1. An bɛɛ be mun lo fɛ an somɔgɔw ye?

BALIMAMUSO dɔ tɔgɔ ko Pauline. * A y’a fɔ ko: “Kabi tuma min na n’ ye tiɲɛn lɔn, n’ tun b’a fɛ n’ somɔgɔw bɛɛ ka kɛ alijɛnɛ kɔnɔ ni n’ ye. N’ tun b’a fɛ kosɔbɛ n’ cɛɛ Wayne ani an dencɛ fitinin ka fara n’ kan ka Jehova bato.” Yala i somɔgɔ * dɔw tɛ Jehova sago kɛra fɔlɔ wa? N’o lo, n’a sɔrɔ ele fana b’a fɛ u ka fara i kan ka Jehova bato.

2. An bena ɲiningali jumanw lo lajɛ barokun nin na?

² An tɛ se k’an somɔgɔw waajibiya u ka sɔn kibaro diiman ma. Nka, an be se k’u dɛmɛ u ka miiri Bibulu ka kumaw na ani u ka sɔn u ma (2 Tim. 3:14, 15). Mun na an ka ɲi k’an somɔgɔw waaju? Mun na an ka ɲi k’a ɲini k’u dusukunnakow faamu? An be se k’an somɔgɔw dɛmɛ cogo di u ka Jehova kanu i ko an b’a kanu cogo min na? An ka kafomɔgɔw bɛɛ be se k’an dɛmɛ cogo di? An bena o ɲiningaliw lo lajɛ barokun nin na.

3. Ka kɛɲɛ ni 2 Piyɛri 3:9 ye, mun na an ka ɲi k’an somɔgɔw waaju?

³ Yanni dɔɔni, Jehova bena duniɲa juguman nin halaki. ‘Minw bɛɛ labɛnnin lo ka sɔn ɲɛnamaya banbali ma,’ olu dɔrɔn lo bena kisi (Kɛw. 13:48, NW ). An tɛ mɔgɔ minw lɔn, an be wagati caaman ta ani an be jijalibaw kɛ k’u waaju an sigidaw la. A bɛnnin lo an k’an somɔgɔw fana waaju walisa u ka fara an kan ka Jehova bato. An Faa kanutigi Jehova “t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.”—2 Piyɛri 3:9 kalan.

4. N’a sɔrɔ an tɛ mun lo kɛ n’an b’an somɔgɔw waajura?

 ⁴ An be kibaro diiman min fɔ mɔgɔw ye, o lo sababu fɛ u be se ka kisi. Nka, an k’a to an hakili la k’o kibaro diiman fɔcogo dɔw ka ɲi ani dɔw man ɲi. An tɛ minw lɔn n’an b’olu waajura, an ka teli k’an kumacogo kɔrɔsi. Nka, n’a sɔrɔ an t’o kɛ n’an b’an somɔgɔw waajura.

5. An ka ɲi ka mun lo to an hakili la n’an be kibaro diiman fɔra an somɔgɔw ye?

⁵ Siɲɛ fɔlɔ min na an y’an somɔgɔw waaju, n’an miirila o la, n’a sɔrɔ an caaman b’a fɔ ko n’an tun y’a lɔn, an tun bena o kɛ cogo wɛrɛ la. Ciden Pol ye kerecɛnw ladi ko: “Aw k’aw ka kuma fɔcogo ɲa tuma bɛɛ, a ka diya bɛɛ ye, waasa aw ka se ka mɔgɔ bɛɛ jaabi ka ɲa.” (Kɔlɔs. 4:5, 6). A ka ɲi an k’an hakili to o ladili la n’an be kumana n’an somɔgɔw ye. N’o tɛ, sanni an k’u dɛmɛ u k’an lamɛn, an bena u kɔnɔ gwan le.

6-7. Kerecɛn min furuɲɔgɔn tɛ Jehova Seere ye, ɲɛyirali dɔ fɔ min b’a yira ko a kɔrɔtanin lo a k’a janto a furuɲɔgɔn dusukunnakow la.

⁶ A ɲini k’u dusukunnakow faamu. Pauline min kofɔra ka tɛmɛ, ale ko: “A daminɛ na, n’ tun b’a fɛ ka baro kɛ ni n’ cɛɛ ye Alakow dɔrɔn lo la. An tun tɛ baro kɛ koo wɛrɛw kan.” Nka, Pauline cɛɛ tun tɛ bɛrɛ lɔn Bibulu koo la ani a tun t’a muso ka kumaw faamu. Ale fɛ, a kɛra komi Pauline tun be miiri a ka diinan dɔrɔn lo la. A tun be siranna ko a muso donna diinan jugu dɔ lo la ani k’u b’a lafilila.

