1. Nɛɛma juman lo b’an fɛ?

NƐƐMABA lo an fɛ ka kɛ Jehova ka kafo kɔnɔ! An be Jehova bato hɛɛrɛ ni nisɔndiya la n’an balimaw ye. Ele ka baara ye juman lo ye kafo kɔnɔ?

2. Ciden Pol ye ɲɛyirali juman lo kofɔ a ka bataki caaman kɔnɔ?

² An ka baara ye min ye kafo kɔnɔ, ciden Pol ye ɲɛyirali dɔ ta min b’an dɛmɛ ka koo caaman faamu o koo la. A y’o ɲɛyirali kofɔ a ka bataki caaman kɔnɔ, a y’o minw sɛbɛ hakili senu barika la. O batakiw kɔnɔ, a ye kafo suma ni mɔgɔ farikolo ye. A ye kafoden kelen kelen bɛɛ suma ni farikolo yɔrɔw ye.—Ɔrɔm. 12:4-8; 1 Kor. 12:12-27; Efɛz. 4:16.

3. An bena koo saba jumanw lo lajɛ barokun nin na?

³ Nafa b’an kelen kelen bɛɛ la Jehova ka kafo kɔnɔ. An bɛɛ be se ka kafo sabati. An ye fantan wala waritigi ye wo, an kalanna wala an man kalan wo, an lɔyɔrɔ, an ka delinankow wala an ka siya mana kɛ min o min ye, nafa b’an bɛɛ la kafo kɔnɔ. Barokun nin na, an bena koo jɔnjɔn saba lajɛ minw be sɔrɔ ciden Pol ka ɲɛyirali kɔnɔ. A fɔlɔ, an bena a ye fɛɛn min kama nafa b’an kelen kelen bɛɛ la kafo kɔnɔ. A filanan, an bena a lajɛ an be se ka min kɛ n’a ka gwɛlɛ an ma k’a lɔn an ka baara ye min ye kafo kɔnɔ. A sabanan, an bena a ye fɛɛn min kama an ka ɲi k’an jija ka to k’an ka baara kɛ kafo kɔnɔ.

4. Ɔrɔmukaw 12:4, 5 b’an dɛmɛ ka koo juman lo faamu?

⁴ Pol ye ɲɛyirali min ta, o b’an dɛmɛ ka koo fɔlɔ min faamu, o ye ko nafa b’an kelen kelen bɛɛ la Jehova ka denbaya kɔnɔ. Pol y’o ɲɛyirali daminɛ ten ko: “Yɔrɔ caaman b’an farisogo la, u bɛɛ ka baara te kelen ye fana. O cogo la, an minw lara Krista la, an n’an ka caya bɛɛ, an jɛnna ka kɛ farisogo kelen ye.” (Ɔrɔm. 12:4, 5). O kuma kɔrɔ ko di? O b’a yira ko nafa b’an kelen kelen bɛɛ la hali n’an ka baara tɛ kelen ye kafo kɔnɔ.

5. Jehova ye ‘boɲafɛn’ jumanw lo di an ma kafo kɔnɔ?

⁵ N’a sɔrɔ i b’a miiri ko baara kalifara an ɲɛminɛbagaw dɔrɔn lo ma kafo kɔnɔ (1 Tes. 5:12; Eburuw 13:17). Tiɲɛn lo, Jehova ye “boɲafɛnw” di an ma kafo kɔnɔ Yezu Krista barika la (Efɛz. 4:8). O ‘boɲafɛn’ dɔw ye Koow Ɲɛnabɔla Jɛnkulu mɔgɔw, u dɛmɛbagaw, tɔnbolo ka kɔmite mɔgɔw, kafokulu kɔrɔsibagaw, diinan mɔgɔkɔrɔw, kɔrɔsigi cidenw ani minw be fɔrɔmasɔn di Alako lakɔliw la. Jehova lo y’o balimacɛw sigi hakili senu barika la walisa u k’u janto a ka sagakulu la ani u ka kafo sabati.—1 Piyɛri 5:2, 3.

6. Ka kɛɲɛ ni 1 Tesalonikaw 2:6-8 ka fɔta ye, Jehova ye balimacɛ minw sigi hakili senu barika la, olu ka laɲinita ye mun lo ye?

