1. Mun lo b’a yira ko Jehova b’a tɛgɛ labila ka sɔnni kɛ?

WAGATI dɔ la, Jehova kelenpe dɔrɔn lo tun be yen. Nka, a tun tɛ miiri a yɛrɛ nafa dɔrɔn na. O kama, a y’a latigɛ ka niin di mɛlɛkɛw ni adamadenw ma. A ka di “hɛɛrɛtigi Ala” Jehova ye ka fɛɛn ɲumanw di a ka danfɛnw ma (1 Tim. 1:11, NW; Zaki 1:17). Komi Jehova b’a fɛ an fana ka ninsɔndiya sɔrɔ, a b’a yira an na cogo min na an be se k’an tɛgɛ labila ka tɔɔw sɔn.—Ɔrɔm. 1:20.

2, 3. a) N’an b’an tɛgɛ labila ka tɔɔw sɔn, mun na o b’an ninsɔndiya? b) An bena mun lo lajɛ barokun nin na?

² Ala ye adamadenw dan a yɛrɛ jaa la (Zɛnɛzi 1:27). O kɔrɔ ko Jehova be ni jogo minw ye, an fana be se k’u yira. Walisa ka ninsɔndiya sɔbɛ la ani ka Jehova ka dugaw sɔrɔ, an ka ɲi k’a ladegi. An ka ɲi k’an mako don sɔbɛ la mɔgɔ tɔɔw la ani k’an tɛgɛ labila k’u sɔn (Filip. 2:3, 4; Zaki 1:5). Mun na do? Sabu Jehova y’an dan o cogo lo la ni kanuya ye. An ka dafabaliya bɛɛ n’a ta, an be se ka Jehova ladegi ani k’an tɛgɛ labila ka tɔɔw sɔn.

³ K’an tɛgɛ labila ka tɔɔw sɔn, an bena a filɛ Bibulu be min  fɔ o koo la. An bena a ye fɛɛn min kama a ka di Jehova ye an k’an tɛgɛ labila ka tɔɔw sɔn. An bena a ye fana cogo min na o b’an dɛmɛ ka Jehova ka baara kɛ. O kɔ, an bena a filɛ fɛɛn min kama n’an b’an tɛgɛ labila ka tɔɔw sɔn, o b’an ninsɔndiya ani fɛɛn min kama an ka ɲi ka to k’o kɛ.

4, 5. Jehova ni Yezu y’a yira cogo di k’u tɛgɛ labilanin lo ka tɔɔw sɔn? Mun na an ka ɲi k’u ladegi?

⁴ Jehova b’a fɛ an k’ale ladegi. O kama, a ka di a ye n’an b’an tɛgɛ labila ka tɔɔw sɔn (Efɛz. 5:1). Jehova y’an dan cogo kabakoman na. A ye dugukolo n’a kɔnɔfɛnw bɛɛ dan fana cogo ɲuman na walisa an k’u diyabɔ. O b’an dɛmɛ k’a faamu ko a b’a fɛ an ka ninsɔndiya (Zab. 104:24; 139:13-16). O la, n’an b’a ɲini ka tɔɔw ninsɔndiya, o be nɔɔrɔ la Jehova kan.

⁵ Kerecɛn sɔbɛw be Yezu Krista ladegi. A y’a yira an na cogo dafanin na an be se k’an tɛgɛ labila ka tɔɔw sɔn cogo min na. Yezu yɛrɛ y’a fɔ ko: “Mɔgɔ Dencɛ ma na waasa mɔgɔw ka baara kɛ a ye. Nga, a nana ka mɔgɔw mako ɲa, ani k’a yɛrɛ nii di ka kɛ mɔgɔ bɛɛ nii kunmabɔ sara ye.” (Mat. 20:28). O kama, ciden Pol ye kerecɛnw jija ko: “Sɔɔn min tun be Yezu Krista la, o ɲɔgɔn ka sɔrɔ aw fana na.” Lɔyɔrɔba min tun b’a fɛ, “a sɔnna k’o bɛɛ to yen, ka na jɔɔn cogo ta.” (Filip. 2:5, 7). An kelen kelen bɛɛ ka ɲi k’an yɛrɛ ɲininga ko: “Yala n’ bele be se ka koo wɛrɛ kɛ walisa ka Yezu ladegi koɲuman wa?”—1 Piyɛri 2:21 kalan.

