1. Jehova ye mun lo di a sagokɛla kantigiw kelen kelen bɛɛ ma?

JEHOVA b’a sagokɛla kantigi kelen kelen bɛɛ kanu ani a ye baara di u bɛɛ ma kafo kɔnɔ. Hali n’an ka baara tɛ kelen ye, nafa b’an bɛɛ la ani an mako be ɲɔgɔn na. Ciden Pol y’an dɛmɛ k’o koo kɔrɔtanin faamu. Cogo di do?

2. Ka kɛɲɛ ni Efɛzikaw 4:16 ye, mun na an ka ɲi ka bonya la ɲɔgɔn kan ani ka baara kɛ ɲɔgɔn fɛ?

² Ka kɛɲɛ ni barokun ka vɛrise jɔnjɔn ye, ciden Pol y’a yira ka gwɛ ko an si man ɲi k’an balimaw filɛ ani k’a fɔ ko ‘ale mako te u la.’ (1 Kor. 12:21). Walisa kafo ka to hɛɛrɛ la, an ka ɲi ka ɲɔgɔn bonya ani ka baara kɛ ɲɔgɔn fɛ (Efɛzikaw 4:16 kalan). N’an be baara kɛ ɲɔgɔn fɛ kelenya la, kafoden kelen kelen bɛɛ bena a ye ko u b’a kanu ani kafo bena sabati.

3. An bena mun lo lajɛ barokun nin na?

³ Cogo minw na an be se k’a yira ko an be bonya la kafoden tɔɔw kan, u la dɔw ye jumanw ye? Barokun nin na, an bena a ye diinan mɔgɔkɔrɔw be se ka bonya la ɲɔgɔn kan cogo minw na. O kɔ, an bena a ye cogo minw na an bɛɛ be se k’a yira ko an be bonya la balimaw kan minw ma furu. A laban, balima minw tɛ an ka kaan fɔ ka ɲɛ, an bena a ye cogo minw na an be se k’a yira ko an be bonya la u kan.

4. Pol ye ladili juman lo di Ɔrɔmukaw 12:10 kɔnɔ diinan mɔgɔkɔrɔw ka ɲi ka min sira tagama?

⁴ Jehova be diinan mɔgɔkɔrɔw bɛɛ sigi kafo kɔnɔ a ka hakili senu lo barika la. Nka, u ka setigiya tɛ kelen ye (1 Kor. 12:17, 18). N’a sɔrɔ dɔw kɛra diinan mɔgɔkɔrɔw ye kura ye ani u tɛ koo caaman lɔn fɔlɔ. Dɔw tɛ se ka caaman kɛ kɔrɔya wala bana kosɔn. O bɛɛ n’a ta, diinan mɔgɔkɔrɔ si man ɲi k’a fɔ a tɔɲɔgɔnw koo la ko ‘ale mako te u la.’ Nka, Pol ye ladili min di Ɔrɔmukaw 12:10 kɔnɔ, u kelen kelen bɛɛ ka ɲi k’o sira tagama. (A kalan.)

5. Diinan mɔgɔkɔrɔw b’a yira cogo di k’u be ɲɔgɔn bonya? Mun na a kɔrɔtanin lo u k’o kɛ?

⁵ Kafo ka diinan mɔgɔkɔrɔw b’a yira k’u be u diinan mɔgɔkɔrɔ ɲɔgɔnw bonya, u kɛtɔ k’u lamɛn koɲuman. N’u ye ɲɔgɔn lajɛn walisa ka koo kɔrɔtaninw lajɛ, a ka ɲi kosɔbɛ u ka ɲɔgɔn lamɛn. Mun na do? A fɔra saan 1988, ɔkutɔburu tile fɔlɔ ka Kɔrɔsili Sangaso kɔnɔ ko: “Diinan mɔgɔkɔrɔw ka ɲi ka sɔn a ma ko Krista be se ka tɛmɛ hakili senu fɛ ka diinan mɔgɔkɔrɔ kelen kelen bɛɛ ɲɛminɛ. O be se k’a to a tigi be Bibulu ka sariyakolo dɔ kofɔ min bena u dɛmɛ ka desizɔn ɲuman ta (Kɛw. 15:6-15). Hakili senu tɛ kafo ka diinan mɔgɔkɔrɔ kelen dɔrɔn dɛmɛ, nka a b’u bɛɛ lo dɛmɛ.”