⁶ Jehova ye balimacɛ minw sigi hakili senu barika la, olu be kunkanbaara caaman dafa. Farikolo yɔrɔw, i n’a fɔ bolow ni seenw be jɛn ka baara kɛ farikolo bɛɛ nafa kosɔn. O cogo kelen na, Jehova ye balimacɛ minw sigi hakili senu barika la, olu be baaraba kɛ kafo kuru bɛɛ nafa lo kosɔn. U t’a ɲini tɔɔw k’u tando. Nka, u ka laɲinita ye k’u balimaw jija ani k’u barika bonya (1 Tesalonikaw 2:6-8 kalan). An be Jehova fo o balima setigiw kosɔn, sabu u be tɔɔw nafa lo ɲini fɔlɔ!

7. Kudayi cidenya baarakɛla caaman be duga jumanw lo sɔrɔ?

⁷ Kafo kɔnɔ, dɔw ye misɔndenw, dan na piyɔniyew wala kudayi piyɔniyew ye. Tiɲɛn na, duniɲa kuru bɛɛ kɔnɔ, balimacɛw ni balimamuso dɔw y’a latigɛ ka waajuli kɛ kudayi kama ani ka mɔgɔw kɛ Krista ka kalandenw ye. O cogo la, u ye mɔgɔ caaman dɛmɛ ka kɛ Yezu Krista ka kalandenw ye. Tuma caaman na, o kudayi cidenya baarakɛlaw tɛ ni fɛɛn bɛrɛ ye, nka Jehova b’u duga yɛrɛ le! (Mariki 10:29, 30). O balimaw koo ka di an ye kosɔbɛ ani an ninsɔn ka di sabu u be n’an ye kafo kɔnɔ!

8. Mun na kibaro diiman weleweledalaw kelen kelen bɛɛ koo ka gwɛlɛ Jehova ma?

⁸ Jehova ye balimacɛ minw sigi kafo kɔnɔ ani balima minw be kudayi cidenya baara la, yala baara kalifara olu dɔrɔn lo ma kafo kɔnɔ wa? Ayi! Kibaro diiman weleweledalaw kelen kelen bɛɛ koo ka gwɛlɛ Jehova ni kafodenw ma (Ɔrɔm. 10:15; 1 Kor. 3:6-9). Kafodenw ka laɲinita jɔnjɔn dɔ ye ka mɔgɔw kɛ an Matigi Yezu Krista ka kalandenw ye (Mat. 28:19, 20; 1 Tim. 2:4). Minw bɛɛ be waajuli kɛ, weleweledala minw batizera wo, minw ma batize wo, u bɛɛ b’u jija k’o baara lo kɛ u ɲɛnako fɔlɔ ye.—Mat. 24:14.

9. Mun na balimamusow koo ka gwɛlɛ an ma?

⁹ Jehova be bonya la balimamusow kan a kɛtɔ ka baara nafaman kalifa u ma kafo kɔnɔ. Furumusow, denbaw, firiyamusow ani musogwana minw be Jehova batora kantigiya la, olu bɛɛ koo ka gwɛlɛ a ma. Muso minw kɛra ɲɛyirali  ɲumanw ye ani u koo diyara Jehova ye, Bibulu be kuma olu caaman koo la. O musow tɔgɔ ɲuman fɔra u ka hakilitigiya, limaniya, kisɛya, jagwɛlɛya n’u ka baara ɲumanw kosɔn ani u tɛgɛ tun labilanin lo (Luka 8:2, 3; Kɛw. 16:14, 15; Ɔrɔm. 16:3, 6; Filip. 4:3; Eburuw 11:11, 31, 35). An be Jehova waleɲuman lɔn kosɔbɛ sabu balimamuso minw b’an ka kafow kɔnɔ, olu fana be n’o jogo ɲumanw ɲɔgɔn ye!