6. Yezu y’an kalan mun lo la tuma min na a ye ntalen la Samarikacɛ ka ɲumanya koo la? (Jaa lajɛ, barokun daminɛ na.)

⁶ N’an be Jehova ni Krista ka ɲɛyirali ɲuman ladegi, an koo bena diya Jehova ye. An b’o kɛ n’an b’an mako don tɔɔw la ani n’an b’a ɲini k’u dɛmɛ. Yezu ye ntalen min la Samarikacɛ ka ɲumanya koo la, a y’a yira ka gwɛ ko a ka kalandenw ka kan k’a ɲini ka mɔgɔ wɛrɛw dɛmɛ, hali u ni minw bɔyɔrɔ tɛ kelen ye (Luka 10:29-37 kalan). I hakili b’a la fɛɛn min kama Yezu y’o ntalen la wa? Yahutucɛ dɔ lo tun y’a ɲininga ko: “Jɔn le ye ne mɔgɔɲɔgɔn ye?” Yezu y’a jaabi cogo min na, o b’a yira ko n’an b’a fɛ k’an koo diya Jehova ye, an ka ɲi k’an yɛrɛ labila ka tɔɔw dɛmɛ i ko Samarikacɛ y’a kɛ cogo min na.

7. An b’a yira cogo di ko an lanin b’a la ko Ala be min ɲini an fɛ, o lo ɲɔgɔn tɛ yen? A ɲɛfɔ.

⁷ Koo min kɛra Edɛn nankɔ kɔnɔ, o b’an dɛmɛ k’a faamu fɛɛn min kama kerecɛnw ka ɲi k’u tɛgɛ labila ka tɔɔw sɔn. Cogo di do? Sutana y’a fɔ ko ni Adama ni Awa banna ka mɛnni kɛ Ala fɛ ani k’u yɛrɛ dɔrɔn sago kɛ, o lo bena u ninsɔndiya. Awa miirila a yɛrɛ dɔrɔn koo la ani a y’a ɲini ka kɛ i ko Ala. Adama fana y’o lo kɛ tuma min na a y’a ɲini k’a yɛrɛ koo diya Awa ye sanni k’a koo diya Ala ye (Zɛnɛzi 3:4-6). U ka kɛwalew nɔfɛko kɛra bɔnɛba lo ye. O b’a yira ko ni mɔgɔ b’a yɛrɛ dɔrɔn nafa lo ɲini, a tɛ se ka ninsɔndiya sɔrɔ o la. N’an b’an tɛgɛ labila ka tɔɔw sɔn, an b’a yira ko an lanin b’a la ko Ala be min ɲini an fɛ, o lo ɲɔgɔn tɛ yen.

8. Mun na Adama ni Awa tun ka ɲi ka miiri mɔgɔ wɛrɛw koo la?

⁸ Ala tun ye cikanw di Adama n’a muso ma. Hali n’u dama lo tun be Edɛn nankɔ kɔnɔ, o cikanw tun ka ɲi k’u lasun ka miiri tɔɔw koo la. Jehova ye Adama ni Awa duga ani k’a fɔ u ye k’u ka deenw  wolo ka dugukolo fa ani k’a kolo (Zɛnɛzi 1:28). An Danbaga b’a fɛ dugukolo kan mɔgɔw bɛɛ ka ninsɔndiya sɔrɔ. Adama ni Awa tun ka ɲi k’o ɲɔgɔn lo miiri u deenw koo la. Jehova tun b’a fɛ Adama ni Awa n’u ka denbaya ka dugukolo kuru bɛɛ kɛ alijɛnɛ ye. O tun ye baaraba ye dɛ!

9. Mun na a tun bena kɛ ninsɔndiya ye adamadenw fɛ ka baara kɛ ka dugukolo kuru bɛɛ kɛ alijɛnɛ ye?

⁹ Adamaden dafaninw tun bena baara kɛ ni Jehova ye walisa k’a sago dafa o min tun ye ka dugukolo bɛɛ kɛ alijɛnɛ ye. Miiri k’a filɛ o baara tun bena adamadenw ninsɔndiya cogo min na! Komi u tun bena u yɛrɛ di ka baara kɛ tɔɔw nafa kosɔn, u tun bena dugaba ni ninsɔndiyaba sɔrɔ o la.