6. Diinan mɔgɔkɔrɔw be se ka baara kɛ ɲɔgɔn fɛ kelenya la cogo di? O be kafo nafa cogo di?

⁶ Diinan mɔgɔkɔrɔ min be bonya la a diinan mɔgɔkɔrɔ ɲɔgɔnw kan, ale t’a ɲini tuma bɛɛ ka kɛ fɔlɔ ye ka kuma u ka lajɛn na. A tɛ kuma kɛ a kelen ta ye ani a t’a miiri ko ale be min fɔ, o lo bɛnnin lo tuma bɛɛ. Nka, a b’a ka miiriya fɔ ni majigilenya ye ani a be tɔɔw lamɛn koɲuman. Min yɛrɛ kɔrɔtanin lo kosɔbɛ, o ye ko a labɛnnin lo ka Bibulu ka sariyakolow kofɔ ani ka tugu “jɔncɛ kantigiman hakiliman” ka cikanw kɔ (Mat. 24:45-47, NW ). Diinan mɔgɔkɔrɔw  ka lajɛn na, n’u b’a yira k’u be ɲɔgɔn kanu ani k’u be ɲɔgɔn bonya, o b’a to u be Ala ka hakili senu ka dɛmɛ sɔrɔ. O la, hakili senu bena u dɛmɛ ka desizɔnw ta minw bena kafo sabati.—Zaki 3:17, 18.

7. Minw ma furu, Yezu tun be olu jati cogo di?

⁷ Kafo kɔnɔ bi, mɔgɔ furuninw ni denbatigiw be yen. Nka balima minw ma furu, olu fana be yen. An ka ɲi k’olu jati cogo di? Minw ma furu, an k’a filɛ Yezu tun b’olu jati cogo min na. Yezu ka cidenya baara wagati la dugukolo kan, a ma muso furu. A tora cɛgwanaya la walisa ka sinsin a ka baara kan. Yezu m’a fɔ abada ko walisa ka kɛ kerecɛn ye, waajibi lo mɔgɔ ka furu wala a kana furu. Nka, a y’a fɔ ko kerecɛn dɔw tun bena a latigɛ k’u tɛ furu (Mat. 19:11, 12). Minw ma furu, Yezu tun be bonya la olu kan. A tun t’a jati ko mɔgɔ furuninw ka fisa n’u ye wala ko fɛɛn dɔ b’u jɛn.

8. Ka kɛɲɛ ni 1 Korɛntikaw 7:7-9 ka fɔta ye, Pol ye kerecɛnw jija u ka miiri mun lo la?

⁸ I ko Yezu, ciden Pol tora cɛgwanaya la a ka cidenya baara kuru bɛɛ la. Nka, a m’a fɔ abada ko koo jugu lo kerecɛn ka furu. A sɔnna a ma ko mɔgɔ kelen kelen bɛɛ lo ka ɲi k’a latigɛ n’a bena furu wala n’a tɛna furu. Nka, a ye kerecɛnw jija u ka miiri k’a filɛ n’u be se ka Jehova sago kɛ u furubali (1 Korɛntikaw 7:7-9 kalan). A gwɛnin lo ko Pol tun t’a jati ko kerecɛn furuninw ka fisa ni kerecɛn furubaliw ye. A yɛrɛ ye kunkanbaarabaw kalifa kanbele Timote ma k’a sɔrɔ Timote tun ye cɛgwana ye * (Filip. 2:19-22). O la, a bɛnnin tɛ an k’a miiri ko komi balimacɛ dɔ furunin lo wala a furunin tɛ, o lo b’a to a be saratiw dafa wala a t’u dafa kunkanbaara dɔ kama.—1 Kor. 7:32-35, 38.

9. An be se ka mun lo fɔ furu ni furubaliya koo la?

⁹ Yezu wo, Pol wo, u si m’a fɔ ko kerecɛnw ka ɲi ka furu wala ko u man ɲi ka furu. O la, an be se ka mun lo fɔ furu ni furubaliya koo la? Saan 2012, ɔkutɔburu tile fɔlɔ ka Kɔrɔsili Sangaso y’o ɲiningali jaabi koɲuman ten ko: “Tiɲɛn na, an be se k’a fɔ ko [furu ni furubaliya] fila bɛɛ ye Ala ka nilifɛn ye. . . . Jehova  t’a jati ko [furubaliya] ye maloyako wala dusukasiko ye.” O la an ka kafow kɔnɔ, balima minw furunin tɛ, an ka ɲi ka bonya la u kan.