10. Mun na mɔgɔkɔrɔbaw koo ka gwɛlɛ an ma?

¹⁰ An ninsɔn ka di k’a ye ko cɛkɔrɔbaw ni musokɔrɔbaw be n’an ye kafo kɔnɔ. Kafo dɔw kɔnɔ, balima mɔgɔkɔrɔba kantigiw be yen minw ye u ka ɲɛnamaya bɛɛ kɛ Jehova sago kɛli la. Dɔ wɛrɛw ye tiɲɛn lɔn a ma mɛɛn. A mana kɛ min o min ye, bana caaman b’o balima dɔw la kɔrɔya kosɔn. O gwɛlɛyaw b’a to u tɛ se ka caaman kɛ kafo kɔnɔ ani waajuli la. O bɛɛ n’a ta, u b’u seko kɛ waajuli la. U fana b’u seko bɛɛ kɛ ka tɔɔw jija ani ka fɔrɔmasɔn di u ma! Ka fara o kan, an be kalan sɔrɔ u fɛ sabu u be koo caaman lɔn. Tiɲɛn na, u koo ka gwɛlɛ Jehova ani anw ma.—Talenw 16:31.

11-12. Denmisɛn minw b’i ka kafo kɔnɔ, u b’i jija cogo di?

¹¹ An ka kuma denmisɛnw fana koo la. Gwɛlɛya caaman b’u kan sabu u be bonyana Sutana ka duniɲa juguman nin kɔnɔ ani Sutana ka miiriya juguw be yɔrɔ bɛɛ (1 Zan 5:19). O bɛɛ n’a ta, u be lakalitaw kɛ lajɛnw na, u be waajuli kɛ ani u b’u ka lannakow lafasa ni jagwɛlɛya ye. An mana o ye, o b’an jija yɛrɛ le! Tiɲɛn na, denmisɛnw lɔyɔrɔ ka bɔn Jehova ka kafo kɔnɔ!—Zab. 8:3.

¹² Nka, a ka gwɛlɛ an balima dɔw ma ka la a la ko nafa b’u la kafo kɔnɔ. Mun lo bena an dɛmɛ ka la a la ko nafa b’an kelen kelen bɛɛ la kafo kɔnɔ? An k’o lajɛ.

13-14. Mun na dɔw be se k’a miiri ko nafa t’u la kafo kɔnɔ?

¹³ Pol ye ɲɛyirali min ta, an k’a filɛ o  b’an dɛmɛ ka koo filanan min faamu. Mɔgɔ caaman be ni miiriya dɔ ye bi Pol kumana min koo la. O ye ko a ka gwɛlɛ u ma ka la a la ko nafa b’u la kafo kɔnɔ. Pol y’a sɛbɛ ko: “Ni seen tun y’a fɔ ko ale te bolo ye, o la, ko ale te farikolo yɔrɔ dɔ ye, o be se k’a niin bɔ farikoloya la wa? Ni tulo tun y’a fɔ ko ale te ɲaa ye, o la, k’ale te farikolo yɔrɔ dɔ ye, o be se k’a niin bɔ farikoloya la wa?” (1 Kor. 12:15, 16). Pol ka kuma kɔrɔ ko di?

¹⁴ N’i b’i yɛrɛ suma ni tɔɔw ye kafo kɔnɔ, o be se k’a to i b’a daminɛ k’a miiri ko nafa t’i la kafo kɔnɔ. A be se ka kɛ ko kafo kɔnɔ, dɔw ye kalankɛla ɲumanw wala koow labɛnbaga ŋanaw ye, wala u be se ka tɔɔw dusu saalo ani k’u jija kosɔbɛ. N’a sɔrɔ i b’a miiri ko ele tɛ se o koow la i ko olu. O b’a yira ko i majiginin lo ani i b’i seko daan lɔn (Filip. 2:3). Nka, i yɛrɛ kɔrɔsi. Minw be ni setigiya kabakomanw ye, n’i be to k’i yɛrɛ suma n’u ye, i fari bena faga. I ko Pol y’a fɔ cogo min na, i yɛrɛ be se k’a miiri ko nafa foyi t’i la kafo kɔnɔ. Mun lo be se k’i dɛmɛ i k’i yɛrɛ tanga o miiriya ma?

15. Ka kɛɲɛ ni 1 Korɛntikaw 12:4-11 ka fɔta ye, an ka ɲi ka sɔn mun lo ma an ka setigiyaw koo la?

¹⁵ Miiri nin na: Hakili senu barika la, Jehova tun ye setigiya kabakomanw di kerecɛn dɔw ma saan kɛmɛkulu fɔlɔ la. Nka, setigiya kelen lo tun ma di u bɛɛ ma (1 Korɛntikaw 12:4-11 kalan). Jehova tun ye setigiya minw di u ma, u si ta tun tɛ kelen ye, nka nafa tun b’o kerecɛnw kelen kelen bɛɛ la. Bi, Jehova tɛ kabako kɛ ka setigiya di an ma hakili senu barika la. Nka i ko saan kɛmɛkulu fɔlɔ la, hali n’an ka setigiyaw tɛ kelen ye, nafa b’an bɛɛ la Jehova ɲɛɛ kɔrɔ.

