1. Mun na Jehova ye mɛlɛkɛw ni mɔgɔw dan?

WAGATI dɔ la, Jehova tun b’a kelen. Nka, ɲɛnafin tun t’a la. Fɛɛn foyi tɛ Jehova jɛn. Nka, a tun b’a fɛ mɛlɛkɛw ni mɔgɔw ka ɲɛnamaya diyabɔ. Kanuya lo y’a lasun ka fɛɛnw dan.—Zab. 36:10; 1 Zan 4:19.

2. Yezu ni mɛlɛkɛw ye mun lo miiri Jehova ka danfɛnw koo la?

² Jehova y’a daminɛ k’a Dencɛ Yezu lo dan. O kɔ, a tɛmɛna ale lo fɛ ka ‘fɛɛn bɛɛ dan.’ Ɲɛyirali fɛ, a ye mɛlɛkɛ miliyɔn caaman dan (Kɔlɔs. 1:16). Yezu ninsɔn diyara kosɔbɛ ka baara kɛ n’a Faa ye (Talenw 8:30). Mɛlɛkɛw fana ninsɔn diyara kosɔbɛ. U tun be yen tuma min na Jehova n’a ka Baarakɛla ŋana Yezu ye sankolo ni dugukolo dan. Mɛlɛkɛw ye mun lo kɛ dugukolo dantuma na? U “tun b’a la ka nisɔndiya, ka pɛrɛn.” Siga t’a la, u ninsɔn diyara fana danfɛn tɔɔw bɛɛ koo la, sanko adamadenw dantuma na (Zɔbu 38:7; Talenw 8:31). O danfɛn kelen kelen bɛɛ be Jehova ka kanuya n’a ka hakilitigiya yira.—Zab. 104:24; Ɔrɔm. 1:20.

3. Ka kɛɲɛ ni 1 Korɛntikaw 15:21, 22 ye, mun lo be se ka kɛ Yezu ka kunmabɔsara barika la?

³ Jehova ye dugukolo cɛɲumanin dan ani a b’a fɛ adamadenw ka ɲɛnamaya banbali kɛ a kan. Nka, Adama ni Awa murutira u Faa kanutigi ma. O kama, u bɔnɛna ɲɛnamaya banbali la. U ye saya lase olu n’u bɔnsɔnw  ma (Ɔrɔm. 5:12). Jehova ye mun lo kɛ? A sinna k’a fɔ ale bena adamadenw niin kisi cogo min na (Zɛnɛzi 3:15). Jehova y’a latigɛ ka kunmabɔsara di walisa Adama ni Awa bɔnsɔnw ka se ka hɔɔrɔnya ka bɔ jurumu ni saya la. O la, a ye sababu di adamadenw kelen kelen bɛɛ ma, u k’a latigɛ k’ale bato ani ka ɲɛnamaya banbali sɔrɔ.—Zan 3:16; Ɔrɔm. 6:23; 1 Korɛntikaw 15:21, 22 kalan.

4. An bena ɲiningali jumanw lo jaabi barokun nin na?

⁴ Ala ye layidu ta ko a bena suuw kunu. An b’an yɛrɛ ɲininga koo caaman na o koo la. Ɲɛyirali fɛ, n’a sɔrɔ an b’an yɛrɛ ɲininga ko: Sukununi bena kɛ cogo di? An ka mɔgɔ kanulen minw sara, n’u suu kununa, an bena se k’u lɔn wa? An bena ninsɔndiya jumanw lo sɔrɔ sukununi wagati la? Sukununi jigiya b’an dɛmɛ ka mun lo faamu Jehova ka kanuya, a ka hakilitigiya n’a ka muɲuli koo la? An k’o ɲiningaliw kelen kelen bɛɛ lajɛ.