10. Balima minw ma furu, an be se k’a yira cogo di ko an be bonya la u kan?

¹⁰ Balima minw ma furu, an be se k’a yira cogo di ko an b’an janto u dusukunnakow n’u ka koow cogoya la? A ka ɲi an k’a to an hakili la ko u dɔw y’a latigɛ le k’u tɛ furu. U dɔw b’a fɛ ka furu, nka u ma bɛn u diyanye mɔgɔ lo ma fɔlɔ. Dɔ wɛrɛw fana furuɲɔgɔn sara le. A mana kɛ min o min ye, minw furunin tɛ, a bɛnnin tɛ kafodenw k’u ɲininga fɛɛn min kama u furunin tɛ. U man ɲi fana ka furuɲɔgɔn ɲini o balimaw ye. Tiɲɛn lo ko kerecɛn furubali dɔw b’a ɲini tɔɔw fɛ u k’u dɛmɛ ka furuɲɔgɔn sɔrɔ. Nka balima minw ma furu, n’an ye furuɲɔgɔn ɲini u ye k’a sɔrɔ u m’o ɲini an fɛ, o be se ka mun lo kɛ u la? (1 Tes. 4:11; 1 Tim. 5:13). Balima kantigi minw ma furu, an k’a filɛ u dɔw ye min fɔ.

11-12. Minw ma furu, ni an m’an janto, an be se k’olu fari faga cogo di?

¹¹ Kafokulu kɔrɔsibaga dɔ ye cɛgwana ye ani a be se a ka baara la koɲuman. Ale fɛ, nafa caaman b’a la ka to furubali. Nka, a y’a fɔ ko balima dɔw b’ale ɲininga ko: “Mun na i ma muso furu?” A ko o be se k’ale fari faga, hali n’o balimaw b’o kɛ ni ŋaniya ɲuman ye. Balimacɛ dɔ be Betɛli la ani cɛgwana lo. A ko: “Tuma dɔw la, balimaw b’a to n’ b’a miiri ko minw ma furu, olu ye makaritɔw ye. O be se k’a kɛ mɔgɔ b’a miiri ko furubaliya ye gwɛlɛya lo ye ani ko nilifɛn tɛ.”

¹² Balimamuso dɔ be Betɛli la ani musogwana lo. A ko: “Weleweledala dɔw b’a miiri ko minw ma furu, u bɛɛ be furuɲɔgɔnw ɲinina. Wala ko u b’a jati ko jamako bɛɛ ye sababu ye ka furuɲɔgɔn sɔrɔ. Loon dɔ, n’ tagara Betɛli baara dɔ kɛ jamana faan wɛrɛ la. N’ sera loon min na, lajɛn tun be yen o loon sufɛ. N’ jigira balimamuso min fɛ, ale y’a fɔ n’ ye ko balimacɛ fila dɔw be kafo kɔnɔ minw ni ne ye filankuruw ye. A ye n’ hakili sigi ko ale t’a ɲinina ka n’ dɛmɛ ka cɛɛ sɔrɔ. Nka, an setɔ lajɛn na dɔrɔn, a ye n’ sama ka taga o balimacɛw yɔrɔ. O koo ye maloya bila ne ni o balimacɛw la.”

13. Ɲɛyirali jumanw lo ye balimamuso furubali dɔ jija?

¹³ Balimamuso wɛrɛ be Betɛli la ani musogwana lo fana. A ko: “N’ be piyɔniye dɔw lɔn minw furubali tora kabi saan caaman. U be koow kɛ k’a dama kɛɲɛ, u be ni laɲinita tigitigiw ye, u labilanin lo ka tɔɔw dɛmɛ ani u ninsɔn ka di. U be kafo dɛmɛ kosɔbɛ. U b’u ka furubaliya koo jati k’a dama kɛɲɛ. U t’a jati ko u ka fisa ni tɔɔw ye u ka furubaliya kosɔn wala ko fɛɛn dɔ b’u jɛn sabu furuɲɔgɔn wala denbaya t’u fɛ.” Tiɲɛn na, ninsɔndiya lo ka kɛ kafo dɔ kɔnɔ yɔrɔ min na balimaw bɛɛ be ɲɔgɔn bonya ani u b’a jati ko nafa be bɛɛ la. I b’a lɔn ko balimaw t’i jati makaritɔ ye, u tɛ ɲɛbɔ i fɛ, u t’i mafiɲɛya ani u t’a miiri ko i ka fisa n’u ye. I b’a lɔn ko u b’i kanu.