⁷ Pauline ko tuma dɔ la, a tun be to ka wagati caaman kɛ sufɛ ani wikɛniw na ni balimaw ye lajɛnw ni waajuli la. A tun be  taga bɔ u ye fana. A ko: “Tuma dɔw la, Wayne tun tɛ na mɔgɔ si sɔrɔ soo. O kama, ɲɛnafin tun b’a la.” A be faamu ko Wayne muso n’a dencɛ ɲɛnafin tun b’a minɛ. U tun be ni mɔgɔ minw ye, a tun t’olu lɔn. A tun b’a ɲɛɛ na fana ko a muso teri kuraw koo ka di a ye ka tɛmɛ ale kan. Wayne y’a muso bagabaga ko ale bena u ka furu sa. Ele fɛ, Pauline tun be se k’a yira cogo jumanw na ko a b’a cɛɛ dusukunnakow faamu?

8. Ka kɛɲɛ ni 1 Piyɛri 3:1, 2 ye, mun lo ka teli ka nɔɔba to an somɔgɔw kan?

⁸ Kɛ ni tagamacogo ɲuman ye. An ka kɛwalew ka teli ka nɔɔba to an somɔgɔw kan ka tɛmɛ an ka kumaw kan (1 Piyɛri 3:1, 2 kalan). Pauline labanna k’o lo faamu. A ko: “N’ tun b’a lɔn ko an koo ka di Wayne ye ani ko a tun t’a fɛ k’an ka furu sa sɔbɛ la. Nka, a ka bagabagari kumaw ye n’ dɛmɛ k’a faamu ko n’ ka ɲi ka Jehova ka ladiliw sira tagama furu koo la. Sanni n’ ka kuma caaman, n’ ka ɲi ka kɛ ɲɛyirali ɲuman ye n’ ka kɛwalew fɛ.” Pauline tun tɛ Wayne waajibiya tugun u ka baro kɛ Bibulu koo la. A y’a daminɛ ka baro kɛ n’a cɛɛ ye koo wɛrɛw kan. Wayne y’a ye ko a muso tun b’a bonya ka tɛmɛ fɔlɔ kan ani ko u dencɛ sɔɔn fisayara (Talenw 31:18, 27, 28). A y’a ye ko Bibulu ka kalanw tun be nɔɔ ɲuman tora a somɔgɔw kan. O kama, a y’a daminɛ ka miiri o kalanw na ani ka sɔn u ma.—1 Kor. 7:12-14, 16.

9. Mun na an ka ɲi ka to k’an somɔgɔw dɛmɛ?

⁹ To k’a ɲini k’i somɔgɔw dɛmɛ. Jehova ye ɲɛyirali ɲuman ye an fɛ. A “tora” ka sababu di mɔgɔw ma u ka sɔn kibaro  diiman na walisa u ka kisi (Zer. 44:4). Ciden Pol fana y’a fɔ Timote ye ko a k’a jija ka tɔɔw dɛmɛ. Mun na do? Sabu n’a y’o kɛ, a bena a yɛrɛ kisi ani k’a lamɛnbagaw fana kisi (1 Tim. 4:16). An somɔgɔw koo ka di an ye. O kama, an b’a fɛ u ka Bibulu ka tiɲɛnkalanw lɔn. Pauline ka kumaw n’a ka kɛwalew labanna ka nɔɔ ɲuman to a somɔgɔw kan. Sisan, a ninsɔn ka di sabu a cɛɛ be Jehova batora n’a ye. U fila bɛɛ ye piyɔniyew ye ani Wayne ye diinan mɔgɔkɔrɔ ye.

10. Mun na an ka ɲi ka muɲu?

¹⁰ I ka muɲu. Tuma min na an y’a latigɛ ka mɛnni kɛ Ala fɛ, an y’an ka ɲɛnamaya kɛcogo n’an ka lannakow yɛlɛma. A be se ka gwɛlɛya an somɔgɔw ma ka sɔn o yɛlɛmaniw ma. U ka teli ka fɛɛn fɔlɔ min kɔrɔsi, o ye ko an tɛ fɛtiw kɛ n’u ye tugun ani ko an t’an seen don politikikow la. A daminɛ na, an somɔgɔ dɔw be se ka dimi an kɔrɔ o kosɔn (Mat. 10:35, 36). Nka, an kana a miiri ko u tɛna yɛlɛma abada. N’an t’an jija tugun k’u dɛmɛ u k’an ka lannakow faamu, a kɛra komi an b’a jati ko u man kan ni ɲɛnamaya banbali ye. Jehova do ma kitiko kalifa an ma. A y’o kalifa Yezu lo ma (Zan 5:22). N’an be muɲu an somɔgɔw kɔrɔ, a laban, u bena sɔn k’an lamɛn. Koorilen nin lajɛ: “ Tɛmɛ an ka site web fɛ ka mɔgɔw kalan.”