10, 11. Cii dira an ma ko an ka waajuli kɛ ani ka mɔgɔw kɛ Yezu ka kalandenw ye. An be se k’o cii dafa cogo di?

¹⁰ Bi, Jehova ye baara dɔ kalifa a sagokɛlaw ma, o min ye ka waajuli kɛ ani ka mɔgɔw kalan walisa u ka kɛ Krista ka kalandenw ye. Walisa k’o cii dafa, an ka ɲi k’an mako don sɔbɛ la tɔɔw la. O kama, fɔɔ an ka kɛ ni ŋaniya ɲuman ye. O kɔrɔ, ka Ala ani an mɔgɔɲɔgɔn kanu.

¹¹ Saan kɛmɛkulu fɔlɔ la, Pol n’a kerecɛnɲɔgɔnw tun be waajuli kɛ ani u tun be mɔgɔw kalan tiɲɛn koo la. O kama, Pol y’a fɔ k’olu ni “Ala ye baarakɛɲɔgɔnw ye.” (1 Kor. 3:6, 9, ABM). Bi, an fana be se ka kɛ Ala “baarakɛɲɔgɔnw” ye n’an b’an tɛgɛ labila k’an ka wagati, an bololafɛnw ani an fanga don Jehova ka baara la. O ye nɛɛmaba ye dɛ!

12, 13. Ele fɛ, duga jumanw lo b’a la ka bibulukalan kɛ ni mɔgɔw ye?

¹² N’an b’an ka wagati ta, k’an seko kɛ waajuli la ani ka mɔgɔw kalan, o b’an ninsɔn diya kosɔbɛ. Balima caaman y’o lo fɔ. O balimaw be bibulukalan kɛra ni mɔgɔw ye minw be ɲɛtaga kɛra. N’an ka Bibulu kalandenw ninsɔndiyanin kosɔbɛ sabu u be tiɲɛn kalanw faamuna, u ka limaniya be barika sɔrɔla ani u b’u ka ɲɛnamaya kɛcogo yɛlɛmana, o b’an fana ninsɔndiya yɛrɛ le! U be min kalanna, n’u y’a daminɛ k’o fɔ mɔgɔw ye, o fana b’an ninsɔndiya. Yezu y’a ka kalanden 70 ci ka taga waajuli kɛ ani u “segira ni nisɔndiya ye” sabu u ye wale diimanw sɔrɔ. O koo ye Yezu fana ninsɔn diya kosɔbɛ.—Luka 10:17-21.

¹³ Duniɲa kuru bɛɛ kɔnɔ, Bibulu ka tiɲɛnkalanw be mɔgɔw ka ɲɛnamaya kɛcogo fisayara cogo min na, balimaw mana o kɔrɔsi, u ninsɔn be diya. Ɲɛyirali fɛ, an ka balimamuso Anna ka koo lajɛ. * Musogwana lo ani a tun be baara min kɛ Jehova ye, a tun b’a fɛ ka dɔ fara o kan.  O kama, a yɛlɛmana Erɔpu kɔrɔn fan fɛ, yɔrɔ min na weleweledalaw man ca. A y’a fɔ ko: “Yan, mɔgɔ be sababu caaman sɔrɔ ka bibulukalanw kɛ. O ka di ne ye kosɔbɛ. N’ ninsɔndiyanin lo kosɔbɛ waajuli baara la. Ni n’ sera soo, wagati tɛ n’ fɛ ka miiri n’ yɛrɛ dɔrɔn koo la. N’ be bibulukalan kɛra ni minw ye, n’ be miiri olu lo koo la: u ka gwɛlɛyaw ani u ka haminankow. N’ be fɛɛrɛw ɲini walisa k’u jija ani k’u dɛmɛ cogo ɲuman na. O y’a to ne lara a la tiɲɛn na ko ‘nisɔndiya be mɔgɔ sɔnni na ka tɛmɛ sɔrɔli kan.’”—Kɛw. 20:35.