14. Balima minw ma furu, an be se k’a yira cogo di ko an be bonya la u kan?

¹⁴ Minw ma furu, a ka di olu ye an ka bonya la u kan u ka jogo ɲumanw kosɔn. U t’a fɛ an k’u jati makaritɔw ye. Sanni an k’o kɛ, a ka ɲi an ka bonya la u kan u ka kantigiya kosɔn. O la, u tɛna a jati ko an b’a fɔra u ye ko an “mako te olu la.”  (1 Kor. 12:21). Nka, u bena a ye ko an be bonya la u kan ani ko an b’a jati ko nafa b’u la kafo kɔnɔ.

15. Balima dɔw ye yɛlɛmani jumanw lo kɛ walisa ka dɔ fara u ka waajuli baara kan?

¹⁵ Saan tɛmɛninw na, balima caaman y’a latigɛ ka kaan wɛrɛ degi walisa ka dɔ fara u ka waajuli baara kan. Walisa ka se k’o kɛ, u ye yɛlɛmani dɔw kɛ. O balimaw tun be kafo dɔ kɔnɔ yɔrɔ min na u ka kaan be fɔ. Nka, u tagara dɛmɛ don kafo wɛrɛ kɔnɔ, yɔrɔ min na kaan wɛrɛ be fɔ ani weleweledalaw man ca (Kɛw. 16:9). O balimaw yɛrɛ lo y’a latigɛ k’o kɛ walisa ka Jehova bato bɛrɛbɛrɛ. Tiɲɛn lo ko u be se ka saan caaman kɛ ka sɔrɔ ka se o kaan fɔcogo la koɲuman. Nka, u be kafo dɛmɛ cogo caaman na. U ka jogo ɲumanw n’u ka lɔnniya sababu fɛ, u be kafo sabati. O balima minw be ni yɛrɛsaraka miiriya ye, u koo ka gwɛlɛ an ma kosɔbɛ!

16. Diinan mɔgɔkɔrɔw be basigi mun lo kan k’a filɛ ni balimacɛ dɔ be saratiw dafa walisa ka kɛ diinan mɔgɔkɔrɔ wala kɔrɔsigi ciden ye?

¹⁶ Diinan mɔgɔkɔrɔw man ɲi k’a latigɛ ko balimacɛ dɔ tɛ se ka kɛ diinan mɔgɔkɔrɔ wala kɔrɔsigi ciden ye sabu a tɛ kafo ka kaan mɛn ka ɲɛ. U ka ɲi ka basigi Bibulu lo kan k’a filɛ ni balimacɛ dɔ be saratiw dafa walisa ka kɛ diinan mɔgɔkɔrɔ wala kɔrɔsigi ciden ye. O balimacɛ be kafo ka kaan mɛn cogo min na, u man ɲi ka basigi o lo kan.—1 Tim. 3:1-10, 12, 13; Titi 1:5-9.

17. Bangebagaw ka ɲi ka mun lo latigɛ n’u ka denbaya yɛlɛmana jamana wɛrɛ la?

¹⁷ Kerecɛn denbaya dɔw yɛlɛmana jamana wɛrɛ la walisa k’u yɛrɛ kalifa wala ka baara ɲini. O koo ɲɔgɔn na, n’a sɔrɔ u deenw be lakɔli kalan kɛ jamana ka kaan lo la. N’a sɔrɔ bangebagaw fana ka ɲi k’o kaan degi walisa ka baara sɔrɔ. Bangebagaw ka ɲi ka mun lo kɛ n’u ka kaan be fɔ kafo dɔ kɔnɔ yen? O denbayamɔgɔw ka ɲi ka taga kafo juman lo la? U ka kaan be fɔ kafo min kɔnɔ wala jamana ka kaan be fɔ min na?