5. Mun na an be se ka la a la ko mɔgɔw bɛɛ suu tɛna kunu wagati kelen na?

⁵ Jehova bena tɛmɛ a Dencɛ fɛ ka mɔgɔ miliyɔn caaman suu kunu. An be se ka la a la ko o mɔgɔw bɛɛ suu tɛna kunu wagati kelen na. Mun na do? Sabu ni mɔgɔw barila ka caya dugukolo kan, o bena kɛ koo ɲagaminin ye. Jehova do tɛ koo ɲagaminin kɛ abada. A b’a lɔn ko walisa adamadenw ka to hɛɛrɛ la, koow ka ɲi ka kɛ cogo bɛnnin na (1 Kor. 14:33). Jehova ye baara kɛ ni Yezu ye ka dugukolo labɛn dɔɔni dɔɔni walisa adamadenw ka se ka ɲɛnamaya kɛ a kan. O b’a yira ko Jehova Ala ye hakilitigi ye ani a be muɲu. Yezu fana bena muɲu ani ka koow kɛ ni hakilitigiya ye a ka saan waa kelen mara  wagati la. O tuma na, ale ani minw bena kisi Arimagedɔn kɛlɛ la, u bena dugukolo labɛn. O la, mɔgɔ minw suu bena kunu, u bena se ka olu bisimila.

6. Ka kɛɲɛ ni Kɛwaliw 24:15 ye, minw suu bena kunu, mɔgɔ sugu jumanw bena kɛ u cɛma?

⁶ Min yɛrɛ kɔrɔtanin lo kosɔbɛ, o ye ko minw suu bena kunu, olu ka ɲi ka kalan sɔrɔ Ala ka Masaya n’a ka sariyaw koo la. Minw bena kisi Arimagedɔn kɛlɛ la, olu lo bena o mɔgɔw kalan. Mun na u ka ɲi k’u kalan do? Sabu minw suu bena kunu, u fanba ye “mɔgɔ tilenbaliw” lo ye (Kɛwaliw 24:15 kalan). * U ka ɲi ka yɛlɛmani caaman kɛ u ka ɲɛnamaya kɔnɔ walisa ka Krista ka kunmabɔsara nafa sɔrɔ. Miiri k’a filɛ baaraba min ka ɲi ka kɛ walisa ka mɔgɔ miliyɔn caaman kalan u ka Jehova lɔn. Yala an bena o mɔgɔw kalan dan na dan na i ko an be bibulukalanw kɛ cogo min na bi wa? Yala o mɔgɔw bena tilan tilan kafow kɔnɔ walisa u ka fɔrɔmasɔn sɔrɔ janko olu fana ka se ka mɔgɔ wɛrɛw kalan minw suu bena kunu u kɔ wa? An t’o lɔn. Nka an be min lɔn, o ye ko Krista ka saan waa kelen mara laban na, “Masaba lɔnni bena yɔrɔ bɛɛ fa.” (Ezayi 11:9). Saan waa kelen mara wagati la, baara kɛta caaman bena kɛ yen, nka o bena kɛ wagati diiman ye yɛrɛ le!

7. Minw suu bena kunu, mun na Ala ka mɔgɔw bena makari u la u kalantɔ?

⁷ Krista ka saan waa kelen mara wagati la, Jehova sagokɛlaw bɛɛ ka ɲi ka to ka yɛlɛmaniw kɛ walisa k’u koo diya a ye. O la, minw suu bena kunu, Jehova sagokɛlaw bena makari u la n’u b’u dɛmɛna. U bena u dɛmɛ ka see sɔrɔ u ka fiɲɛw kan ani ka koow kɛ ka kɛɲɛ ni Jehova ka sariyaw ye (1 Piyɛri 3:8). Minw suu bena kunu, u bena a ye ko Jehova sagokɛlaw majiginin lo ani ko u be ‘baara kɛra u ka kisili kosɔn.’ U bena a ɲini ka fara u kan ka Jehova bato.—Filip. 2:12.

8. An ka mɔgɔ kanulen minw sara, mun na an be se ka la a la ko n’u suu kununa, an bena u lɔn?

⁸ Dalilu caaman b’a to an lanin b’a la ko an ka mɔgɔ kanulen minw sara, n’u suu kununa, an bena u lɔn. Ɲɛyirali fɛ, Jehova ye mɔgɔw suu kunu cogo min na galen, o b’an dɛmɛ ka koo nin faamu: Jehova bena mɔgɔ minw suu kunu, a bena o kɛ cogo dɔ la walisa u sawura, u kumacogo n’u miiricogo ka kɛ i ko u tun be cogo min na u satuma na. A to i hakili la ko Yezu y’a yira ko saya be i ko sinɔgɔ ani ko sukununi be i n’a fɔ ka kunu ka bɔ sinɔgɔ la (Mat. 9:18, 24; Zan 11:11-13). An do b’a lɔn ko mɔgɔ sawura, a kumacogo n’a ka miiriyaw tun be cogo min na a latuma na, u tɛ yɛlɛma a kunutuma na. An ka Lazari ka koo lajɛ. A fari tun y’a daminɛ ka toli sabu a tun sara a tile naani ye nin ye. Nka tuma min na Yezu y’a suu kunu, a balimamusow sinna k’a lɔn ani siga t’a la, ale fana y’u lɔn.—Zan 11:38-44; 12:1, 2.

