1. Dawuda ye mun lo fɔ Jehova ka majigilenya koo la?

YALA an be se k’a fɔ tiɲɛn na ko Jehova majiginin lo wa? Ɔnhɔn, an be se k’o fɔ. Loon dɔ Dawuda y’a fɔ ko: “Ele Ala le b’i ka sesɔrɔli nigɛkunbɛnnan di ne ma. Ne kɛra mɔgɔbaba ye i ka dɛmɛ [majigilenya, NW ] kosɔn.” (2 Sam. 22:36). Tuma min na Dawuda y’o fɔ, n’a sɔrɔ a tun be miirila koo minw kɛra loon min na kira Samuyɛli nana a facɛ ka soo. A tun nana walisa ka mɔgɔ dɔ mɔ k’a kɛ Israɛl masacɛ ye. Dawuda facɛ tun be ni dencɛ 8 ye ani Dawuda lo tun ye laban ye. Nka, Jehova tun ye ale lo sugandi k’a kɛ masacɛ ye Sayuli nɔɔ na.—1 Sam. 16:1, 10-13.

2. An bena mun lo lajɛ barokun nin na?

² Zaburu sɛbɛbaga dɔ y’a sɛbɛ Jehova koo la ko: “A b’a yɛrɛ majigi ka dugukolo ni sankolo filɛ. A be makaritɔ wili ka bɔ duguma, ka dɛsɛbagatɔ wili . . . k’a sigi yɔrɔ fɔlɔ la a ka jamana ɲamɔgɔw cɛma.” (Zab. 113:6-8). Siga t’a la, Dawuda n’o Zaburu sɛbɛbaga ka miiriya tun ye kelen ye. Barokun nin na, an bena kalan jɔnjɔn dɔw lajɛ fɔlɔ majigilenya koo la, an kɛtɔ k’a filɛ Jehova y’o jogo yira cogo minw na. O kɔ, an bena a filɛ an be se ka kalan minw sɔrɔ masacɛ Sayuli, kira Daniyɛli ani Yezu fɛ majigilenya koo la.

3. Jehova b’an minɛ cogo di ani o be mun lo yira a koo la?

³ Jehova b’a sagokɛla dafabaliw minɛ cogo min na, o b’a yira ko a majiginin lo. A be sɔn an ka batoli ma. Nka o  dɔrɔn tɛ, a b’an jati a teriw ye fana (Talenw 3:32). Jehova y’a latigɛ k’a Dencɛ di k’a kɛ saraka ye an ka jurumuw kosɔn walisa an ka se ka teriya kɛ n’ale ye. A be makari an na yɛrɛ le!

4. Jehova ye mun lo di an ma ani mun na?

⁴ Jehova b’a yira cogo wɛrɛ la ko a majiginin lo. Ale lo ye Danbaga ye minkɛ, a tun be se k’an dan ani a tɛ see di an ma an ka koow latigɛ an yɛrɛ ma. Nka a m’o kɛ. A y’an dan a yɛrɛ jaa la ani ka see di an ma an ka koow latigɛ an yɛrɛ ma. N’u y’an suma ni Jehova ye, an tɛ foyi ye. Nka, a b’a fɛ an k’ale bato n’an dusu bɛɛ ye sabu an b’a kanu ani an b’a lɔn ko nafa b’a la ka mɛnni kɛ ale fɛ (Deter. 10:12; Ezayi 48:17, 18). Jehova majiginin lo yɛrɛ le! An b’a waleɲuman lɔn kosɔbɛ o kosɔn!

5. Jehova b’an kalan cogo di walisa an ka kɛ mɔgɔ majigininw ye? (Jaa lajɛ ɲɛɛ fɔlɔ kan.)

⁵ Jehova b’an minɛ cogo min na, a be tɛmɛ o lo fɛ k’an kalan walisa an ka kɛ mɔgɔ majigininw ye. Jehova ka hakilitigiya ɲɔgɔn tɛ yen. O bɛɛ n’a ta, a be sɔn tɔɔw ta ma. Ɲɛyirali fɛ, a y’a to a Dencɛ y’a dɛmɛ ka fɛɛn bɛɛ dan (Talenw 8:27-30; Kɔlɔs. 1:15, 16). Hali k’a sɔrɔ Jehova ye Sebagayabɛɛtigi ye, a be kunkanbaaraw kalifa tɔɔw ma. Ɲɛyirali fɛ, a ye Yezu sugandi k’a kɛ Masacɛ ye a ka Masaya kun na. A bena kuntigiya dɔ kalifa mɔgɔ 144 000 ma fana walisa u ka mara kɛ ni Yezu ye (Luka 12:32). Jehova ye fɔrɔmasɔn di Yezu ma janko a ka kɛ Masacɛ ani sarakalasebagaw Kuntigiba ye (Eburuw 5:8, 9). A ye fɔrɔmasɔn di Yezu marakɛɲɔgɔnw fana ma. A ma baara kalifa u ma ani ka tila ka to k’o  baara faan bɛɛ kɛcogo kɔrɔsi. Nka, a lanin b’a la ko u bena ale sago kɛ.—Yir. 5:10.