18. Ka kɛɲɛ ni Galatikaw 6:5 ye, an be se k’a yira cogo di ko an sɔnna sotigi dɔ ka desizɔn ma?

¹⁸ Sotigi lo ka ɲi k’a latigɛ a ka denbaya bena lajɛnw kɛ ni kafo min ye. * Komi ale lo ka ɲi k’o latigɛ, a ka ɲi k’a filɛ min ka fisa a ka denbayamɔgɔw ma (Galatikaw 6:5 kalan). A mana min o min latigɛ, an ka ɲi ka sɔn o ma. An k’a yira ko an sɔnna o desizɔn ma an kɛtɔ k’a ka denbayamɔgɔw bisimila koɲuman ani k’a yira ko an b’u kanu.—Ɔrɔm. 15:7.

19. Sotigi ka ɲi ka miiri koɲuman ani ka delili kɛ mun lo koo la?

 ¹⁹ N’a sɔrɔ denbayamɔgɔ dɔw be kafo min kɔnɔ, bangebagaw ka kaan lo be fɔ yen ani u deenw t’o kaan mɛn ka ɲɛ. O kafo be yɔrɔ min na, ni jamana ka kaan lo be fɔ yen, a be se ka gwɛlɛya denmisɛnw ma ka lajɛnw faamu ani ka ɲɛtaga kɛ Alako ta fan fɛ. Mun na do? Sabu a be se ka kɛ ko denmisɛnw be lakɔli kalan kɛ jamana ka kaan lo la, bangebagaw ka kaan tɛ. O koo ɲɔgɔn na, sotigi ka ɲi ka miiri koɲuman ani ka delili kɛ walisa k’a lɔn a be se k’a deenw dɛmɛ cogo min na u k’u magwɛrɛ Jehova n’a sagokɛlaw la. A be se k’a latigɛ k’a deenw dɛmɛ u k’u ka kaan fɔ ka ɲɛ. Wala a deenw be kaan min mɛn ka ɲɛ, a be se k’a latigɛ ka taga kafo dɔ kɔnɔ, o kaan be fɔ yɔrɔ min na. Sotigi mana desizɔn o desizɔn ta, a y’a latigɛ ka taga kafo min kɔnɔ, o kafomɔgɔw ka ɲi k’a yira ko u b’ale n’a ka denbayamɔgɔw bonya ani ko nafa b’u la.

20. An balima minw be kaan wɛrɛ degira, an be se k’a yira cogo di ko an be bonya la u kan?

²⁰ I ko an y’a ye ka tɛmɛ cogo min na, kafo caaman kɔnɔ, balima dɔw b’u jijara ka kaan wɛrɛ degi. N’a sɔrɔ a ka gwɛlɛ u ma k’u ka miiriyaw fɔ. Nka, u b’o kaan kura fɔ cogo min na, n’an tɛ sinsin o kan, an bena a ye ko u be Jehova kanu ani ko u b’a fɛ k’a sago kɛ. N’an be miiri u ka jogo ɲumanw na, an bena a ye ko nafa b’u la kosɔbɛ ani an bena bonya la u kan. An tɛna a fɔ ko an ‘mako te u la’ sabu u t’an ka kaan fɔ ka ɲɛ.

21-22. Jehova ye nɛɛmaba juman lo kɛ an ye?

²¹ Jehova ye nɛɛmaba kɛ an ye a kɛtɔ ka baara nafaman kalifa an kelen kelen bɛɛ ma kafo kɔnɔ. An ye cɛɛ wala muso ye wo, an furula wala an ma furu wo, an ye mɔgɔkɔrɔba wala denmisɛn ye wo, an be kaan dɔ fɔ ka ɲɛ wala an t’a fɔ ka ɲɛ wo, an koo ka gwɛlɛ Jehova ma. An koo ka gwɛlɛ ɲɔgɔn ma fana.—Ɔrɔm. 12:4, 5; Kɔlɔs. 3:10, 11.

²² Pol ye ɲɛyirali min kofɔ adamaden farikolo koo la, an ye kalan nafaman caaman sɔrɔ o la. An ka to k’o kalanw sira tagama. O bena an dɛmɛ k’a lɔn ko nafa b’an na kafo kɔnɔ ani an bena bonya la kafoden tɔɔw kan fana.