9. Minw suu bena kunu, mun na u tɛna sin ka kɛ mɔgɔ dafaninw ye?

⁹ Jehova ye layidu ta ko Krista ka mara wagati la, mɔgɔ si tɛna a fɔ ko: “Ne man kɛnɛ.” (Ezayi 33:24; Ɔrɔm. 6:7). O la, minw bena lakunu, olu bena kɛ kɛnɛya la. Nka, u tɛna sin ka kɛ mɔgɔ dafaninw ye. N’o tɛ, u ka mɔgɔ kanulenw tɛna se k’u lɔn. A be komi adamadenw bɛɛ bena kɛ mɔgɔ dafaninw ye dɔɔni dɔɔni le, Krista ka saan  waa kelen mara wagati la. Sanni o mara ka ban, u bɛɛ bena kɛ mɔgɔ dafaninw ye. O mara bannin kɔ, Krista bena Masaya segi a Faa ma. O y’a sɔrɔ o Masaya y’a ka ciiw bɛɛ dafa.—1 Kor. 15:24-28; Yir. 20:1-3.

10. Sukununi bena mun lo kɛ an na?

¹⁰ Miiri k’a filɛ ko i ka mɔgɔ kanulenw suu kununa ani i be u kunbɛnna. O bena mun lo kɛ i la? Yala i bena yɛlɛ wala ka kasi ninsɔndiya bolo wa? Yala i bena dɔnkili la walisa ka Jehova tando wa? Siga t’a la, an bena an Faa Jehova ani a Dencɛ kanu kosɔbɛ sabu olu lo kɛra sababu ye sukununi kɛra.

11. Ka kɛɲɛ ni Yezu ka kumaw ye Zan 5:28, 29 kɔnɔ, minw be Ala ka sariya tilenninw labato, olu bena duga juman lo sɔrɔ?

¹¹ Minw suu bena kunu, miiri k’a filɛ u ninsɔn bena diya cogo min na tuma min na u bena u jogokɔrɔ dabila ani ka Ala ka sariya tilenninw labato. Minw y’o yɛlɛmaniw kɛ, olu bena ɲɛnamaya banbali kɛ alijɛnɛ kɔnɔ. Nka minw bena muruti Ala ma, a tɛna a to u ka ɲɛnamaya kɛ alijɛnɛ kɔnɔ ani ka tɔɔw ka hɛɛrɛ nagasi.—Ezayi 65:20; Zan 5:28, 29 kalan.

12. Kɔrɔ juman na Jehova bena dugukolo kan mɔgɔw bɛɛ duga?

¹² Ala ka Masaya ka mara wagati la, Ala sagokɛlaw bɛɛ bena Talenw 10:22 ka kumaw tiɲɛntigiya ye. A fɔra yen ko: “Matigi ka duba bɛ mɔgɔ fɛntigiya, tɔɔrɔ si tɛ fara o kan.” (Bible senuma). Ala ka hakili senu barika la, a sagokɛlaw bena fɛntigiya Alako ta fan fɛ. O kɔrɔ ko dɔɔni dɔɔni, u bena to ka koow kɛ i ko Krista ani a laban, u bena kɛ mɔgɔ dafaninw ye (Zan 13:15-17; Efɛz. 4:23, 24). Loon o loon, dɔ bena to ka fara u barika kan ani u sɔɔn bena to ka fisaya. Ɲɛnamaya bena diya yɛrɛ le! (Zɔbu 33:25). N’i be miiri sukununi koo la, o bena i nafa cogo di kabini sisan?