11-13. Alice y’a bangebagaw minɛ cogo min na, i be kalan juman lo sɔrɔ o la?

¹¹ Lɔ kelen kan, nka koow kɛ nɛmɛnɛmɛ (Talenw 15:2). An ka Alice ka koo lajɛ. A bangebagaw tun lanin tɛ Ala la ani u tun jijanin lo politikikow la. Alice ye Jehova lɔn tuma min na, o y’a sɔrɔ a tun be jamana wɛrɛ la. A y’a faamu ko a tun be koo ɲuman minw kalanna, a tun ka ɲi k’o fɔ a bangebagaw ye joona joona. A ko: “N’i ye kɔnɔni kɛ ka sɔrɔ k’i ka lannako kuraw n’i ka kokɛcogo kuraw ɲɛfɔ u ye, u dusu bena tiɲɛ kojugu.” A ye barokun dɔw sugandi minw be se ka diya a bangebagaw ye. O barokun dɔ ɲɛsinna kanuya ma. O kɔ, a ye lɛtɛrɛw sɛbɛ u ma k’a fɔ u ye Bibulu be min fɔ o barokunw koo la. A y’u ɲininga u be min miiri o koo la (1 Kor. 13:1-13). A y’u fo sabu u y’a lamɔ ani k’u janto a la. A ye kadow ci u ma fana. Tuma min na a tagara bɔ u ye, a y’a seko bɛɛ kɛ k’a bamuso dɛmɛ sokɔnɔ baaraw la. Alice bangebagaw dusu tiɲɛna tuma min na a y’a ka lannako kuraw kofɔ u ye.

¹² Ka Alice to n’a bangebagaw ye, a bele tora ka Bibulu kalan loon o loon. A ko: “O ye n’ bamuso dɛmɛ k’a faamu ko Bibulu koo ka gwɛlɛ n’ ma kosɔbɛ.” O wagati la, Alice facɛ y’a latigɛ ka Bibulu kalan walisa k’a faamu fɛɛn min kama a denmuso yɛlɛmana. A tun b’a fɛ fana ka fiɲɛ dɔw sɔrɔ Bibulu kɔnɔ. Alice ko: “N’ ye Bibulu di a ma ani fɛɛn minw be se k’a dusukun sɔrɔ, n’ y’o dɔ sɛbɛ k’a don a kɔnɔ.” Mun lo sɔrɔla o la do? Alice facɛ ma fiɲɛ sɔrɔ Bibulu kɔnɔ. Nka, a ye min kalan Ala ka Kuma kɔnɔ, o y’a dusukun sɔrɔ kosɔbɛ.

¹³ An ka ɲi ka lɔ kelen kan ani ka koow kɛ nɛmɛnɛmɛ, hali ni gwɛlɛya b’an kan (1 Kor. 4:12b). Ɲɛyirali fɛ, Alice bamuso y’a kɛlɛ a ka lannakow kosɔn. Alice ko: “Tuma min na n’ batizera, n’ bamuso ko n’ ye ‘deen kolon’ ye.” Alice ye koow ta cogo di? A ko: “N’ ma siran ka kuma n’ ka diinan kura koo la. N’ y’a ɲɛfɔ a ye ni bonya ye ko n’ y’a latigɛ ka kɛ Jehova Seere ye ani ko n’ tɛna n’ ka desizɔn yɛlɛma. N’ ye n’ jija ka n’ bamuso  hakili sigi ko a koo ka di n’ ye kosɔbɛ. An fila bɛɛ kasira ani n’ ye dumuni diiman dɔ tobi a ye. Kabi o tuma, n’ bamuso y’a daminɛ k’a faamu ko Bibulu be nɔɔ ɲuman tora n’ kan.”

