔw dɛmɛ u ka Jehova lɔn. Jehova ka ɔriganisasiyɔn ye gafew ani videwow bɔ walisa k’an dɛmɛ ka kibaro diiman fɔ mɔgɔw ye kaan caaman na. Ɲɛyirali fɛ, saan 2010, an ka gafew tun be sɔrɔ kaan 500 ɲɔgɔn na. Bi, u be bɔ kaan 1 000 ni kɔ la!

12. Ni mɔgɔw ye Bibulu ka tiɲɛnkalanw mɛn u ka kaan na, o be u nafa cogo di? Ɲɛyirali dɔ fɔ.

¹² Ni mɔgɔw ye Bibulu ka tiɲɛnkalanw mɛn u ka kaan na, o be mun lo kɛ u la? An ka balimamuso dɔ ka koo lajɛ. A ye tile saba lajɛnba dɔ kɛ Mɛnfis dugu la, Tenesi mara la Etazini. O lajɛnba kɛra kinyarwanda kaan na, o min ye o balimamuso ka kaan ye. O kaan be fɔ Ruwanda, Kɔngo Kinsasa, ani Uganda jamanaw na. O lajɛnba kɔ, balimamuso y’a fɔ ko: “N’ siɲɛ fɔlɔ lo ka lajɛnba  kalanw faamu koɲuman kabi n’ yɛlɛmana Etazini a saan 17 ye nin ye.” Siga t’a la, tuma min na balimamuso y’o kalanw mɛn a ka kaan na, o y’a dusu sɔrɔ yɛrɛ le. N’i be se, yala a bena diya i ye ka kaan wɛrɛ degi walisa ka mɔgɔ dɔw dɛmɛ i ka kafo ka kiinw kɔnɔ wa? O bena kɛ koo ɲuman ye sabu o kiinw kɔnɔ, n’a sɔrɔ dɔw be kaan wɛrɛ lo fɔ ka ɲɛ. N’i ye i jija ka kaan wɛrɛ degi, i bena ninsɔndiyaba sɔrɔ o la.

13. An balima minw be Irisi jamana na, olu ye mun lo kɛ hɛɛrɛ wagati la?

¹³ An balima tɛ se ka waajuli kɛ u sago la jamana dɔw la, sabu faamanw ye bali sigi an ka waajuli baara kan. Ɲɛyirali fɛ, an balima minw be Irisi jamana na, an ka olu ka koo lajɛ. Faamanw y’u tɔɔrɔ saan caaman kɔnɔ. Nka saan 1991 marisikalo la, faamanw ye bali wuli u ka batoli kan. O wagati la, weleweledalaw tun ye mɔgɔ 16 000 ɲɔgɔn ye Irisi jamana na. Saan mugan o kɔ, caaman farala weleweledalaw hakɛ kan. U kɛra mɔgɔ 160 000 ni kɔ ye! A gwɛnin lo ko tuma min na balimaw tun be se ka waajuli kɛ u sago la, u ye koow kɛ ni hakilitigiya ye. Nka, o wagati ma mɛɛn. Hali n’o balimaw ka koow cogoya yɛlɛmana, u bele kisɛyanin lo Jehova ka baara la. U b’u seko bɛɛ kɛra Jehova sago kɛli la.

14-15. Jehova ka setigiya barika la, a ye Aza dɛmɛ cogo di?

¹⁴ Aza tile la, hɛɛrɛ wagati labanna ka ban. Etiyopikaw ka kɛlɛbolo barikaman nana Aza kama. U tun ka ca ni sɔrɔdasi miliyɔn kelen ye. U kuntigi Zera tun lanin b’a la ko ale n’a ka kɛlɛbolo tun bena see sɔrɔ Zudakaw kan. Nka, Aza y’a jigi la Jehova kan. A ye delili kɛ ko: “Masaba an  ka Ala, an dɛmɛ! Bari an jigi be ele le kan. An nana i tɔgɔ la jamaba nin kɛlɛyɔrɔ” la.—2 Til. Kib. 14:10.

¹⁵ Etiyopikaw ka sɔrɔdasiw hakɛ tun be ɲini ka se Aza ka sɔrɔdasiw sigiyɔrɔma fila ma. Nka, Aza tun b’a lɔn ko Jehova barika ka bon kosɔbɛ ani ko a be se k’a ka jama dɛmɛ. Jehova fana y’u dɛmɛ. Aza n’a ka sɔrɔdasiw ye see sɔrɔ Etiyopikaw kan.—2 Til. Kib. 14:7-12.