6-7. An sankolola Faa be kunkanbaaraw kalifa tɔɔw ma. An be kalan juman lo sɔrɔ a fɛ o koo la?

⁶ An sankolola Faa be kunkanbaaraw kalifa tɔɔw ma. Ale min mako tɛ mɔgɔ si ka dɛmɛ na, n’ale b’o kɛ, yala an man ɲi k’o ɲɔgɔn kɛ wa? Ɲɛyirali fɛ, yala i ye sotigi wala diinan mɔgɔkɔrɔ ye kafo kɔnɔ wa? N’o lo, Jehova ladegi i kɛtɔ ka baara kalifa mɔgɔ wɛrɛw ma ani i kana a ɲini k’o baara faan bɛɛ kɛcogo kɔrɔsi. N’i be Jehova ladegi, o baara bena kɛ, i bena fɔrɔmasɔn di tɔɔw ma ani i bena u dɛmɛ u ka la u yɛrɛ la (Ezayi 41:10). Kunkanbaara dɔ kalifara minw ma, olu be se ka Jehova ladegi cogo wɛrɛ juman na?

⁷ Bibulu b’a yira ko Jehova b’a mako don mɛlɛkɛw ka miiriyaw la (1 Mas. 22:19-22). Bangebagaw, aw be se ka Jehova ladegi cogo di? Aw be se k’aw deenw ɲininga baara dɔ kɛcogo la. N’u ka fɔta bɛnnin lo, aw k’a kɛ o cogo la.

8. Jehova muɲuna Ibrayima ni Sara kɔrɔ cogo di?

⁸ Jehova b’a ka majigilenya yira fana a ka muɲuli fɛ. Ɲɛyirali fɛ, a be muɲu a sagokɛlaw kɔrɔ n’u b’a yira ni bonya ye ko u ma sɔn a ka desizɔn dɔw ma. Tuma min na Jehova y’a latigɛ ka Sodɔmu ni Gomɔrɛ halaki, Ibrayima y’a yira ko ale fɛ, o bɛnnin tɛ. Nka Jehova y’a lamɛn (Zɛnɛzi 18:22-33). A ye Ibrayima muso Sara minɛ cogo min na fana, i hakili to o la. Jehova y’a daa di ko Sara bena deen wolo hali k’a sɔrɔ a kɔrɔla. Sara yɛlɛla o koo la, nka Jehova ma dimi a kɔrɔ (Zɛnɛzi 18:10-14). A ye Sara minɛ ni bonya ye.

9. Bangebagaw ni diinan mɔgɔkɔrɔw be kalan juman lo sɔrɔ Jehova fɛ?

⁹ Bangebagaw ni diinan mɔgɔkɔrɔw, aw be kalan juman lo sɔrɔ Jehova fɛ? I be mun lo kɛ n’i deen wala kafoden dɔ ma sɔn i ta ma? Yala i be sin k’a fɔ a ye ko tiɲɛn t’a fɛ wa? Wala i b’a ɲini k’a ka miiriya faamu? Ni bangebagaw ni diinan mɔgɔkɔrɔw be Jehova ladegi, o be u ka denbaya ani kafo nafa. An y’a ye an be se ka kalan minw sɔrɔ Jehova fɛ majigilenya koo la. Bibulu kɔnɔ, dɔw y’a yira ko u b’u seko daan lɔn ani dɔw m’o yira. An k’a filɛ sisan an be se ka kalan minw sɔrɔ u fɛ.

10. Jehova be tɛmɛ mɔgɔ wɛrɛw ka ɲɛyirali fɛ cogo di k’an kalan?

¹⁰ Jehova y’an “kalanbaga” ye minkɛ, a y’a to u ye dɔw ka koo lakali Bibulu kɔnɔ walisa k’an kalan (Ezayi 30:20, 21). Mɔgɔ dɔw kofɔra Bibulu kɔnɔ minw y’a yira ko u b’u seko daan lɔn ani ko u be ni jogo wɛrɛw ye minw ka di Ala ye. N’an b’u ka maana kalan ka miiri a kan, an be kalan caaman sɔrɔ u fɛ. Mɔgɔ wɛrɛw y’a yira ko u tɛ n’o jogo ɲumanw ye. N’an y’a lajɛ koo minw y’u sɔrɔ, an be kalan sɔrɔ u ka koo la fana.—Zab. 37:37; 1 Kor. 10:11.