14. Hali ni mɔgɔw tɛ mɛnni kɛ an fɛ, mun lo be se k’an dɛmɛ ka ninsɔndiya sɔrɔ waajuli baara la?

¹⁴ Hali ni mɔgɔw tɛ sɔn ka mɛnni kɛ an fɛ, an ka sababu di u ma u ka kibaro diiman mɛn. O be se k’a to an be ninsɔndiya sɔrɔ. Bi, an ka baara be i ko kira Ezekiyɛli ta. Jehova tun y’a fɔ a ye ko mɔgɔw ye ‘mɛnni kɛ a fɛ wo, u ma sɔn ka mɛnni kɛ wo,’ a k’ale ka kuma fɔ u ye (Ezek. 2:7; Ezayi 43:10). Hali ni dɔw tɛ sɔn ka mɛnni kɛ, an be jijali minw kɛ, u ka di Jehova ye kosɔbɛ! (Eburuw 6:10 kalan). Weleweledala dɔ y’a yira ko a be ni miiriya ɲuman ye o koo la. A y’a fɔ a ka waajuli baara koo la ko: “An be tutuli kɛ, ka jii kɛ a la ani an be Jehova deli a k’a to a be falen ka bonya.”—1 Kor. 3:6.

15. An man ɲi ka ɲumanya kɛ sabu mɔgɔw t’an waleɲuman lɔn wa? A ɲɛfɔ.

¹⁵ Yezu b’a fɛ an ka ninsɔndiya sɔrɔ an kɛtɔ k’an tɛgɛ labila ka mɔgɔw sɔn. Mɔgɔ caaman b’an waleɲuman lɔn n’an b’an tɛgɛ labila k’u sɔn. O lo kama, Yezu y’an jija ko: “A’ ye mɔgɔw sɔn, mɔgɔw na aw sɔn. U na mure ta ka aw ta suma k’a digidigi k’a yigiyigi ka dɔ fara a kan fo a bɛ bɔn, ka o yɛlɛma aw ka dulɔki jufabaw kɔnɔ, k’a masɔrɔ aw bɛ tɔw ta suma ni minan min ye, aw ta na suma ni o minan yɛrɛ de ye.” (Luka 6:38, ABM). Bɛɛ tɛna an waleɲuman lɔn an ka ɲumanya kosɔn. Minw b’an waleɲuman lɔn, an ka ɲumanya be se k’olu lasun u fana b’u  tɛgɛ labila ka tɔɔw sɔn. O la, mɔgɔw y’an waleɲuman lɔn wo, u man waleɲuman lɔn wo, an ka to k’an tɛgɛ labila ka tɔɔw sɔn. Miiri k’a filɛ i ka ɲumanya wale kelen be se ka mɔgɔw nafa cogo min na!

16. An ka ɲi k’an tɛgɛ labila ka mɔgɔ sifa jumanw lo sɔn ani mun na do?

¹⁶ Mɔgɔ minw b’u tɛgɛ labila ka tɔɔw sɔn, olu t’o kɛ walisa ka tɔnɔ sɔrɔ o la. Yezu y’a fɔ ko: “N’i bena dumuniba di mɔgɔw ma, i ka fantanw ni senkelenninw ni namaraw ani fiɲɛntɔw wele. N’i y’o kɛ, i bena duba sɔrɔ, bari olu te se k’i ka juru sara.” (Luka 14:13, 14). Hakili senu ye Bibulu sɛbɛbaga dɔ lasun k’a sɛbɛ ko: “Mɔgɔɲuman bena hɛrɛ sɔrɔ.” Dɔ wɛrɛ y’a fɔ fana ko: “Mɔgɔ min be dɛsɛbagatɔ jati, o tigi dagamunin lo.” (Talenw 22:9; Zab. 41:2). Tiɲɛn na, n’an be tɔɔw dɛmɛ, an bena ninsɔndiya sɔbɛ la.