16. An b’a lɔn cogo di ko hɛɛrɛ wagati bena ban?

¹⁶ Tiɲɛn lo ko an t’a lɔn tigitigi min bena an kelen kelen sɔrɔ loon nataw la. Nka, an b’a lɔn ko hɛɛrɛ min be Ala ka mɔgɔw kan, o tɛ mɛɛnta ye. A to i hakili la ko Yezu tun kɔnna k’a fɔ ko laban loonw na, “Alalɔnbaliw bɛɛ bena [a ka kalandenw] kɔniya.” (Mat. 24:9). Ciden Pol y’a fɔ fana ko: “Minw bɛɛ b’a fɛ ka jɛn ni Yezu Krista ye ka kɛ Alaɲasiranbagaw ye sɔbɛ la, olu bena tɔɔrɔ sɔrɔ.” (2 Tim. 3:12). “Sutana dimininba” lo. N’an b’a miiri ko an bena kisi a ka dimiya ma, an b’an yɛrɛ lafilila le.—Yir. 12:12.

17. An ka limaniya be se ka kɔrɔbɔ cogo jumanw na?

¹⁷ Yanni dɔɔni, an kelen kelen bɛɛ ka limaniya bena kɔrɔbɔ. Tɔɔrɔba bena daminɛ “min ɲɔgɔn ma kɛ ka ye kabini diɲɛ dantuma, fɔɔ ka na se bii ma.” (Mat. 24:21). O wagati la, an somɔgɔw be se ka wuli an kama ani faamanw be se ka bali sigi an ka baara kan (Mat. 10:35, 36). I ko Aza, yala an kelen kelen bɛɛ bena an jigi la Jehova kan walisa a k’an dɛmɛ ani k’an latanga wa?

18. Ka kɛɲɛ ni Eburuw 10:38, 39 ye, tuma min na hɛɛrɛ bena ban, mun lo bena an dɛmɛ an labɛnnin ka to?

¹⁸ Jehova b’an labɛnna Alako ta fan fɛ koo nataw kama. O kama, a be “jɔncɛ kantigiman hakiliman” ɲɛminɛna walisa a ka dumuni nafaman di an ma Alako ta fan fɛ “a wagati la.” (Mat. 24:45, NW ). A b’o kɛra janko k’an dɛmɛ an sinsinnin ka to a batoli la. Nka, an kelen kelen bɛɛ lo ka ɲi k’an jija walisa ka kɛ ni limaniya barikaman ye.—Eburuw 10:38, 39 kalan.

19-20. Ka kɛɲɛ ni 1 Tilew Kibaru 28:9 ye, an ka ɲi k’an yɛrɛ ɲininga mun lo la ani mun na?

 ¹⁹ I ko masacɛ Aza, an ka ɲi ka Jehova “Ala le ɲini.” (2 Til. Kib. 14:3; 15:1, 2). An b’a daminɛ ka Jehova ɲini n’an ye lɔnniya sɔrɔ a koo la ani ka batize. An b’an seko bɛɛ kɛ walisa k’an ka kanuya sabati a koo la. Walisa k’an yɛrɛ sɛgɛsɛgɛ k’a filɛ an ka kanuya be cogo min na, an k’an yɛrɛ ɲininga ko: “Yala n’ be taga kafo ka lajɛnw na tuma o tuma wa?” Jehova ka ɔriganisasiyɔn lo b’o lajɛnw labɛn an ye. O lajɛnw na, an be barika sɔrɔ walisa ka to ka Jehova sago kɛ ani an be jijaliw sɔrɔ ka bɔ an balimaw fɛ (Mat. 11:28). An be se k’an yɛrɛ ɲininga fana ko: “Yala n’ be kelenna kalan kɛ tuma o tuma wa?” Yala ele n’i somɔgɔw be wagati kunmabɔ lɔgɔkun o lɔgɔkun gwa kɔnɔ batoli kama wa? Nka, n’i b’i kelen do, yala i b’o ɲɔgɔn lo kɛ wa? Yala i b’i seko bɛɛ kɛ waajuli la ani i be mɔgɔw kalan walisa u ka se ka kɛ Krista ka kalandenw ye wa?

²⁰ Mun na an ka ɲi k’an yɛrɛ ɲininga o koow la? Bibulu b’a fɔ ko Jehova b’an ka miiriyaw n’an dusukun sɛgɛsɛgɛ. O kama, an fana ka ɲi k’an yɛrɛ sɛgɛsɛgɛ (1 Tilew Kibaru 28:9 kalan). N’an y’o kɛ, n’a sɔrɔ an bena a ye ko an ka ɲi k’an ka laɲinita, an ka kokɛcogo wala an ka miiriya dɔw yɛlɛma. N’o lo, an ka Jehova deli walisa a k’an dɛmɛ k’o yɛlɛmaniw kɛ. Sisan lo an ka ɲi k’an yɛrɛ labɛn kɔrɔbɔli nataw kama. Kana a to koo si k’i bali ka koow kɛ ni hakilitigiya ye hɛɛrɛ wagati la!