13. Ka kɛɲɛ ni Zaburuw 139:1-4 ka fɔta ye, sukununi b’a yira cogo di ko Jehova b’an lɔn koɲuman?

¹³ I ko an y’a ye cogo min na, mɔgɔ sɔɔn ani a ka miiriya tun be cogo min na a satuma na, Jehova bena a lakunu ten le. Miiri k’a filɛ o kɔrɔ ye min ye. Jehova b’i kanu kosɔbɛ. O kama, a b’a janto i ka miiriyaw, i dusukunnakow, i ka kumaw n’i ka kɛwalew la ani a b’u to a hakili la. O la n’i sara, n’a ko a b’i lakunu, a ka nɔgɔ a ma ka i miiricogo, i sɔɔn ani i ka kokɛcogow segi u nɔɔ na. Masacɛ Dawuda tun b’a lɔn ko Jehova b’a mako don an kelen kelen bɛɛ la kosɔbɛ (Zaburuw 139:1-4 kalan). K’a faamu ko Jehova b’an lɔn koɲuman, o be mun lo kɛ an na?

14. Jehova b’an lɔn koɲuman. N’an be miiri o la, o ka ɲi ka mun lo kɛ an na?

¹⁴ Jehova b’an lɔn koɲuman. N’an be miiri o la, o man ɲi ka siranya bila an na. Mun na do? An kana ɲinɛ ko a b’a janto an na kosɔbɛ. An kelen kelen bɛɛ koo ka gwɛlɛ a ma. Koo o koo ye nɔɔ to an kan, a tɛ ɲinɛ o kɔ. O b’an hakili sigi yɛrɛ le! An man ɲi k’a miiri fewu ko an b’an kelen na. Jehova be ni an ye sanga ni wagati bɛɛ ani a b’a fɛ k’an dɛmɛ.—2 Til. Kib. 16:9.

15. Sukununi be Jehova ka hakilitigiya yira ka gwɛ cogo di?

¹⁵ N’u ye mɔgɔ dɔ bagabaga ko u bena a faga, saya ɲɛsiran be se k’a to o tigi be koo dɔ kɛ a tun tɛ sɔn ka min kɛ.  Sutana kɔmɔgɔw be tɛmɛ o fɛ ka mɔgɔw waajibiya u k’u teriw janfa wala u ka koo bɛnbaliw kɛ. Nka, o bagabagariw tɛ foyi kɛ an Jehova Seerew la. An b’a lɔn ko n’an juguw y’an faga, Jehova bena an lakunu (Yir. 2:10). An b’a lɔn fana k’u tɛ se k’an bali ka Jehova sago kɛ (Ɔrɔm. 8:35-39). Jehova y’a yira ko a ka hakilitigiya ka bon kosɔbɛ a kɛtɔ ka sukununi jigiya di an ma. Komi an be n’o jigiya ye, an tɛ siran hali ni Sutana kɔmɔgɔw y’an bagabaga k’u bena an faga n’an m’u sago kɛ. O jigiya b’an jaa gwɛlɛya kosɔbɛ fana walisa an ka to ka kantigiya kɛ Jehova ye.

16. I ka ɲi k’i yɛrɛ ɲininga mun lo la? O ɲiningaliw jaabiliw bena i dɛmɛ ka mun lo lɔn?

¹⁶ Ni Jehova juguw y’i bagabaga k’u bena i faga, yala i bena la a la ko Jehova bena i lakunu wa? I be se k’a lɔn cogo di ko i lanin b’o la? Ɲɛyirali fɛ, i yɛrɛ ɲininga ko: “N’ be desizɔn den-dennin minw ta loon o loon, yala u b’a yira ko n’ jigi lanin be Jehova kan wa?” (Luka 16:10). Jehova ye layidu ta ko a bena i mako wasa bololafɛnw ta fan fɛ n’i y’a ka Masaya ɲini fɔlɔ. O la, i be se k’i yɛrɛ ɲininga fana ko: “Yala n’ ka ɲɛnamaya kɛcogo b’a yira ko n’ lanin b’o layidu la wa?” (Mat. 6:31-33). N’i y’o ɲiningaliw jaabi ko ɔnhɔn, o b’a yira ko i jigi lanin be Jehova kan ani i labɛnnin bena to gwɛlɛya nataw kama.—Talenw 3:5, 6.

17. a) Sukununi b’a yira cogo di ko Jehova be muɲu? b) An be se k’a yira cogo di ko an be Jehova waleɲuman lɔn a ka muɲuli kosɔn?