16. An ka ɲi ka ciden Pol ka ladili juman lo sira tagama?

¹⁶ An man ɲi k’an yɛrɛ suma ni tɔɔw ye. Sanni an k’o kɛ, an ka ciden Pol ka ladili sira tagama, a ye min di hakili senu barika la. A ko: “Mɔgɔ kelen kelen bɛɛ k’a yɛrɛ sɛgɛsɛgɛ, n’i ye koo dɔ ye n’i be se k’i yɛrɛ boɲa o la, e k’i yɛrɛ boɲa, o ka  kɛ i yɛrɛ ka koo la, mɔgɔ si kan’a ta kɛɲɛ n’a tɔɲɔgɔn ta ye ka sɔrɔ k’a yɛrɛ boɲa.”—Gal. 6:4.

17. N’an be Pol ka ladili sira tagama, o bena an nafa cogo di?

¹⁷ An ka Pol ka ladili sira tagama an kɛtɔ k’an yɛrɛ ka koow sɛgɛsɛgɛ. O la, an bena a ye ko an be ni setigiya dɔw ye tɔɔw tɛ ni minw ye. Ɲɛyirali fɛ, a be se ka kɛ ko diinan mɔgɔkɔrɔ dɔ tɛ se forobakalanw kɛcogo la koɲuman. Nka, n’a sɔrɔ a be se ka mɔgɔw dɛmɛ koɲuman u ka kɛ Krista ka kalandenw ye. Wala a be se ka kɛ ko a tɛ se koow labɛncogo la koɲuman i ko diinan mɔgɔkɔrɔ tɔɔw. Nka, n’a sɔrɔ diinan mɔgɔkɔrɔ ɲuman lo ani a be balimaw kanu. N’a sɔrɔ a ka nɔgɔ balimaw ma fana ka Bibulu ka ladiliw ɲini a fɛ. Wala a be se ka kɛ ko lonanw ladonbaga ɲuman lo (Eburuw 13:2, 16). N’an b’a lɔn an be ni setigiya min ye, an bena a ye ko an be se ka koo dɔ kɛ ka kafo dɛmɛ ani an bena ninsɔn diya o kosɔn. Ka fara o kan, an ni balima minw ka setigiya tɛ kelen ye, an tɛna olu ɲangoya.

18. An be se ka dɔ fara an ka setigiya kan cogo di?

¹⁸ An ka baara mana kɛ min o min ye kafo kɔnɔ, an bɛɛ ka ɲi k’a ɲini ka dɔ fara an ka setigiya kan. An be baara min kɛra Jehova ye, an k’a ɲini k’o fisaya fana. Walisa k’an dɛmɛ o la, Jehova be tɛmɛ a ka ɔriganisasiyɔn fɛ ka fɔrɔmasɔn di an ma. Ɲɛyirali fɛ, kerecɛnw ka ɲɛnamaya n’u ka waajuli baara lajɛn na, an be ladiliw sɔrɔ minw b’an dɛmɛ k’an ka waajuli kɛcogo fisaya. Yala i b’i jija k’o ladiliw sira tagama wa?

19. I be se ka mun lo kɛ walisa ka saratiw dafa janko ka taga Masaya waajulikɛlaw ka lakɔli la?

¹⁹ Masaya waajulikɛlaw ka lakɔli ye fɔrɔmasɔn ɲuman wɛrɛ ye fana. Kudayi cidenya baarakɛla minw sanda be saan 23 ni 65 cɛ, olu lo be se k’o lakɔli kɛ. N’a sɔrɔ i b’a miiri ko i tɛna se k’o lakɔli kɛ abada. Nka koo minw be se k’i bali k’o lakɔli kɛ, sanni i ka miiri o la, a sɛbɛ kuun minw kama i b’a fɛ k’o lakɔli kɛ. O kɔ, a filɛ i ka ɲi ka koo minw kɛ walisa ka saratiw dafa. Jehova ka dɛmɛ ani i ka jijalibaw barika la, i tun b’a miiri ko i tɛ se ka min kɛ abada, n’a sɔrɔ i bena se k’o kɛ.