17. An be se k’an tɛgɛ labila ka tɔɔw sɔn cogo jumanw na ani ka ninsɔndiya sɔrɔ?

¹⁷ Yezu tun y’a fɔ ko: “Nisɔndiya be mɔgɔ sɔnni na ka tɛmɛ sɔrɔli kan.” Tuma min na ciden Pol segira o kumaw kan, a tun tɛ kumana bololafɛnw dɔrɔn lo koo la. Nka, a ka kumaw b’a yira ko an be se ka mɔgɔw jija, ka tɛmɛ Bibulu fɛ k’u ladi ani k’u dɛmɛ cogo wɛrɛ la (Kɛw. 20:31-35). Pol ka kɛwalew n’a ka kumaw fɛ, a y’a yira ko an ka ɲi ka sɔn k’an yɛrɛ, an ka wagati ani an ka fanga kɛ ka mɔgɔ wɛrɛw dɛmɛ. A y’a yira fana ko an ka ɲi k’an janto mɔgɔw la ani k’u kanu.

18. K’i tɛgɛ labila ka tɔɔw sɔn, sɛgɛsɛgɛrikɛla caaman ye mun lo fɔ o koo la?

¹⁸ Mɔgɔ minw be adamadenw kɛcogo sɛgɛsɛgɛ, olu y’a ye ko n’i b’i tɛgɛ labila ka mɔgɔ sɔn, o b’i ninsɔn diya. Ka kɛɲɛ ni barokun dɔ ye, mɔgɔw y’a fɔ ko n’u ye koo ɲuman kɛ u mɔgɔɲɔgɔnw ye, o b’u ninsɔn diya. Sɛgɛsɛgɛlikɛlaw y’a fɔ ko n’an be mɔgɔw dɛmɛ, an b’a ye ko kuun b’an ka ɲɛnamaya la. O kama, lɔnnikɛla dɔw be mɔgɔw jija k’u ka sɔn k’u yɛrɛ di ka tɔɔw dɛmɛ walisa k’u yɛrɛ ka kɛnɛyakow fisaya ani ka ninsɔndiya sɔrɔ. Minw sɔnna a la ko Bibulu y’an Danbaga kanutigi Jehova ka Kuma lo ye, o koo tɛ bari olu la.—2 Tim. 3:16, 17.

19, 20. Mun na i b’a fɛ k’i tɛgɛ labila ka tɔɔw sɔn?

¹⁹ N’an sigiɲɔgɔnw be miiri u yɛrɛ dɔrɔn koo la, a be se ka gwɛlɛya an ma an k’an tɛgɛ labila ka tɔɔw sɔn. Nka cikan minw ka bon ni cikan tɔɔw bɛɛ ye, Yezu y’o fɔ an ye. A fɔlɔ, a ko an ka Jehova kanu n’an dusukun bɛɛ ye, n’an niin bɛɛ ye, n’an hakili bɛɛ ye ani an barika bɛɛ ye. A filanan, a ko an k’an mɔgɔɲɔgɔn kanu i n’a fɔ an yɛrɛ (Mariki 12:28-31). An y’a ye barokun nin na ko Jehova kanubagaw b’a ladegi. Jehova ni Yezu b’u tɛgɛ labila ka tɔɔw sɔn. U b’an jija an k’o ɲɔgɔn kɛ sabu o bena an ninsɔn diya sɔbɛ la. N’an b’an jija k’an tɛgɛ labila ka tɔɔw sɔn ani ka baara kɛ Jehova ye, an bena nɔɔrɔ la a kan. O b’an yɛrɛ ni mɔgɔ wɛrɛw nafa fana.

²⁰ Siga t’a la, i b’i seko kɛra ka mɔgɔ wɛrɛw dɛmɛ, sanko i kerecɛnɲɔgɔnw yɛrɛ (Gal. 6:10). N’i tora k’o kɛ, i koo bena diya mɔgɔw ye ani i bena ninsɔndiya sɔrɔ. Bibulu b’a fɔ ko: “Mɔgɔ min tigɛ foninin lo, o tigi bena nafa caaman sɔrɔ. Mɔgɔ min be jii di minnɔgɔtɔ ma, o tigi yɛrɛ ka minnɔgɔ bena ban.” (Talenw 11:25). An ka ɲɛnamaya kɔnɔ ani an ka cidenya baara la, sababu caaman be yen minw na an be se k’an tɛgɛ labila ka tɔɔw sɔn ni ŋaniya ɲuman ye. An bena o sababu dɔw lajɛ barokun nata la.