11. Sayuli ka koo b’an dɛmɛ ka mun lo faamu?

¹¹ Miiri masacɛ Sayuli ka koo la. A kanbele tuma, a tun b’a seko daan lɔn. A yɛrɛ tun be sigasiga ka sɔn kunkanbaara dɔw ma (1 Sam. 9:21; 10:20-22). Nka dɔɔni a siginin kɔ masaya la, a kɛra kuncɛba ye ani a ye koo dɔw kɛ a tun man kan ka minw kɛ. Loon dɔ, a ma muɲu ka kira Samuyɛli kɔnɔ. Walisa ka koow kɛ jama nafa kosɔn, Sayuli tun ka ɲi k’a  seko daan lɔn ani k’a jigi la Jehova kan. Nka Sayuli m’o kɛ. A ye saraka jɛnita bɔ k’a sɔrɔ a tun man ɲi k’o kɛ. O kama, Jehova banna a la ani a laban, Sayuli bɔnɛna a ka masaya la (1 Sam. 13:8-14). Koo min ye Sayuli sɔrɔ, n’an b’a ɲini ka kalan sɔrɔ o la ani ka ban ka kuncɛbaya kɛ, o ye hakilitigiyako lo ye.

12. Daniyɛli y’a yira cogo di ko a b’a seko daan lɔn?

¹² Kira Daniyɛli tun tɛ i ko Sayuli. An k’a ka ɲɛyirali ɲuman lajɛ. A sii bɛɛ la, a majiginin tora ani a tun b’a seko daan lɔn. A tun be dɛmɛ ɲini Jehova fɛ tuma bɛɛ. Ɲɛyirali fɛ, tuma min na Jehova y’a dɛmɛ a ye Nebukadnezar ka siko ɲɛfɔ, a m’a fɔ ko ale sera k’o kɛ a yɛrɛ ma. Nka, a y’a yira ni majigilenya ye k’o setigiya bɔra Jehova lo yɔrɔ (Dan. 2:26-28). An be kalan juman lo sɔrɔ o koo la? N’a sɔrɔ a ka di balimaw ye ka an ka forobakalanw lamɛn wala an be sanga sɔrɔla waajuli la. Nka, an ka ɲi k’a to an hakili la ko an be sera k’o kɛ Jehova ka dɛmɛ lo barika la. An ka sɔn a ma ni majigilenya ye ko ni Jehova ka dɛmɛ tɛ, an tɛ se k’o koow kɛ (2 Kor. 4:7). O cogo la, an be Yezu ka ɲɛyirali ɲuman lo ladegira fana. Cogo di do?

13. Ka kɛɲɛ ni Zan 5:19, 30 ka fɔta ye, Yezu y’a yira ko a b’a seko daan lɔn. An be kalan juman lo sɔrɔ a fɛ?

¹³ Yezu ye Jehova Dencɛ dafanin ye. O bɛɛ n’a ta, a y’a jigi la Jehova kan (Zan 5:19, 30 kalan). A m’a ɲini abada ka kuntigiya bɔsi a sankolola Faa la. Bibulu b’a fɔ ko Yezu ma sɔn k’a “yɛrɛ kaɲa ni Ala ye jagboya ra.” (Filip. 2:6, Biblu Ala ta Kuma). Yezu be kolo a Faa ye: A b’a seko daan lɔn ani a b’a Faa ka kuntigiya bonya.

14. Tuma min na u y’a ɲini Yezu fɛ a ka koo dɔ kɛ min t’a ka kɛta ye, a ye mun lo kɛ?

¹⁴ Loon dɔ, Zaki, Zan ani u bamuso y’a ɲini Yezu fɛ ko a ka koo dɔ kɛ u ye min t’a ka kɛta ye. Miiri k’a filɛ Yezu ye min kɛ. A sinna k’a fɔ u ye ko ale sankolola Faa dɔrɔn lo be se k’a latigɛ tigi min bena sigi ale Yezu kinibolo wala a numanbolo fɛ Ala ka Masaya la (Mat. 20:20-23). O cogo la, a y’a yira ko a tɛ sɔn ka koo si kɛ min t’a ka kɛta ye. A tun b’a seko daan lɔn. Jehova ma sira di a ma a ka min kɛ, a tɛ sɔn k’o kɛ (Zan 12:49). An be se ka Yezu ka ɲɛyirali ɲuman ladegi cogo di?

15-16. Ladili min be sɔrɔ 1 Korɛntikaw 4:6 kɔnɔ, an be se k’o sira tagama cogo di?