20. Ɔrɔmukaw 12:6-8 b’an dɛmɛ ka mun lo faamu?

²⁰ Pol ye ɲɛyirali min ta, o b’an dɛmɛ ka koo sabanan min faamu, o be sɔrɔ Ɔrɔmukaw 12:6-8 kɔnɔ. (A kalan.) O yɔrɔ la, Pol y’a yira tugun ko kafodenw ka setigiya tɛ kelen ye. Nka, a sinsinna a kan ko setigiya min b’an fɛ, an ka ɲi ka baara kɛ n’o ye walisa ka kafo sabati.

21-22. An be kalan juman lo sɔrɔ Robert ni Felice ka koow la?

²¹ An ka balimacɛ Robert * ka koo lajɛ. A tun be kudayi cidenya baara kɛra jamana wɛrɛ la. O kɔ, u y’a ci ka taga baara kɛ Betɛli la a ka jamana na. Balimaw y’a hakili sigi ko u m’a ci ka taga yen sabu a ye koo jugu dɔ lo kɛ. O bɛɛ n’a ta, a ko: “N’ dusu kasira kalo caaman kɔnɔ, sabu a tun be n’ ɲɛɛ na ko n’ ma se ka n’ ka cii dafa. Wagati dɔw la yɛrɛ, n’ tun b’a fɛ ka Betɛli baara dabila.” Robert ye ninsɔndiya  sɔrɔ kokura cogo di? A diinan mɔgɔkɔrɔ ɲɔgɔn dɔ y’a fɔ a ye ko an ka baara tɛmɛninw na, Jehova ye fɔrɔmasɔn di an ma. A y’o kɛ walisa an be baara min na sisan, an ka se k’o kɛ ka ɲɛ. Robert y’a faamu ko a man ɲi ka to ka miiri koo tɛmɛninw na, nka a be se ka min kɛ sisan yɛrɛ, a ka ɲi ka to ka miiri o lo la.

²² O gwɛlɛya ɲɔgɔn lo tun be Felice Episcopo kan. Ale n’a muso y’u ka diplomu sɔrɔ Gilead lakɔli la saan 1956. O kɔ, u ye kafokulu kɔrɔsili baara kɛ Bolivi jamana na. Saan 1964, u ye deen sɔrɔ. Felice ko: “A tun ka gwɛlɛ an ma kosɔbɛ k’o baara to yen sabu a tun ka di an ye. Tiɲɛn fɔ ka di, n’ dusu kasira saan kelen bɛɛ kɔnɔ. Nka Jehova ka dɛmɛ barika la, n’ ye n’ miiricogo yɛlɛma ani n’ tora ka sinsin n’ ka kunkanbaara kura kan, o min ye ka kɛ denfa ye.” Yala i be ni Robert ni Felice ka dusukunnakow ɲɔgɔn ye wa? Yala i dusu kasinin lo sabu i be ni kunkanbaara minw ye sisan, u ni fɔlɔ taw tɛ kelen ye wa? N’o lo, i bena ninsɔndiya sɔrɔ n’i y’i miiricogo yɛlɛma. I be se ka min kɛ sisan Jehova ka baara la ani k’i balimaw dɛmɛ, to ka miiri o lo la. Setigiya min b’i fɛ, i jija ka baara kɛ n’o ye ka tɔɔw dɛmɛ. O la, i bena ninsɔndiya sɔrɔ sabu i bena kafo sabati.

23. An ka ɲi ka wagati ta ka mun lo kɛ? An bena mun lo lajɛ barokun nata la?

²³ An kelen kelen bɛɛ koo ka gwɛlɛ Jehova ma ani a b’a fɛ an ka la a la ko an y’a ka denbayamɔgɔ dɔ ye. An be se ka koo minw kɛ walisa k’an balimaw ka limaniya sabati, an ka wagati ta ka miiri o la ani an k’an jija k’o koow kɛ. O la, an tɛna a miiri ko nafa t’an na kafo kɔnɔ. Nka, an be kafoden tɔɔw jati cogo di? An be se k’a yira cogo di ko an b’u kanu ani ko an be bonya la u kan? An bena o koo jɔnjɔnw lo lajɛ barokun nata la.