14. An ye desizɔn min ta ka Jehova bato, mun na an man ɲi k’a to abada an somɔgɔw k’an lasun k’o yɛlɛma?

¹⁴ N’a sɔrɔ an somɔgɔw bena wagati caaman ta ka sɔrɔ k’a faamu bɛrɛbɛrɛ ko a kɔrɔtanin lo kosɔbɛ an fɛ ka Jehova bato. Ɲɛyirali fɛ, Alice bangebagaw tun b’a fɛ a ka baara tigitigi dɔ kɛ. Tuma min na a y’a latigɛ ka kɛ piyɔniye ye, a bamuso kasira tugun. Nka, Alice lɔra kelen kan. A ko: “N’i y’i ka desizɔn yɛlɛma koo dɔ la i somɔgɔw kosɔn, siga t’a la, u bena o ɲini i fɛ koo wɛrɛw la. Nka, n’i be lɔ kelen kan ani n’i b’u minɛ ni ɲumanya ye, n’a sɔrɔ i somɔgɔ dɔw bena sɔn k’i lamɛn.” Alice ka koo b’o lo yira. A bangebaga fila bɛɛ ye piyɔniyew ye sisan ani a facɛ ye diinan mɔgɔkɔrɔ ye.

15. Ka kɛɲɛ ni Matiyo 5:14-16 ani 1 Piyɛri 2:12 ye, tɔɔw ka “kɛwaliɲumanw” be se k’an somɔgɔw dɛmɛ cogo di?

¹⁵ Jehova be tɛmɛ a sagokɛlaw ka “kɛwaliɲumanw” fɛ ka mɔgɔw dɛmɛ u k’u magwɛrɛ ale la (Matiyo 5:14-16; 1 Piyɛri 2:12 kalan). N’i furuɲɔgɔn tɛ Jehova Seere ye, yala a b’i ka kafomɔgɔw lɔn wa? Pauline min kofɔra ka tɛmɛ, ale ye balimaw weele ka na u ka soo walisa a cɛɛ Wayne ka se k’u lɔn. Wayne hakili b’a la balimacɛ dɔ y’ale dɛmɛ cogo min na k’a faamu Jehova Seerew ye mɔgɔ sifa minw ye tigitigi. Wayne ko: “A ye tile  kelen kɔnze ta a ka baarakɛyɔrɔ la walisa an ka spɔr dɔ filɛ ɲɔgɔn fɛ telewisɔn na. N’ y’a ye ko a tɛ miiri a ka diinankow dɔrɔn lo la!”

16. Mun na an ka ɲi k’an somɔgɔw weele u ka na kafo ka lajɛnw na?

¹⁶ An be se k’an somɔgɔw dɛmɛ cogo ɲuman minw na, u dɔ ye k’u weele ka na kafo ka lajɛn dɔ la n’an ye (1 Kor. 14:24, 25). Siɲɛ fɔlɔ min na Wayne nana lajɛn na, o tun ye Hakilijigi lajɛn lo ye. Mun na do? Sabu o lajɛn be kɛ baara jiginin kɔ ani a tɛ mɛɛn. A ko: “N’ ma kalan faamu ka ɲɛ, nka n’ hakili tora mɔgɔw lo la. U ye n’ bisimila ani u ye n’ fo ni dusudiya ye. Tiɲɛn na, mɔgɔ ɲumanw lo.” Balimacɛ dɔ n’a muso tun be Pauline minɛ ni ɲumanya ye kosɔbɛ u kɛtɔ k’u janto a dencɛ la lajɛnw na ani waajuli la. O kama, tuma min na Wayne y’a latigɛ k’a muso ka lannako kuraw faamu, a y’a ɲini o balimacɛ lo fɛ a ka bibulukalan kɛ n’ale ye.

17. An man ɲi k’an yɛrɛ jalaki mun lo kosɔn? Nka, mun na an man ɲi k’a miiri abada ko an somɔgɔw tɛna yɛlɛma?

¹⁷ An jigi b’a la ko an somɔgɔw bɛɛ bena fara an kan ka Jehova bato. N’a sɔrɔ an be jijaliw kɛra k’an somɔgɔw dɛmɛ u ka kɛ Jehova sagokɛlaw ye. O jijaliw bɛɛ n’a ta, n’a sɔrɔ u tɛna sɔn ka na tiɲɛn sira kan. N’o lo, an man ɲi k’an yɛrɛ jalaki u ka desizɔn kosɔn. An tɛ se ka mɔgɔ waajibiya a ka sɔn an ka lannakow la. Nka, n’i somɔgɔw y’a ye ko i ninsɔn ka di kosɔbɛ sabu i be Jehova sago kɛra, o be se ka nɔɔba to u kan. O kama, delili kɛ u ye, kuma u fɛ nɛmɛnɛmɛ ani to k’a ɲini k’u dɛmɛ! (Kɛw. 20:20). I ka la a la ko i be jijali minw kɛra, Jehova bena i duga o kosɔn. Ka fara o kan, n’i somɔgɔw y’a latigɛ k’i lamɛn, u bena kisi!