 ¹⁵ Yezu tun b’a seko daan lɔn. An b’a ladegi an kɛtɔ ka 1 Korɛntikaw 4:6 ka ladili sira tagama. A fɔra yen ko: “Fɛn minnu sɛbɛnna Kitabu la, mɔgɔ kana tɛmɛn olu kan.” (Bible senuma). O la, ni dɔ ye ladili ɲini an fɛ, an man ɲi k’an yɛrɛ ka miiriya fɔ wala ka kuma an kunfɛ. Nka, ladili minw be sɔrɔ Bibulu ani an ka gafew kɔnɔ, an ka ɲi k’olu lo yira a tigi la. O cogo la, an b’a yira ko an b’an seko daan lɔn ani ko Jehova ka ladiliw ɲɔgɔn tɛ yen.—Yir. 15:3, 4.

¹⁶ N’an b’an seko daan lɔn, o be nɔɔrɔ la Jehova kan. Nka o dɔrɔn tɛ, nafa wɛrɛw b’o la. Sisan, an bena a ye ko n’an b’an seko daan lɔn ani n’an majiginin lo, o be se k’a to an be ninsɔndiya sɔrɔ ani ka bɛn ni tɔɔw ye.

17. Minw majiginin lo ani u b’u seko daan lɔn, mun na olu ninsɔn diyanin lo?

¹⁷ N’an majiginin lo ani n’an b’an seko daan lɔn, an ka teli ka ninsɔndiya sɔrɔ. Mun na do? Sabu n’an b’an seko daan lɔn, tɔɔw mana koo o koo kɛ an ye, an b’u waleɲuman lɔn o kosɔn. Miiri kunatɔcɛ tan koo la, Yezu ye minw kɛnɛya. U la kelen dɔrɔn lo segira ka na Yezu fo sabu a y’a kɛnɛya ka bɔ bana jugu bolo. O cɛɛ y’a faamu ko ale yɛrɛ tun tɛ se k’o kɛ abada! O kama, a ye Yezu waleɲuman lɔn ani a ye barika la Ala ye.—Luka 17:11-19.

18. N’an b’an seko daan lɔn ani n’an majiginin lo, o b’an dɛmɛ ka bɛn ni tɔɔw ye cogo di? (Ɔrɔmukaw 12:10)

¹⁸ Minw majiginin lo ani u b’u seko daan lɔn, olu ka teli ka bɛn ni tɔɔw ye kosɔbɛ ani ka teri sɔbɛw sɔrɔ. Mun na  do? Sabu u be sɔn a ma ko tɔɔw be ni jogo ɲumanw ye ani u b’a yira ko u lanin be tɔɔw la. Minw majiginin lo ani u b’u seko daan lɔn, a ka di olu ye k’a ye ko tɔɔw b’u ka kunkanbaaraw dafara ka ɲɛ. U tɛ sigasiga fana k’o tigiw tando ani ka bonya la u kan.—Ɔrɔmukaw 12:10 kalan.

19. Kuun minw kama an man ɲi ka kuncɛbaya kɛ, u la dɔw ye jumanw ye?

¹⁹ Kuncɛbaw tɛ i ko mɔgɔ majigininw. A ka gwɛlɛ kuncɛbaw ma ka tɔɔw tando. U b’a fɛ tɔɔw lo k’olu tando. U ka teli k’u yɛrɛ suma ni tɔɔw ye ani k’a ɲini k’u yɛrɛ fisaya n’u ye. U tɛ fɔrɔmasɔn di tɔɔw ma ani u tɛ baara kalifa u ma. Nka, u ka teli k’a fɔ ko: “N’i b’a fɛ baara dɔ ka kɛ i sago la, fɔɔ i k’a kɛ i yɛrɛ ma.” Kuncɛbaw ka teli ka lɔyɔrɔba ɲini ani ka tɔɔw ɲangoya (Gal. 5:26). O mɔgɔw ka teriya man teli ka taga ɲɛ. N’an y’a kɔrɔsi ko kuncɛbaya b’an na, an ka ɲi k’an kɔnɔ gwɛ ka Jehova deli a k’an dɛmɛ walisa an k’an miiricogo yɛlɛma. O la, o jogo jugu tɛna sigiyɔrɔ sɔrɔ an kɔnɔ.—Ɔrɔm. 12:2.

20. Mun na an ka ɲi k’an yɛrɛ majigi ani k’an seko daan lɔn?

²⁰ An be Jehova Ala waleɲuman lɔn kosɔbɛ a ka ɲɛyirali kosɔn! A b’a sagokɛlaw minɛ cogo min na, o b’a yira ko a majiginin lo. An b’a fɛ k’a ladegi. Minw ye Jehova sago kɛ ni majigilenya ye galen, an b’a fɛ k’olu fana ladegi. Jehova ka kan ni nɔɔrɔ ani bonya min ye, an k’an jija k’o la a kan tuma bɛɛ (Yir. 4:11). N’an y’o kɛ, an bena se ka teriya kɛ ni Jehova ye fɔɔ abada sabu minw majiginin lo ani u b’u seko daan lɔn, olu koo ka di a ye.