¹⁷ Jehova ye wagati dɔ latigɛ ka ban walisa ka daan sigi duniɲa juguman nin na (Mat. 24:36). A tɛna kɔrɔtɔ ka koow kɛ ka kɔn o wagati ɲɛ. A b’a fɛ sɔbɛ la ka mɔgɔ saninw lakunu, nka a muɲunin lo (Zɔbu 14:14, 15). A be wagati latigɛnin lo kɔnɔna k’o kɛ (Zan 5:28). Dalilu barikamanw b’an fɛ ka Jehova waleɲuman lɔn a ka muɲuli kosɔn. Miiri k’a filɛ: Jehova ka muɲuli kosɔn, anw ni mɔgɔ caaman wɛrɛw sera ka “nimisa ka faran [an] ka kojuguw la.” (2 Piyɛri 3:9). Jehova b’a fɛ mɔgɔ caamanba ka ɲɛnamaya banbali sɔrɔ. O la, an k’a yira ko an b’a waleɲuman lɔn a ka muɲuli kosɔn. An be se k’o kɛ cogo di do? An k’an seko bɛɛ kɛ ka mɔgɔw ɲini minw “labɛnnin lo ka sɔn ɲɛnamaya banbali ma.” Ani, an k’u dɛmɛ u ka Jehova kanu ani k’a bato (Kɛw. 13:48, NW ). O la,  i ko anw, olu fana bena nafa sɔrɔ Jehova ka muɲuli la.

18. Mun na an ka ɲi ka muɲu tɔɔw kɔrɔ?

¹⁸ Jehova bena muɲu ka kɔnɔni kɛ fɔɔ saan waa kelen mara laban na walisa an ka kɛ mɔgɔ dafaninw ye. Sanni o cɛ, a labilanin lo ka yafa an ma. O kama, an fana ka ɲi ka tɔɔw ka jogo ɲumanw lo filɛ ani ka muɲu u kɔrɔ. An ka balimamuso dɔ ka koo lajɛ. A cɛɛ y’a daminɛ ka hami kojugu ani ka lajɛntaga dabila. O balimamuso ko: “O tun man nɔgɔ n’ ma hali dɔɔni. An ka ɲɛnamaya kɛcogo barila ka yɛlɛma. An tun b’a fɛ ka koo minw bɛɛ kɛ, an tun tɛ sera k’o kɛ tugun.” O bɛɛ n’a ta, o balimamuso tora k’a cɛɛ kanu ani ka muɲu a kɔrɔ. A y’a jigi la Jehova kan ani a m’a fari faga abada. I ko Jehova, a ma sinsin a cɛɛ ka bana kan, nka a sinsinna a ka jogo ɲumanw lo kan. A ko: “N’ cɛɛ be ni jogo ɲumanw ye ani a be jijaliw kɛra dɔɔni dɔɔni walisa ka kɛnɛya.” An ka denbayamɔgɔw ani kafomɔgɔ minw be jijaliw kɛra walisa ka gwɛlɛyaw muɲu, a kɔrɔtanin lo kosɔbɛ an ka muɲu u kɔrɔ!

19. An ka ɲi k’an jija ka mun lo kɛ?

¹⁹ Tuma min na Ala ye dugukolo dan, Yezu ni mɛlɛkɛw ninsɔn diyara. Dugukolo bena fa adamaden dafaninw na minw be Jehova kanu ani k’a bato. Miiri k’a filɛ o bena Yezu ni mɛlɛkɛw ninsɔn diya cogo min na! Mɔgɔ minw bena taga sankolo la, miiri k’a filɛ olu fana ninsɔn bena diya cogo min na k’a ye k’u ka baara be adamadenw nafara! (Yir. 4:4, 9-11; 5:9, 10). An tɛna kasi dusukasi bolo tugun, nka an ɲɛji bena bɔn ninsɔndiya kojugu lo bolo. Banaw, dusukasi ani saya bena ban pewu. Miiri k’a filɛ ɲɛnamaya bena diya cogo min na! (Yir. 21:4). Sanni o cɛ, i jija ka Jehova ladegi, ale min ye an Faa kanutigi ni hakilitigi ye ani a be muɲu. O la, i ka gwɛlɛyaw mana kɛ min o min ye, i ninsɔn diyanin bena to (Zaki 1:2-4). An be Jehova waleɲuman lɔn kosɔbɛ sabu a ye layidu ta ko “mɔgɔ saninw bena kunu”!—Kɛw. 24:15, NW.